Read bariba Misee 2 Bible Online

Misee 2 - bariba bible

Misee 2

¹Bɔ̃rurobɑ be bɑ rɑ n kɔ̃sɑ bwisikumɔ wɔ̃kuru mi bɑ kpĩ. Bɑ̀ n seewɑ buru buru kpɑ bu ye ko yèn sɔ̃ bɑ yen dɑm mɔ.

²Bɑ̀ n ɡoon ɡberu binɛ kuɑ, kpɑ bu tu mwɑ. Bɑ̀ n ɡoon diru binɛ kuɑ, kpɑ bu tu mwɑ. Bɑ rɑ yɛ̃ro kɑ win yɛnuɡibu dɑm dɔrewɑ kpɑ bu du bu ben dukiɑ kpuro ɡurɑ.

³Yen sɔ̃nɑ Yinni Gusunɔ u nɛɛ, wee nɑ kɔ̃sɑn sɔɔru mɔ̀ tɔn ben sɔ̃. Bɑ ǹ mɑɑ kpɛ̃ bu ye dukɑ suuri. Mɛyɑ bɑ ǹ mɑɑ kpɛ̃ bu sĩ bɑ n wĩiru yɔ̃rɑsie dɑm dɑm. Domi tɔ̃ɔ te tɑ wee mi, tɔ̃ɔ kɔ̃surɑ.

⁴Yen tɔ̃ɔ te, bɑ koo ɡɔɔ wurɑ yeni ko bu nɛɛ, wee! Bɑ bu ɡurɑ kpuro mɑm mɑm. Ben tɔmbu bɑ ǹ mɑɑ tem mɔ. Bɑ bu ɡirɑ ben ɡbeɑn di. Bɑ ye bɔnu kuɑ ben tii tiinɛ sɔɔ. Mbɑn sɔ̃nɑ bɑ bu ɡurɑ nɡe mɛ.

⁵Adɑmɑ sɑɑ ɡɑɑ sisi yè sɔɔ ben ɡoo kun mɑɑ tem wɑsi Yinni Gusunɔn tɔmbu bɑ̀ n tem bɔnu mɔ̀.

⁶Ben ɡɑbɑ bɑ seewɑ bɑ Misee sɔ̃ɔwɑ bɑ nɛɛ, ɑ ku mɑɑ ɡɑri suni ɑ n mɔ̀, kɔ̃sɑ ye, yɑ weewɑ kɑm kɑm.

⁷Bɑ Isirelibɑn bweseru bɔ̃rusiwɑ? Yinni Gusunɔ u suuru kpɑnɑwɑ? Nɡe mɛyɑ u rɑ rɑɑ sun kue? Adɑmɑ Misee bu wisɑ u nɛɛ, ɡɑri doriyɑ nɑ ɡerumɔ be bɑ kom ɡem mɔ̀n sɔ̃.

⁸Adɑmɑ bɛɛyɑ Yinni Gusunɔ u sɔ̃ɔmɔ u mɔ̀, i kuɑ win tɔmbun yibɛrɛbɑ. I tɔmbu sɛ̃re be bɑ wee tɑbu ɡberun di i ben yɑ̃nu potirɑ.

⁹I ben kurɔbu ɡirɑ sɑɑ yɛnu si bɑ kĩn min di, mɑ i derɑ ben bibɑ kun mɑɑ ɡirimɑ wɑsi sere kɑ bɑɑdommɑɔ yè nɑ rɑɑ bu wɛ̃.

¹⁰I seewo i doonɑ, i ǹ mɑɑ bɔri yɛndu wɑsi tem mɛ sɔɔ. Wɑhɑlɑ bɑkɑ yɑ bɛɛ mɑrɑ bɛɛn mɛm nɔɔbu sɑrirun sɔ̃.

¹¹Domi Gusunɔn sɔmɔ benin bweserɑ i rɑ kɑ̃ be bɑ rɑ bɛɛ weesu kue bu nɛɛ, i ko i tɑm wɑ i nɔ, yen tɑm bɔɔbɔm mɑm.

¹²Yinni Gusunɔ u nɛɛ, bɛɛ Isirelibɑ, Yɑkɔbun bweseru, kon bɛɛ be i tie kpuro mɛnnɑ. Kon bɛɛ mɛnnɑ nɡe yɑ̃ɑnu ɡɔ̃ɔ teu sɔɔ. Kpɑ i n wɑ̃ɑ sɑnnu nɡe yɑ̃ɑnu kpɑrɑ yerɔ. Bɛɛn tem mu koo tɔmbu yibu.

¹³Nɛ, Yinni Gusunɔ bɛɛn sinɑ boko, nɛnɑ nɑ bɛɛ kpɑre. Kon nɑ n bɛɛ swɑɑ ɡbiiye. Nɛnɑ kon bɛɛ swɑɑ kɛniɑ i kɑ yɑkiɑrɑ. I ko i swɑɑ ɡĩɑ kpɑ i yɑri min di.