Read bariba Misee 5 Bible Online

Misee 5 - bariba bible

Misee 5

¹Yinni Gusunɔ u nɛɛ, wunɛ Bɛtelehɛmu, Efɑrɑtɑɡibun wuu, wunɑ ɑ piiburu bo Yudɑn wusu sɔɔ. Adɑmɑ wunɛn min diyɑ kpɑro koo yɑri wi u koo nɛn tɔmbu Isirelibɑ kpɑrɑ. U wɑ̃ɑwɑ sɑɑ yee yellun di.

²Adɑmɑ ko nɑ n ɡinɑ nɛn tɔn be deriwɑ ben yibɛrɛbɑn nɔmɑ sɔɔ sere kurɔ wì u koo kpɑro wi mɑ, u kɑ mɑ. Be bɑ kpikiru dɑ, bɑ koo ɡɔsirɑmɑ bu Isireli be bɑ tie deemɑ.

³Kpɑ kpɑro wi nɑ bɛɛ nɔɔ mwɛɛru kuɑ mi, u bɛɛ nɛn tɔmbu mɛnnɑ u kpɑrɑ mɑm mɑm kɑ nɛ, Yinni Gusunɔn dɑm kɑ nɛn yiiko. Win tɔmbu bɑ ko n wɑ̃ɑ bɔri yɛndu sɔɔ. Kpɑ u yĩsiru yɑri hɑnduniɑn ɡoonu nnɛ ye sɔɔ.

⁴Wiyɑ u koo kɑ bɔri yɛndu nɑ. Asiriɡibu bɑ̀ n nɑ, bɑ bɛsɛn tem wɔri bɑ duɑ sere bɛsɛn sinɑ kpɑɑrɔ, sɑ ko bɛsɛn kpɑro be bɑ dɑm bo seeyɑ bu bu wɔri.

⁵Ben tɑbu yɑ̃nun sɔ̃, bɑ koo Asiriɡibu kɑ Nimuroduɡii be tɑɑre, kpɑ bu sun wɔrɑ Asiriɡibu bɑ̀ n bɛsɛn tem wɔrimɑ.

⁶Isireli be bɑ tiɑrɑ bɑ ko n wɑ̃ɑ tɔn dɑbinun suunu sɔɔ nɡe kɑko ɑrufɑɑniɡiru te Yinni Gusunɔ u derɑ tɑ wɔrumɑ, ǹ kun mɛ nɡe ɡurɑ ye yɑ nɛmɔ tɛɛru, yɑ ǹ ɡɑ̃ɑnu yĩiyɔ tɔnun min di.

⁷Isireli be bɑ tiɑrɑ bɑ ko n wɑ̃ɑ tɔmbun suunu sɔɔ, kpɑ bɑ n dɑm mɔ nɡe ɡbee sunɔ ɡe ɡɑ wɑ̃ɑ ɡbeeku yɛɛn suunu sɔɔ, ǹ kun mɛ yɑ̃ɑ ɡɔ̃ɔ sɔɔ. Mi ɡɑ duɑ kpuro, ɡɑ rɑ yɑɑ kɑsukuwɑ ɡu mwɛ. Goo kun mɑɑ kpɛ̃ u ɡu mwɑɑri.

⁸Isirelibɑ, i seewo i bɛɛn yibɛrɛbɑ wɔri. Kpɑ i bu ɡo mɑm mɑm.

⁹Yinni Gusunɔ u nɛɛ, tɔ̃ru ɡɑrɑ sisi tè sɔɔ kon bɛɛn dumi kɑ bɛɛn tɑbu kɛkɛbɑ kpeerɑsiɑ.

¹⁰Kpɑ n bɛɛn wusu kɑm koosiɑ. Kpɑ n bɛɛn ɡbɑ̃rɑnu suriri.

¹¹Kon bɛɛn dobo doboɡibu ɡo. I ǹ mɑɑ ben dobo dobo wɑsi bɛɛn suunu sɔɔ.

¹²Kon bwɑ̃ɑrokunu kɑ kpee ni i ɡirɑ kɔsuku. I ǹ mɑɑ nu sɑ̃ɑmɔ.

¹³Kon bũu wi bɑ mɔ̀ Asitɑɑten sɑ̃ɑ yerun dɑ̃nu wukiri. Kpɑ n bɛɛn wusu kɔsuku.

¹⁴Nɛn mɔru koo se, kpɑ n nɛn dɑm sɔ̃ɔsi bwese ni nu ǹ mɑn mɛm nɔɔwɑmmɛn mi.