Read bariba Misee 6 Bible Online

Misee 6 - bariba bible

Misee 6

¹I swɑɑ dɑkio ye nɛ, Yinni Gusunɔ nɑ ɡeruɑ. Nɑ nɛɛ, Isirelibɑ, i seewo i kɑ tii yinɑ ɡuunu kɑ ɡunɡunun wuswɑɑɔ.

²Bɛɛ ɡuunu, i swɑɑ dɑkio. Bɛɛ tem kpɛɛkpɛɛku dɑmɡinu, nɛ, Yinni Gusunɔ nɑ nɛn tɔmbu tɑɑrɛ wɛ̃ɛmɔ. Nɑ kĩ n bu siribu soku.

³Bɛɛ Isirelibɑ, bɛɛ nɛn tɔmbu, kɔ̃sɑ mbɑ nɑ bɛɛ kuɑ. Mɑ sɔɔrɑ nɑ derɑ i wɑsirɑ. I mɑn wisio.

⁴I mɑn tɑɑrɛ wɛ̃ɛmɔ yèn sɔ̃ nɑ bɛɛ Isirelibɑ yɑrɑ sɑɑ Eɡibitin di? Ǹ kun mɛ yèn sɔ̃ nɑ bɛɛ yɑrɑ sɑɑ yorun di? Ǹ kun mɛ yèn sɔ̃ nɑ bɛɛ kpɑro beni ɡɔriɑmɑ, Mɔwisi kɑ Aroni kɑ Mɑriɑmu?

⁵Bɛɛ nɛn tɔmbu, i yɑɑyo kɔ̃sɑ ye Bɑlɑki Mɔɑbun sinɑ boko u bwisikɑ u bɛɛ kuɑ. I mɑɑ yɑɑyo ye Bɑlɑmu Beorin bii u nùn wisɑ. Nɑ bɛɛ yɔ̃siri bɛɛn sɑnum sɔɔ sɑɑ Sitimun di sere Giliɡɑliɔ. Mɑ i nɛn durom wɑ mɛ nɛ, Yinni Gusunɔ nɑ bɛɛ kuɑ.

⁶Kɛ̃ɛ terɑ̀ kon kɑ Yinni Gusunɔ wi, wi u kpuro kere dɑɑwɑ nɑ̀ n dɔɔ win sɑ̃ɑ yerɔ. Kɛ̃ɛ terɑ̀ ko nɑ n nɛni n kɑ nùn yiirɑ. Nɑɑ wɔ̃ɔ tiɑɡiɑ kon kɑ nùn yɑ̃ku dɔ̃ɔ mwɑɑrɑruɡiru kuɑ?

⁷Yinni Gusunɔ u yɑ̃ɑ kinɛ dɑbi dɑbinun bukɑtɑ mɔ? Gum kotosun bukɑtɑwɑ u mɔ? Nɛn bii ɡbiikoowɑ kon nùn wɛ̃ u sere mɑn nɛn torɑnu suuru kuɑ?

⁸Aɑwo, Yinni Gusunɔ u tɔmbu ɡeɑ sɔ̃ɔsi ye u rɑ kɑ̃. Ye u bu kɑnɑmɔ bu ko, yerɑ bu ben berusebu wɛ̃ ye n sɑ̃ɑ beɡiɑ. Kpɑ bu bu kĩru sɔ̃ɔsi. Kpɑ bu wi, Gusunɔ ben Yinni swĩi kɑ tii kɑwɑbu.

⁹Yinni Gusunɔ u kɑ Yerusɑlɛmuɡibu yɑ̃. Wi u bwisi mɔ, u koo nùn nɑsiɑ. Bɛɛ Yudɑbɑ, i de nɛn siribu bu bɛɛ yeeri.

¹⁰Kon wurɑ tɔn kɔ̃so u dukiɑ ɡure win dirɔ kɑ ɡbɛnɑ? Kpɑ u n sɑkɑku mɔ ɡe nɑ ǹ kĩ?

¹¹I tɑmɑɑ wi u kilo weesuɡiɑ mɔ u dɛɛre?

¹²Wee bɛɛn ɡobiɡibu bɑ tɔmbu dɑm dɔremɔ, bɑ rɑ n weesu mɔ̀. Kpɑ bɑ n ɡɑbu nɔni wɔ̃kumɔ kɑ ben ɡɑri.

¹³Tɛ̃, nɑ sɔɔru kpɑ n kɑ bɛɛ sɛ̃suku bɛɛn durum sɔ̃, kpɑ i kɑm ko.

¹⁴I ko i di, ɑdɑmɑ i ǹ debumɔ. I ko i nɔɔɡiru suɑ ɡɔ̃ɔrun sɔ̃. Mɛyɑ n ǹ koorɔ i ɡɑ̃ɑnu bere. Ì n mɑɑ ɡɑ̃ɑnu beruɑ, tɑbɑ kon kɑ ye kɑm koosiɑ.

¹⁵I ko i duure, ɑdɑmɑ i ǹ ɡɛ̃ɛmɔ. I ko i olifi ɡɑmɑ, ɑdɑmɑ i ǹ wɑsi i yen ɡum sɑwɑ. I ko i resɛm tɑm wĩɑ, ɑdɑmɑ i ǹ wɑsi i mu nɔ.

¹⁶Domi i sinɑ boko Omirin dɑɑ kɔ̃sɑ sɑɑrimɔ kɑ sere mɑɑ Akɑbuɡiɑ. I ben dɑɑ sɑɑrimɔwɑ mɑm mɑm. Yen sɔ̃nɑ kon de bɛɛn wuu ɡu ko bɑnsu. Kpɑ n de bu bɛɛ yɛ̃ɛ. I ko i sekuru wɑ bɛɛ kpuro nɡe mɛ nɛn tɔmbu bɑ rɑ wɑ.