Read bariba Nɑhumu 2 Bible Online

Nɑhumu 2 - bariba bible

Nɑhumu 2

¹Bɛɛ Yudɑbɑ, wee ɡoo u nɑ ɡuunu wɔllɔ u bɔri yɛndun lɑbɑɑri ɡeɑ kpɑrɑmɔ. Yen sɔ̃, i bɛɛn tɔ̃ɔ bɑkɑ ni i rɑ rɑɑ di Yinni Gusunɔn sɔ̃ dio. I bɛɛn nɔɔ mwɛɛnu yibio. Domi tɔn kɔ̃so wi, u ǹ mɑɑ wee bɛɛn suunu sɔɔ. Nɑ nùn kpeerɑsiɑwɑ mɑm mɑm.

²Bɛɛ Ninifuɡibu, kɑm koosio u bɛɛ wɔrim wee. Yen sɔ̃, i bɛɛn ɡbɑ̃rɑru mɑruo, kpɑ i bɛɛn swɛɛ kɔ̃su. I sɔɔru koowo, kpɑ i wɔruɡɔru sɔ̃ɔsi kɑ bɛɛn dɑm kpuro.

³Wee Yinni Gusunɔ u Yɑkɔbun bweseru, Isirelibɑ ben bɛɛrɛ wesiɑmɔ, be, be yibɛrɛbɑ bɑ wɔri bɑ ben yɑ̃nu ɡurɑ nɡe mɛ bɑ rɑ resɛm kɑ̃ɑsi yɑkiri.

⁴Ninifun yibɛrɛbɑn tɑbu durɔ dɑmɡibun tɛrɛnu nu sɔ̃ri. Mɑ bɑ yɑ̃ɑ wunɔmɡinu doke. Tɑbun tɔ̃ru tɑ̀ n turɑ, ben tɑbu kɛkɛ be dumi ɡɑwe yi rɑ kurɑmɛwɑ yi n bɑllimɔ nɡe dɔ̃ɔ buri, kpɑ bɑ n yɑɑsi fĩɑmɔ.

⁵Bɑ tɑbu kɛkɛbɑ yɑkiɑmɔ swɛɛ sɔɔ nɡe wiirobu. Bɑ dɑɑmɔ bɑtumɑ kpuro sɔɔ kɑ dɑm. À n bu wɑ, ɑ rɑ n tɑmɑɑ dɔ̃ɔ yɑriyɑ. Kpɑ bɑ n duki mɔ̀ nɡe ɡuru mɑɑkinu.

⁶Ninifun sinɑ boko u win tɑbu durɔ dɑmɡibu yɑɑyɑ u sokumɔ. Adɑmɑ be wee, bɑ sĩimɔ bɑ bɑ̃ɑrimɔ. Ben yibɛrɛbɑ bɑ sɛnde bɑ kɑ dɔɔ wuun ɡbɑ̃rɑru ɡiɑ. Mɑ bɑ tii kuku yenu kuɑ.

⁷Subɑru sɔɔ, bɑ dɑɑnun swɛɛ kɛniɑ, mɑ sinɑ kpɑɑrɑ wɔrukɑ.

⁸Bɑ Ninifu ye mwɑ bɑ yen yɑ̃nu ɡurɑ bɑ kɑ doonɑ. Yen tɔn kurɔbu bɑ sumɔ nɡe kpɑrukonu, mɑ bɑ toronu soomɔ.

⁹Ninifu ye, yɑ sɑ̃ɑwɑ nɡe nim bwee bɑkɑru tèn nim mu ɡɛ̃ɛrɑ mu doonɑ. Mɑ nɔɔɡirɑ nɔɔrɑmɔ tɑ mɔ̀, i yɔ̃ro, i yɔ̃ro. Adɑmɑ ɡoo kun yɔ̃re.

¹⁰I sii ɡeesu kɑ wurɑ ɡuro. Ben dukiɑ yɑ ǹ nɔru mɔ. Dukiɑ bwese bwesekɑwɑ bɑ mɔ.

¹¹Bɑ ɡurɑmɔ, bɑ ɡoomɔ, bɑ sɑnkumɔ. Tɔmbu kpuron ɡɔmɑ dwiiyɑ. Ben dũunu soonɑmɔ, mɑ ben dɑm doonɑ. Be kpuron wuswɑɑ burisinɛ.

¹²Mɑnɑ Ninifu ye, yɑ wɑ̃ɑ tɛ̃, ye, ye yɑ rɑɑ sɑ̃ɑ nɡe ɡbee sinɑnsun wɑ̃ɑ yeru, mi ɡbee sunɔ dwɑɑ kɑ ninu kɑ binu nu rɑ n bɔsu, ɡoo ku rɑ mɑɑ nu nɑre,

¹³kpɑ dwɑɑ ye, yu yen kurɔbu kɑ yen binu yɑɑ ɡoowɑ, kpɑ yu wɑ̃ɑ yee te yɑɑ yibiɑ.

¹⁴Gusunɔ wɔllu kɑ tem Yinni u nɛɛ, nɛ wee. Nɛnɑ nɑ sɑ̃ɑ yen yibɛrɛ. Kon de yen tɑbu kɛkɛbɑ bu dɔ̃ɔ mwɑɑrɑ. Kon de bu yen bibu ɡo tɑbu sɔɔ. Kon de yu ku mɑɑ tɔmbun yɑ̃nu ɡurɑ. Goo kun mɑɑ yen sɔmɔbun nɔɔ nɔɔmɔ.