Read bariba Nɑhumu 3 Bible Online

Nɑhumu 3 - bariba bible

Nɑhumu 3

¹Ninifuɡibɑ kuɑ bɔ̃rurobu. Domi bɑ sɑ̃ɑwɑ tɔn ɡowobu. Bɑ weesu yibɑ. Mɑ bɑ kuurɑmɔ kɑ ɡbɑnɑ. Bɑ rɑ n tɔmbun yɑ̃nu ɡurɑmɔwɑ.

²Wee sɛnɑn dɑmusu nɔɔrɑmɔ wuu ɡe sɔɔ. Wee tɑbu kɛkɛbɑn uruun wɔkinu nɔɔrɑmɔ, mɑ dumi yi yi ɡɑwe yi yɔ̃ɔkumɔ.

³Mɑɑsɔbu bɑ wee, bɑ tɑkobibɑ kɑ yɑɑsi nɛni yi bɑllimɔ. Wee bɑ tɔmbu mɛɛrɑ kuɑ, mɑ ɡonu tɛrie bɑɑmɑ, nu ǹ ɡɑrirɔ. Mɑ bɑ nu wɔrikimɔ.

⁴Ninifu yɑ sɑ̃ɑwɑ nɡe kurɔ sɑkɑrɑ kowo kpoko. Yɑ bwese dɑbinu yoru diisiɑ yen burɑm kɑ yen sɔrorun sɔ̃.

⁵Yen sɔ̃nɑ nɛ Gusunɔ, wɔllu kɑ tem Yinni, kon ye wɔrimɑ. Kon yen yɑberu ɡbɑbiɑ n kɑ yen wuswɑɑ wukiri, kpɑ n yen tereru bwesenu sɔ̃ɔsi, kpɑ yu sekuru wɑ.

⁶Kon ye kubɑnu sure, kpɑ tɔmbu bu ye kɑ.

⁷Sɑɑ yerɑ wi u ye wɑ u koo dukɑ su, kpɑ u nɛɛ, Ninifu yɑ kuɑ bɑnsu. Wɑrɑ u koo ye wɔnwɔndu kuɑ. Mɑnɑ kon bu wɑ be bɑ koo ye nukuru yɛmiɑsiɑ.

⁸Tebɛsi yɑ wɑ̃ɑ Nilun nim swɛɛ yi bɑ ɡbɑn bɔkuɔ. Nim mu kɑ ye sikerenɛ. Mɑ mu sɑ̃ɑ yen ɡbɑ̃rɑru. Ninifu, ɑ tɑmɑɑ ɑ Tebɛsi ye sɑnɔ kere?

⁹Etiopiɡibu kɑ Eɡibitiɡibɑ bɑ sɑ̃ɑ yen dɑm. Putiɡibu kɑ Libiɡibu bɑ sɑ̃ɑwɑ yen somiɔbu.

¹⁰Kɑ mɛ kpuro, yen tii yɑ yoru dɑ. Bɑ ye mwɑ mɑ bɑ yen bibu ɡo swɛɛ kpuro sɔɔ. Bɑ yen wiruɡibu tɛtɛ toosi, mɑ bɑ yen dɑmɡibu mwɛɛrɑ bɑ yɔni doke.

¹¹Wunɛ Ninifu, kɑɑ nɔni sɔ̃ɔrɑwɑ, kpɑ ɑ n sɑ̃ɑ nɡe wi u tɑm ɡoore, kpɑ ɑ kuku yeru kɑsu yibɛrɛbɑn sɔ̃ ɑ kuke.

¹²Sɑɑ ye sɔɔ, wunɛn ɡbɑ̃rɑnu kpuro nu ko n sɑ̃ɑwɑ nɡe dɑ̃ɑ nìn mɑrum mu ye. Bɑ̀ n mu sirɑ kpɑ mu wɔri wi u koo mu din nɔɔwɔ.

¹³Wee wunɛn tɔmbu bɑ sɑ̃ɑ nɡe tɔn kurɔbu wunɛn suunu sɔɔ. Wunɛn tem wusun kɔnnɔsu su kɛniɑrɑ mɑm mɑm yibɛrɛbɑn wuswɑɑɔ. Mɑ dɔ̃ɔ u sin kɔkɔrɔbɑ di.

¹⁴Bɛɛ Ninifuɡibu, i nim tɑkirio i yi. Domi bɑ koo bɛɛn wuu tɑrusi. I bɛɛn ɡbɑ̃rɑrun dɑm sosio. I birikibɑ muro kpɑ i sɔndu tɑɑku i kɑ tu bɑni.

¹⁵Bɑɑ ì n yebɑ kpuro kuɑ, kɑ mɛ, dɔ̃ɔ u koo nɑ u bɛɛ di, ǹ kun mɛ bu bɛɛ ɡo kɑ tɑkobi. Bɑ koo bɛɛ kpeerɑsiɑwɑ nɡe mɛ twee yi rɑ dɑ̃ɑ wurusu di. Wee, i dɑbiɑ nɡe twee.

¹⁶Bɛɛn tenkubɑ bɑ kperi dɑbiru kere. Adɑmɑ be kpuro bɑ doonɑ nɡe twee yi yi yɔ̃ɔwɑ.

¹⁷Bɛɛn kɔ̃sobu bɑ dɑbi nɡe ɡbɑbu swɛ̃ɛ. Bɛɛn sɔm kowobu bɑ dɑbi nɡe twee yi yi sinɑ dɑ̃ɑ kikisɔ bururu. Adɑmɑ ye sɔ̃ɔ u yɑrɑ mɑ yi yɔ̃ɔwɑ yi doonɑ, bɑ ǹ tubɑ mi yi dɑ.

¹⁸Wunɛ Asirin sinɑ boko, wee wunɛn kpɑrobu bɑ dom yĩbirimɔ. Wunɛn tɑbu durɔ dɑmɡibu bɑ ǹ mɑɑ wɑsi. Mɑ wunɛn tɔmbu bɑ yɑrinɛ yɑm kpuro ɡuunu wɔllɔ, ɡoo sɑri wi u koo bu kpɑɑsinɑ.

¹⁹Goo kun wunɛn mɛɛrɑ ye nɔɔrimɔ. Yɑ koo nun ɡowɑ. Wi u nuɑ ye yɑ nun deemɑ, u koo tɑkɑ kowɑ nuku dobun sɔ̃. Domi ɡoo sɑri wi ɑ ǹ nɔni sɔ̃ɔwɑ.