Read bariba Hɑbɑkuku 3 Bible Online

Hɑbɑkuku 3 - bariba bible

Hɑbɑkuku 3

¹Wee kɑnɑ te Gusunɔn sɔmɔ Hɑbɑkuku u kuɑ kɑ weeweenu.

²U nɛɛ, Yinni Gusunɔ, nɑ nuɑ ye ɑ ɡeruɑ. Mɑ nɑ nɑndɑ. A de yu koorɑ wɔ̃ɔ sini sɔɔ. A de tɔmbu bu ye wɑ bɛsɛn wɑɑti yeni sɔɔ. Adɑmɑ wunɛn mɔru ye sɔɔ, ɑ yɑɑyo ɑ sun wɔnwɔndu kuɑ.

³Gusunɔ, ɑ nɑ sɑɑ Edɔmun di. Wunɛ, Dɛɛro, ɑ nɑ Pɑrɑnin ɡuurun di. Wunɛn yiiko yɑ wɔllu yɑm bururɑsie. Mɑ tem kpuro mu nun siɑrɑmɔ.

⁴A nɑ, mɑ yɑm mu bururɑ. Sɔ̃ɔ yɑ̃nɑ yɑrɑ wunɛn nɔmɑn di, mi wunɛn dɑm mu wɑ̃ɑ.

⁵A derɑ bɑrɑnu nu pusimɔ. A nu derimɔ mi ɑ sɑrɑ kpuro.

⁶À n yɔ̃rɑ, tem mu rɑ yĩiriwɑ. À n bwesenu mɛɛrɑ, nu rɑ diiriwɑ. Guu ni nu wɑ̃ɑ sɑɑ yee yellun di, nu wɔrukɑ, ɡunɡuu ni nu wɑ̃ɑ sɑɑ tɛɛbun di, nu kɔsikirɑ, domi niyɑ nu rɑɑ sɑ̃ɑ wunɛn swɑɑ ye ɑ rɑ sĩ.

⁷Nɑ Kusɑniɡibun weeweenu nɔɔmɔ. Nɑ mɑɑ wɑ mɑ Mɑdiɑnibɑ bɑ bɛrum soore.

⁸Yinni Gusunɔ, ɑ kɑ dɑɑnu mɔru mɔ̀wɑ? Nɡe nim wɔ̃kuwɑ ɑ kɑ mɔru mɔ̀. Wee ɑ yɔɔwɑ ɡuru winu wɔllɔ nɡe wi u yɔɔwɑ tɑbu kɛkɛn wɔllɔ, mɑ yɑ nùn nɑsɑrɑ wɛ̃.

⁹A wunɛn tɛndu bɛri. Wunɛn bɔ̃ri yi sɑ̃ɑwɑ nɡe sɛ̃ɛnu. A tem bɛrɑ mɑ dɑɑnu kokɑ min di.

¹⁰Guunu nù n nun wɑ, nu rɑ diiriwɑ. Gurɑ yɑ nɛmɔ kɑ dɑm, mɑ nim wɔ̃kun nim mu wɔki, mu nim kurenu kɔ̃ɔmɔ sere wɔllɔ.

¹¹Sɔ̃ɔ kɑ suru bɑ yɔ̃rɑ ye bɑ wunɛn ɡuru mɑɑkinu wɑ nu bɑllimɔ nɡe yɑɑsɑ, mɑ nu dɔɔ nɡe sɛ̃ɛnu.

¹²Wee ɑ tem bukiɑnɑmɔ, ɑ bwesenu kɔsukumɔ kɑ mɔru bɑkɑ.

¹³Wee ɑ yɑrɑ ɑ wunɛn tɔmbu kɑ wunɛn sunɔ wi ɑ ɡɔsɑ somiru nɑ. A tɔn kɔ̃sobun sunɔ ɡo. A win bwɑ̃ɑbu kpeerɑsiɑ mɑm mɑm.

¹⁴A yibɛrɛbɑn sinɑmbun winu yɑburɑ kɑ ben tiin sɛ̃ɛnu. Bɑ rɑɑ sun wɔrim wee kɑ sɛndɑru nɡe woo bɔkɔ, bu kɑ sun yɑrinɑsiɑ. Bɑ nuku dobun kuuki mɔ̀. Bɑ sɔɔru sɑ̃ɑ bu kɑ sun ɡo bɛsɛn kuku yenɔ.

¹⁵Yinni Gusunɔ, ɑ sɔ̃ wunɛn dumin wɔllɔ, ɑ nim wɔ̃ku tɑɑkumɔ ɡe ɡɑ nim kɔ̃ɔmɔ ɡɑ wɔki.

¹⁶Nɑ ɡen wɔkinu nɔɔmɔ too. Mɑ nɑ nɑndɑ ɡem ɡem, nɛn nɔɔ ɡɑ diirimɔ bɛrum sɔ̃. Mɑ nɛn wɑsi yi wɔkɔnu wɔrimɔ, nɑ yɔ̃ sɛ̃ɛ nɑ nuku sɑnkirɑnun tɔ̃ru mɑrɑ te tɑ wee bwese ni nu koo sun dɑm dɔren sɔ̃.

¹⁷Fiɡien dɑ̃nu nu ǹ ko n binu mɔ. Resɛm dɑ̃nu nu ǹ mɑɑ mɑrumɔ. Olifin dɑ̃nu nu ǹ mɑɑ binu mɑrumɔ. Gbeɑ kun mɑɑ dĩɑnu wɛ̃ɛmɔ. Yɑ̃ɑnu kɑ kɛtɛ kun ko n mɑɑ wɑ̃ɑ ɡɔ̃ɔwɔ.

¹⁸Adɑmɑ nɛ, nɛn nuku dobu weewɑ wunɛ Yinni Gusunɔn min di. Nɑ nuku dobu mɔ yèn sɔ̃ ɑ rɑ mɑn fɑɑbɑ ko.

¹⁹Wunɑ ɑ sɑ̃ɑ nɛn dɑm. A rɑ de nɑ n sɑ̃u nɡe nɛmu. Kpɑ nɑ n sĩimɔ ɡuunu wɔllɔ. Womu ɡeniwɑ bɑ wom kowobun wiruɡii kuɑ kɑ mɔrɔku.