Read bariba Sofoni 1 Bible Online

Sofoni 1 - bariba bible

Sofoni 1

¹Gɑri yiniwɑ Yinni Gusunɔ u Sofoni, Kusin bii sɔ̃ɔwɑ Yosiɑsi, Amɔɔn bii, Yudɑbɑn sinɑ bokon bɑndun wɑɑti sɔɔ. Sofoni wi, u sɑ̃ɑwɑ Gedɑliɑn debubu, Amɑriɑn sikɑdobu, Esekiɑsin yɑ̃ɑsebu.

²Yinni Gusunɔ u nɛɛ, kon kpuro kpeerɑsiɑ hɑnduniɑ sɔɔ.

³Kon tɔmbu kɑ yɛɛ kɑ ɡunɔsu kɑ swɛ̃ɛ kpeerɑsiɑ kɑ sere mɑɑ tɔn kɔ̃sobu kɑ ye yɑ rɑ bu sokurɑsie. Kon tɔmbu kpuro kpeerɑsiɑ hɑnduniɑ sɔɔ. Nɛ, Yinni Gusunɔwɑ nɑ yeni ɡeruɑ.

⁴Yinni Gusunɔ u mɑɑ nɛɛ, kon Yudɑbɑ kɑ Yerusɑlɛmuɡibu kpuro nɔmɑ doke. Kon bũu wi bɑ mɔ̀ Bɑɑlin sɑ̃ɑ yee ni nu tie kpeerɑsiɑ min di. Kon yen wiruɡibu kɑ yen yɑ̃ku kowobun yĩsɑ ɡo.

⁵Be bɑ dii tɛɛri wɔllɔ kperi kɑ suru sɑ̃ɑmɔ kɑ be bɑ bɔ̃rumɔ kɑ nɛ, Yinni Gusunɔn yĩsiru, mɑ bɑ wure bɑ bɔ̃rumɔ kɑ ben bũun yĩsiru, be kpurowɑ kon ɡo.

⁶Be bɑ mɑn biru kisi kɑ be bɑ ku rɑ mɑn kɑsu, kɑ sere mɑɑ be bɑ ku rɑ mɑn ben ɡɑri sɑɑwɑrɑ ko, be kpurowɑ kon ɡo.

⁷I nɔɔ mɑrio wi, Yinni Gusunɔn wuswɑɑɔ. Domi win tɔ̃ru tɑ turuku kuɑ. U win yɑ̃kuru sɔɔru kuɑ. U mɑɑ ɡɔsɑ be bɑ koo tu di.

⁸Wi, Yinni Gusunɔn yɑ̃ku ten tɔ̃ru sɔɔ, u koo wiruɡibu kɑ sinɑ bokon bibu wɔri, kɑ sere mɑɑ be bɑ tɔn tukobun komɑnu swĩi.

⁹Yen tɔ̃ɔ te, be bɑ ku rɑ sɑ̃ɑ yerun kɔnnɔ suuku tɑɑrɑm kɑ̃ nɡe bũu sɑ̃ɔbu, kɑ sere be bɑ ben sunɔn yɛnu dukiɑ yibiɑmɔ ye bɑ ɡurɑmɑ kɑ ɡbɛnɑ, kɑ dɑm dibu, be kpurowɑ u koo wɔri.

¹⁰Yen tɔ̃ɔ te, bɑ koo wuri nɔ sere kɔnnɔwɔ ɡe bɑ mɔ̀ Swɛ̃ɛ, kɑ mɑɑ wuun wɔɔ berɑ ɡɑɑn mi. Mɛyɑ nɔni swɑ̃ɑ bɑkɑrɑ ko n wɑ̃ɑ ɡuunu wɔllɔ.

¹¹Bɛɛ Mɑkitɛsiɡibu, i wuri koowo. Domi tenkubɑ kpuro bɑ koo kɑm ko. Be bɑ ɡobi kɔsimɔ kpuro bɑ koo kpeerɑ.

¹²Yen tɔ̃ɔ te, u koo Yerusɑlɛmu bũuri kɑ fitilɑnu. U koo tɔmbu wɔrimɑ be bɑ sɔ̃ kpɛtɛɛ nɡe tɑm kɔrɔnu. Mɑ bɑ ɡerumɔ ben ɡɔ̃ruɔ bɑ mɔ̀, wi, Yinni Gusunɔ u ǹ ɡeɑ mɔ̀, u ǹ mɑɑ kɔ̃sɑ mɔ̀.

¹³Bɑ koo ben ɑrumɑni ɡurɑ kpɑ ben yɛnusu su ko bɑnsu. Bɑ koo diɑ bɑni yè sɔɔ bɑ ǹ sinɑmɔ. Bɑ koo resɛm duure, ɑdɑmɑ bɑ ǹ yen tɑm nɔrumɔ.

¹⁴Yinni Gusunɔn tɔ̃ɔ nɑnumɡirɑ tɑ turuku kuɑ. Te wee tɑ wee fuuku, tɑ nɔɔɡiru sue. Tɑbu durɔ dɑmɡii u koo kuuki ko dɔmɑ te.

¹⁵Tɔ̃ɔ te, tɑ sɑ̃ɑwɑ mɔrun tɔ̃ru. Tɔ̃ɔ te, tɑ sɑ̃ɑwɑ nuku sɑnkirɑnun tɔ̃ru. Tɑ sɑ̃ɑwɑ kɑm kobun tɔ̃ru. Tɔ̃ɔ te, yɑm wɔ̃kurɑ koo tu wukiriwɑ nɡe bukɔ kɑ ɡuru winu.

¹⁶Yen tɔ̃ɔ te, tɑbu kowobu bɑ koo kɔbi so kpɑ bu kuuki ko bu kɑ wuu si su ɡbɑ̃rɑnu mɔ wɔri.

¹⁷U koo tɔmbu nuku sɑnkirɑnu kpɛ̃ɛ kpɑ bɑ n sĩimɔ nɡe wɔ̃kobu. Domi Yinni Gusunɔwɑ bɑ torɑri. U koo de ben yɛm mu n tɛrie nɡe tuɑ, kpɑ ben ɡonu nu n sɑ̃ɑ nɡe kubɑnu.

¹⁸Yen dɔmɑ te, ben sii ɡeesu ǹ kun mɛ ben wurɑ, yen ɡɑɑ kun kpɛ̃ yu bu wɔrɑ Yinni Gusunɔn mɔru bɑkɑ yen min di. Tem mɛ kpuro mu koo dɔ̃ɔ mwɑɑrɑ win mɔrun sɔ̃. U koo mɛn tɔmbu kpuro ɡowɑ subɑru sɔɔ.