Read bariba Sɑkɑri 12 Bible Online

Sɑkɑri 12 - bariba bible

Sɑkɑri 12

¹Gɑri yi Yinni Gusunɔ u ɡeruɑ Isirelibɑn sɔ̃ wee. Wi, wi u wɔllu kɑ tem mɔmɑ, mɑ u mɑɑ tɔnu hunde dokeɑ

²u nɛɛ, nɑ Yerusɑlɛmu kuɑ nɡe nɔrɑ ye yɑ nɛn mɔru yibɑ nɡe tɑm. Yɑ koo bwese ni nu kɑ ye sikerenɛ woo tiro kpɛ̃ɛ. Woo tiro ɡe, ɡɑ koo Yudɑbɑ kpuro nɛnɛ bɑ̀ n Yerusɑlɛmu tɑrusi.

³Tɔ̃ɔ te sɔɔ, kon ye ɡɔsiɑ nɡe kpee bɑkɑru. Be bɑ kĩ bu tu suɑ bɑ koo mɛɛrɑ wɑ. Hɑnduniɑn bwesenu kpuro nu koo mɛnnɑ nu tu wɔri.

⁴Yen tɔ̃ɔ te, Yinni Gusunɔ u nɛɛ, kon ben dumi woo tiro kpɛ̃ɛ kpɑ n yin mɑɑsɔbu nɔni swɑ̃ɑru kpɛ̃ɛ, kpɑ n bwese tukunun dumi wɔ̃koru kpɛ̃ɛ. Adɑmɑ kon Yudɑbɑ kɔ̃su.

⁵Yudɑn wiruɡibu bɑ koo nɛɛ, Yerusɑlɛmuɡibɑ bɑ sɑ̃ɑ ben dɑm nɛ, Gusunɔ ben Yinnin sɔ̃, nɛ wi nɑ wɔllu kɑ tem mɔ.

⁶Yen tɔ̃ɔ te sɔɔ, kon Yudɑbɑn wiruɡibu kowɑ nɡe dɔ̃ɔ boko dɑ̃ɑ sɔ̃ɔwɔ, ǹ kun mɛ nɡe wii bɔn tèn dɔ̃ɔ bɑ sɔkɑ dĩɑ bɔkunu sɔɔ. Bɑ koo bwese ni nu kɑ bu sikerenɛ kɑmiɑwɑ mɑm mɑm. Adɑmɑ Yerusɑlɛmuɡibu bɑ ko n sɔ̃wɑ ben temɔ.

⁷Nɛ, Yinni Gusunɔ kon Yudɑbɑn yɛnusu fɑɑbɑ ko, kpɑ Dɑfidin yɛnun bɛɛrɛ kɑ Yerusɑlɛmuɡibun bɛɛrɛ yu ku rɑɑ Yudɑ be bɑ tieɡiɑ kerɑ.

⁸Yen tɔ̃ɔ te, kon Yerusɑlɛmuɡibu kɔ̃su. Be sɔɔ, wi u kun dɑɑ dɑm mɔ, u koo dɑm kowɑ nɡe Dɑfidi. Kpɑ Dɑfidin yɛnuɡibu bɑ n sɑ̃ɑ nɡe Gusunɔn ɡɔrɑdo wi u yɔ̃ ben wuswɑɑɔ.

⁹Yen tɔ̃ɔ te, kon kookɑri ko n bwese ni kpuro ɡo ni nu Yerusɑlɛmu wɔrim wee.

¹⁰Kon de Dɑfidin yɛnuɡibu kɑ Yerusɑlɛmuɡibu bɑ n wɔnwɔndu mɔ kpɑ bɑ n dɑ kɑnɑru ko, kpɑ bu ɡɔsirɑmɑ nɛn mi, nɛ wi bɑ yɑɑsɑ sɔkɑ. Bɑ koo mɑn swĩisi nɡe wìn bii teereru tɑ ɡu. Bɑ koo swĩwɑ kɑ nuku sɑnkirɑ bɑkɑnu nɡe wìn bii ɡbiikoo u ɡu.

¹¹Yen tɔ̃ɔ te, nuku sɑnkirɑru tɑ ko n kpɑ̃ Yerusɑlɛmuɔ nɡe te bɑ kuɑ Hɑdɑdirimɔɔn sɔ̃ Mɛɡidon wɔwɑɔ.

¹²Tem mɛ kpuro sɔɔ, bɑ ko n ɡɔɔ wooru sɔ̃wɑ yɛnu kɑ yɛnu. Dɑfidin yɛnuɡibu, kurɔbu kɑ durɔbu nɛnɛm. Nɑtɑnin yɛnuɡibu, kurɔbu kɑ durɔbu nɛnɛm.

¹³Lefin yɛnuɡibu, kurɔbu kɑ durɔbu nɛnɛm. Simɛin yɛnuɡibu, kurɔbu kɑ durɔbu nɛnɛm.

¹⁴Nɡe mɛyɑ yɛnu si su mɑɑ tien tɔmbu bɑ ko n ɡɔɔ wooru sɔ̃ nɛnnɛnkɑ, kurɔbu kɑ durɔbu nɛnɛm.