Read bariba Sɔ̃ɔsiru 32 Bible Online

Sɔ̃ɔsiru 32 - bariba bible

Sɔ̃ɔsiru 32

¹Wɔllu, ɑ swɑɑ dɑkio ɑ nɛn ɡɑri nɔ. Tem, ɑ swɑɑ tem kpĩiyɔ ɑ nɛn nɔɔ nɔ.

²Nɛn yɛ̃ru tɑ kokumɔ nɡe ɡuru nim mɑ nɛn ɡɑri nɛmɔ nɡe kɑkoru mɑ yi dɑ̃ɑkumɔ nɡe dirum yɑkɑ bekusu sɔɔ.

³Kon Yinni Gusunɔn yĩsiru kpɑrɑ. Bɛɛ Isirelibɑ, i Gusunɔ bɛsɛn Yinnin yĩsirun kpɑ̃ɑru kpɑro.

⁴Yinni Gusunɔ u sɑ̃ɑwɑ nɡe kperu. U rɑ kowɑ dee dee. Win siribu bu rɑ n dɛɛrewɑ. U sɑ̃ɑwɑ nɑɑnɛɡii, murɑfitiru sɑri win mi. U sɑ̃ɑwɑ ɡemɡii.

⁵Adɑmɑ bɛɛ, i sɑ̃ɑwɑ tɔn kɔ̃sobu be bɑ ǹ dee dee swĩi. I nùn torɑri. Yɑ kuɑ bɛɛn sekuru. I ǹ mɑɑ sɑ̃ɑ win bibu.

⁶Gɑri bɑkɑsu bɛɛ, nɡe mɛyɑ bɑ rɑ Yinni Gusunɔ kue? U ǹ sɑ̃ɑ bɛɛn bɑɑbɑ kɑ bɛɛn tɑkɑ kowo? N ǹ wi, u bɛɛ tɑ̃sisiɑ u kuɑ win tɔmbu?

⁷I yellu yɑɑyo. I bwisikuo ye n koorɑ yellu. I bɛɛn bɑɑbɑbɑ kɑ bukurobu bikio, bɑ koo bɛɛ sɔ̃.

⁸Sɑnɑm mɛ u tɔmbu tem bɔnu kuɑ, kɑ sɑɑ ye u bweseru bɑɑtere ten tem nɔɔ burɑ yeru kuɑ, u nin bɑɑtere ɡoo wɛ̃ wɔllun di wi u ko n tu kpɑre.

⁹Adɑmɑ u tii Isirelibɑ yiiyɑ, be bɑ sɑ̃ɑ Yɑkɔbun bweseru.

¹⁰Yinni Gusunɔ u bu deemɑ ɡbɑburɔ mi ɡbeeku bɔ̃nu nu ɡberi. Mɑ u bu suɑ u nɔɔri u keu sɔ̃ɔsi. U ben lɑɑkɑri mɔ nɡe win tiin nɔni.

¹¹U bu kɔ̃su nɡe kɑsɑ ye yɑ yɔ̃ɔwɑ yen sokuru wɔllɔ yɑ kɑ yen binu yɔ̃ɔsiɑmɔ. Mɑ yɑ kɑsɑ dɛrie yu kɑ nu ɡɑbɑ.

¹²Yinni Gusunɔ turowɑ u bu kpɑrɑ. Bũu ɡoo kun nùn somi.

¹³U derɑ bɑ dɑ bɑ sinɑ ɡunɡuru wɔllɔ. Mɑ u bu ɡberun dĩɑnu diisiɑ. U derɑ bɑ kperun tim di. U derɑ ben dɑ̃ɑ ɡbɑɑnu ɡeɑ kuɑ kpenu wɔllɔ bu kɑ ɡum wɑ.

¹⁴Bɑ kɛtɛbɑ kɑ yɑ̃ɑnun bom nɔrumɔ. Bɑ yɑ̃ɑ kpɛmminu kɑ yɑ̃ɑ kinɛnu kɑ boo kinɛnun yɑɑ ɡumɡiɑ temmɔ. Som ɡem dĩɑnɑ bɑ rɑ n dimɔ. Mɛyɑ bɑ rɑ mɑɑ resɛm tɑm ɡem nɔ.

¹⁵Ye bɑ debɑ bɑ kpɑ mɑ bɑ Gusunɔ seesi. Ye bɑ bɔriɑ bɑ kpɑ, yerɑ bɑ wi, Gusunɔ ben tɑkɑ kowo deri. Mɑ bɑ nùn ɡɛmɑ wi, wi u sɑ̃ɑ ben fɑɑbɑ kowo.

¹⁶Bɑ win nisinu seeyɑ bɑ dɑ bɑ bũnu sɑ̃ɑmɔ. Bɑ win mɔru seeyɑ bɑ dɑ bɑ bũnu yiire

¹⁷mɑ bɑ nu yɑ̃kuru koosimɔ ni, ni nu ǹ sɑ̃ɑ ɡem. Bɑ ǹ dɑɑ nu yɛ̃, ben bɑɑbɑbɑ bɑ ǹ nu sɑ̃ɑre.

¹⁸Bɑ Gusunɔ duɑri wi u sɑ̃ɑ nɡe ben kpee bɑɑ mi bɑ rɑ kuke, wi, wi u bu wɑ̃ɑru wɛ̃.

¹⁹Sɑnɑm mɛ Gusunɔ u wɑ mɛ, yerɑ win mɔru seewɑ mɑ u bu ɡɛmɑ be, be bɑ sɑ̃ɑ win bibu.

²⁰U nɛɛ, u ǹ mɑɑ bu somimɔ kpɑ u wɑ ye yɑ koo bu deemɑ. Domi bɑ sɑ̃ɑwɑ mɛm nɔɔ sɑriruɡibu kɑ nɑɑnɛ sɑribɑ.

²¹Bɑ win mɔru kɑ win nisinu seeyɑ ben bũu ni bɑ sokumɔ Gusunɔn sɔ̃, ni nu ǹ sɑ̃ɑ ɡɑ̃ɑnu. Yen sɔ̃nɑ u nɛɛ, wi, u koo mɑɑ bwese wiirɑruɡiru sokusiɑ u kɑ ben mɔru seeyɑ, kpɑ u ben nisinu seeyɑ kɑ bwese te, te bɑ ǹ ɡɑrisi ɡɑ̃ɑnu.

²²Win mɔru koo se nɡe dɔ̃ɔ yɑrɑ kpɑ yi ɡɑ̃ɑnu kpuro dɔ̃ɔ mɛni tem sɔɔ, kpɑ yu mɑɑ dɑ sere tem sɔɔ sɔɔwɔ. Kpɑ yu ɡuunun kpɛɛkpɛɛkunu dɔ̃ɔ mɛni.

²³U koo bu nɔni swɑ̃ɑru sure. Kpɑ u bu twee.

²⁴Bɑ koo ɡbi ɡɔ̃ɔru kɑ bɑrɑrun sɔ̃. Bɑrɑ bɑkɑnu koo bu ɡo. U nɛɛ, u koo bu ɡbeeku yɛɛ sure yi bu mwɛɛri. Kpɑ u mɑɑ de wɛɛ dɛ̃ɛɡii yi bu dwɛ̃ɛ.

²⁵Tɑbu koo bu ɡo swɛɛ sɔɔ kpɑ be bɑ wɑ̃ɑ yɛnusɔ bu bɛrum soorɑ. Aluwɑɑsibɑ kɑ wɔndiɑbɑ bɑ koo ɡbisuku, bɑɑ kɑ bii wɛ̃ɛnɔ kɑ tɔkɔnɔ bɑ ǹ derimɔ.

²⁶U koo bu kɑm koosiɑwɑ mɑm mɑm sere ɡoo kun mɑɑ bu yɑɑyɑmɔ.

²⁷Adɑmɑ u ǹ wurɑmɔ yibɛrɛbɑ bu nùn yɛ̃ɛ yèn sɔ̃ bɑ win tɔmbu kɑmiɑ, kpɑ bu nɛɛ, n ǹ wi, Yinni Gusunɔ u ye kuɑ.

²⁸Isirelibɑ bɑ sɑ̃ɑwɑ bwese te tɑ ǹ bwisi mɔ, tɑ ǹ mɑɑ lɑɑkɑri mɔ.

²⁹Bɑ̀ n dɑɑ bwisi mɔn nɑ, bɑ koo rɑɑ ɡiɑ ye yɑ koo bu deemɑ.

³⁰Kpɑ bu tii bikiɑ bu nɛɛ, tɔn turo u koo kpĩ u tɔmbu nɔrɔbu (1.000) yɑrinɑsiɑ? Ǹ kun mɛ tɔmbu yiru bu tɔmbu nɔrɔbun subɑ wɔkuru (10.000) yɑrinɑsiɑ? Geemɑ Gusunɔ bɛsɛn Yinni dɑmɡii u sun deriwɑ, u sun yibɛrɛbɑ nɔmu bɛriɑwɑ.

³¹Adɑmɑ yibɛrɛ ben tii bɑ yɛ̃ mɑ ben bũu wi u bu kɔ̃su u ǹ wi, Gusunɔ Isirelibɑn Yinni dɑm turɑ.

³²Ben yibɛrɛ be, bɑ sɑnkirewɑ nɡe Sodomu kɑ Gomɔrɑɡibu. Bɑ sɑ̃ɑwɑ nɡe tɑm mɛ mu sosu, mɑ mu dɛ̃ɛ mɔ.

³³Bɑ sosuwɑ nɡe wɑɑn dɛ̃ɛ. Bɑ sɑ̃ɑwɑ nɡe wɑɑ ɡɔsɔrun dɛ̃ɛ.

³⁴Yinni Gusunɔ u yɛ̃ ye yibɛrɛ be, bɑ kuɑ. U mɑɑ yɛ̃ ye u koo bu kɔsie.

³⁵Wiyɑ u koo bu mɔru kɔsie u bu sɛɛyɑsiɑ. Tɔ̃ru ɡɑrɑ sisi tè sɔɔ bɑ koo wɔrumɑ. Tɔ̃ɔ te, nɔni swɑ̃ɑruɡirɑ, tɑ ǹ mɑɑ tɛɛmɔ.

³⁶Yinni Gusunɔ ù n deemɑ win tɔmbu bɑ ǹ dɑm mɔ, bɑ ǹ mɑɑ tɑ̃si yeru ɡɑru mɔ, u koo bu siriɑ, kpɑ u be, win sɔm kowobun wɔnwɔndu wɑ.

³⁷Sɑɑ ye sɔɔ, u koo bikiɑ u nɛɛ, mɑnɑ bɛɛn bũu dɑmɡii ni, nu wɑ̃ɑ, nìn mi i kuku yeru kɑsu,

³⁸ni i rɑ yɑɑ ɡumɡiɑ ɡoowe, kpɑ i nu tɑm wɛ̃ nu nɔ. I nu sokuo nu nɑ nu bɛɛ somi tɛ̃. I de nu duki nɑ nu bɛɛ fɑɑbɑ ko.

³⁹Yinni Gusunɔ u nɛɛ, nɛnɑ nɑ wɑ̃ɑ. Goo mɑɑ sɑri wi u sɑ̃ɑ Gusunɔ. Nɛnɑ nɑ rɑ ɡo, nɛnɑ nɑ rɑ mɑɑ seeye. Nɛnɑ nɑ rɑ mɛɛrɑ ko kpɑ n wure n bɛkiɑ. Goo sɑri wi u koo kpĩ u tɔnu wɔrɑ nɛn nɔmun di.

⁴⁰Sere kɑ nɛn wɑ̃ɑru, nɑ nɔmu suɑ wɔllɔ nɑ bɔ̃ruɑ nɑ nɛɛ,

⁴¹kon nɛn tɑkobi nɔɔ dɛ̃ɛri, kpɑ n tɔmbu siri. Kon nɛn yibɛrɛbɑ mɔru kɔsie kpɑ n bu sɛɛyɑsiɑ be, be bɑ mɑn tusɑ.

⁴²Nɛn sɛ̃ɛnu koo yɛm debu kpɑ nɛn tɑkobi yu be bɑ mɑn seesimɔ ɡo. Nɑ ǹ ɡoo derimɔ wi u kɑ mɑn tɑbu mɔ̀. Be, be bɑ mɛɛrɑ kuɑ kɑ be bɑ yoru mwɛɛrɑ bɑ koo ɡbiwɑ.

⁴³Bɛɛ bwese tukunu, i Yinni Gusunɔn tɔmbu tɔmɔ, domi u koo bu mɔru bɑrɑ, kpɑ u bu ben torɑnu suuru kuɑ u ben tem dɛɛrɑsiɑ.

⁴⁴Mɑ Mɔwisi kɑ Yosue, Nunin bii bɑ nɑ Isirelibɑn wuswɑɑɔ bɑ bu womu ɡen ɡɑri kpuro sɑɑriɑ.

⁴⁵Sɑnɑm mɛ Mɔwisi u Isirelibɑ Yinni Gusunɔn sɔ̃ɔsi te sɔ̃ɔwɑ u kpɑ, yerɑ u nɛɛ,

⁴⁶woodɑ ye nɑ bɛɛ wɛ̃ɛmɔ mini ɡisɔ, i ye mɛm nɔɔwɔ. I de i ye bɛɛn bibu sɔ̃ɔsi kpɑ bu wɑ bu ye mɛm nɔɔwɑ kpuro.

⁴⁷I n yɛ̃ mɑ woodɑ ye, yɑ ǹ fɑɑɡin ɡɑri. Domi yeyɑ yɑ koo bɛɛ wɑ̃ɑru wɛ̃ kpɑ yu de tu dɑkɑɑ dɑ tem mɛ sɔɔ, mɛ i ko i mwɑ Yuudɛnin ɡuru ɡiɔ.

⁴⁸Yen tɔ̃ɔ terɑ Yinni Gusunɔ u Mɔwisi sɔ̃ɔwɑ u nɛɛ,

⁴⁹ɑ doo ɡuu ni bɑ mɔ̀ Abɑrimuɔ, Mɔɑbun temɔ Yerikon deedeeru, kpɑ ɑ yɔ Nɛbon ɡuurɔ. Sɑɑ min diyɑ kɑɑ Kɑnɑnin tem wɑ mɛ kon Isirelibɑ wɛ̃.

⁵⁰Guu ten wɔllɔwɑ kɑɑ ɡbi nɡe mɛ wunɛn mɔɔ Aroni u ɡu Horiɔ, kpɑ ɑ dɑ ɑ wunɛn sikɑdobɑ deemɑ.

⁵¹Domi bɛɛ kpuro i ǹ mɑn nɑɑnɛ kue Isirelibɑ kpuron wuswɑɑɔ sɑnɑm mɛ i wɑ̃ɑ Mɛribɑn bwiɑɔ, Kɑdɛsiɔ, Sinin ɡbɑburɔ. A ǹ mɑn bɛɛrɛ wɛ̃ Isirelibɑn wuswɑɑɔ dɔmɑ te.

⁵²Yen sɔ̃nɑ kon de ɑ tem mɛ wɑ tontonden di mɛ nɑ nɛɛ, kon Isirelibɑ wɛ̃ mi, ɑdɑmɑ ɑ ǹ duɔ mɛ sɔɔ.