Read bariba Kpɑrobu 5 Bible Online

Kpɑrobu 5 - bariba bible

Kpɑrobu 5

¹Dɔmɑ terɑ Deborɑ kɑ Bɑrɑki Abinɔɑmun bii bɑ womu ɡeni kuɑ bɑ nɛɛ,

²i Yinni Gusunɔ siɑro domi Isirelibɑn wiruɡibu bɑ ɡɔ̃ru doke bu tɑbu ko. Tɔmbu kpuro bɑ mɑɑ tii wɛ̃ bu kɑ bu swĩi.

³I nɔɔwɔ bɛɛ sinɑmbu, i swɑɑ dɑkio bɛɛ tem yɛ̃robu. Nɑ kon Gusunɔ, Isirelibɑn Yinni tɔmɑ kɑ womusu.

⁴Yinni, sɑnɑm mɛ ɑ sɑrɑmɑ Seirin ɡuurun di Edɔmun temɔ, tem mu yĩirɑ, ɡuru winu ɡɔsirɑ nim, mɑ ɡurɑ nɑ.

⁵Guu bɑkɑnu nu yĩirɑ wunɛ Gusunɔ Isirelibɑn Yinnin wuswɑɑɔ, wunɛ wi ɑ tii sɔ̃ɔsi Siɔniɔ.

⁶Sɑnɡɑɑ, Anɑtin biin wɑɑti sɔɔ, kɑ mɑɑ Yɑɛlin sɑɑ sɔɔ, ɡoo ku rɑ sĩ swɑɑ dosɔ. Be bɑ ɡɑm dɔɔ, swɑɑ kisiyɑ bɑ rɑ kɑ de.

⁷Wiruɡii ɡoo sɑri wi u dɑm mɔ Isirelibɑ sɔɔ, sere nɛ Deborɑ nɑ rɑ kɑ seewɑ nɡe ben mɛro.

⁸Sɑnɑm mɛ bɑ Gusunɔ deri bɑ bũnu sɑ̃ɑmɔ, sɑɑ yerɑ bɑ bu tɑbu wɔrimɑ. Adɑmɑ bɑɑ ben tɔmbu nɔrɔbun subɑ weeru (40.000) sɔɔ, ɡoo sɑri wi u tɛrɛru ǹ kun mɛ yɑɑsɑ mɔ.

⁹Nɛn ɡɔ̃ru ɡɑ dorɑ Isirelin wiruɡibun sɔ̃, kɑ be bɑ tii wɛ̃ bu kɑ tɑbu ko. I Yinni Gusunɔ tɑkɑru koowo.

¹⁰Bɛɛ sinɑmbu, bɛɛ be i kɛtɛku kpikinu sɔni, i ɡɑri yi kpɑro. Bɛɛ ɡobiɡibu, bɛɛ be i sɔ̃ beku burɑnu wɔllɔ, i yi ɡeruo. Bɛɛ mɑɑ bwɛ̃ɛbwɛ̃ɛbu, bɛɛ be i kɑ nɑɑsu sĩimɔ, i yi wonwɔ.

¹¹I swɑɑ dɑkio. Dɔkɔbɑn bɔkuɔ tɔmbɑ Yinni Gusunɔn nɑsɑrɑn womusu mɔ̀, ye u Isirelibɑ wɛ̃. Yen biru Yinni Gusunɔn tɔmbu bɑ sɑrɑmɑ bɑ dɑ bɑ wɑ̃ɑ ben wusɔ.

¹²A seewo, Deborɑ, ɑ tɑbun womu ko, ɑ n kɑ sun ɡbiiye. A seewo, Bɑrɑki, Abinɔɑmun bii, ɑ kɑ wunɛn yobu wurɑmɑ.

¹³Isirelibɑn sukum bɑ dɑmɡibu kɑmiɑ. Yinni Gusunɔ u derɑ nɑ nɑsɑrɑ wɑ tɑbu durɔbun wɔllɔ.

¹⁴Be bɑ Amɑlɛkibɑ kɑmiɑ, bɑ nɑ Efɑrɑimubɑn tem di. Bɛnyɑmɛɛbɑ bɑ mɑɑ bu swĩi. Wiruɡibɑ nɑ Mɑkirin bweserun di. Tɑbu sinɑmbɑ mɑɑ nɑ Sɑbulonibɑn min di.

¹⁵Isɑkɑribɑn wiruɡibu bɑ kɑ Deborɑ yɔ̃rɑ. Mɑ ben tɔmbu kpuro bɑ Bɑrɑki swĩi. Bɑ duki nɑ wɔwɑ mi. Adɑmɑ Rubɛnibɑ bɑǹ nɔɔ tiɑ kue. Bɑ sikɑ kuɑ tɑɑ bin dɑɑbu sɔɔ.

¹⁶Mbɑn sɔ̃nɑ bɑ yɑ̃ɑnu sinɛ. Bɑ kĩwɑ bu kpɑrobun nɔɔ nɔ be bɑ nu sokumɔ? Mɛyɑ Rubɛnibɑ bɑǹ nɔɔ tiɑ kue. Bɑ sikɑ kuɑ tɑɑ bin dɑɑbu sɔɔ.

¹⁷Gɑlɑdiɡibu bɑ sinɑ Yuudɛnin ɡuruɔ. Mbɑ n kuɑ Dɑnubɑ bɑ kɑ ben ɡoo nimkusu sinɛ. Asɛɛbɑ bɑ mɑɑ sɔ̃ nim wɔ̃kun berɑ ɡiɑ kɑ ɡen ɡoorɔ, bɑǹ nɛ.

¹⁸Adɑmɑ Sɑbulonibɑ kɑ Nɛfitɑlibɑ bɑ tii doke kɑri sɔɔ tɑbu ɡberɔ.

¹⁹Kɑnɑnin sinɑmbɑ nɑ bɑ kɑ bu tɑbu kuɑ Tɑnɑkiɔ dɑɑrun bɔkuɔ te bɑ mɔ̀ Mɛɡido. Adɑmɑ bɑǹ bu kɑmiɛ bu sere ben ɑrumɑni ɡɑɑ ɡurɑ. Bɑɑ sii ɡeesu bɑǹ wɑ bɑ sue.

²⁰Wɔllun diyɑ kperi yi kɑ Siserɑ tɑbu kuɑ. Yi wɑ̃ɑwɑ yin swɛɛ sɔɔ sɑɑ ye yi kɑ nùn sɑnnɑmɔ.

²¹Kisionin dɑɑru te tɑ wɑ̃ɑ yellun di, ten nim mu seewɑ mu bu ɡurɑ. Su se su tɑbu wɔri kɑ wɔruɡɔru.

²²Siserɑn tɑbu kowobu bɑ duki doonɑ. Ben dumin nɑɑsun wɔkinu nɔɔrɑ.

²³Yinni Gusunɔn ɡɔrɑdo u ɡeruɑ u nɛɛ, i Mɛrosi bɔ̃rusio, i yen tɔmbu bɔ̃rusio. Domi bɑǹ nɛ kɑ wɔruɡɔbɑ sɑnnu bu kɑ Yinni Gusunɔ somi.

²⁴Kɑɑ domɑru wɑ, Yɑɛli, Hebɛɛ Kenin kurɔ. Kɑɑ domɑru wɑ, Yɑɛli, n kere kurɔbu ɡɑbu be bɑ wɑ̃ɑ kunɔ.

²⁵Siserɑ u nun nim bikiɑ, mɑ ɑ nùn bom wɛ̃. A kɑ nùn nɑɑ bom ɡum nɑɑwɑ ɡbɛ̃ɛ bɛɛrɛɡiru sɔɔ.

²⁶A kurun sii dɛkɑ suɑ kɑ nɔm dwɑru. Mɑ ɑ mɑtɑlɑkɑ suɑ wunɛn nɔm ɡeuɔ. A Siserɑ kpɑre ɑ win bɑɑ sɑburosu yɑburɑ.

²⁷Siserɑ u dwiiyɑ u kpunɑ wunɛn nɑɑsɔ. Mi u kpĩ mi, miyɑ u ɡbiisi.

²⁸Siserɑn mɛro u mɛɛrɑ fɛnɛntin di u nɔɔɡiru suɑ u nɛɛ, ɑmɔnɑ win tɑbu kɛkɛ yɑǹ kɑ tunumɛ. Mbɑ n kuɑ win dumi yi kɑ tɛ mɛ.

²⁹Win bwɑ̃ɑ bwisiɡibɑ nùn sɔ̃ɔwɑ bɑ nɛɛ, bɑ ɑrumɑni ɡurɑ bɑ bɔnu mɔ̀wɑ, kpɑ tɑbu kowo bɑɑwure u wɔndiɑ turo ǹ kun mɛ yiru suɑ. Siserɑ u beku ɡobiɡinu suɑmɔ win tiin sɔ̃, kɑ yɑbe ni bɑ sɔmɑ dokeɑ. N deemɑ mɛyɑ win mɛro u mɑɑ tii sɔ̃ɔmɔ.

³¹Yinni Gusunɔ, ɑ de wunɛn yibɛrɛbɑ kpuro bu ɡbi nɡe Siserɑ. Adɑmɑ be bɑ nun kĩ, bɑ n bɑllimɔ nɡe sɔ̃ɔ wii wɔllun sɔ̃ɔ. Yen biruwɑ tem mɛ, mu bɔri yɛndu wɑ wɔ̃ɔ weeru.