Read bariba Sɑmuɛli I 27 Bible Online

Sɑmuɛli I 27 - bariba bible

Sɑmuɛli I 27

¹Yenibɑn biru, Dɑfidi u tii sɔ̃ɔwɑ u nɛɛ, sɔ̃ɔ teeru Sɔɔlu u koo mɑn nɔmɑ turi u ɡo. Yen sɔ̃, n burɑm bo n dukɑ yɑkurɑ minin di n kpikiru dɑ Filisitibɑn temɔ kpɑ Sɔɔlu u ku mɑɑ mɑn kɑsu Isirelibɑn tem kpuro sɔɔ. Nɡe mɛyɑ kon kɑ wɑ n kisirɑ win nɔmɑn di.

²Yerɑ Dɑfidi u seewɑ wi kɑ win tɑbu durɔbu nɑtɑ (600) bɑ dɑ Akisi, Mɑɔkin biin mi. Akisi wi, u sɑ̃ɑwɑ Gɑtin sunɔ.

³Durɔ win miyɑ u wɑ̃ɑ kɑ win tɔmbu nɑtɑ ye, ben bɑɑwure kɑ win kurɔ kɑ bibu. Dɑfidin kurɔbu yiru Akinɔɑmu, Yisirɛɛliɡii, kɑ Abiɡɑli, Kɑɑmɛliɡii, Nɑbɑlin ɡɔmini, bɑ mɑɑ wɑ̃ɑ kɑ wi.

⁴Sɑɑ yerɑ bɑ dɑ bɑ Sɔɔlu sɔ̃ɔwɑ mɑ Dɑfidi u kpikiru suɑ u wɑ̃ɑ Gɑtiɔ. Mɑ Sɔɔlu u nùn deri sɛ̃ɛ, u ǹ mɑɑ kɑsu u nùn ɡo.

⁵Sɔ̃ɔ teeru Dɑfidi u Akisi sɔ̃ɔwɑ u nɛɛ, ɑ mɑn durom kuo, ɑ de n dɑ n sinɑ bɑru kpɑɑru ɡɑrun mi. Domi nɑ ǹ kĩ nɑ n wɑ̃ɑ kɑ wunɛ sɑnnu wunɛn tiin wuu mini.

⁶Yen tɔ̃ɔ terɑ Akisi u nùn wuu ɡe bɑ mɔ̀ Sikilɑɡi wɛ̃. Yen sɔ̃nɑ ɡɑ kuɑ Yudɑbɑn sinɑ boko wi u bɑndu diiɡuu sere kɑ ɡisɔ.

⁷Mɑ Dɑfidi u wɑ̃ɑ bɑru kpɑɑru mi sere n kɑ kuɑ wɔ̃ɔ tiɑ kɑ suru nnɛ.

⁸Min diyɑ wi kɑ win tɔmbu bɑ rɑ yɑri bu Gesuribɑ kɑ Girisiɡibu kɑ Amɑlɛkibɑ wɔrɑɑ de. Domi tɔn beyɑ bɑ wɑ̃ɑ Suriɔ n kɑ ɡirɑri Eɡibitin temɔ sɑɑ yellun di.

⁹Dɑfidi kɑ win tɑbu kowobu bɑ̀ n duɑ tɔn ben wuu ɡɑɡu sɔɔ, bɑ rɑ ɡen tɔmbu ɡowɑ mɑm mɑm, kurɔbu kɑ durɔbu, kpɑ bu ben yɑ̃nu ɡurɑ kɑ ben yɑɑ sɑbenu, niyɑ yɑ̃ɑnu kɑ kɛtɛbɑ kɑ kɛtɛkunu kɑ yooyoosu. Yen biru kpɑ bu ɡɔsirɑ Akisin mi.

¹⁰Yerɑ Akisi u rɑ bu bikie u nɛɛ, mɑnɑ i ɡisɔ wɔrɑɑ dɑ. Kpɑ Dɑfidi u nùn wisi u nɛɛ, sɑ dɑwɑ Yudɑn tem sɔ̃ɔ yɛ̃sɑn nɔm dwɑru ɡiɑ. Gɑsɔ kpɑ u mɑɑ nɛɛ, sɑ dɑwɑ Yerɑmɛɛlibɑn tem sɔ̃ɔ yɛ̃sɑn nɔm dwɑru ɡiɑ. Gɑsɔ kpɑ u mɑɑ nɛɛ, Kenibɑn tem sɔ̃ɔ yɛ̃sɑn nɔm dwɑru ɡiɑ.

¹¹Dɑfidi kɑ win tɔmbu bɑ̀ n wɔrɑ ye dɑ, wuu ɡe bɑ wɔri bɑ rɑ ɡen tɔmbu ɡowɑ mɑm mɑm. Bɑɑ tɔn turo bɑ ku rɑ deri wɑsiru, u sere nɑ Gɑtiɔ u Akisi sɔ̃ u nɛɛ, ɑmɛni kɑ ɑmɛniwɑ Dɑfidi kɑ win tɔmbu bɑ rɑ ko. Nɡe mɛyɑ Dɑfidi u kuɑ sɑɑ ye u wɑ̃ɑ Filisitibɑn tem mi.

¹²Mɑ Akisi u nùn nɑɑnɛ kuɑ u nɛɛ, Isirelibɑrɑ Dɑfidi u mɔru seeyɑmɔ. Yen sɔ̃, u ko n sɑ̃ɑwɑ nɛɡii sere kɑ bɑɑdommɑɔ.