Read basketo ማ̈ቶ̈ሳ 11 Bible Online

ማ̈ቶ̈ሳ 11 - basketo bible

ማ̈ቶ̈ሳ 11

¹ዬሱ̈ሲ ፌ ታ̈ማ̈ራን ታ̈ጶ ና̈ምኣንቦ ኪ̈ቲ̇ን ኢሚ̇ ዉርሲኖፖ ዎሃ ታማ̈ርሳንዳብኬ ሳባ̇ካንዳቦ ኢና ኡክ ዎ ካታማን ጋርታ̇ ሉኪ̇ዴ።

²ዪኒ̇ባራ ጻማ̇ቂዛ ዋ̈ኒ̇ሲ ቃሺ ኣ̈ል ዎዶሪ ክርስቶ̈ሲ ኦ̈ኖ ኦ̈ሳን ሲስካ̇ሪ ፌ ታማ̈ራን ጋርታ̇ፖ ናምኣን ዬሱ̈ሳክ ኪ̈ቲ̇ ሚሻሪ፥

³“ዬይሬ ጌዪ ና̈ጊ ዎ ክርስቶ̈ሲ ኔ̈ናቤ ዎይ ኑ ሜላ ኣስ ና̈ጋኔ?” ጌይዴ።

⁴ዬሱ̈ሳር ኢንታ̇ኮ “ሉካ̇ሪ ዪንቲ̇ ሲስካ̈ዚንዲኬ ዪንቲ̇ ቤቃ̇̈ዚን ዋ̈ኒ̇ሳብ ሶ̈ሊብቴ̇፦

⁵ኣ̈ፊ ዎባ̇ን ቤቂ̇̈ሬ፣ ቶሂ ዎባ̇ን ዬ̈ሬ፣ ሹያ ባሮን ፋጺ̈ሬ፣ ዋይ ዱላ̇ን ሲስኪ̇̈ሬ፣ ዓይቂ̇ኖን ዓይቃ ጋርታፖ ዲንዲ̈ሬ፣ ዎርባያንቦ ጾ̈ሳ̇̇ ዎጛላ ሳባ̇ኪንቲ̈ሬ፤

⁶ታ̈ና ሲባ̈ሶ ኣሲ ኣንጂንቲኖ̈ዳ” ጌይዴ።

⁷ዋ̈ኒ̇ሳ ታማ̈ራን ሉኪ̇ኖፖ ዎሃ ዬሱ̈ሲ ዎርዣ̈ቦ ዋ̈ኒ̇ሳ ባዝ ሶ̈ሊ̈ርዶሪ “ዪንቲ̇ ዚቃንታ̇ ባራሃ ጋርታ̇ ዋ̈ኒ̇ሳክ ኣብዝ ቤቃ̇ንዳ ጌዪ ሉኪ̇ና? ኣይጊ ኤንኢሲዝ ሾምባቂንዲፌ̈ን ጌዳክ ዓኒክ ጌይዝ ኣስ ቤቃ̇ንዳ̇ብ ሉኪ̇ና?

⁸ዎይ ኮሽ ቆይሲዝ ኣፊላ ማኢኖ ኣስ ቤቃ̇ንዳቤ̇? ኮሽ ቆይሲዝ ኣፊላ ማኢኖን ካ̈ቲንታ̇ን ኣ̈ል ዎ።

⁹ዓት ዪዶኮ ዪንቲ̇ ኣብዝ ቤቃንዳብ ሉኪ̇ና? ናቢ ቤቃ̇ንዳብቤ? ኣ ዪንቲ̇ ቤቂ̇ኖ̈ዲ ኢ ናቢፓ̇ር ሺ̈ሬ።

¹⁰‘ታ̈ኒ ኔ ቲ̈ኒን ሉካ̇ሪ ኔ ጎይሚን ኮሺንቺ̇ዝ ቴ ኪ̈ታ ኣስ ኔ ቲ̈ን ሚሻንዳ̇’ ጌዪ ኢ ባዝ ጻ̈ፊንቲ̇ኖ ኢያ።

¹¹ቴ ዪንታ̇ክ ኪን ጋ̈ሬ ሳ̈ዝ ጋልዳ̇ ዬሊንቲ̇ኖ ኣሳን ዎይን ጋርታ̇ ጻማ̇ቂዛ ዋ̈ኒ̇ሳፖ ሺዝ ኣሲ ዉርሲ ባዬ̇ ማ̈ቂ̇ናካሬ ጾ̈ሳ̇̇ ካ̈ቲቲን ጋርታ̇ ዎይ̈ፖ ጉጺዛ̈ዲ ዋ̈ኒ̇ሳፖ̇ ሺ̈ሬ።

¹²ጻማ̇ቂዛ ዋ̈ኒ̇ሳ ኬላ̇ፖ ኤ̈̇ሪ ዓታ̇ብ ዬሊ̇ዝ ዲራ̈ስ ጾ̈ሳ̇̇ ካቲ̇ቲን ጋርታ̇ ዎልቃባር ጌላንዳብ ዎይሊንን ቡቲቲኔ ሚ̈ጛር ቡቲቲኖን ኢዞ ዲጚ̈ሬ።

¹³ሙ̈ሳ ማጻ̈ፋንኬ ናባን ዎይ ጻማ̇ቂዛ ዋ̈ኒ̇ሳ ኬል̇ ዬሊ̇ዝ ዲራ̈ስ ጾ̈ሳ̇̇ ካ̈ቲቲ ጎይ ካ̈ያ ሶ̈ሊኔ።

¹⁴ዪዚ ኢንቲ̇ ሶ̈ሊኖን ዪንቲ̇ ኤካ̇̈ንዳብ ኮይዶኮ ኢንቲ̇ ዬይሬ ጌዪ ሶ̈ሊኖ ኤ̈ላ̈ሲ ዪ ዋ̈ኒ̇ሲ ኢያ።

¹⁵ሲስኪ̇ዝ ዋይ ዎ ኣሲ ዪኖ̇ ሲስኮ̇ጋ̈ቤ።

¹⁶“ዓ ዓታባሮ ኣሳ ቴ ኣብዝባር ማይጺሳኖ? ጋቢ ጋልዳ ዶኣሪ ፌ ላጋ̇ን ጼይጋሪ፥

¹⁷‘ኑ ዪንታ̇ብ ዎይሳ ፉጊ̇ን ዪንቲ̇ ዶ̈ጛካ̇ይ ኣቲ̈ዴ፤ ኑ ዪንታ̇ብ ሳን ዪ̈ንቲ ዬ̈ካካ̇ይ ኣቲ̈ዴ’ ጌይዝ ናኣን ማይጺ̈ሬ።

¹⁸ዪና̇ ኢዝፌ̈ን ጻማ̇ቂዛ ዋ̈ኒ̇ሲ ሞ̈ካ̇ይዶርኬ ኡሽካካ̇ይዶ̈ር ዬ̈ይን ዪንቲ̇ ‘ኢ ጋልዳ ኢታ̇ ኣያ̇ና ዎ̈’ ጌይዴ።

¹⁹ታ̈ኒ ኣሳ ናኣ̈ዲ ሙያሙታ̇ኬ ኡሽካ̇ሙታ̇ ዬ̈ይን ‘ዪ̈ዲ ሙንትኬ ኡሽኬ ዶሲዝ ኣሴ! ኢ ቃራጻ ቃጺሲዛንኬ ናጋራንቻ̇ን ላጋ̇’ ጌይዴ ጾ̈ሳ̇̇ ኤሪቲን ዎይ̈ፖ̇ ሺ ማ̈ቂ̇ኖንዳ̇ ፌ ቤይሲኖ ኦ̈ሲምባራ ኤሪንታ̇ዴ።

²⁰ኢናፖ̇ ዬሱ̈ሲ ሜላ ካ̈ታ̇ማን ጋርታ ኦ̈ንቲ̇ኖ ታሚ̇ራ̈ታንፖ ሺ ታ̈ሚ̇ራ̈ታ ኦ̈ንቲ̇ኖ ካታማን ማሪቲ ጌላካ̇ዮኮታ̇ቦ ኢንታ̇ ዪዝ ጌዪ ቦሪ ኤ̈̇ዴ፦

²¹“ኣ̈ሽ ኮራዚን ካታሚንዴ! ኔ̈ና ኣዬ̇፤ ኣ̈ሽ ቤ̈ቴሳይዴ! ኔ̈ና ኣዬ፤ ዪንታ̇ ጋርታ̇ ኦ̈ንቲ̇ኖ ታ̈ሚ̇ራ̈ታን ጢሮ̈ሳኬ ሲዶ̈ና ካታማን ጋርታ̇ ኦ̈ንቲኔፌ̈ንኮ ዎን ኢና ዎ ኣሳን ኣዛ̇ና ኣፊላ ማኢ ፌ ጋሊ̇ን ቡዳ ዲርኪ̇ ዎታሪ ዓኖ̇ ሚን ሚን ማ̈ሪቲ ጌሊ̈ርዶ̈ን።

²²ዪ̈ኮታ̇ቦ ፊርዳ ጋላሲ̇ ዪንታ̇ ጋልዳ̇ ዬ̈ዝ ፊርዲንዳ ጢሮ̈ሳ ጋልዳ̇ኬ ሲዶ̈ና ጋልዳ ዬ̈ዝ ፊርዲምፖ̇ ሺ̈ሬ ጋ̈ር ቴ ዪንታ̇ብ ሶ̈ላ̈ሬ።

²³ኣ̈ሽ ቂፊርና̈ሆ̈ሜ! ኔ ኣፋ ጪላ ዲራ̈ስ ሾክ ሾክ ጋ̈ንዳ̇ብ ኮዪዬ? ጾ̈ሲ̇ ኔ̈ና ጋ̈ና̇ማ ጌልሲ̈ሬ፤ ኔ ጋርታ̇ ኦ̈ንቲ̇ኖ ታ̈ሚ̇ራ̈ታ̈ዲ ዎን ሶዶማ ጋርታ̇ ኦ̈ንቲ̇ኖኮ ካታሚን ኢዛ ዓኖ̇ ዬሊ̇ዝ ዲራ̈ስ ያካ̇ይ ዶኣ̈ርዶ̈ን።

²⁴ዪ̈ኮታ̇ቦ ፊርዳ ጋላስ ሶዶማ ጋልዳ ዬ̈ዝ ፊርዲምፖ̇ ኔ ጋልዳ ዬ̈ዝ ፊርዲን ሺ̈ሬ።

²⁵ዪና̇ ኢዝባራ ዬሱ̈ሲ “ኣፎ ሳ̈ዚምቢኬ ሳ̈ዶ̇ ሳ̈ዚምቦ ጎዳ ቴ ባ̈ባ̈ዶ! ዓኖ̇ ኔ̈ኒ ኤጫንፕኬ ኤራንፖ̇ ጌ̈ሚራ ኤራ ባዮ̇ ዳሻንቦ ቤይሲኖንኮታቦ̇ ቴ ኔ̈ና ጋላታ̈ሬ።

²⁶ኣ ቴ ባ̈ባ̈ዶ! ዓና̇ ኔ̈ብ ዎ ኮሽ ቆፊንዲፌ̈ን ማ̈ቂ̇ኔ።

²⁷ታ ባ̈ባ̈ዲ ታ̈ብ ዎይ ባዝ ኢሚ̇ኔ፤ ባ̈ባ̈ፖ̇ ሜላ ኦ̈ናካር ናኣ ኤሪዛ ባዬ̇፤ ዪና̇ ኢዝፌኒ ናኣ̈ፖ ሜላ ባ̈ባ̈ ኤሪዛ ባዬ̇። ባ̈ባ ኦ̈ናኮ ናኣ̈ዲ ኢባዝ ኤርሳካ̇ይ ኣቴ̇ጌይን ኦ̈ና̈ካር ባ̈ባ̈ ኤራንዳ̇ብ ዳንዳኢባ̈ሴ።

²⁸“ቶ̈ፊ ዪንታ̇ ዴ̈ጻ̇ር ዳ̈ቡሪኖን ዎይ ታ̈ክ ዬብቴ̇! ቴ ዪንታ̇ ሼምፒ̇ቻ̇ንዳ።

²⁹ታ̈ኒ ቴ ቡ̈ዳባራ ኣሽካ̇ኬ ኦቲርቃባሶ ማ̈ቂ̇ኖኮታ̇ቦ ቴ ቃምባ̇ሪን ዪንታ̇ ካ̈ሊ̇ን ጋልዳ̇ ቶ̈ኪ̇ብቴ̇፤ ቴ ጋልዳ̇ፖ ታማ̈ሪብቴ̇፤ ዪንቲ̇ ዪንታ̇ ሼምፒምባሬ ሼምፓ ዲጚ̈ሬ።

³⁰ታ ቃ̈ምባሪንዳ ፋ̈ላ̇፤ ቴ ቶ̈ፊንዳር ዴ̈ጻ̇ባሴ።