Read basketo ማ̈ቶ̈ሳ 16 Bible Online

ማ̈ቶ̈ሳ 16 - basketo bible

ማ̈ቶ̈ሳ 16

¹ፋራሳ̈ዋንኬ ሳዱቃን ዬሱ̈ሳክ ዬ̈ሪ ኢያ ፋታ̇ናንዳብ ኮያሪ ኢ̈ኮ “ኣፋፖ̇ ኑ̈ና ማላ̇ ቤይሳቤ” ጋ̈ሪ ኦይጪ̇ዴ።

²ኢያር ኢንታ̇ኮ፥ [“ኦማ ኣፋ ሳ̈ዚን ዞ̈ቄጌዪን ዪንቲ̇ ቤቃሪ ‘ሳ̈ዚ ኣዊ̈ቲሬ’] ጌዪሬ።

³ማ ሳ̈ዚ ዎንቲ̇ን ጌ̈ሽ ኣፋ ሳ̈ዚን ሻ̈ሪታ ካርቴ̇ጌይንዶ̇ ‘ዓታ̇̈ብ ኢሪ ኬዲ̇̈ሬ’ ጌይሬ። ዪንቲ̇ ኣፎ ሳ̈ዚን ጋልዳ ዎ ማሊ̇ን ቤቃ̇ሪ ‘ዓታ̇ብ ኢሪ ኬዲ̇̈ሬ’ ዎይ ‘ዓታ̇ብ ኣዉቲ̇̈ሬ’ ጌዪ ሶ̈ላንዳ̇ብ ዳንዳኢ̈ርዶሪ፥ ዓና̇ ላይን ጋርታ̇ ማ̈ቂ̇ሙታ̇ ዎ ማላ̇ን ቤቂ̇ሙታ̇ ኢንቲ̇ ኣብዝ ቤይሲ̈ርኮ ዪንቲ̇ ኤሪባ̈ሴ።

⁴ዓታ̇ባሮ ኣማ̇ኒንቲ̇ባ̈ሶ ዉጫ ኣሳን ማላ̇ ቤቃ̇ንዳ̇ብ ኮዪ̈ሬ። ዎቲናካሬ ናባ ዮ̈ና̈ሳ ጋልዳ ዬሊ̇ኖን ማይጻዝ ማሊ̇ምፖ̇ ኣቲ̇ን ሜላ ማላ̇ ኢሚ̇ንቲባ̈ሴ” ጌይዴ። ዪኒ̇ፖ ዎሃ ዬሱ̈ሲ ኢንታ̇ ኣሻ̇ር ሜላ ቤስ̇ ሉኪ̇ዴ።

⁵ዬሱ̈ሳ ታማ̈ራን ጌዳ ባሃ̈ሪን ፊ̈ጚ̈ርዶሪ ሶ̈ላ̇ ኤ̈ካይ ቦቲጚዴ።

⁶ኢያር ኢንታ̇ኮ “ቆፒ̇ብቴ፥ ዪንቲ̇ ፋራሳ̈ዋንኬ ሳዱቃን ሹ̈ሚን ጋልዳ̇ፖ ና̈ጊንቲ̇ብቴ̇” ጌይዴ።

⁷ኢንታ̇ሬ “ኢ ዪኖ̇ ጌይኖንዳ̇ ኑ̈ኒ ሶ̈ላ̇ ኤ̈ካ̇ዮንኮታ̇ቦ ማይጻ̈ሬ” ጋ̈ሪ ዎልዎልኣ ሶ̈ሊንቲ̇ዴ።

⁸ዬሱ̈ሲ ኢንታ̇ ቆፊን ኤራሪ ኢንታ̇ኮ “ዪንቲ̇ ኣማ̇ና ዪንታ̇ብ ጉ̈ጺ̇ኖ ኣሳን! ‘ኢ ዪኖ̇ ጌይኖንዳ̇ ኑ̈ኒ ሶ̈ላ̇ ኤ̈ካ̇ዮንኮታ̇ቦ’ ጋ̈ሪ ኣባብ ዎልዎልኣ ሶ̈ሊንቲ̇̈ራ?

⁹ዓኖ̇ ዬላ̇ራ ዪንታ̇ብ ጌላካ̇ያ? ኢሺ̇ን ሶ̈ሊ̇ን ኢሺ̇ን ሙኩላ ኣሳብ ጊዳራ ሺኖ ዶካ̇ ኣ̈ፊን ሌ̈ማታ ኩም ሺ̈ሺ̇ ዲንኖኮ ዪንቲ̇ ቦቲጚቴ?

¹⁰ዪና̇ ኢዝፌ̈ኒ ታብዛ ሶ̈ሊ̇ን ኦይዲ̇ ሙኩላ ኣሳብ ጊዳራ ሺኖ ዶካ̇ ኣፊን ሌ̈ማታ ኩም ሺ̈ሺ̇ ዲንኖኮ ዪንቲ̇ ቦቲጚቴ?

¹¹ዪዚ ፋራሳ̈ዋንኬ ሳዱቃን ሹ̈ሚን ጋልዳ̇ፖ ና̈ጊንቲ̇ብቴ! ጋ̈ራ ዪንታ̇ብ ሶ̈ሊኖን ሶ̈ላ̇ኮታ̇ቦ ጊዳካ̇ዮን ዎዛርታ̇ር ዪንታ̇ብ ጌላካ̇ይ ኣታ̇?” ጌይዴ።

¹²ኢ ታማራንሬ ዬሱ̈ሲ ኢንታ̇ክ ናጊንቲ̈ብቴ ጌይኖንዳ ፋራሳ̈ዋንኬ ሳዱቃን ታማ̈ርሳዝ ቲሚርቲ̈ን ጋልዳፖዶኬ ሙኒቃ̇ብ ማ̈ቂ̇ዝ ሹሚ ጎይ ጊዳካዮን ዪና̇ ኢዝባራ ኤሪዴ።

¹³ዬሱ̈ሲ ፊልጶ̈ስ ቂሳ̈ራ ጌይዝ ቤስ̇ ጋርታ̇ ዬላ̇ር ፌ ታማ̈ራንኮ “ኣሳን ታ̈ና ኣሳ ናኣ̈ዳ ኦ̈ና ጌይራ?” ጋ̈ሪ ኦይጪ̇ዴ።

¹⁴ኢንታ̇ር ኢ̈ኮ “ፔታ̇ን ፔታ̇ናን ኔ̈ና ‘ጻማ̇ቂዛ ዋ̈ኒ̇ሳ’ ጌይሬ ሜላን ‘ኤ̈ላ̈ሳ’ ጌይሬ ማ ሜላን ‘ኤርማ̈ሳ ዎይ ናባን ጋርታ̇ፖ̇ ፔታ̇ና̈ዳ’ ጌይሬ” ጌይዴ።

¹⁵ዬሱ̈ሲ ኢንታ̇ኮ “ዓት ዪንቲ̇ሽ ታ̈ና ኦ̈ና ጌይራ?” ጌይዴ።

¹⁶ዪና̇ ኢዝባራ ሲሞ̈ን ጴ̈ጥሮ̈ሲ ኢ̈ኮ “ኔ̈ኒ ሜናብ ዶኢዝ ጾ̈ሳ̇̇ ናኣ ክርስቶ̈ሳ” ጋ̈ር ማሂዴ።

¹⁷ዬሱ̈ሳር ኢ̈ኮ “ዮ̈ና ናኣ ሲሞ̈ኖ! ዓኖ̇ ኔ̈ና ቤይሲኖ̈ዲ ኣፋ ዎ ቴ ባ̈ባ̈ዲዶኬ ኣስ ጊዳካዬ። ዪ̈ኮታ̇ቦ ኔ̈ኒ ኣንጂንቲ̇ኖ̈ዳ።

¹⁸ታ̈ና̈ሬ ኔ̈ክ ጋ̈ሬ ኔ̈ኒ ጴ̈ጥሮ̈ሳ ዛ̈ላ̇̈ዳ፥[3] ታ̈ኒ ዓና ዛ̈ሊ̇ን ጋልዳ ቴ ዎ̈ሳ ኬ̈ን ኬ̈ጻ̇ንዳ፤ ዪኖ̇ ዎ̈ሳ ኬ̈ን ዓይቃ̇ ዎልቃር ማ̈ቂ̇ን ኢዞ ጋማንዳብ ዳንዳኢባ̈ሴ።

¹⁹ታ̈ኒ ጾ̈ሳ̇̇ ካቲ̈ቲን ፊርቂዝ ቁልፋን ኔ̈ብ ኢማ̇ንዳ፤ ኔ ሳ̈ዳ̇ ቃቺ̇ኖ ባዚ ዎይ ኣፋ ቃቺንቲ̈ሬ፤ ኔ ሳ̈ዳ ቢሊ̇ኖ ባዚ ዎይ ኣፋ ቢሊንቲ̈ሬ” ጌይዴ።

²⁰ዪኒ̇ፖ ዓኒ ፌ ታማራንኮ “ታ̈ኒ ክርስቶ̈ሳ ማ̈ቂ̇ኖን ኦ̈ባካር ሶ̈ላፒ̇ቴ” ጋ̈ር ኢንታ̇ ኪ̈ቲ̇ዴ።

²¹ዪኒ̇ፖ ኤ̈̇ሪ ዬሱ̈ሲ ፌ ታማ̈ራንኮ፥ ኢ ዬሩሳ̈ላም ሉካ̇ንዳብ ኮሻ̇ዚንዶ̇፥ ኢና ጋዳ ጪጛሻን፣ ቄ̈ሳ ኣላቃንኬ ሙ̈ሳ ሂጋ̇ ታማ̈ርሲዛን ኢ ጋልዳ̇ ሜታ ዬልዚንዶ̇፥ ኢያ ዎዚንዶ̇ ማ̈ቂ̇ናካሬ ዓይዚ̇ ቃምባራ ኢ ዓይቃ ጋርታ̇ፖ̇ ዲንዳዚንዶ̇ ሶ̈ሊ ኤ̈̇ዴ።

²²ጴ̈ጥሮ̈ሲ፥ ዬሱ̈ሳ ጌዳ ዱማ ኢያ ኤ̈ጛሪ ኢ̈ኮ “ጎዳ̈ዶ! ዪ̈ፌ̈ኖ ባዝ ጋ̈ፔ̇፥ ዪ̈ፌ̈ኖ ባዚ ዉርሲ ኔ̈ና ዬሊ̇ባ̈ሴ!” ጋ̈ሪ ኢያ ጎይሊዴ።

²³ዬሱ̈ሲ ጌዳ ቢሪንቲ̇ ጴ̈ጥሮ̈ሳኮ “ኣን ዓ̈ ሴ̈ጣና! ቴ ላፋፖ̇ ጌዳ ፋካ̇ቤ! ኔ̈ኒ ኣሲ ቆፒ̇ዛ̈ዲፌ̈ንዶኬ ጾ̈ሳ̇̇ ቆፓ̇ዚን ቆፓ̇ባሶኮታ̇ቦ ኔ ታ̈ብ ፊ ማ̈ቃ̇ዴ” ጌይዴ።

²⁴ኢናፖ̇ ዬሱ̈ሲ ፌ ታማ̈ራንኮ “ቴ ዎሂን ዬ̇ንዳብ ኮዪዝ ኣሲ ፌ ቆሚ̇ምቦ̇ ቆፓ̇ዚን ዉርሲ ኣሾ̇ጋ̈ቤ፤ ፌ ማስቃሊን ቶ̈ካ̇ሪ ቴ ዎሂን ዬጋ̈ቤ።

²⁵ፌ ሼምፒ̇ን ጋዳ̇ንዳብ ኮዪዝ ኣሲ ዎይ ኢዞ ይሲ̇̈ሬ፤ ፌ ሼምፒ̇ን ቴኮታ̇ቦ ጋ̈ሪ ይሲ̇ዛ̈ዲ ኢዞ ፋ̈ሬ።

²⁶ኣሲ ኣላማ ጋልዳ ዎ ቆሊን ዎይ ቆላሪ ፌ ሼምፒ̇ን ይሴጌይን ኢያ ኣ ማ̈ዳ̇̈ራ? ዎይ ኣሲ ፌ ሼምፒ̇ምቦ ማ̈ቂ̇ዝ ባዝ ኣብዝ ጪጋ̇ንዳ̇ብ ዳንዳኢ̈ራ?

²⁷ታ ኣሳ ናኣ̈ዲ ቴ ባ̈ባ ቦንቺ̇ንባራ፥ ኪታ̇ንቻ̇ንባር ዎልኣ ማ̈ቃር ዬ̈ሬ፤ ዪኖ̇ ኢዝባራ ታ̈ኒ ዎይንቦ ኢንታ̇ ኦ̈ሲንዲፌ̈ን ኢንታ̇ብ ጪጋ̇̈ሬ።

²⁸ቴ ዪንታ̇ክ ኪን ጋ̈ሬ፥ ቴ ኣሳ ናኣ̈ዲ ቴ ካ̈ቲቲን ቦንቺ̇ንባራ ዬ̈ዚን ቤቂ̇ዝ ዲራ̈ስ ዓንዳ ኤቂ̇ኖን ጋርታ̇ፖ ዓይቂ̇ባ̈ሶ ኣሳ̈ን ዎ” ጌይዴ።