Read basketo ማ̈ቶ̈ሳ 2 Bible Online

ማ̈ቶ̈ሳ 2 - basketo bible

ማ̈ቶ̈ሳ 2

¹ሄሮዶ̈ሲ ካ̈ቲ ማ̈ቃ̇ር ጋድ ኣቂሳዝ ላይን ጋርታ̇፥ ዬሱ̈ሲ ጋሊላ ጋዳ̇ ዎ ቤቴሌ̈ም ካታሚን ጋርታ̇ ዬሊንቲ̇ኖፖ̇ ዎሃ ቤ̈ርስ ፋይዲዝ ኤራን ኣዋ̈ፍ ኬሲፖ̇ ዬሩሳ̈ላም ዬ̈ሪ፥

²“ዬሊንቲ̇ኖ ኣይሁድ ካ̈ታ ዎይዲ ዎ? ኑ̈ኒ ኣዋ̈ፍ ኬሲ ጎይ ኢ ቤ̈ርሲ̇ን ቤንቲ̇ን ኢዞ ቤቃ̇ር ኢ̈ቦ ጎሽታ̇ንዳ̇ብ ዬይኔ” ጌይዴ።

³ካ̈ታ ሄሮዶ̈ሲ ዪኖ̇ ሲስካ̇ር ኢ̈ጪ̇ዴ፤ ዬሩሳ̈ላም ካታሚን ጋርታ ዎ ኣሳንር ዎይ ኢባር ዎልኣ ኢ̈ጪ̇ዴ።

⁴ኢናፖ̇ ኢ ቄ̈ሳ ኣላቃንኬ ሙ̈ሳ ሂጋ̇ ታማ̈ርሲዝ ኣሳን ጼይጊ ሺ̈ሻ̇ሪ “ክርስቶ̈ሲ ዬሊንታ̇ዝ ቤሲ̇ን ዎይዲያ?” ጋ̈ር ኦይጪ̇ዴ።

⁵ኢንታ̇ር ኢ̈ኮ፥ 1 “ ‘ኣ̈ሽ ዪሁዳ ጋዳ̇ ዎ ቤቴሌ̈ም ካታሚንዴ፥ 2 ኔ̈ኒ ዪሁዳ ጋዳ̇ ዎ ጴች ካታማንፖ̇ ኣባካር ጉ̈ጻ̇ባሴ። ኣባ ጌዬጌይንዶ፥ ቴ ዎርዣ ኢስሬ̈ላ ናኣን ኣቂሲዝ ኣሲ ኔ ጋርታ̇ፖ̇ ኬስኪ̇̈ሬ’ ጋ̈ሪ ናባ ጻ̈ፊኖኮታ̇ቦ ክርስቶ̈ሲ ዪሁዳ ጋዳ̇ ቤቴሌ̈ም ካታሚን ጋርታ̇ ዬሊንቲ̈ሬ” ጌይዴ።

⁷ዪኒ̇ፖ ዎሃ ሄሮዶ̈ሲ ቤ̈ርስ ፋይዲዝ ኤራን ጋሳ ጎይባር ጼይጋሪ፥ ቤ̈ርሲን ቤንቲ̇ኖ ኬሊ̇ን ኮሺንቺ̇ ኦይጫ̇ር ኤሪዴ።

⁸ሄሮዶ̈ሲ ኤራንኮ “ዪንቲ̇̇ ቤቴሌ̈ም ሉካ̇ሪ ናኣ ዎይዲ ዎኮ ኮሺንቺ̇ ኮያሪ፥ ዲጚኖፖ̇ ዓኒ ታ̈ናር ሉካ̇ራ ኢ̈ብ ጎሽታምፔ̈ኒ ዬ̈ሪ ታ̈ቦ ሶ̈ሊብቴ” ጌይዴ።

⁹ኢንታ̇ር ካ̈ታ ጌይኖን ሲስኪ̇ኖፖ̇ ዓኒ ኬስካ̇ር ሉኪ̇ዴ። ኢንቲ̇ ሉካ̇ምባራ ኣዋ̈ፍ ኬሲ ጋልዳ ኢንቲ̇ ቲ̈ን ቤቂ̇ኖ ቤ̈ርሲን ኢንታ̇ ቲ̈ናራ ናኣ ኣቂላ ዎ ቤሲ̇ን ሉካ̇ር ኤቂ̇ዝ ዲራ̈ስ ኢንታ̇ ቲ̈ኒን ቲ̈ኒን ኣ̈ር ኤ̈ጛር ዬልዴ።

¹⁰ኢንቲ̇ ቤ̈ርሲን ቤቃ̇ር ዎይሊን ኡፋይቲ̇ዴ።

¹¹ኢናፖ̇ ኢንቲ̇ ኬ̈ ጌላምባራ ናኣ̈ዲ ፌ ኢንዲ̇ን ማ̈ራሚባር ዎልኣ ዎዶ̈ን ቤቂ̇ዴ። ኢናፖ̇ ቡቂንታ̇ር ኢ̈ብ ሞ̈ኪንቲ̇ዴ። ማ ፌ ሳ̈ጺኒን ፊርቃ̇ሪ ዎርቃ፣ ኢጻ̈ናኬ ካርባኬ ኢ̈ብ ኪልስ ኢሚ̇ዴ።

¹²ዪኒ̇ፖ ዓኒ ኢንቲ̇ ማ̈ቃ̇ር ሄሮዶ̈ስኮ ሉካካ̇ይፌ̈ኒ ጾ̈ሳ̇̇ ኣይባባር ኢንታ̇ብ ሚ̈ን ሶ̈ሊኖኮታ̇ቦ ሜላ ጎይባር ማ̈ቃ̇ር ፌ ኣ̈ል ሉኪ̇ዴ።

¹³ኤራን ሉኪ̇ኖፖ̇ ዎሃ ጾ̈ሳ̇̇ ኪ̈ታንቻ̇̈ዲ ዮ̈ሴ̈ፋቦ ኣይባባር ቤንታ̇ሪ “ሄሮዶ̈ሲ ናኣ ዎንዳቦ ኮዪዛኮታ̇ቦ ዲንዳራ ናኣዲክ ኢንዲንዲክ ዎልኣ ኤካ̇ራ ጊብጻ ሉካ̇ር ባያቤ። ዎዳ ኔ ዎ ቤሲ̇ን ማ̈ቃ̇ቤ ጋ̈ር ቴ ኔ̈ብ ሶ̈ሊዝ ዲራ̈ስ ኢና ዶኣቤ” ጌይዴ።

¹⁴ዮ̈ሴ̈ፊ ቃም ዲንዳሪ ናኣ̈ዲክ ኢንዲንዲክ ኤካ̇ር ጊብጻ ሉኪ̇ዴ።

¹⁵ሄሮዶ̈ሲ ዓይቂ̇ዝ ዲራ̈ስ ኢና ዶኢዴ። ዪና̇ር ማ̈ቂ̇ኖንዳ̇፥ ጾ̈ሳ̇̇̈ዲ ናቢባራ “ታ̈ኒ ታ ናኣ ጊብጻ ጋዳ̇ፖ̇ ጼይጋዴ” ጌይኖ ቃ̈ሊን ፎቲንታ̇ምፔ̈ኔ።

¹⁶ሄሮዶ̈ሲ ኤራን ኢያ ማቂ̇ኖን ኤራሪ ዎይሊን ጎይሊዴ። ኢ ቤ̈ርሲ̇ን ቤንቲ̇ኖ ኬሊ̇ን ኢንታ ኦይጫ̇ሪ ቲ̈ን ኤሪኖኮታ̇ቦ ኢዞ ፋይዳሪ ቤቴሌ̈ምኬ ኢዝ ቡጊድባር ዎ ሳፋራን ጋርታ̇ ዎይ ዎታዳራ ሚሻሪ ናምኢ ላይፖ̇ ኤ̈̇ር ቶ̈ራ ዎ ኣቲና ናኣን ዎይ ዎሲዴ።

¹⁷ዪና̇ ኢዝባራ ናባ ኤርማ̈ሲ፥ “ዬ̈ፊኬ ዎይሊን ዉይሶ ራ̈ማ ካታሚን ጋርታ̇ ሲስኪ̇ንቲ̇ዴ፥ ራሄ̈ላ ፌ ናኣንቦ ዬ̈ካ̇ዴ፥ ‘ጋርዣቤ’ ጌይናር ኢጻ̇ዴ። ኣባ ጌይን ኢንቲ̇ ዎይ ዓይቂ̇ ዉሪኖኮታ̇ቦ” ጋ̈ር ጻ̈ፊኖ ቃ̈ሊን ፎቲንታ̇ዴ።

¹⁹ሄሮዶ̈ሲ ዓይቂ̇ኖፖ̇ ዓኒ ጾ̈ሳ̇̇ ኪ̈ታንቻ̇̈ዲ ዮ̈ሴ̈ፋቦ ጊብጻ ጋዳ̇ ኣይባባር ቤንታ̇ሪ፥

²⁰“ናኣ ኣቂላ ዎንዳብ ኮዪዝ ኣሳን ዓይቂ̇ኖኮታ̇ቦ ዲንዳራ ናኣ ኢንዲንባር ዎልኣ ኤካ̇ራ ኢስሬ̈ላ ጋዳ̇ ሉካ̇ቤ” ጌይዴ።

²¹ዮ̈ሴ̈ፋር ዲንዳር ናኣ ኢንዲንባር ዎል ኤካ̇ር ኢስሬ̈ላ ጋዳ̇ ማ̈ቂ̇ ሉኪ̇ዴ።

²²ዎቲናካሬ ሄሮዶ̈ስ ቤሲ̇ን ኢ ናኣ ኣርኬሎ̈ስ ጌይዛ ካውቲኖን ሲስካ̇ሪ ዮ̈ሴ̈ፊ ኢና ሉካ̇ንዳብ ኢ̈ጪ̇ዴ። ጾ̈ሳ̇̇ ኢ̈ቦ ኣይባባር ሶ̈ሊኖኮታ̇ቦ ጋሊላ ጋዳ̇ ሉኪ̇ዴ።

²³ኢናፖ̇ ና̈ዝሬ̈ት ካታማ ሉኪ̇ ዶኢዴ። ዪና̇ሬ ናቢባራ “ና̈ራ̈ዲ ና̈ዝሬ̈ታ ኣስ ጌዪንቲ̈ሬ” ዪዝ ጌዪ ሶ̈ሊኖ ቃ̈ሊን ፎቲንታ̇ምፔ̈ኔ።