Read basketo ማ̈ቶ̈ሳ 20 Bible Online

ማ̈ቶ̈ሳ 20 - basketo bible

ማ̈ቶ̈ሳ 20

¹“ጾ̈ሳ̇̇ ካ̈ቲቲንዳ̇ ፌ ዎይና ታ̈ኪልቲ̇ን ጋርሲ̇ን ጪጋ̇ር ኦ̈ሳንዳ̇ቦ ኣስ ኮዪ ጌ̈ሽ ጌላፋ ኬስኪ̇ኖ ና̈ሳ ማይጻ̈ሬ።

²ፔቲ̇ ኣሳብ ፔቲ̇ ጋላስ ኦ̈ኖምቦ̇ ፔቲ̇ ዲና̈ራ ጪጋ̇ንዳ̇ቦ ጋ̈ሪ ሶ̈ሊንቲ̇ኖፖ̇ ዓኒ ኦ̈ዝ ኣሳን ኤኪ̇ ዬ̈ሪ ዎይኒን ጋርታ̇ ኦ̈ሳ ኤይዴ።

³“ና̈ሳ̈ዲ ጌ̈ሽ ዓይ̇ዚ ሳ̈ኣታ ጋልዳ̇ ኬስካ̇ሪ ኦ̈ሳ̇ ባዪዶን ሜላ̇ ጉካ̇ ጋልዳ ኤቂ̇ኖ ሜላ ኣሳን ዲጚዴ።

⁴ኢያር ኢንታ̇ኮ ‘ዪንታ̇ር ሉካ̇ሪ ቴ ዎይና ታኪልቲ̇ን ጋርታ̇ ኦ̈ብቴ ቴ ዪንታ̇ብ ማ̈ቃ̇ዝ ሚ̈ሺን ጪጋ̇ንዳ̇’ ጌይዴ።

⁵ኢንታ̇ር ኦ̈ሲን ቤሲ̇ን ሉኪ̇ዴ። ማ ና̈ሳ ዓታ̇ር ጋላስ ሌሂ ሳኣ̈ታ ጋልዳኬ ሳ̈ካሊ ሳኣ̈ታ ጋልዳ ኬስካ̇ሪ ዪና̇ ኢዝፌ̈ኒ ሜላ ኣሳን ኤኪ̇ ዬ̈ሪ ኦ̈ሳ ኤይዴ።

⁶ማ ጋላስ ታጶ ፔቲ̇ ሳኣታ ጋልዳ ኬስካ̇̇̈ሪ ሜላ ኣሳን ኤቂ̇ንዶ̈ን ዲጛሪ ኢንታ̇ኮ ‘ዪንቲ̇ ዓታ̇̈ቦ ጋላሲ̇ን ዎይ ኦ̈ሳ̇ ባዪ ኣብዛብ ዓይዲ ኤቂ̇ና?’ ጋ̈ር ኢንታ̇ ኦይጪ̇ዴ።

⁷ኢንታ̇ሬ ኢ̈ኮ ‘ኑ̈ብ ጪጋ̇ር ኑ̈ና ኦ̈ሲዝ ኣሲ ያሼ’ ጌይን ኢያር ኢንታ̇ኮ ‘ዓት ዪ̈ዲኮ ዪንታ̇ር ቴ ዎይና ታኪልቲ̇ን ጋርታ̇ ሉካ̇ሪ ኦ̈ብቴ̇’ ጌይዴ።

⁸ሳ̈ዚን ቃሚ̇ንዶን ዎይና ታኪልቲ̇ን ላ̈̈ዲ ኦ̈ዝ ኣሳን ኣላቃ̈ኮ ‘ኦ̈ዝ ኣሳን ጼይጋራ ዎሃ ዉርሲ ጋልዳ ዬ̈ዪ ኦ̈ሳ̇ ኤ̈̇ኖ ኣሳንፖ̇ ኤ̈̇ራ ቲ̈ኖን ዬሊ̇ዝ ዲራ̈ስ ዎ ኣሳንቦ ኢንቲ̇ ኦ̈ኖንኮን ኢንታ̇ብ ጪጋ̇ቤ’ ጌይዴ።

⁹“ታጶ̇ ፔቲ̇ ሳኣ̈ታባር ኦ̈ሳ̇ ኤ̈̇ኖ ኣሳን ዬ̈ሪ ፌ ቆሚ̇ን ቆሚ̇ን ፔቲ̇ ፔቲ̇ ዲና̈ራ ኤኪ̇ዴ።

¹⁰ኢንታ̇ፖ̇ ቲ̈ን ኦ̈ሳ̇ ኤ̈̇ኖ ኣሳን ዬ̈ሪ ኢንታ̇ፖ̇ ሺ ኤኪ̇ዛ ኢንታ̇ብ ማይጺንዶ̈ን፥ ኢንታባር ኢንታ̇ ቆ̈ሚን ቆ̈ሚን ፔቲ̇ ፔቲ̇ ዲና̈̇ራ ኤኪ̇ዴ።

¹¹ኢንቲ̇ ሚ̈ሺ̇ን ኤኪ̇ ማ̈ቂ̇ኖፖ̇ ዓኒ ና̈ሳ ዎይና ታ̈ኪልቲ̇ን ላ̈ ጋልዳ ጉንዲሚሙታ̇፤

¹²‘ዓን ዉርሲ ጋልዳ̇ ዬ̈ሪ ፔቲ̇ ሳኣ̈ታ ሙታ̇ ኦ̈ኔ፥ ኑ̈ኒ ጌ̈ሻ̇ፖ ኤ̈̇ር ኦማ ዬሊ̇ዝ ዲራ̈ስ ኣዋ ሶ̈ልባር ኦ̈ ዳ̈ቡሪ ፌ̈ሽኪ̇ኖን ኑ̈ብ ኢንታ̇ባር ዎልፌ̈ን ዎዛር ጪጋ̇̈ራ?’ ጌይዴ።

¹³“ዎይና ታ̈ኪልቲ̇ን ላ̈ዲ ኢና ኦ̈ኖ ኣሳን ጋርታ̇ፖ̇ ፔታ̇ናኮ ‘ቴ ላጋ̇̈ዶ! ቴ ኣባካር ኔ̈ብ ኢ̈ሲ̇ኖ ባዚ ባዬ̇፤ ኔ̈ናክ ታ̈ናክ ዎልኣ ሶ̈ሊንቲ̇ኖንዳ̇ ፔቲ̇ ጋላሳ̇ቦ ፔቲ̇ ዲና̈ራ ጪጋ̇ንዳ̇ ጋ̈ር ጊዳካ̇ያ?

¹⁴ዪ̈ኮታ̇ቦ ኔ̈ና ዬላ̇ዚን ኤካ̇ር ሉካ̇ቤ። ኔ̈ብ ኢሚ̇ኖንዲፌ̈ን ዓ̈ ና̈ሳ ጋሶባር ኢማ̇ንዳብ ቴ ዶሲኔ።

¹⁵ቴ ሚ̈ሽ ጌ̈ቲንባ̇ር ቴ ኮዪኖ ባዝ ኦ̈ንዳ ዳንዳኣባሳ? ዎይ ታ̈ኒ ሱ̈ቂታካ̇ይ ኢሚ̇ዝ ኣስ ማ̈ቂ̇ኖኮታ̇ቦ ኔ ቃናኣ̈ራ?’

¹⁶“ዪዚ ቲ̈ን ኣ̈̇ኖን ጋስ ማ̈ቂ̇ን ጋስ ዎን ቲ̈ን ኣ̈̇̈ሬ” ጌይዴ።

¹⁷ዪኒ̇ፖ ዓኒ ዬሱ̈ሲ ዬሩሳ̈ላም ሉኪ̇̈ርዶሪ ጎይም ጋልዳ ፌ ታማ̈ራን ታጶ̇ ናምኣን ሙታ̇ ፌ̈ክ ሺ̈ሻ̇ሪ ኢንታ̇ኮ፥

¹⁸“ኑ̈ኒ ዓት ዬሩሳ̈ላም ሉኪ̇̈ሬ፤ ኢና ቴ ኣሳ ናኣ̈ዲ ቄ̈ሳ ኣላቃንኬ ሙ̈ሳ ሂጋ̇ ታማ̈ርሲዝ ኣሳን ኩሽታ̇ ኣ̈ ኢሚ̇̈ንታ̈ሬ፤ ኢንታ̇ሬ ዓይቃ ፊርዳ ቴ ጋልዳ ፊርዲ̈ሬ።

¹⁹ኣይሁድ ዜር ማ̈ቃካ̇ዮ ኣሳንቦ ታ̈ና ኣ̈ ኢሚ̇̈ሬ፤ ኢንታ̇ር ቴ ጋልዳ ቃልዲ፣ ታ̈ና ጋራ̇ፊ፣ ሶቲ̇ ታ̈ና ዎ̈ሬ። ታ̈ናር ዓይ̇ዚ ቃምባር ዓይቃ ጋርታ̇ፖ̇ ዲንዳ̈ሬ” ጌይዴ።

²⁰ኢናፖ̇ ዛብዶ̈ሳ ናኣን ኢንዲንዳ ፌ ናኣንባር ዎልኣ ዬሱ̈ሳክ ዬ̈ራ ኢ ቲ̈ን ቡቂንታ̇ራ ፔቲ̇ ባዝ ፌ̈ብ ኦ̈ምፔን ኢያ ጌሻዴ።

²¹ዬሱ̈ሳር ኢዝኮ “ኔ ኣብዝ ኮያራ?” ጌይዴ። ኢዛር ኢ̈ኮ “ኔ ካ̈ቲቲን ጋርታ̇ ቴ ናኣን ዓን ናምኣን ፔታ̇ና ኔ̈ብ ኡሻች ጎይ ፔታ̇ና ዓዲርስ ጎይ ዶኣምፔ̈ን ዎቲሼ” ጋ̈ዴ።

²²ዬሱ̈ሲ ኢንታ̇ኮ “ዪንቲ̇ ጌሻዝ ባዚን ኣብዝኮ ኤሪባ̈ሴ፤ ቴ ኡሽካዝ ሜታ ጺዊን ዪንቲ ኡሽካ̇ንዳብ ዳንዳኢ̈ራ? ጌይን ኢንታ̇ር ኢ̈ኮ “ኣ ኑ ዳንዳኢ̈ሬ” ጌይዴ።

²³ዬሱ̈ሳሬ ኢንታኮ “ኣ ኪን ቴ ኡሽካዝ ሜታ ጺዊን ዪንቲ̇ ኡሽኪ̈ሬ፤ ዎቲናካሬ ታ̈ቦ ኡሻች ጎይኬ ዓዲርስ ጎይ ዶኣምፔ̈ን ዎቲዛ̈ዲ ታ̈ና ጊዳካ̇ዬ፤ ዪን ቤሳ̇ን ኢሚ̇ንቲዛ̈ዲ ቴ ባ̈ባ̈ ኢንታ̇ብ ጊ̈ጊሲኖ ኣሳንቦ” ጌይዴ።

²⁴ኣቲ̇ኖ ታጳ̇ ኢ ታማራን ዪኖ̇ ሲስካ̇ሪ ናምኣን ኢሻ̈ዳክ ጌ̈ዳዳክ ጋልዳ ዎይሊን ጎይሊዴ።

²⁵ዬሱ̈ሲ ዎይን ፌ̈ክ ጼይጋሪ ኢንታ̇ኮ “ዓና̇ ኣላሚን ጋልዳ ዎ ዎርዣ ኣቂሲዝ ላ̈ን ፌ ዎርዣን ጋልዳ ጎዳ ማ̈ቃ̇ዚንዶ፥ ማ ሲልጣ̈ና ኢንታ̇ብ ዎ ኣሳን ዎርዣ ጋልዳ ፌ ዎልቃ̇ ቤይሳዚን ዪንቲ̇ ኤሪ̈ሬ።

²⁶ዎቲናካሬ ዪንታ̇ ጊዳ̇ ዪ̈ፌን ማ̈ቃ̇ንዳብ ኮሺ̇ባ̈ሴ፤ ዪንታ̇ ጊዳ̇ ጴች ማ̈ቂ̇ ቦንቺንታ̇ንዳ ኮዪዝ ኣሲ ፌ̈ና ዪርክ ዎታሪ ዪንታ̇ብ ኣሽካ̇ራ ማ̈ቆ̇ ጋ̈ቤ።

²⁷ዪንታ̇ ጋርታ̇ ኣላቃ ማ̈ቃ̇ንዳብ ኮዪዝ ኣሲ ዎኮ ዪንታ̇ብ ኣይላ ማ̈ቆ̇ጋ̈ቤ።

²⁸ታ ኣሳ ናኣ̈ዳሬ ኣስ ማ̈ዳ̇ንዳብኬ ዎይሊንን ፋንዳቦ ኢንታኮታ̇ብ ቴ ሼምፒ̇ን ኣ̈ ኢማ̇ንዳብ ዬ̈ዶ̇ኬ ኣሲ ታ̈ና ማ̈ዳ̇ምፔ̈ን ቴ ዬ̈ካ̇ዬ” ጌይዴ።

²⁹ዬሱ̈ሳኬ ኢ ታማ̈ራንኬ ዎልኣ ያ̈ሪካፖ̇ ኬስካ̇ር ሉካ̇ምባራ ዎይሊን ዎርዦ ኢ ዎሂን ዬ̇ዴ።

³⁰ኢና ኣ̈ፊ ዎቢ̇ኖ ናምኢ ኣሲ ጎይ ቡጊድ ዶኢንዶ̈ሪ ዬሱ̈ሲ ዪኒ̇ባራ ኣ̈̇̈ሬ ጋ̈ዚን ሲስካ̇ሪ “ጎዳ̈ዶ! ዳ̈ዊታ ናኣ̈ዶ! ኑ̈ና ማ̈ራቤ!” ጋ̈ር ዉይሲዴ።

³¹ኣሳንር ኢንታ̇ኮ “ዚምዶኢብቴ̇!” ጋ̈ሪ ኢንታ̇ ቆዲ̇ን ኢንቲ “ጎዳ̈ዶ! ዳ̈ዊታ ናኣ̈ዶ! ዋ̈ዴ ኑ̈ና ማ̈ራቤ” ጋ̈ር ጉጃ̇ር ዉይሲዴ።

³²ዬሱ̈ሲ ኤቃ̇ር ኢንታ̇ ጼይጋሪ ኢንታ̇ኮ “ቴ ዪንታ̇ብ ኣብዝ ዎታምፔ̈ን ዪንቲ̇ ኮዪ̈ራ?” ጌይዴ።

³³ኢንታ̇ር ኢ̈ኮ “ጎዳ̈ዶ! ኑ ኣ̈ፊን ቤቃ̇ምፔን ኮዪ̈ሬ” ጌይዴ።

³⁴ዬሱ̈ሲ ኢንታ̇ብ ሚጪ̇ንታሪ ኢንታ̇ ኣ̈ፊን ፊቲ̇ን ኢንታ̇ ኣ̈ፊን ኤሊ̇ባር ቤቃ̇ዴ፤ ኢንታ̇ሬ ኢ ዎሂን ዬዴ።