Read basketo ማ̈ቶ̈ሳ 22 Bible Online

ማ̈ቶ̈ሳ 22 - basketo bible

ማ̈ቶ̈ሳ 22

²“ጾ̈ሳ̇̇ ካቲቲ̇ንዳ ፌ ና̈ኣቦ ኢስ̇ ማስኪ̇ ዬርጋ̇ር ኣስ ጼይጊኖ ካ̈ታ ማይጻ̈ሬ።

³ካ̈ታ̈ዲ ጼይጊንቲ̇ኖ ኣሳን ኢሲ̇ን ጋርታ̇ ዬ̈ምፔ̈ን ኣሳንቦ ሶ̈ሎ ጌዪ ፌ ኣሽካራን ኢንታ̇ክ ሚሺዴ። ዎቲናካሬ ኣሳን ኢሲ̇ን ጋርታ ዬብዳ̇ ጌዪ ኢጺ̇ዴ።

⁴“ካ̈ታ̈ዲ ዓታ̇ር ማሃሪ ‘ጼይጊንቲ̇ኖ ኣሳንኮ ሉካ̇ሪ፤ ዓ̈ዲሼ ኢሳ̇ቦ ማስካ፥ ቴ ጌ̈ንንኬ ዱዲ̇ኖ ቴ ሜሃን ሹካ̇ ዎይ ባዝ ዬርጊ̇ኔ። ዪዚ ኢሲ̇ን ጋርታ̇ ዬብቴ̇ ጋ̈ሪ ሶ̈ሊብቴ̇’ ጌዪ ሜላ ኣሽካራን ጉጃ̇ር ኪ̈ታ̇ር ሚሺዴ።

⁵ዎቲናካሬ ኢንቲ̇ ኢ ጼይሲ̇ን ኣባካር ማይጺሳካ̇ይ ኣሻ̇ሪ ፔታ̇ና̈ዲ ፌ ዎት ጋዳ̇፥ ሜላ̈ዲ ፌ ዛላ ሉኪ̇ዴ።

⁶ማ ኣቲ̇ኖን ኢ ኣሽካራን ኤ̈̇ ቡኪ̇ ዎዴ።

⁷ዪና̇ ኢዝባራ ካ̈ታ̈ዲ ጎይሊሙታ̇ዶር ፌ ዎታ̇ዳ̇ራን ሚሻር ኢ ኣሽካራን ዎኖ ኣሳን ኢንታ̇ ዎሲዴ፤ ኢንታ ካታሚንዳር ታማባር ሚቺሺዴ።

⁸ኢ ዪኒ̇ፖ ዎሃ ፌ ኣሽካራንኮ ‘ዓዲሼ ኢሳ̇ ባዚ ዎይ ዬርጊ̇ንቲ ዉሪኔ፤ ጼይጊንቲ̇ኖ ኣሳን ኢሲ̇ን ጋርታ̇ ዬ̈ንዳቦ ቤይሲኖ ኣስ ማ̈ቂ̇ ቤንታ̇ካ̇ዬ።

⁹ዪ̈ኮታ̇ቦ ጎይ ኮካ̇ ጋልዳ ሉካ̇ሪ ዪንታ̇ብ ቤንቲ̇ኖ ኣስ ዎይ ዓና̇ ኢሲ̇ምቦ ጼይጊብቴ̇’ ጌይዴ።

¹⁰ኢ ኣሽካራንሬ ጎይም ጋልዳ̇ ሉካ̇ሪ ኢ̈ታር ኮሻ̇ር ማ̈ቂ̇ን ፌ̈ብ ቤንቲ̇ኖ ኣስ ጌይዛ ዎይ ሺ̈ሺ̇ን ኢሳ̇ ኬ̈ምባር ኩሚዴ።

¹¹“ዎቲናካሬ ካ̈ታ̈ዲ ጼይጊንታ̇ር ዬይኖ ኣሳን ቤቃ̇ንዳብ ኬ̈ ጌላዚምባራ ኣሳን ጋርታ̇ ኢሳ̇ ኣፊላ ማኣካ̇ዮ ፔቲ̇ ኣሲ ኢና ዎዶን ቤቂ̇ዴ።

¹²ካ̈ታ̈ዲ ኢ̈ኮ “ታ ዳባ̇̈ዶ! ኔ ኢሳ̇ ኣፊላ ማኣካይዶራ ዎዛርታር ዓይዲ ጌሊ?” ጌይን ና̈ሳ̈ዳር ዚም ጌይዴ።

¹³“ካ̈ታ̈ዳሬ ፌ ኣሽካራንኮ ‘ኢ ኩሺንዲክ ኢ ቶሂን ቃቻ̇ሪ ዛ̈ና ሚ̇ን ጋርታ̇ ኢያ ቶጚብቴ̇ ኢና ኢ̈ብ ዬ̈ፊክ ኣቺ̇ ሙንትኬ ማ̈ቂ̇̈ሬ’ ጌይዴ።

¹⁴“ጼይጊንቲ̇ኖ ኣሳን ዎይሊን፤ ማራ̇ጺንቲ̇ኖ ኣሳን ጊላ̇” ጌይዴ።

¹⁵ኢናፖ̇ ፋራሳ̈ዋን ሉካ̇ሪ “ዬሱ̈ሲ ሶ̈ላዝ ሶ̈ሊምባር ኑ ኢያ ዎዛ̈ርታ̇ር ኮራኔ?” ጋ̈ሪ ዎል ዎልኣ ዞሪንቲዴ።

¹⁶ፌ ታማ̈ራን ሄሮዶ̈ሳ ኣሳንባር ዎልኣ ዬሱ̈ሳክ ኪ̈ቲ̇ ሚሻሪ ኢ̈ኮ “ኣስታማ̈ራ̈ዶ! ኔ̈ኒ ኪን ኣስ ማ̈ቂ̇ኖንዲኬ ጾ̈ሳ̇̇ ጎይሚን ኪን ታማ̈ርሳ̇ዚንዶ̇ ኑ ኤሪ̈ሬ። ማ ኔ ኣስ ዎይ ዎልፌ̈ን ቤቂ̇ዛኮታ̇ቦ ኣሳብ ኢ̈ጫ̇ራ ኦ̈ዝ ባዚ ኣባካር ባዬ̇።

¹⁷ዓት ኔ ኑ̈ብ ሶ̈ሊኔ ኔ̈ብ ኣብዝ ማይጺራ? ቄ̈ሳ̈ራብ ጊ̈ራ ጊ̈ራንዳብ ኮሺ̇̈ርቤ ኮሺባ̈ሳ?” ጌይዴ።

¹⁸ዬሱ̈ሲ ኢንታ ዉጪን ኤራሪ ኢንታ̇ኮ “ዪንቲ̇ ኣሳ ቲ̈ን ዪንታ̇ ኮሽ ማይጺሲዝ ኢ̈ት ኣሳን! ታ̈ና ኣባብ ሶ̈ላባር ኮራንዳብ ኮዪ̈ራ?

¹⁹ዪንቲ̇ ጊ̈ራብ ጪጋ̇ዝ ሳንቲ̇ን ዓይ ኤሄ̈ር ታ̈ና ቤይሲንቴ” ጌይን ኢንታ̇ር ኢ̈ብ ፔቲ̇ ሳንቲ̇ ኤኪ̇ ዬይዴ።

²⁰ኢያር ኢንታ̇ኮ “ዓና̇ ሳንቲ̇ን ጋልዳ ዎ ሚሲሊንዲኬ ኢዝ ጋልዳ̇ ጻ̈ፊንቲ̇ኖ ሱሚን ኦያ?” ጋ̈ር ኦይጪዴ።

²¹ኢንታ̇ር ኢ̈ኮ “ቄ̈ሳ̈ራዬ” ጌይን ኢያር ኢንታ̇ኮ፥ “ዓት ዪ̈ዲኮ ቄ̈ሳ̈ራኮን ቄ̈ሳ̈ራብ፥ ጾ̈ሳ̇̇̈ኮን ጾ̈ሳ̇̇̈ቦ ኢሚ̇ብቴ̇” ጌይዴ።

²²ኢንታ̇ር ኢ ሶ̈ላ ዪ̈ባራ ጋራ̇ሚንታ̇ሪ ኢያ ኣሻ̇ር ሉኪ̇ዴ።

²³ሳዱቃን ዓይቂ̇ኖ ኣሳብ ዲንዳ ባዬ̇ ጌዪ ኣማ̇ኒዝ ኣሴ። ፔቲ̇ ጋላሲ ዪን ኣሳን ጋርታ̇ፖ̇ ፔታ̇ን ፔታ̇ናን ዬሱ̈ሳክ ዬ̈ር ኢያ ኦይጪ̇̈ርዶሪ፥

²⁴“ኣስታማ̈ራ̈ዶ! ሚን ሙ̈ሶ ጌይርዶሪ ‘ፔቲ̇ ኣሲ ማጫ̇ ኤካ̇ሪ ፌ ማጪ̇ን ጋልዳ̇ፖ̇ ናኢ ዬላካ̇ይዶር ዓይቄጌይን ኢ ኢና̇ኣዲ ኢ ማጪ̇ን ማሃሪ ኢ ቤሲ̇ን ኢ̈ብ ናኢ ዬሎ ጌይሬ’

²⁵ፔቲ̇ ኢንዲ ናእ ማ̈ቂ̇ኖ ታብዛ ኣሳን ኑ̈ክ ዎዶ̈ን ኢሻ ቲ̈ኖዲ ማጫ̇ ኤካ̇ሪ ናኢ ዬ̈ላካይዶር ዓይቂ̇ን ኢ ኢና̇ኣ̈ዲ ኢ ማጪ̇ን ማሂዴ።

²⁶ናምኢ̈ዳሬ ዓይዚ̈ዳር ሉኪ̇ ታብዚ ዬሊ̇ዝ ዲራ̈ስ ዎይ ኢዞ ማሂ ኤካ̇ሪ ዎይ ናኢ ዬላካ̇ይ ዓይቂ̇ዴ።

²⁷ዉርሲ ጋልዳ ኣሲንዳር ዓይቃ̇ዴ።

²⁸ዪዚ ኣሳን ዪን ዎይ ኢዞ ኤኪ̇ኖኮታ̇ቦ ጊዳክ ዓይቃ ጋርታ̇ፖ̇ ዲንዳ ቃምባራ ዪን ታብዛን ጋርታ̇ፖ ኢዛ ዎ̈ቦ ማጫ̇ ማ̈ቃ̇̈ራ?” ጌዪ ኦይጪ̇ዴ።

²⁹ዬሱ̈ሳር ኢንታ̇ኮ “ዪንቲ̇ ጌ̈ሻ̇ ማጻ̈ፋኬ ጾ̈ሳ̇̇ ዎልቃ̇ ኤሪባ̈ሶኮታ̇ቦ ባሊቲ̇̈ሬ።

³⁰ኣሲ ዓይቃ ጋርታ̇ፖ̇ ዲንዲኖፖ̇ ዓኒ ኣፎ ኪ̈ታንቻ̇ንፌ̈ን ማ̈ቂ̇̈ርዶኬ ማጫ̇ ኤኪ̇ባ̈ሴ ማጫ̇ር ኢስቲባሴ።

³¹ዓይቂ̇ኖ ኣሲ ዲንዳዝ ጎይን ጾ̈ሲ̇ ዪንታ̇ብ ሶ̈ሊኖን ናባ̇ቢ ቤቃካ̇ያ? ዪና̇ሬ

³²‘ታ̈ኒ ኣብራሃ̈ማ ጾ̈ሲ̇፣ ዪሳ̈ቃ ጾ̈ሲ̇፣ ዓይቆ̈ባ ጾ̈ሴ̇’ ጋ̈ዚንዶ። ጾ̈ሳ̇̇̈ዲ ሼምፓባሮን ጾ̈ስዶኬ ዓይቂ̇ኖን ጾ̈ስ ጊዳካ̇ዬ” ጌይዴ።

³³ዎርዣ̈ዳሬ ዪ ሲስካ̇ሪ ኢ ቲሚርታ̇̈ባራ ዎይሊን ጋራ̇ሚንቲ̇ዴ።

³⁴ዬሱ̈ሲ ሳዱቃን ሶ̈ሊዝ ባዝ ይሲ̇ኖን ሲስካ̇ሪ ፋራሳ̈ዋን ዎልኣ ፔታ̇ን ሺ̈ቂዴ።

³⁵ኢንታ̇ ጋርታ̇ፖ̇ ፔታ̇ና ሙ̈ሳ ሂጋ̇ ኤሪዛ̈ዲ ዬሱ̈ሳ ፋ̈ጪ̇ ቤቃ̇ንዳብ ኮያሪ ኢ̈ኮ፥

³⁶“ኣስታማ̈ራ̈ዶ! ሂጋ̇ ዎይፖ̇ ሺዝ ኪቲ̇ን ዎኒ̇ያ?” ጌይዴ።

³⁷ዬሱ̈ሳር ኢ̈ኮ “ ‘ኔ ጎዳ ጾ̈ሳ̇̇̈ዳ ፎቲ ቡ̈ዳባራ፣ ፎቲ ሼምፓባራ፣ ፎቲ ቆፊባራ ዶሳቤ’

³⁸ዪና̇ ቲ̈ኖንዲኬ ዎይፖ̇ ሺዝ ኪ̈ቲን ኢዞ።

³⁹ናምኢንዳሬ ዪኖ̇ ኢዛ ማይጻ̈ሬ ኢዛሬ ‘ኔ ኔ̈ና ካዚንዲፌ̈ኒ ኣስ ዎይ ካቤ’ ጋ̈ዚንዶ።

⁴⁰ሙ̈ሳ ሂጊ̇ንዲኬ ናባን ቲሚርታ̇ን ዎይ ናምኢ ኪታ̇ን ዓን ጋልዳ̇ ኤቂ̇ኔ” ጌይዴ።

⁴¹ፋራሳ̈ዋን ዎልኣ ሺ̈ቃር ዎዶን ዬሱ̈ሲ ኢንታ፥

⁴²“ዪንቲ̇ ክርስቶ̈ሳ ባዝ ኣብዜ ጌይራ? ዪንቲ̇ ኢያ ኦ ናኤ ጌይራ?” ጌይን ኢንታ̇ሬ ኢ̈ኮ “ኢ ዳ̈ዊታ ናኤ” ጋ̈ር ማሂዴ።

⁴³ዬሱ̈ሳር ኢንታ̇ኮ “ዓት ዪ̈ዶኮ ዳ̈ዊቲ ጌ̈ሻ̇ ኣያ̇ና ኢያ ቲ̈ኒን ሶ̈ሊ̈ርዶሪ ዎዛ̈ርታ̇ር ኢያ ‘ጎዳ̈ዶ’ ጌዪ ጼይጌ? ኢ ጌይርዶሪ፥

⁴⁴“ ‘ጾ̈ሲ̇ ቴ ጎዳ̈ኮ “ቴ ኔ ጻላታን ኔ̈ብ ኣ̈ ኢሚ̇ዝ ዲራ̈ስ ዓንዳ ታ̈ብ ኡሻች ጎይ ዶኣቤ ጌይዴ’ ጌይኔ።

⁴⁵ዪዚ ኢ ዳ̈ዊቲ ፌ ቆሚ̇ን ኢያ ‘ጎዳ̈ዶ’ ጌዪ ጼይጊ̈ርኮ ክርስቶ̈ሲ ዎዛርታ̇ር ኢ̈ብ ናኢ ማ̈ቃ̇ንዳብ ዳንዳኢ̈ራ?” ጌይዴ።

⁴⁶ፔቲ̇ ቃ̈ላ ኦ̈ናካር ኢ̈ብ ሶ̈ሊ ማሂኖ ኣሲ ባዬ̇፤ ማ ዪኖ̇ ኢዝ ቃሚ̇ምፖ̇ ኤ̈̇ር ኢያ ኣባካር ኦይች ኦይጫ̇ንዳብ ዳንዳኢኖ ኣሲ ኦ̈ናካር ባዬ̇።