Read basketo ማ̈ቶ̈ሳ 25 Bible Online

ማ̈ቶ̈ሳ 25 - basketo bible

ማ̈ቶ̈ሳ 25

¹ዬሱ̈ሲ ኢንታ̇ኮ “ዪና̇ ኢዝባራ ጾ̈ሳ̇̇ ካቲ̇ቲንዳ ፌ ፎኢንን ፌ ኩሽታ ኤ̈̇ሪ ኢሲ̇ ሞኪ̇ ኤካ̇ንዳብ ጊ̈ጊንቲ̇ኖ ታጳ̇ ዉዲራን ማይጻ̈ሬ።

²ኢንታ̇ ጋርታ̇ፖ ኢሺ̇ናን ቦ̈ዛ ኢሺናን ኤጫ።

³ቦ̈ዛ ዉዲራን ፌ ፎ̈ኢንን ፌ ኩሽታ ኤ̈̇ናካሬ ኢንታ̇ ፎ̈ኢንምቦ ማ̈ቂ̇ዝ ጉጃ ላ̈ምባ[6] ኤ̈ካ̇ዬ።

⁴ኤጫ ዉዲራን ፌ ፎ̈ኢምቦ ማ̈ቂ̇ዝ ጉጃ ላ̈ምባ ኢቃ̈ባር ኤ̈̇ኔ።

⁵ኢሳ̇̈ ዬ̈ካይ ጋምኢን ዎይን ሱ̈ርሲ ኢንታ̇ክ ዬ̈ይን ሱርቂ̇ዴ።

⁶“ቃም ጊዲ̇ቢላ ማ̈ቂ̇ንዶ̈ን ‘ኢሳ̇ ዬይኔ! ኬስካ̇ር ሞኪ̇ብቴ!’ ዪዝ ጌይዝ ዉይሳ ሲስኪንቲ̇ዴ።

⁷ዪና̇ ኢዝባራ ዉዲራን ዎይ ዲንዳ̇ሪ ፌ ፎኢን ጊ̈ጊሲዴ።

⁸ቦ̈ዛ ዉዲራን ኤጫንኮ ‘ኑ ፎኢንን ቴይቃ̇ንዳብ ዎቲዛኮታ̇ቦ ዪንታ̇ ላ̈ምቢ̇ን ጋልዳፖ ኑ̈ብ ኢማ̇ንቲሼ ዋ̈ዲቴ̇’ ጌይዴ።

⁹ኤጫ ዉዲራን ‘ኑ̈ብኬ ዪንታ̇ቦ ዎልኣ ጊዲዝ ላ̈ምቦ ኑ̈ክ ባዬ̇፥ ዪ̈ፖ̇ ዪንቲ̇ ዎጚዝ ቤስ̇ ሉካ̇ሪ ዪንታ̇ብ ማ̈ቂ̇ዝ ላ̈ምባ ዎ̈ጚብቴ̇’ ጋ̈ር ማሂዴ።

¹⁰ቦ̈ዛ ዉዲራን ላ̈ምባ ዎ̈ጛንዳብ ሉኪ̇ን ኢሳ̇ ዬይዴ። ጊ̈ጊንታ̇ር ዎ ዉዲራን ኢሳ̇̈ባራ ኢሳ̇ ኬ̈ ጋርታ̇ ጌሊዴ፤ ካራ̈ዳር ዪብጺንቲ̇ዴ።

¹¹“ጋስ ኣቲ̇ኖ ዉዲራን ዬ̈ሪ ‘ጎዳ̈ዶ! ጎዳ̈ዶ! ካሪን ኑ̈ብ ፊርቂ̇ሼ ዋ̈ዴ!’ ጌይዴ።

¹²“ኢያር ኢንታ̇ኮ ‘ቴ ዪንታ̇ክ ኪን ጋ̈ሬ፥ ቴ ዪንታ̇ ኤራባሴ!’ ጋ̈ሪ ማሂዴ።

¹³“ዪዚ ዪንቲ̇ ቃሚ̇ንዲክ ሳኣ̈ቲንዲክ ኤሪባ̈ሶኮታ̇ቦ ሚ̈ጛር ና̈ጊብቴ” ጌይዴ።

¹⁴“ጾ̈ሳ̇̇ ካ̈ቲቲንዳ̇ ፌ ኣሽካራን ጼይጋሪ ፌ̈ብ ዎ ቆሊን ዓዳራባር ኢማ̇ሪ ሜላ ጋዳ̇ ሉካ̇ንዳብ ኬስኪ̇ኖ ፔቲ̇ ና̈ሳ ማይጻ̈ሬ።

¹⁵ና̈ሳ ዪ̈ዲ ፌ ኣሽካራንቦ ኢንቲ̇ ዳንዳኣዚንዲፌ̈ኒ ፔታ̇ና̈ብ ኢሺ̇ን ሙኩላ ቢራ፣ ፔታ̇ናቦ ና̈ምኢ ሙኩላ ቢራ፣ ፔታ̇ና̈ቦ ፔቲ̇ ሙኩላ ቢራ ኢማ̇ሪ ፌቆሚ̇ን ሜላ ጋዳ̇ ሉኪ̇ዴ።

¹⁶ኢሺ̇ን ሙኩላ ቢራ ኤኪ̇ኖ̈ዲ ኤሊ̇ባር ሉካ̇ሪ ዛልኣሪ ሜላ ኢሺ̇ን ሙኩላ ቢራ ቲርፊሲዴ።

¹⁷ናምኢ ሙኩላ ቢራ ኤኪ̇ኖ̈ዲ ዪና̇ ኢዝፌ̈ኒ ዛልኣሪ ሜላ ናምኢ ሙኩላ ቢራ ቲርፊሲዴ።

¹⁸ፔቲ̇ ሙኩላ ቢራ ኤኪ̇ኖ̈ዲ ሉካ̇ሪ ሳ̈ዝ ቦ̈ካ̇ሪ ፌ ላ̈ ሚ̈ሺ̇ን ሳ̈ዳ̇ ዱ̈ኪ̇ዴ።

¹⁹“ዎይሊን ኬላ̇ፖ̇ ዎሃ ዪን ኣሽካራን ላ̈̈ዲ ዬ̈ሪ ኢንቲ̇ ኤኪ̇ኖ ሚ̈ሺ̇ንባር ኣብዝ ኦ̈ኖኮ ኤራንዳ̇ቦ ኢንታ̇ ጼይጊዴ።

²⁰ኢሺ̇ን ሙኩላ ቢራ ኤኪ̇ኖ ኣሽካራ̈ዲ ፌ ላ̈ኮ ሜላ ኢሺ̇ን ሙኩላ ቢራ ኤኪ̇ ዬ̈ሪ ‘ላ̈! ኔ ታ̈ብ ኢሺ̇ን ሙኩላ ቢራ ኢሚ̇ንዶ̈ን ዓት ታ̈ኒ ዓ̈ዲሼ ሜላ ኢሺ̇ን ሙኩላ ቢራ ቲርፊሲኔ’ ጌይዴ።

²¹“ኢ ላ̈̈ዳር ኢ̈ኮ ‘ዎይኣ! ኔ̈ኒ ኣማ̇ኒንቲ̇ኖ ኮሻ̇ ኣሽካራ! ኔ ጊላ̇ ባዛቦ ኣማ̇ኒንቲኖኮታ̇ቦ ዎይሊን ባዝ ጋልዳ ቴ ኔ̈ና ሹ̈ማንዳ̇፤ ዪዚ ዓይ ዬ̈ቤ ኔ ላ̈ባር ዎልኣ ኡፋይታ̇ንዳብ ዓይ ጌላቤ!’ ጌይዴ።

²²“ናምኢ ሙኩላ ቢራ ኤኪ̇ኖ ና̈ሳ ዬ̈ሪ ‘ላ̈! ናምኢ ሙኩላ ቢራ ኔ ታ̈ብ ኢሚ̇ኔ፥ ዓት ዓ̈ዲሼ ሜላ ናምኢ ሙኩላ ቢራ ታ̈ኒ ቲርፍሲኔ!’ ጌይዴ።

²³“ኢ ላ̈̈ዲ ኢ̈ኮ ‘ዎይኣ! ኔ̈ኒ ኣማ̇ኒንቲኖ ኮሻ̇ ኣሽካራ። ኔ̈ኒ ጊላ̇ ባዛቦ ኣማ̇ኒንቲ̇ኖኮታ̇ቦ ዎይሊን ባዝ ጋልዳ ቴ ኔ̈ና ሹ̈ማንዳ፤ ዓይ ዬ̈ራ ኔ ላ̈ባር ዎልኣ ኡፋይታንዳብ ዓይ ጌላቤ!’ ጌይዴ።

²⁴“ፔቲ̇ ሙኩላ ቢራ ኤኪ̇ኖ̈ዲ ዬ̈ሪ ‘ላ̈! ኔ ዜርቃካ̇ዮ ቤሳ ጋልዳፖ ቴይሲዝ፥ ካ̈ ላ̈ላ̇ካ̇ዮ ቤሳ̇ ጋልዳፖ ሱ ሺ̈ሺ̇ዝ ዉጫ ኣስ ማ̈ቂ̇ኖን ቴ ኤሪኔ።

²⁵ዪ̈ኮታ̇ቦ ቴ ኢ̈ጫ̇ራ ኔ ሚ̈ሺ̇ን ኤ̈ጛር ሳ̈ዝ ቦ̈ካ̇ር ዱ̈ካ̇̈ዴ፤ ዪዚ ኔ ሚ̈ሺን ዓኒ̇ሼ!’ ጌይዴ።

²⁶“ኢ ላ̈ዳር ኢ̈ኮ ‘ኣን ኔ ዉጫኬ ቦ̈ዛ ኣሽካራዲ! ቴ ዜርቃካ̇ዮ ቤስ̇ ጋልዳፖ ቴይሳዚንዶ፥ ካ ላ̈ላ̇ካ̇ዮ ቤስ̇ ጋልዳፖ ሺ̈ሻ̇ዚን ኔ ኤሪኖኮ፥

²⁷ኔ ቴ ሚ̈ሺ̇ን ቲርፊሲዝ ኣሳንቦ ኢሚ̇ኖኮ ቴ ዬ̈ራ ቴ ሚ̈ሺ̇ን ዬላባር ዎልኣ ኤካ̇ርዶን ኣታ̇ዴ።

²⁸ዪዚ ሚ̈ሺ̇ን ኢ ጋልዳፖ ኤካ̇ሪ ታጳ̇ ሙኩላ ቢራ ዎ̈ቦ ኢሚ̇ብቴ።

²⁹ቲ̈ን ኣባካ ዎቦ ጉጂንቲ̈ሬ፥ ኢ̈ቦ ዎይሊ̈ሬ፤ ባዮ̇ ና̈ሳ ጋልዳፖ ሜላ ኣቲን ኢ̈ብ ዎ ጊሊ̇ን ኢዛር ኣታካይ ኢ ጋልዳፖ̇ ኤኪ̇ንታ̇ሬ።

³⁰ዓ ፋባ̈ሶ ኣሽካ̇ራ ዛ̈ና ሚ̇ን ጋርታ̇ ኬሳ̇ር ኢያ ቶጚብቴ̇። ኢና ኢ̈ብ ዬ̈ፊኬ ኣቺ̇ ሙንት ማ̈ቃ̇̈ሬ’ ጌይዴ።

³¹“ታ ኣሳ ናኣ̈ዲ ቴ ኪ̈ታ̇ንቻ̇ ዎይንባር ቦንችባር ዬ̈ራ ቴ ቦንቻ̇ ዙፋ̈ና ጋልዳ ዶኣ̈ሬ።

³²ዎርዣ ዎይ ቴ ቲ̈ን ሺ̈ቂ̈ሬ፥ ጋይጫኖ ዶራን ዶርቲ̇ ጋርታ̇ፖ ቆራዚንዲፌ̈ን ታ̈ናር ዎርዣን ጋርታ̇ፖ̇ ቆራ̈ሬ።

³³ጺላ̇ ኣሳን ኡሻች ጎይ፥ ናጋራንቻ̇ን ዓዲርስ ጎይ ኤሳ̇̈ሬ።

³⁴“ኢናፖ̇ ታ̈ኒ ካ̈ታ̈ዲ ኡሻች ጎይ ዎንኮ ‘ቴ ባ̈ባ ዪንታ̇ ኣንጂኖን! ዓይ ዬብቴ̇! ኣላሚን ኮቺ̇ንቲኖፖ ኤ̈̇ር ዪንታ̇ብ ጊ̈ጊንቲኖን ካ̈ቲቲን ኤኪ̇ብቴ!

³⁵ታ̈ኒ ጋፍሲንቲ̇ንዶ̈ን፥ ዪንቲ̇ ታ̈ና ሙ̈ሲኔ፤ ታ̈ኒ ባ̈ርሲንቲ̇ንዶ̈ን፥ ዪንቲ̇ ታ̈ና ኡሺ̇ኔ፤ ታ̈ኒ ዛቃ̇ ማ̈ቃ̇ር ዬይን፥ ዪንቲ̇ ታ̈ና ሞኪ̇ ኤኪ̇ኔ፤

³⁶ማኢዝ ኣፊላ ታ̈ና ዪንዶ̈ን፥ ዪንቲ̇ ታ̈ና ማኢሲኔ፤ ቴ ማንዶ̈ን፥ ዪንቲ̇ ታ̈ና ቤቂ̇ ታ̈ብ ኦዪንቲ̇ኔ፤ ቴ ቃሺንቲ̇ንዶ̈ን፥ ዪንቲ̇ ዬ̈ሪ ታ̈ና ኦይጪ̇ኔ’ ጋ̈ሬ።

³⁷“ዪና̇ ኢዝባራ ጺላ̇ ኣሳን ታኮ ‘ጎዳ̈ዶ! ኔ̈ና ኣ̈ንታ̇ ጋፊ ዎን ኑ ቤቃ̇ር ኔ̈ና ሙሴ? ኔ ኣ̈ንታ̇ ባ̈ርሲንቲ̇ን ኑ ቤቃ̇ር ኔ̈ና ኡሼ̇?

³⁸ኔ ኣ̈ንታ̇ ዛቃ̇ ማ̈ቃ̇ር ኑ̈ክ ዬ̈ይን ኑ ኔ̈ና ኑ ኣ̈ል ሞኪ̇ ኤኬ̇? ኔ̈ና ኣ̈ንታ̇ ኣፊላ ዪን ቤቃ̇ር ኑ ኔ̈ና ማኢሴ?

³⁹ኔ ኣንታ̇ ማ ዎይ ቃቺ̇ንቲን ኑ ቤቃ̇ሪ ኔ̈ና ኦይጬ̇?’ ጌይሬ።

⁴⁰“ታ̈ናር ኢንታ̇ኮ ‘ቴ ዪንታ̇ክ ኪን ጋ̈ሬ፥ ዓን ቴ ኢሺንታ̇ን ጋርታፖ ሌቂንቲ̇ኖ ማ̈ቂ̇ኖ ፔታ̇ናቦ ኦ̈ኖ ባዚንዳ ታ̈ብ ኦ̈ኖዲፌ̈ኔ’ ጋ̈ራ ማሃ̈ሬ።

⁴¹“ኢናፖ̇ ዓዲርስ ጎይ ዎንኮ ‘ዪኒቲ̇ ባ̈ዲንቲ̇ኖን! ታ̈ፖ̇ ጌዳ ጎቲ̇ብቴ! ሴ̈ጣናብኬ ኢ ኪ̈ታንቻ̇ንቦ ጊ̈ጊንቲ̇ኖ ሜናብ ቴይቂ̇ባ̈ሶ ታማ ጋርታ̇ ሉኪ̇ብቴ!

⁴²ቴ ጋፊንቲ̇ን ዪንቲ̇ ታ̈ና ሙሳካ̇ዬ፥ ቴ ባ̈ርሲንቲ̇ን ዪንቲ̇ ታ̈ና ኡሻ̇ካዬ።

⁴³ታ ዛቃ̇ ማ̈ቃ̇ር ዬ̈ይን ዪንቲ̇ ታ̈ና ሞካካ̇ዬ፤ ታ̈ና ማኢዝ ባዚ ዪን ዪንቲ̇ ታ̈ና ማኢሳካ̇ዬ፤ ታ̈ኒ ማ ቃቺ̇ንታ ዎቲንዶ̈ን ዪንቲ̇ ታ̈ና ኦይጫካ̇ዬ’ ጋ̈ሬ።

⁴⁴ኢንታ̇ር ታ̈ኮ ‘ጎዳ̈ዶ ኔ̈ኒ ዎይዲ ጋፍሲንታ̇ ዎይ ባ̈ርሲንታ̇ ዎይ ዛቃ̇ ማ̈ቃ̇ ዎይ ኣፊላ ኔ̈ና ዪን ዎይ ማ ዎይ ቃቺ̇ንቲን ዎይዲ ቤቃ̇ሪ ኑ ኔ̈ና ማዳ̇ካ̇ይ ኣቴ̇?’ ጋ̈ሪ ማሂ̈ሬ።

⁴⁵ታ̈ናር ኢንታ̇ኮ ‘ቴ ዪንታ̇ክ ኪን ጋ̈ሬ፥ ዓን ቴ ኢሺንታን ጋርታ̇ፖ ሜላ ኣቲ̇ን ሌቂንቲ̇ኖ ፔታ̇ናቦ ዪንቲ̇ ኦ̈ካዮንዳ ዪንቲ̇ ታ̈ባር ኦካዮዲፌ̈ኔ’ ጋ̈ሬ።

⁴⁶“ዪ̈ኮታ̇ቦ ዓን ታ ጋልዳፖ̇ ፋጊንታ̇ሪ ሜናብ ጎይል ቤስ̇ ሉካ̇ምባራ ጺላ̇ን ሜናብ ሼምፓባር ዶኢዝ ቤስ̇ ሉኪ̇̈ሬ” ጌይዴ።