Read basketo ማ̈ቶ̈ሳ 26 Bible Online

ማ̈ቶ̈ሳ 26 - basketo bible

ማ̈ቶ̈ሳ 26

¹ዬሱ̈ሲ ዪ ዎይ ቲሚርታ̇ ታማ̈ርሲ ዉርሲ̇ኖፖ̇ ዓኒ ፌ ታማራንኮ፥

²“ናምኢ ቃማፖ ዎሃ ፋ̈ሲጋ ባ̈ል ማ̈ቂ̇ኖን ዪንቲ̇ ኤሪ̈ሬ፤ ዪኒ̇ባራ ታ̈ና ኣሳ ናኣዳ ኣሳን ሶታ̇ምፔ̈ን ኣ̈ ኢሚ̇̈ሬ” ጌይዴ።

³ዪና̇ ኢዝባራ ቄ̈ሳ ኣላቃንኬ ጋድ ጪጛሻን ዎልኣ ቄ̈ሳ ኣላቃ ቃያ̈ፋ ጊባ̇ ጋርታ ሺ̈ቂዴ።

⁴ኢና ዬሱ̈ሳ ዉጫባር ኤ̈̇ር ዎንዳቦ ዎልኣ ዞሪንቲ̇ዴ።

⁵ዎቲናካሬ “ዎርዣ ጊዳ̇ ዎይሊን ዋቺ̇ ዲንዳካዮ̈ዲፌ̈ኒ ባ̈ል ጋላስ ማ̈ቃፖ̇” ጌይዴ።

⁶ዬሱ̈ሳሬ ቢታ̈ና ጋርታ̇ ሹያባሮ ሲሞ̈ና ጌይዛ ና̈ሳ ኣ̈ል ዎዶ̈ን፥

⁷ፔቲ̇ ማጫ̇ዶ̈ራ ዎይሊን ኣልኣ ማ̈ቂ̇ኖ ሺታ̇ ኣልባ̈ስጢሮ̈ሳ ጌይዝ ሹችባር ኦ̈ኖ ቢልቃ̈ጻባር ኩም ኤካ̇ ኢ̈ክ ዬ̈ራ ኢ ዶኣር ቡና ኡሽካ̇ምባ̇ራ ኢ ቆሚ̇ን ዲርካ̇ዴ።

⁸ኢ ታማ̈ራንሬ ዪኖ̇ ቤቂ̇ ጎይላሪ “ዓ ሺታ̇ ኣባብ ሜላ̇ ኢ̈ቲ ኣቲ̇̈ራ?

⁹ኢዞ ዎይሊን ሚ̈ሽ ዎጛሪ ሚ̈ሺ̇ን ዎርባያንቦ ኢማ̇ንዳብ ዳንዳኢ̈ርዶን!” ጌይዴ።

¹⁰ዬሱ̈ሳሬ ኢንቲ̇ ዪኖ̇ ጌይኖን ኤራሪ ኢንታ̇ኮ “ዪንቲ̇ ኣሲን ዓኖ̇ ኣብዛብ ዋ̈ዪ̈ራ? ኢዛ ታ̈ብ ኮሽ ባዝ ኦ̈ኔ።

¹¹ዎርባያን ዎይ ጋላስ ዪንታ̇ባር ዶኢ̈ሬ፥ ታ̈ኒ ዪንታ̇ባር ዎይ ጋላስ ዶኣባሴ።

¹²ኢዛ ዓና̇ ሺቲ̇ን ቴ ጋልዳ ዉልኢኖንዳ ቴ ዱ̈ፊምቦ̇ ታ̈ና ጊ̈ጊሳንዳ̇ቦ።

¹³ቴ ዪንታ̇ክ ኪን ጋ̈ሬ ሳ̈ዝ ኤ̈ሻ̇ ዎይ ጋልዳ ዓ ዎጛላ ሳ̈ባ̇ኪንቲዝ ቤሲ̇ ዎይዲካር ማ̈ቂ̇ን ኢዛ ኦኖ ባዚንዳ̇ ቦቲጚንታ̇ካይፌ̈ን ሶ̈ሊንቲ̈ሬ” ጌይዴ።

¹⁴ኢናፖ ታጶ̇ ናምኢ ዬሱ̈ሳ ታማ̈ራን ጋርታ̇ፖ ፔታ̇ና ዪሁዳ ኣስቆሮ̈ቶ̈ዲ ቄ̈ሳ ኣላቃንኮ ሉካ̇ሪ፥

¹⁵“ቴ ዪንታ̇ብ ዬሱ̈ሳ ኣ̈ ኢሜ̇ጌዪን ዪንቲ̇ ታ̈ብ ኣብዝ ኢማ̇ንቴ̇?” ጌይዴ። ኢንታ̇ሬ ኢ̈ብ ዓይዚ̇ ታጳ̇ ቢራ ኢሚ̇ዴ።

¹⁶ኢያሬ ዪኖ̇ ኢዝ ቃሚምፖ ኤ̈̇ር ዬሱ̈ሳ ኣ̈ ኢማ̇ንዳብ ፌ̈ብ ማ̈ቂ̇ዝ ቃም̇ ኮዪ ኤ̈̇ዴ።

¹⁷ቂጻ̇ ሞ̈ዝ ባ̈ሊን ቦንቻ̇ዝ ቲ̈ኖ ጋላሲ̇ን ዬሱ̈ስ ታማ̈ራን ኢ̈ክ ዬ̈ሪ “ኑ ኔ̈ብ ፋ̈ሲጋ ባ̈ላብ ማ̈ቃ̇ዝ ኢራ̈ቲን ዎይዲ ጊ̈ጊሳምፔ̈ን ኔ ኮያ̈ራ?” ጋ̈ሪ ኦይጪ̇ዴ።

¹⁸ኢያር ኢንታ̇ኮ “ዪንቲ̇ ካታሚን ጋርታ̇ ጌላምባ̇ራ ዪንታ̇ ዬሊ̇ዝ ና̈ሳ ኢ ኣ̈ል ሉካ̇ሪ ‘ኣስታማ̈ራ̈ዲ ቴ ኬሊ̇ን ዬሊ̇ኖኮታ̇ቦ ቴ ታማ̈ራንባራ ፋ̈ሲጋ ኢራ̈ታ ሞ̈ዚንዳ ኔ ኣ̈ሌ ጌይኔ’ ጌብቴ̇” ጌይዴ።

¹⁹ኢ ታማ̈ራንሬ ዬሱ̈ሲ ኢንታ̇ ኪ̈ቲ̇ኖንዲፌ̈ን ዎቲ̇ዴ፥ ፋ̈ሲጋ ኢራ̈ቲንዳር ኢና ጊ̈ጊሲዴ።

²⁰ሳ̈ዚን ቃ̈ሚን ዬሱ̈ሲ ፌ ታማራን ታ̈ጶ ና̈ምኣንባር ዎልኣ ኢራ̈ታ ሞ̈ንዳብ ዶኢዴ።

²¹ኢንቲ̇ ኢራ̈ቲን ሙይርዶሪ ዬሱ̈ሲ ኢንታ̇ኮ “ቴ ዪንታ̇ክ ኪን ጋ̈ሬ፥ ዪንታ ጋርታ̇ፖ̇ ፔታ̇ናዲ ታ̈ና ኣይሁድ ኣላቃንቦ ኣ̈ ኢሚ̇̈ሬ” ጌይዴ።

²²ኢ ታማራንሬ ዪኒ̇ባራ ዎይሊን ኣዛ̇ናሪ ኢንቲ̇ ዎይን “ጎዳ̈ዶ ታ̈ና ዶ̈ኔ?” ጌዪ ኢያ ኦይች ኤ̈̇ዴ።

²³ዬሱ̈ሳሬ ኢንታ̇ኮ “ታ̈ና ኣ̈ ኢሚ̇ዛ̈ዲ ዓት ታባር ዎልኣ ፊልኢሲን ጋርታ̇ ዱሺዛ̈ዳ።

²⁴ታ ኣሳ ናኣ̈ዲ ታ̈ብ ዎዳ ጻ̈ፊንቲ̇ኖንዲፌ̈ኒ ዓይቃ̇̈ርዶኒ፥ ታ̈ና ኣሳ ናኣ ኣ̈ ኢሚ̇ዝ ና̈ሳ ኢባዚ ኣዬ̇! ና̈ሳ ዪ̈ዲ ዬሊንታ̇ካ̇ይ ኣቲ̇ኖኮ ኢ̈ብ ኮሽዶ̈ን” ጌይዴ።

²⁵ኢያ ኣ̈ ኢሚ̇ዛ ዪሁዳር ኢ̈ኮ “ኣስታ̇ማ̈ራ̈ዶ! ታ̈ና ዶ̈ኔ?” ጌይዴ ዬሱ̈ሳር ኢ̈ኮ “ኣ ኔ̈ና” ጌይዴ።

²⁶ኢንቲ̇ ዎልኣ ሙይርዶሪ ዬሱ̈ሲ ሶ̈ሊን ዲንሪ ጋላታ ዎ̈ሳ ዎ̈ሳ̇ር ዳርሲ̇ዴ። ኢናፖ̇ ፌ ታማ̈ራንኮ “ዓይሺቴ ሙብቴ፤ ዓና̇ ቴ ኣይሺ̇ንዶ” ጋ̈ሪ ኢንታ̇ብ ኢሚ̇ዴ።

²⁷ኢናፖ̇ ጺዊን ዲንሪ ጋላታ̇ ዎሳ ዎ̈ሲኖፖ̇ ዓኒ ኢንታ̇ኮ “ዎይን ዓና̇ ጺዊን ጋርታ̇ፖ ኡሽኪብቴ፤

²⁸ዓና̇ ዎይሊንን ናጋራ ኣቶ̇ ጌዪንታ̇ምፔ̈ን ዉሊንታ̇ዝ ቴ ኦራ ጫ̈ቃ ሱ̈ንዶ።

²⁹ቴ ባ̈ባ ካ̈ቲቲን ጋርታ̇ ኦራ ዎይና ኣ̈ፍ ጪ̈ጪኖን ዪንታ̇ባር ኡሽካ̇ዝ ቃሚ̇ን ዬሊ̇ዝ ዲራ̈ስ ዓኒ̇ፖ ጌዳ ዓኖ̇ ዎይና ጪ̈ጪኖን ናሚኢ ቴ ኡሽካባሴ” ጌይዴ።

³⁰ኢናፖ ማዝሙራ ዬጺ̇ኖፖ̇ ዓኒ ዳብራዛይታ ኢንዲን ጋልዳ ኬስኪ̇ዴ።

³¹ኢናፖ̇ ዬሱ̈ሲ ፌ ታማ̈ራንኮ “ ‘ታ̈ኒ ጋይጫ ናኣ ቡካ̇ንዳ ዶራንር ላ̈ሊ̇ንቲ̈ሬ’ ጋ̈ሪ ጻ̈ፊንቲኖኮታ̇ቦ ዓታ̇̈ብ ቃም ዪንቲ̇ ዎይን ታ̈ና ኣሻ̇ር ሉኪ̇̈ሬ።

³²ዎቲናካሬ ታ̈ኒ ዓይቃ ጋርታ̇ፖ ዲንዲኖፖ̇ ዓኒ ዪንታ̇ፖ ቲ̈ኒታራ ጋሊላ ሉካ̈ሬ” ጌይዴ።

³³ጴ̈ጥሮ̈ሲ ኢ̈ኮ “ሜላን ዎይ ኔ̈ና ኣሻ̇ር ሉኪ̇̈ርካሬ ቴ ኔ̈ና ኣባካር ጌይን ኣሻ̇ባሴ” ጋ̈ሪ ሶ̈ሊዴ።

³⁴ዬሱ̈ሳር ኢኮ “ቴ ኔ̈ክ ኪን ጋ̈ሬ ዓታ̇ብ ቃም ኩቶ ኦ̈ላ̇ናፖ̇ ቲ̈ን ኔ ታ̈ና ዓይዚ̇ ቶህ ካ̈ዳ̈ሬ” ጌይዴ።

³⁵ጴ̈ጥሮ̈ሲ ኢ̈ኮ “ቴ ኔባር ሜላ ኣቲ̇ን ዓይቂ̇ዝ ባዝ ማ̈ቄጌይናር ዓይቃ̇̈ርዶኬ ኣባካር ጌይን ቴ ኔ̈ና ካ̈ዳባሴ!” ጌይዴ። ኣቲ̇ኖ ኢ ታማ̈ራንር ዎይ ዪኖ̇ ኢ ጌይኖንዲፌ̈ን ጌንት ኤ̈̇ዴ።

³⁶ዪኒ̇ፖ ዓኒ ዬሱ̈ሲ ፌ ታማ̈ራንባር ዎልኣ ጌ̈ቴሴማ̈ኒ ጌይዝ ቤስ̇ ሉኪ̇ዴ። ኢና ዬሊ̇ኖንዲፌ̈ኒ ኢንታ̇ኮ “ታ̈ኒ ሴካንዳ̇ ሉካ̇ር ዎ̈ሳ̇ምባራ ዪንቲ̇ ዓንዳ̇ ዶኢብቴ̇” ጌይዴ።

³⁷ፌባራ ጴ̈ጥሮ̈ሳኬ ዛብዶ̈ሳ ናኣን ናምኣን ፌ ዎሂን ኤኪ̇ ሉካ̇ሪ ዎይሊን ሙርሚ ኤ̈̇ዴ።

³⁸ኢናፖ̇ ኢንታ̇ኮ “ቴ ሼምፒ̇ን ዓይቃብ ዬ̈ሊዝ ዲራ̈ስ ታ̈ና ዎይሊን ጫና̇ቂሺኔ፥ ዪንቲ̇ ዓንዳ̇ ዶኣሪ ታ̈ባር ባርካ̇ር ዶኢብቴ̇” ጌይዴ።

³⁹ኢ ኢንታ̇ ጋልዳፖ̇ ጊላ̇ ጌዳ ዓር̇ ጌዪ ሉካ̇ሪ ሳ̈ዝ ጋልዳ ፌ ዴ̈ሚንባር ጉጲጛሪ “ታ ባ̈ባ̈ዶ! ኔ̈ብ ዳንዳኢንታ̇̈ርኮ ዓና̇ ሜታ ጺዊን ቴ ጋልዳ̇ፖ ኔ ኣ̈ቤ! ዪና̇ሬ ኔ ኮዪኖንዲፌ̈ን ማ̈ቆ̇ዶኬ ቴ ኮዪኖንዲፌ̈ን ማ̈ቃፖ̇” ጋ̈ሪ ዎ̈ሲ̇ዴ።

⁴⁰ኢናፖ̇ ማ̈ቃ̇ሪ ፌ ታማ̈ራንኮ ዬ̈ዚምባ̇ራ ኢንቲ̇ ሱርቂንዶ̈ን ዲጛሪ ጴ̈ጥሮ̈ሳኮ “ዪንቲ̇ ሜላ ኣቲ̇ን ፔቲ̇ ሳኣ̈ታ ባርካ̇ር ታባር ዶኣንዳ̇ብ ዪንታ̇ ጋማ?

⁴¹ዪንቲ̇ ሜታ ጋርታ̇ ጌላካዮ̈ዲፌ̈ን ሚ̈ጛር ዎ̈ሲ̇ብቴ፤ ሚ̈ጛንዳብ ኢና̇ ዪንታ̇ብ ዎዶ̈ን፥ ዪኖ̇ ዎታንዳብ ዎልቂን ዪንታ̇ብ ጉ̈ጻ̇̈ሬ” ጌይዴ።

⁴²ማ ማ̈ቃ̇ሪ ዬሱ̈ሲ ናምኢ ኢንታ̇ ጋልዳፖ ጌዳ ጊላ̇ ጎቲ̇ ሉካ̇ሪ “ታ ባ̈ባ̈ዶ! ዓና̇ ሜታ ጺዊን ታ̈ና ዬላካ̇ይ ኣ̈ንዳብ ዳንዳኣባስኮ ኔ ጌይኖዲፌ̈ን ማ̈ቆ̇ ጋ̈ቤ” ጋ̈ሪ ዎ̈ሲ̇ዴ።

⁴³ማ ፌ ታማ̈ራንኮ ማ̈ቂ̇ ዬ̈ዚምባራ ኢንታ̇ክ ሱርሲ ዬይን ሱርቂንዶ̈ን ዲጚዴ።

⁴⁴ዓታ̇ር ኢንታ̇ ኣሻ̇ር ማ̈ቂ̇ ሉካ̇ሪ ዎዳ ፌ ዎ̈ሲ̇ኖ ቃ̈ሊን ኢዞ ዓይዚ̇ ዎ̈ሲ̇ዴ።

⁴⁵ዪኒ̇ፖ ዎሃ ፌ ታማ̈ራንኮ ማ̈ቂ̇ ዬ̈ሪ ኢንታ̇ኮ “ዓታ̇ር ዪንቲ̇ ዓኖ̇ ዬላ̇ር ሱርስ ጋልዳ̇ኬ ሼምፕ ጋልዳ ዎ? ታ ኣሳ ናኣዳ ናጋራንቻ̇ን ኩሽታ̇ ኣ̈ ኢሚ̇ዝ ሳኣ̈ቲን ዬሊ̇ኔ።

⁴⁶ዪዚ ዲንዲ̇ብቴ̇ ሉኪ̇ስቶ! ታ̈ና ኣ̈ ኢሚ̇ዝ ና̈ሳ̈ዲ ዓይ ኡኪ̇ኔ!” ጌይዴ።

⁴⁷ዬሱ̈ሲ ዪኖ̇ ቢርት ሶ̈ላምባ̇ራ ኢ ታማ̈ራን ታጶ̇ ናምኣን ጋርታ̇ፖ ፔታ̇ና ዪሁዶ ዬይዴ። ኢባራ ማሽኬ ጉ̈ፋክ ኤ̈̇ኖ ዎይሊን ኣሳን ዬ̈ይዴ። ኢንታ̇ሬ ቄ̈ሳ ኣላቃን ጋርታፕኬ ጋድ ጪጛሻን ጋርታ̇ፖ̇ ኪ̈ቲንታ̇ር ዬ̈ይኔ።

⁴⁸ዬሱ̈ሳ ኣ̈ር ኢሚ̇ዛ ዪሁዶ ኣሳንኮ “ቴ ዬርቂ̇ዛ ና̈ሳ ኢያ፥ ዪንቲ̇ ኢያ ኤ̈̇ብቴ̇” ጋ̈ሪ ኢንታ̇ብ ቲ̈ን ማላ̇ ኢሚ̇ኔ።

⁴⁹ዪሁዶ ኤሊ̇ባራ ዬ̈ሪ ዬሱ̈ሳክ ኡካ̇ሪ “ኣስታ̇ማ̈ራ̈ዶ! ሳሮ!” ጋ̈ሪ ኢያ ዬርቂ̇ዴ።

⁵⁰ዬሱ̈ሳር ኢ̈ኮ “ታ ላጋ̇̈ዶ! ዪዚ ኔ ዬይኖን ኣብዛብኮ ኢዞ ፎታቤ” ጌይዴ። ዪኒ̇ፖ ዎሃ ኣሳን ኢ̈ክ ኡካ̇ሪ ኢያ ኤ̈̇ዴ።

⁵¹ዪኒ̇ባራ ዬሱ̈ሳባር ዎን ጋርታ̇ፖ ፔታ̇ና̈ዲ ማሽ ኬሳ̇ሪ ቄ̈ሳ ኣላቃንቦ ኣሽካ̇ራ ዋይን ቃጻ̇ክ ፋይዴ።

⁵²ዬሱ̈ሲ ኢ̈ኮ “ኣሳ ጋልዳ ማሽ ኬሲ̇ዝ ኣሲ ማሻ̇ባር ዓይቂ̇̈ሬ፤ ዪ̈ኮታ̇ቦ ኔ ማሺ̇ን ማሃር ኢዝ ሾ̈ኪን ጋርታ ሚ̈ሻቤ።

⁵³ታ̈ኒ ቴ ባ̈ባ ጌሻ̈ርኮ ዎይሊን ሙኩላ ፋይዲንቲ̇ዝ ኣፎ ኪ̈ታንቻ̇ ሚሻንዳ̇ብ ዳንዳኢባ̈ሶ ኔ̈ክ ማይጺ̈ራ?

⁵⁴ዪ̈ፌ̈ን ማ̈ቂ̇ርኮ ‘ኢ ሜታ ኤካ̇ንዳብ ኮሺሬ’ ጌዪ ጌ̈ሻ̇ ማጻ̈ፋ ጋልዳ ጻ̈ፊንቲ̇ኖ ቃ̈ላ ዎዛርታ̇ር ፎቲንቲ̈ራ?” ጌይዴ።

⁵⁵ዪና̇ ኢዝባራ ዬሱ̈ሲ ኢና ሺ̈ቂኖ ዎርዣኮ “ዪንቲ̇ ቡሪዝ ኣስ ኤ̈̇ዛ̈ዲፌ̈ኒ ታ̈ና ኤ̈̇ንዳብ ማሽኬ ጉፋክ ኤካ̇ር ዬይቴ? ቴ ዎይ ጋላስ ጾ̈ሳ̇̇ ኬ̈ ጋርታ̇ ታማ̈ርሳ̇ ሙታ̇ ዪንታ̇ባር ዎዶ̈ን ዪንቲ̇ ታ̈ና ኤ̈ካ̇ዬ፤

⁵⁶ዪ ዎይ ማ̈ቂ̇ኖ̈ዲ ናባን ማጻ̈ፋ ጋልዳ ጻ̈ፊንቲ̇ኖ̈ዲ ፎቲንታ̇ምፔ̈ኔ” ጌይዴ። ኢናፖ̇ ኢ ታማ̈ራን ዎይ ኢያ ኣሻ̇ር ዎጺ̇ዴ።

⁵⁷ኢናፖ̇ ዬሱ̈ሳ ኤ̈̇ኖ ኣሳን ኢያ ቄ̈ሳ ኣላቃ ቄያ̈ፋክ ኤ̈ጚዴ፤ ኢና ሙ̈ሳ ሂጋ̇ ታማ̈ርሲዛንኬ ጋድ ጪጛሻን ሺ̈ቃር ዎ።

⁵⁸ጴ̈ጥሮ̈ሲ ቄ̈ሳ ኣላቃ ኣ̈ል ጊቢ̇ን ዬሊ̇ዝ ዲራ̈ስ ዬሱ̈ሳ ዎሂን ጎት̇ባራ ዬ̇ሙታ̇ዶሪ ሉኪ̇ዴ። ኢናፖ̇ ጊቢ̇ን ጋርታ̇ ጌላር ዬሱ̈ሳ ጋል ኣብዝ ዎቲ̈ርኮ ቤቃ̇ንዳቦ ጋ̈ሪ ዛባንባር ዎልኣ ኢና ዶኢዴ።

⁵⁹ቄ̈ሳ ኣላቃንኬ ኣይሁድ ፊርዳ ኣ̈ሎ ኣሳን ዎይ ዬሱ̈ሳ ጋልዳ ዓይቃ ፊርዳ ፊርዲሳንዳ̇ቦ ማቃ ማርካ̇ ኮዪ ኤ̈̇ዴ።

⁶⁰ዎይሊን ማቃ ማርካ̇ን ሺ̈ቂናካሬ፥ ኢ ጋልዳ ዓይቃ ፊርዳ ፊርዲሲዝ ባዝ ዲጛካ̇ዬ። ዉርሲ ጋልዳ ናምኢ ማርካ̇ን ሺ̈ቃሪ፥

⁶¹“ና̈ሳ ዓ̈ዲ ‘ታ̈ኒ ጾ̈ሳ̇̇ ኬ̈ ዪርዲሳራ ዓይዚ̇ ቃምባር ማሃር ኬ̈ጻ̇ንዳብ ዳንዳኣ̈ሬ’ ጌይኔ” ጋ̈ሪ ሶ̈ሊዴ።

⁶²ኢናፖ̇ ቄ̈ሳ ኣላቃ ዲንዳ̇ሪ ኢ̈ኮ “ዓን ኣሳን ኔ ጋልዳ ሶ̈ሊዝ ባዛን ዎይንቦ ኣባካር ማልሳ ኢማ̇ባሳ?” ጋ̈ር ኦይጪ̇ዴ።

⁶³ዎቲናካሬ ዬሱ̈ሲ ዚም ዶኢዴ። ኢናፖ̇ ቄ̈ሳ ኣላቃ̈ዲ ማ̈ቃ̇ር ዬሱ̈ሳኮ “ቴ ኔ̈ና ጾ̈ሳ̇̇ ሱምባር ኦይጫ̇̈ሬ! ጾ̈ሳ̇̇ ናኣ ክርስቶ̈ሳ ኔ̈ናኮ ሶ̈ላቤ!” ጌይዴ።

⁶⁴ዬሱ̈ሳር ኢኮ “ኣ ኔ ጌይኖን ኪን፤ ዎቲናካሬ ዓኒ̇ፖ̇ ጌዳ ቴ ኣሳ ናኣ̈ዲ ጴቻ̇ ጾ̈ሳ̇̇̈ቦ ኡሻች ጎይ ዶኤጌይንኬ ማ ኣፋ ሻ̈ራባር ዬ̈ዚምባር ዪንቲ̇ ቤቂ̇̈ሬ” ጋ̈ሬ ጌይዴ።

⁶⁵ዪና̇ ኢዝባራ ቄ̈ሳ ኣላቃ̇̈ዲ ዛላ̇ባር ፌ ኣፊሊን ዳርሳ̇ሪ ኢንታ̇ኮ “ዓዲሼ ኢ ጾ̈ሳ̇̇ ቆ̈ኔ! ዪንታ̇ር ኢ ቆ̈ሲን ሲስኪ̇ኔ፤ ዪ̈ፖ̇ ሺዝ ሜላ ኣ ማርካ̇ ኮዪሲ̈ራ?

⁶⁶ዪዚ ዪንታ̇ብ ኣብዝ ማይጺ̈ራ?” ጌይን ኢንታ̇ሬ “ዓይቃ ኢ̈ብ ኮሺ̇̈ሬ!” ጋ̈ሪ ማሂዴ።

⁶⁷ዪዚ ዪኒ̇ባራ ኢ ጋልዳ ጩቲ̇፣ ኢያ ቆጺ̇፣ ባቂ̇ሙታ̇

⁶⁸“ኣን ክርስቶ̈ሶ! ኔ̈ና ቡካ̇ ኦ̈ኖ̇? ኔ ኑ̈ብ ካ̈ያ ሶ̈ላቤ” ጌንት ኤ̈̇ዴ።

⁶⁹ጴ̈ጥሮ̈ሲ ቄ̈ሳ ኣላቃንቦ ኣላቃ ኣ̈ል ዛ̈ና ጊቢ̇ን ጋርታ̇ ዶኢንዶ̈ን ፔቲ̇ ጋራዲን ኢ̈ክ ዬ̈ራ “ኔ̈ናር ጋሊሎ ና̈ሳ ዬሱ̈ሳባር ዎ!” ጋ̈ዴ።

⁷⁰ኢ ኢዝኮ “ኣ̈ሽ! ኔ ሶ̈ላዚን ኣብዝኮ ቴ ኤራባሴ!” ጋ̈ር ኣስ ዎይ ቲ̈ን ኢያ ካ̈ዲ̇ዴ።

⁷¹ኢ ኬስካ̇ንዳቦ ካ̈ሪንኮ ሉካ̇ምባ̇ራ ሜላ ፔቲ̇ ጋራዲን ኢያ ቤቃ̇ራ ኢና ዎ ኣሳንኮ “ዓ ና̈ሳ̈ዲ ናዝሬ̈ቶ ዬሱ̈ሳባር ዎ!” ጋ̈ዴ።

⁷²ጴ̈ጥሮ̈ሳር ኢዝኮ “ኣ̈ሽ! ኔ ጌይዝ ና̈ሳ ቴ ኢያ ኤራባሴ” ጌዪ ጫ̈ቃ̇ር ናምኢ ካ̈ዲዴ።

⁷³ጊላ̇ ጋምኢኖፖ̇ ዓኒ ኢና ኤቂ̇ ዎ ኣሳን ጴ̈ጥሮ̈ሳክ ዬ̈ሪ “ኔ ሶ̈ሊን ፌ̈ብ ኤሪንታ̇̈ሬ ኪን ኢንታ̇ ጋርታ̇ፖ̇ ፔታ̇ና̈ ኔ̈ና” ጌይዴ።

⁷⁴ዪና̇ ኢዝባራ ጴ̈ጥሮ̈ሲ “ታ̈ኒ ዪ ና̈ሳ ኤራባሴ!” ጌዪሙታ̇ ጫ̈ቂኬ ፌ̈ና ባ̈ዲ ኤ̈̇ዴ። ዪኖ̇ ኢ ጋ̈ምባ̇ር ኢና ኩታ ኦ̈ሊ̇ዴ።

⁷⁵ጴ̈ጥሮ̈ሳሬ ዬሱ̈ሲ ኢ̈ኮ “ኩቶ ኦ̈ላ̇ካ̇ይዶ̈ን ዓይዚ̇ ቶህ ኔ ታ̈ና ካ̈ዳዝዳ” ጌይኖን ኢ̈ክ ኤልቅ ጋ̈ዴ። ኢናፖ̇ ዛ̈ና ኬ̈ስካ̇ሪ ሲክ̇ ሲክ̇ ጌዪ ዬ̈ኪ̇ዴ።