Read basketo ማ̈ቶ̈ሳ 9 Bible Online

ማ̈ቶ̈ሳ 9 - basketo bible

ማ̈ቶ̈ሳ 9

¹ዪኒ̇ፖ ዓኒ ዬሱ̈ሲ ጎጛ ጋርታ̇ ጌላር ባሃ̈ሪን ፊ̈ጛሪ ፌ ካታሚን ጋርታ̇ ዬይዴ።

²ኣሳን ቶሂ ዎባ̇ር ኣርሳ̇ ጋልዳ ሱርቂ̇ኖ ፔቲ̇ ኣስ ቶ̈ካ̇ሪ ዬሱ̈ሳክ ኤሄይዴ። ዬሱ̈ሳር ኢንታ̇ ኣማ̇ኒን ቤቃ̇ሪ ዎባ̇̈ኮ “ኣን ና̈ራ̈ዶ! ኢ̈ጫፔ̇! ኔ ናጋራ ኔ̈ብ ኣቶ̇ ጌዪንቲ̇ኔ!” ጌይዴ።

³ዪኒ̇ባራ ሙ̈ሶ ሂጋ̇ ታማ̈ርሲዝ ፔቲ̇ ፔቲ̇ ኣሳን “ና̈ሳ ዓ̈ ጾ̈ሳ̇̇ ቆ̈̈ርባያ!” ጋ̈ሪ ፌ ቡ̈ዳባር ቆፒ̇ዴ።

⁴ዬሱ̈ሳር ኢንታ̇ ቆፊን ኤራሪ ኢንታ̇ኮ “ዪንቲ̇ ኣባቦ ዪ̈ዲፌ̈ኖ ኢ̈ታባዝ ዪንታ̇ ቡ̈ዳባር ቆፒ̇̈ራ?

⁵‘ኔ ናጋሪን ኔ̈ብ ኣቶ̇ ጌዪንቲ̇ኔ’ ጋ̈ዚምፔኬ ‘ዲንዳር ዬ̇ቤ’ ጋ̈ዚምፖ̇ ዎና̇ ጻ̇̈ራ?

⁶ዎቲናካር ቴ ኣሳ ናኣ̈ቦ ሳ̈ዝ ጋልዳ̇ ናጋራ ኣቶ̇ ጋንዳ̇ቦ ታ̈ቦ ሲልጣ̈ና ዎን ዪንቲ̇ ኤራምፔ̈ኒዬ” ጋ̈ሪ ዎባ̇̈ኮ “ዲንዳ̇ር ኔ ኣርሲን ቶ̈ካ̇ር ኔ ኣ̈ል ሉካ̇ቤ” ጌይዴ።

⁷ና̈ሳ̈ዳር ዲንዳ̇ር ፌ ኣ̈ል ሉኪ̇ዴ።

⁸ዎርዣ ዪ ቤቃ̇ር ጋራ̇ሚንታ̇ሪ፥ ዪ̈ዲፌ̈ኖ ሲልጣ̈ና ኣሳብ ኢሚ̇ኖ ጾ̈ሳ̇̇ ጋላቲዴ።

⁹ዬሱ̈ሲ ኢናፖ̇ ዲንዳሪ ሉኪ̇̈ርዶሪ ማ̈ቶ̈ሳ ጌይዛ ፔቲ̇ ና̈ሳ ቃራጻ ቃጺሲዝ ቤስ̇ ጋልዳ̇ ዶኢንዶ̈ን ቤቃ̇ሪ “ቴ ዎሂን ዬ̇ቤ!” ጌይዴ። ኢያር ዲንዳር ኢ ዎሂን ዬ̇ዴ።

¹⁰ዬሱ̈ሲ ማ̈ቶ̈ሳ ኣ̈ል ቡና ኡሽካንዳ̇ብ ዶኢንዶ̈ን ቃራጻ ቃጺሲዝ ኣስ ዎይሊንኬ ናጋራንቻ̇ን ኢ̈ክ ዬ̈ሪ ኢባርኬ ኢ ታማ̈ራንባር ዎልኣ ቡና ኡሽካንዳ̇ ዶኢዴ።

¹¹ፋራሳ̈ዋን ዪኖ̇ ቤቃ̇ሪ ኢ ታማ̈ራንኮ “ዪንታ̇ ኣስታማ̈ራ̈ዲ ቃራጻ ቃጺሲዛንባርኬ ናጋራንቻ̇ንባራ ዎዛርፌ̈ን ዎልኣ ሙይራ” ጌይዴ።

¹²ዬሱ̈ሲ ኢንቲ̇ ሶ̈ሊኖን ሲስካ̇ሪ ኢንታ̇ኮ “ማዛንቦዶኬ ኮሻ̇ንቦ ኣኪማ ኮሺባ̈ሴ።

¹³‘ቴ ኮያዚንዳ̇ ማ̈ሪቲዶኬ ዣ̈ርሻ ጊዳካ̇ዬ’ ጋ̈ር ጻ̈ፊኖንዳ̇ ኢዛ ኣብዝ ጌንትኮ ኮሺንቺ̇ ቤቂ̇ ኤሪብቴ̇። ቴ ዬይኖንዳ̇ ጺላ̇ን ጼይጋንዳብ ጊዳካ̇ይዶ̈ን ናጋራንቻ̇ን ማ̈ሪቲ ጌላምፔ̈ኔ” ጌይዴ።

¹⁴ኢናፖ̇ ጻማ̇ቂዛ ዋ̈ኒ̇ሳ ታማ̈ራን ዬሱ̈ሳክ ዬ̈ሪ “ኑ̈ናኬ ፋራሳ̈ዋን ዎይ ጋላስ ጾ̈ሚ̈ርዶን ኔ ታማ̈ራን ጾ̈ሚባ̈ሶን ኣባቢያ?” ጌዪ ኦይጪ̇ዴ።

¹⁵ዬሱ̈ሳር ኢንታ̇ኮ “ኢሳ̇̈ዲ ኢንታባር ዶኣምባ̇ራ ቱሪን ኣሳን ዎዛርታር ሙዲዳንዳብ ዳንዳኢ̈ራ? ኢሳ̇ ኢንታ̇ ጋልዳፖ̇ ፋጊንቲ̇ዝ ኬሊ̇ ዬይሬ ዪን ኢዝባራ ኢንቲ̇ ጾ̈ሚ̈ሬ።

¹⁶ሲላ ኣፊላ ጋልዳ ኦራ ጫርቃ ጋዳ̇ር ኪቢዝ ኣሲ ኦ̈ናካር ባዬ̇። ዪዝ ዎቴ̈ጌንዶ፥ ጫርቂን ኦራንዳ ኣፊሊን ሲሊን ዳርሳ̇ራ ቲ̈ኖምፖ̇ ዉ̈ርሲ ኢ̈ሳር ኣሻ̇ሬ።

¹⁷ዪና̇ ኢዝፌ̈ኒ ቢርት ኤ̈ሲ̇ኖ ኤ̈ስ ሲላ ኦካራ ጋርታ̇ ጋዲ̇ዝ ኣሲ ኦ̈ናካር ባዬ̇። ዪኒ̇ፌ̈ን ዎቴጌይንዶ̇ ኦካሪንዳ̇ ዳርኣ̈ሬ፤ ኤ̈ሲ̇ንዳ̇ር ዉልኢንታ̇̈ሬ፤ ኦካሪንዳር ሜላ̇ ኣታ̇̈ሬ። ቢርት ኤ̈ሲ̇ኖ ኤ̈ሲ̇ንዶ̇ ኦራ ኦካራ ጋርታ̇ ጋዳ̇ንዳብ ኮሺ̇̈ሬ፥ ዪስቴጌይንዶ̇ ኤ̈ሲ̇ንዳ̇ር ኦካሪንዳር ዎልኣ ኮሽ ዶኢ̈ሬ።

¹⁸ዬሱ̈ሲ ዪኖ̇ ኢንታ̇ብ ሶ̈ላምባ̇ራ፥ ኣይሁዳን ዎ̈ሳ ኬ̈ቦ ኣላቃ ማ̈ቂ̇ኖ ፔቲ̇ ኣስዶ̈ሪ ኢ̈ክ ዬ̈ር ኢ ቲ̈ን ቡቂንታ̇ሪ “ታ ናኢን ቴ ጋል ዓት ዓይቃ̇ዴ፤ ዎቲናካር ኔ ዬ̈ራ ኢዝ ጋል ኔ ኩሽ ጋዳ̇̈ርኮ ፋጻ̈ርሽዋ” ጌይዴ።

¹⁹ዬሱ̈ሳር ኢናፖ̇ ዲንዳር ኢባር ሉኪ̇ን ኢ ታማ̈ራንሬ ኢ ዎሂን ሉኪ̇ዴ።

²⁰ዪኒ̇ባራ ታጶ̇ ናምኢ ላይ ኩም ሱ̈ ጎጊንታ̇ ሙታ̇ ዎይሊን ቢጻ ቤቂ̇ኖ ፔቲ̇ ማጪ̇ንዳ፥ ዬሱ̈ሳክ ጋስ ጎይ ዬ̈ራ ኢ ኣፊሊን ሲ̈ንን ኤ̈̇ዴ።

²¹ኢዛ ዪኖ̇ ዎቲኖንዳ̇ “ሜላ ኣቲ̇ን ታ̈ኒ ቴ ኩሽባር ኢ ኣፊሊን ሙታ̇ ኤ̈̇ኖኮ ፋጻ̈ሬ” ጋ̈ራ ፌ ቡ̈ዳባር ቆፒ̇ኖኮታ̇ቦ።

²²ዬሱ̈ሲ ጋስ ማ̈ቂ̇ ኣሲን ቤቃ̇ሪ “ቴ ናኢንዴ̇ ኢ̈ጫፔ̇! ኔ ኣማ̇ኒን ኔ̈ና ፋኔ” ጌይዴ። ኣሲንዳ̇ ላው ኢዝባር ፋጻዴ።

²³ዬሱ̈ሲ ኣይሁዳን ዎ̈ሳ̇ ኬ̈ቦ ኣላቃ ኣ̈ል ዬላ̇ምባራ ዬ̈ፊብ ሞይዛ ፉጊዝ ኣሳንኬ ዎጺ̇ሙታ̇ ዬ̈ኪ̇ዝ ኣሳን ቤቂ̇ዴ።

²⁴ኢያር ኢንታ̇ኮ “ዪንቲ̇ ዎይ ዓንዳ̇ፖ̇ ዓር ጌብቴ̇፥ ናኢን ሱርቂንዶኬ ዓይቃካ̇ዬ!” ጌይዴ። ኢንታ̇ር ኢ ጋል ሚጪ̇ዴ።

²⁵ዎርዣ ዛ̈ና ኬስኪ̇ኖፖ̇ ዓኒ ዬሱ̈ሲ ናኢን ዎ ኬ̈ን ጋርታ̇ ጌላሪ ኢዝ ኩሺን ኤ̈̇ዴ። ኢዛር ዲንዳ̇ ኤቃ̇ዴ።

²⁶ኢ ኦ̈ሲንዳ̇ ኢና ዎ ጋዲን ጋርታ̇ ዎይ ሲስኪ̇ንታ̇ዴ።

²⁷ዬሱ̈ሲ ኢናፖ̇ ዲንዳ̇ሪ ሉካ̇ምባራ ኣ̈ፊ ዎቢ̇ኖ ናምኢ ኣሳን ኢ̈ኮ “ዳ̈ዊታ ናኣ̈ዶ! ኑ̈ና ማ̈ራቤ!” ጌዪ ዉይሲ ሙታ̇ ኢ ዎሂን ዬ̇ዴ።

²⁸ዬሱ̈ሲ ኬ̈ ጌሊኖፖ̇ ዓኒ ኣ̈ፊ ዎቢ̇ኖ ኣሳን ኢ̈ክ ዬይዴ። ኢያር “ቴ ዪንታ̇ ኣ̈ፊን ፋንዳብ ዳንዳኣዚን ዪንቲ̇ ኣማ̇ኒ̈ራ?” ጋ̈ር ኢንታ̇ ኦይጪ̇ዴ። ኢንታ̇ር ኢ̈ኮ “ኣ̈ ጎዳ̈ዶ! ኔ ፋ̈ሬ” ጋ̈ር ማሂዴ።

²⁹ኢናፖ̇ ዬሱ̈ሲ ኢንታ̇ ኣ̈ፊን ፌ ኩሽባር ፊታ̇ሪ “ዪንታ̇ ኣማ̇ኒንዲፌ̈ኒ ዪንታ̇ብ ማ̈ቆ̇ጋ̈ቤ!” ጌይዴ።

³⁰ኢንታ̇ ኣ̈ፊንዳር ቤቃ̇ዴ። ዬሱ̈ሲ ኢንታ̇ኮ “ዪንቲ̇ ዪኖ̇ ኦ̈ባካር ሶ̈ላፒ̇ቴ!” ጋ̈ሪ ሚ̈ንር ኪ̈ቲ̇ዴ።

³¹ዎቲናካር ኢንቲ̇ ሉካ̇ሪ ዬሱ̈ሳ ኦ̈ሲን ኢና ዎ ጋዲን ጋርታ̇ ዎይ ሶ̈ሊዴ።

³²ዬሱ̈ሲ ኢንታ̇ ኣ̈ፊን ፋኖ ኣሳን ኬስኪ̇ ሉኪ̇ኖፖ̇ ዓኒ ሜላ ኣሳን ኢ̈ታ ኣያ̇ና ኤ̈̇ር ኖ̈ኒን ሙ̈ሚሲኖ ፔቲ̇ ኣሲ ዬሱ̈ሳክ ኤሄይዴ።

³³ዬሱ̈ሲ ና̈ሳ ጋልዳፖ̇ ኢ̈ታ ኣያ̇ና ኬሲ̇ኖፖ̇ ዓኒ ና̈ሳ̈ዲ ኖ̈ኒን ፊርቂንቲ̇ን ሶ̈ሊ ኤ̈̇ዴ። ዎርዣ̈ዳር “ዓዲፌ̈ኖ ባዚ ኢስሬ̈ል ጋዳ̇ ኑ ቤቃ̇ራር ኤራካ̇ዬ” ጌይዴ።

³⁴ዎቲናካሬ ፋራሳ̈ዋን “ኢ ኢ̈ታ ኣያ̇ና ኬሲ̇ዛ̈ዲ ኢ̈ታ ኣያ̇ናን ኣላቃባራ” ጌይዴ።

³⁵ዬሱ̈ሲ ዎርዣ ኣይሁዳን ዎ̈ሳ ኬ̈ ጋርታ̇ ታማ̈ርሲሙታ̇፥ ጾ̈ሳ̇̇ ካ̈ቲቲ ዎጛሊን ሳባ̇ኪሙታ̇፥ ኣሳ ዱማ ዱማ ዓርጋ ጋልዳፖ̇ ዎይ ፋሙታ̇፥ ካታማ ጋርታ̇ኬ ጋጻራ ጋርታ̇ ዎይ ዬ̇ዴ።

³⁶ዎርዣ̈ዲ ጋይጫናኢ ባዮ̇ ዶሪፌ̈ኒ ሜቲንታ̇ርኬ ኢንታ̇ ማ̈ዲ̇ዝ ኣሲ ባዮ̇ ማ̈ቃ̇ር ዎን ቤቃ̇ሪ ኢንታ̇ብ ሚጪንቲ̇ዴ።

³⁷ዪ̈ኮታ̇ቦ ኢ ፌ ታማ̈ራንኮ “ዎት ጋዳ̇ ዎ ካ ዎይሊን፤ ዎቲናካሬ ኢና ኦ̈ዝ ኣሳን ጊላ̇።

³⁸ዪዚ ካን ላ̈̈ዲ ካን ሺ̈ሺ̇ዝ ኣስ ዎቲን ጋዲን ጋርታ̇ ሚሻምፔ̈ኒ ጌሺብቴ̇” ጌይዴ።