Read basketo ማ̈ርቆ̈ሳ 13 Bible Online

ማ̈ርቆ̈ሳ 13 - basketo bible

ማ̈ርቆ̈ሳ 13

¹ዬሱ̈ሲ ጾ̈ሳ̇̇ ኬ̈ ጋርታፖ̇ ኬስካ̇ዚምባራ ኢ ታማ̈ራን ጋርታ̇ፖ ፔታ̇ናዲ “ኣስታማ̈ራ̈ዶ! ኬ̈ንኬ ኬ̈ ኬ̈ጺ̇ንቲኖ ሹቻ̇ን ዎዛርፌ̈ን ቆይሲ̈ራ ቤቃ̇ቤ!” ጌይዴ።

²ዬሱ̈ሲ ማሃሪ “ኔ ዪን ጴች ሹች ኬ̈ን ቤቃ̇ራ? ሹቺ̇ ሹች ጋልዳ ኬ̈ሊንቲኖ̈ዲፌ̈ን ኣቲ̇ባ̈ሴ። ዎይ ቢርት ላ̈ሊንቲ̈ሬ” ጌይዴ።

³ዬሱ̈ሲ ጾ̈ሳ̇̇ ኬምፖ̇ ቲ̈ና ጎይ ጌዳ ቤንታ̇ዚን ዳብራዛይታ ጋ̈ዝ ኢንዲን ጋልዳ ዶኣር ዎዶ̈ን ጴ̈ጥሮ̈ሳ፣ ዓይቆ̈ባ፣ ዋ̈ኒ̇ሳኬ ኢንድራ̈ሳክ ዎል ማ̈ቃ̇ሪ ዬሱ̈ሳ፥

⁴“ዪና̇ ኔ ጌይኖን ኣ̈ንት ማ̈ቃ̇̈ርኮ ኑ̈ብ ሶ̈ሊሼ፤ ዪና̇ ዎይ ፎቲንታ̇ንዳብ ዬሊ̇ኖን ኑ ኣ ማላ̇ር ኤራኔ?” ጌዪ ኦይጪ̇ዴ።

⁵ዬሱ̈ሲ ኢንታኮ “ኦ̈ናካር ዪንታ̇ ባሊካ̇ይፌ̈ኒ ና̈ጊንቲ̇ብቴ።

⁶ዎይሊን ኣሲ ‘ታ̈ኒ ክርስቶ̈ሳ’ ጌዪ ሙታ̇ ቴ ሱምንባር ዬ̈ሪ ዎይሊን ኣስ ባሊ̈ሬ።

⁷ዪንታ̇ ላፍ ኡክ ኦሊ ኬስኬጌይናሬ፤ ጎት ኦሊ ዎ ጌይዝ ባዝ ሲስኬጌይናሬ ኢ̈ጫፒ̇ቴ። ዪ ኣባካር ጌይን ኣቲ̇ባ̈ሶ ባዜ። ማ̈ቂ̇ናካሬ ዉርሲ ላይን ቢርቴ̇።

⁸ዎርዦ ዎርዣ ጋልዳ ካ̈ቲ ካ̈ታ ጋልዳ ኦል ዲንሬ። ዎይሊን ቤሳ̇ ጋልዳር ሳ̈ዚ ኤንኢ̈ሬ ጋፋር ጌሊ̈ሬ። ዪ ዎይ ዬላንዳብ ዎቲዝ ማጫ̇ብ ቢርት ዞ̈ቃ ቂ ኤ̈̇ዛዲፌ̈ኒዬ።

⁹ዪንቲ̇ ዪንታ̇ ቆሚ̇ን ና̈ጊብቴ፤ ኣሳን ዪንታ̇ ፊርዳብ ኣ̈ ኢሚ̇̈ሬ፤ ኣይሁድ ዎ̈ሳ ኬ̈ ጋርታ̇ሬ ዪንታ̇ ኤ̈̇ ቡኪ̇̈ሬ፤ ዪንቲ̇ ማርካ̇ ማ̈ቃ̇ምፔ̈ኒ ቴኮታ̇ቦ ጋ̈ሪ ኤ̈ንታ̇ር ጋዳ ኣቂሲዛንኬ ካ̈ቲንታን ቲ̈ን ኤቂ̇ዝዳ።

¹⁰ዉርሲ ላይን ዬ̈ናፖ ቲ̈ኒታሪ ዎጛላዲ ዎርዣ ዎይ̈ቦ ዬላ̇ንዳብ ኮሺ̈ሬ።

¹¹ዪንታ̇ ኤ̈̇ሪ ፊርዳብ ሺ̈ሻ̇ምባራ ጌ̈ሻ̇ ኣያ̇ና ዪንታ̇ብ ሶ̈ላምፔ̈ን ኢማ̇ዚን ሶ̈ሊብትዶኬ ኑ ኣ ሶ̈ላኔ ጋ̈ሪ ቲ̈ራፒ̇ቴ። ዪንታ̇ባር ማ̈ቃ̇ር ሶ̈ሊዛ ጌ̈ሻ̇ ኣያ̇ና̈ዲዶኬ ዪንቲ ጊዳ̇ካ̇ዬ።

¹²ኢሻ ፌ ጌ̈ዳዳ፣ ጌ̈ዳ ፌ ኢሻ̈ዳ፣ ባ̈ባ̈ ፌ ናኣ̈ዳ ዓይቃብ ኣ̈ ኢሚ̇̈ሬ። ናኣን ፌ ባ̈ባኬ ፌ ኢንዲ ጋልዳ ዎልቃ ኬሳ̇ሪ ኢንታ ዎ̈ሬ።

¹³ቴ ጊሻ̇ቦ ጋ̈ሪ ኣስ ዎይ ቲ̈ን ዪንቲ ኢጺ̇ንቲኖ ማ̈ቂ̈ሬ። ዉርሲን ዬሊ̇ዝ ዲራ̈ስ ሚ̈ጚዝ ኣሲ ኢ ፋጺ̈ሬ።

¹⁴“ይሲ̇ዝ ቄ ባዚ” ኢ̈ብ ማ̈ቃካ̇ዮ ቤስ̇ ጋልዳ ኤቃ̇ር ቤንቴ̇ጌይንዶ̇ ዪና̇ ኢዝባራ ዪኖ̇ ናባ̇ቢዝ ኣሲ ቆፒ̇ ኤራጋ̈ቤ። ዪና̇ ኢዝ ኬሊ̇ንባራ ዪሁዳ ጋዳ̇ ዎን ፉዳ ኢንዳ ጋልዳ ዎጺ̇ ቡ̈ታ̇ ጋ̈ቤ።

¹⁵ዛ̈ና ዎ ኣሲ ኣባክ ኤካ̇ንዳ ጋ̈ሪ ማ̈ቂ̇ ኬ̈ ጌላፖ̇።

¹⁶ዎት ቤስ̇ ጋልዳ ዎ̈ዳሬ ፌ ኣፊላ ኤካ̇ንዳ ጋ̈ሪ ጋስ ማ̈ቃፖ̇።

¹⁷ዪና̇ ኢዝ ኬሊ̇ንባራ ዎዳንብኬ ኣሚ̇ሲዛን ባዚን ኣዬ̇!

¹⁸ዪና̇ ባርጊ ጋርታ̇ ማ̈ቃካ̇ዮ̈ዲፌ̈ኒ ዎ̈ሲ̇ብቴ።

¹⁹ኣባ ጌይን ዪና̇ ኢዝ ኬሊ̇ንባራ ጾ̈ሲ̇ ቲ̈ን ሳ̈ዝ ኤ̈ሺ̇ን ኮቺ̇ኖምፖ ኤ̈̇ር ዓኖ̇ ዬሊ̇ዝ ዲራ̈ስ ጌዳ ቲ̈ናሬ ማ̈ቃ̇ምፔ̈ን ባዮ̇ ጴች ሜታ ዬይሬ።

²⁰ጾ̈ሲ̇ ዪኖ̇ ሜታ ኬሊ̇ን ዎይሊን ቃም ማሂኖኮ ዎኒ ኦ̈ና̈ካር ቡ̈ቲ̇ባ̈ስዶ̈ን ኢ ፌ̈ብ ቆሪኖ ኣሳንቦ ጋ̈ሪ ቃሚ̇ን ቃቢንኔ።

²¹ዪዚ ኦናክ ዪንታ̇ኮ “ክርስቶ̈ሲ ዓይ ዎ” ዎይ ኣቴ̇ጌይን “ሴካይ ዎ” ጌይጌይንዶ ዪንቲ ኪን ጋ̈ፒ̇ቴ።

²²ኣባ ጌይን ዎርዳ ክርስቶ̈ሳንኬ ዎርዳ ናባን ኬስካሪ ዎይሊን ማላ̇ ባዝኬ ታ̈ሚ̇ራ̈ታ ኦ̈ሙታ̇ ኢንታ̇ብ ዳንዳኢንቴ̇ጌይን ሜላ ኣቲ̇ን ቆሪንቲኖንሬ ባሊ̈ሬ።

²³ቴ ቲ̈ኒታር ዎይ ባዝ ሶ̈ሊኖኮታ̇ቦ ዪዚ ዪንቲ ና̈ጊንቲብቴ።

²⁴“ዪና̇ ኢዝ ኬሊ̇ንባር ዪ ዎይ ሜታ ኣ̈̇ኖፖ̇ ዓኒ ኣዋ̈ፊን ማ̇̈ሬ፤ ኣጋኒን ፎ̈ኢሳባሴ።

²⁵ቤ̈ርሳር ኣፋፖ̇ ጋ̈ሪንቲ̇ ኬዲ̇̈ሬ፤ ኣፋ ዎ ዎልቃ ባሮ ባዝ ዎይ ኤንኢ̈ሬ።

²⁶ዪና̇ ኢዝ ኬሊ̇ንባር ታ ኣሳ ናኣ̈ዲ ሻ̈ራባር፥ ጴች ዎልቃባርኬ ጴች ቦንችባራ ዬ̈ምባር ታ̈ና ቤቂ̇̈ሬ።

²⁷ታ̈ናር ቴ ኪ̈ታንቻ̇ን ሚሻ̈ራ፥ ኢንቲ ታ̈ብ ቆሪንቲኖን ሳ̈ዝ ኤ̈ሻ̇ፖ̇ ዎይ፥ ቡጊዳፖ̇ ቡጊድ ዬላ̇ር ኢንቲ ዎ ቤሳ̇ፖ̇ ዎይ ሺሺ̇ሬ።

²⁸ባላሳ ሚን ዪንታ̇ብ ሚሳ̈ሊፌ̈ን ማ̈ቆ̇፤ ኢዝ ሻቃን ፉርቲ̇፥ ኢዝ ዋይን ጫ̈ልቃ ዎቴ̈ጌይን ዪኒ̇ባራ ሴ̈ታ ዬላ̇ንዳብ ኡኪ̇ኖን ዪንቲ ኤሪ̈ሬ።

²⁹ዪና̇ ኢዝፌ̈ኒ ቴ ዪንታ̇ብ ሶ̈ሊኖን ዉርሲ ላይ ማሊ̇ን ፎቲንታ̇ምባ̇ራ ታ ኣሳ ናኣ̈ዲ ዬ̈ንዳብ ኡካ̇ር ካራ ኬ̈ሽ ጋልዳ ዎን ኤሪብቴ̇።

³⁰ቴ ዪንታ̇ክ ኪን ጋ̈ሬ ዪን ዎይ ፎቲንታ̇ካ̇ይዶ̈ን ዓ ዬሊቲ ዪባ̈ሴ።

³¹ኣፎ ሳ̈ዝኬ ሳ̈ዶ ሳ̈ዚ ዪ̈ሬ፤ ታ ቃ̈ሊንዳ ያባሴ።

³²ዪና̇ ኢዝ ቃሚ̇ን ኣ̈ንታ ማ̈ቃ̇ርኮ ጾ̈ሳ̇̇ ባ̈ባ̈ፖ̇ ኣቲ̇ን ኣፎ ኪታንቻ̇ንር ማ̈ቂ̇ን ናኣ̈ዳር ማ̈ቂ̇ን ኦናካር ኤሪባ̈ሴ።

³³ዪና̇ ኢዝ ቃሚ̇ን ኣ̈ንታ ማ̈ቃ̇ርኮ ዪንቲ ኤሪባ̈ሶኮታ̇ቦ ና̈ጊንቲ̇ብቴ፤ ሚ̈ጚብቴ፤ ዎ̈ሲብቴ።

³⁴ዪና̇ሬ ፌ ኣ̈ሊን ኣሻ̇ሪ ሜላ ጋዳ̇ ሉኪ̇̈ርዶ̈ር ፌ ኣሽካራንቦ ዱማ ዱማ ኦ̈ሳ ኢማ̇ሪ ፌ ኣ̈ሊን ና̈ጊዝ ና̈ሳ̈ባሬ ሚ̈ጚ ና̈ጋምፔ̈ን ሶ̈ላሪ ሉኪ̇ኖ ኣስፌ̈ኒዬ።

³⁵ዪዚ ኣ̈ሊን ባ̈ባ̈ዲ ኦማ ዬይርካሬ፥ ጊዲ̇ቢላ ዬይርካሬ ዎይ ኩታ ኦ̈ላዚምባር ዬይርካሬ ዎንማ̈ ዬይርካሬ ኤሪባ̈ሶኮታ̇ቦ ሚ̈ጛር ና̈ጊብቴ።

³⁶ኢ ዬ̈ምባራ ዪንቲ ሱርቂ ቤንታ̇ካ̇ዮ̈ዲፌ̈ኒ ና̈ጊንቲ̇ብቴ።

³⁷ቴ ዪንታ̇ብ ሶ̈ሊኖንዲፌ̈ኒ ሜላንባር ዎይ ሚ̈ጚብቴ ጋ̈ሬ” ጌይዴ።