Read basketo ማ̈ርቆ̈ሳ 2 Bible Online

ማ̈ርቆ̈ሳ 2 - basketo bible

ማ̈ርቆ̈ሳ 2

¹ጊላ̇ ቃማ̇ፖ ዓኒ ዬሱ̈ሲ ቂፊርና̈ሆ̈ም ካታማ ማ̈ቂ̇ ዬ̈ሪ ኣ̈ል ጌሊኖን ዎርዣ ሲስኪዴ።

²ዪ̈ኮታ̇ቦ ዎይሊን ኣሲ ዬ̈ር ኬ̈ባር ኩማሪ ካራ ጋልዳር ቤሲ̇ ዪዝ ዲራ̈ስ ሺ̈ቂዴ። ኢያሬ ጾ̈ሳ̇̇ ቃ̈ላ ኢንታ ታማ̈ርሲዴ። ኢ ቃ̈ላ ታማ̈ርሳምባራ፥

³ኦይዲ̇ ኣሳን ዎልማ̈ቃ̇ር ፔቲ̇ ዎብ̇ ኣስ ቶ̈ካ̇ር ኢ̈ክ ኤሄይዴ።

⁴ዎርዣ ዎይሊኖኮታ̇ቦ ዬሱ̈ሲ ዎ ቤሲ̇ን ዬልንዳብ ኢንታ ጋሚን ኣፎ ኬ̈ን ሾክ ዎቲ ዴንሪ ዎባ̇ ኢ ሱርቂ̇ኖን ኣርሲንባር ዎልኣ ኢዝባር ሶ̈ቢሲዴ።

⁵ዬሱ̈ሳር ኢንታ ኣማ̇ኒን ቤቃ̇ሪ ዎባ̇ኮ “ቴ ኢሻ̈ዶ! ኔ ናጋራ ኔ̈ብ ኣቶ̇ ጌዪንቲ̇ኔ” ጌይዴ።

⁶ዪና̇ ኢዝባራ ሙ̈ሳ ሂጋ̇ ታማ̈ርሲዝ ኣሳን ኢና ዶኢንዶ̈ሪ ፌ ቡ̈ዳ ጋርታ “ና̈ሳ ዓ̈ ኣባብ ጾ̈ሳ̇̇ ጋልዳ ዪዲፌ̈ኖ ቆ̈ሳ ሶ̈ሊራ? ጾ̈ሳ̇̇ ፔታ̇ናፖ̇ ኣቲ̇ን ኣሳ ናጋራ ኣቶ̇ ጋ̈ንዳ̇ብ ዳንዳኢዛ ኦ̈ኖ?” ዪዝ ጋ̈ር ቆፒ̇ዴ።

⁸ኢንቲ̇ ፌ ቡ̈ዳ ጋርታ ቆፒ̇ኖን ዬሱ̈ሲ ፌ ኣያ̇ናባር ኤሊ̇ር ኤራሪ ኢንታ̇ኮ “ዪንቲ̇ ዪንታ̇ ቡ̈ዳ ጋርታ ኣባብ ዪፌ̈ን ቆፒ̇̈ራ?

⁹ዎባ̇̈ኮ ‘ኔ ናጋራ ኔ̈ብ ኣቶ̇ ጌይንቲ̇ኔ’ ጋ̈ዚምፔኬ ‘ኔ ኣርሲን ቶ̈ካ̇ር ሉካ̇ቤ’ ጋ̈ዚምፖ̇ ዎና̇ ዴ̈ጻ̇̈ራ?

¹⁰ቴ ዪንታ̇ብ ሶ̈ሎ፥ ታ̈ቦ ኣሳ ናኣ̈ቦ ሳ̈ዝ ጋልዳ ናጋራ ኣቶ̇ ጋ̈ንዳ̇ቦ ዎልቃ̇ ዎን ዪንቲ ኤራምፔ̈ኒ” ጋ̈ሪ ዎባ̇̈ኮ

¹¹“ዲንዳ̇ራ ኔ ኣርሲን ቶ̈ካ̇ር ኔ ኣ̈ል ሉካ̇ቤ ጋ̈ር ቴ ኔ̈ብ ሶ̈ላሬ” ጌይዴ።

¹²ዎባ̇̈ዳር ዲንዳ̇ሪ ኣሳ ዎይ ኢያ ቤቃ̇ምባራ ፌ ኣርሲን ቶ̈ካ̇ር ሉኪ̇ዴ። ኢና ዎ ኣሳ ዎይ ጋራ̇ሚንታሪ “ዓ ፌ̈ኖ ባዝ ኑ ዉርሲ ቤቃ̇ራር ኤራካ̇ዬ” ጋ̈ሪ ጾ̈ሳ̇̇̈ቦ ጋላታ ሺ̈ሺ̇ዴ።

¹³ዬሱ̈ሲ ማ̈ቃ̇ር ባሃ̈ሪን ላፍ ሉኪ̇ዴ። ዎይሊን ዎርዣ ኢ̈ክ ዬይን ኢ ኢንታ ታማ̈ርሲዴ።

¹⁴ኢ ባሃሪን ላፊንባር ኣ̈̇ምባር ኢልፎ̈ሳ ናኣ ሌ̈ዊ[4] ጌይዛ ቃራጻኣ ቃጺሲዝ ቤሳ̇ ጋልዳ ዶኢንዶ̈ን ቤቃ̇ሪ “ቴ ዎሂን ዬ̈ቤ” ጌይን ኢ ዲንዳር ኢ ዎሂን ሉኪ̇ዴ።

¹⁵ዬሱ̈ሲ ቡና ኡሽካ̇ንዳብ ሌ̈ዊ ኣ̈ል ጌሊንዶ̇ን ዎይሊን ቃራጻ ቃጺሲዛንኬ ናጋራንቻ̇ን ኢ ዎሂን ሉካ̇ሪ ኢያኬ ኢ ታማ̈ራንባር ዎልኣ ሙንት ኤ̈̇ዴ።

¹⁶ዬሱ̈ሲ ናጋራንቻ̇ንባርኬ ቃራጻ ቃጺ̇ዛንባር ዎልኣ ሞ̈ምባ̇ር ቤ̈ቃ̇ሪ ሙ̈ሳ ሂጋ̇ ታማ̈ርሲዛንኬ ፋራሳ̈ዋን “ኢ ኣባቦ ናጋራንቻ̇ንባርኬ ቃራጻ ቃጺሲዛንባር ዎልኣ ሙይራ?” ዪዝ ጋ̈ር ኢ ታማ̈ራን ኦይጪ̇ዴ።

¹⁷ዬሱ̈ሳር ኢንቲ ሶ̈ላዚን ሲስካሪ “ማኖንቦዶኬ ማካ̇ዮንቦ ኣኪማ ኮሽባ̈ሴ፤ ታ̈ናሬ ናጋራንቻ̇ን ታ̈ክ ጼይጋንዳብ ዬ̈ዶ̇ኬ ጺላ̇ን ጼይጋንዳብ ዬ̈ካ̇ዬ” ጌይዴ።

¹⁸ዋ̈ኒ̇ሳ ታማ̈ራንኬ ፋራሳ̈ዋን ጾ̈ሚርዶ̈ኒ፥ ፔቲ̇ ፔቲ̇ ኣሳን ዬሱ̈ሳክ ዬ̈ሪ “ዋ̈ኒ̇ሳ ታማ̈ራንኬ ፋራሳ̈ዋን ጾ̈ሚርዶ̈ን፥ ኔ ታማ̈ራን ኣባብ ጾ̈ሚባ̈ሳ” ጌይዴ።

¹⁹ዬሱ̈ሳር ኢንታኮ “ኢሳ̇ ኢንታባር ዶኣምባ̇ራ ቱሪን ኣሲ ጾ̈ማንዳብ ኮሺ̈ራ? ዪዝ ጊዳካ̇ዬ፥ ኢሳ̇ ኢንታባር ዶኣምባ̇ራ ኢንቲ ጾ̈ማንዳብ ኮሺ̇ባ̈ሴ።

²⁰ኢሳ̇ ኢንታ ጋልዳፖ ሉኪ̇ዝ ኬሊ̇ ዬይሬ፥ ዪና̇ ኢዝ ኬሊ̇ንባራ ኢንቲ ጾ̈ሚሬ።

²¹“ሲላ ኣፊላ ጋልዳ ኦራ ጫርቃ ጋዳ̇ር ኪቢዝ ኣሲ ዎ? ዪዝ ዎቴ̈ጌንዶ፥ ጫርቂን ኦራንዳ ኣፊሊን ሲሊን ዳርሳ̇ራ ቲ̈ኖምፖ̇ ዉ̈ርሳ ኢ̈ሳ̇ር ኣሻ̇̈ሬ።

²²ዪና̇ ኢዝፌ̈ኒ ቢርት ኤ̈ሲ̇ኖ ኤ̈ስ̇ ሲላ ኦካራ ጋርታ̇ ጋዲ̇ዝ ኣሲ ባዬ̇። ዪኖ̇ ዎቴጌይንዶ̇ ኤ̈ሲ̇ንዳ ኦካሪን ዳርሳ̇̈ሬ፤ ኢናፖ̇ ኤ̈ሲ̇ን ዉልኢንታ̈ሪ ኦካሪንዳር ሜላ̇ ኣታ̇ሬ። ዪ̈ኮታ̇ቦ ቢርት ኤ̈ሲ̇ኖ ኤ̈ስ ኦራ ኦካራ ጋርታ̇ ጋዳ̇ንዳ̇ብ ኮሺ̈ሬ” ጌይዴ።

²³ፔታ̇̈ብ ሳ̈ዚ ሳምባታ ቃምዶ̈ን፥ ዬሱ̈ሲ ጎስ̇ ቲሽ ጋርሳባር ኣ̈̇ምባር ኢ ታማ̈ራን ጎስ ቲሽ ዱ̈ሪ ሺጪ̇ ሙንት ኤ̈̇ዴ።

²⁴ፋራሳ̈ዋን ኢ̈ኮ “ኔ ታማ̈ራን ሳምባታ ጋላስ ካዪንቲ̇ኖ ባዝ ኣባብ ዎቲ̈ራ?” ጋ̈ር ኦይጪ̇ዴ።

²⁵ዬሱ̈ሳር ኢንታኮ “ዳ̈ዊቲ ፔታ̇ብ ኢ̈ት ጋፊ ኢያ ዎን ፌባር ዎ ኣሳንባር ዎል ማ̈ቃ̇ሪ ዎቲኖ ባዚን ዪንቲ ናባ̇ቢ ቤቃ̇ካ̇ያ?

²⁶ቄ̈ሳ ኣላቃንቦ ኣላቃ ኣባ̈ታር ኬል̇ባራ ኢ ጾ̈ሳ̇̇ ኬ ጋርታ̇ ጌላሪ ቄ̈ሳንፖ̇ ኣቲ̇ን ሜላ ኣስ ሞ̈ካ̇ይፌ̈ን ካዪንቲ̇ኖ ጾ̈ሳ̇̇̈ቦ ዣ̈ርሺንቲኖ ሶ̈ሊ̇ን ሙይዴ። ፌባር ዎ ኣሳንባር ኢሚ̇ዴ” ጌይዴ።

²⁷ዬሱ̈ሲ ማ̈ቃ̇ር ኢንታኮ “ሳምባታ ኣሳብ ኮቺ̇ንቲንዶኬ ኣሲ ሳምባታብ ኮቺ̇ንታካ̇ዬ።

²⁸ዪ̈ኮታ̇ቦ ታ̈ኒ ኣሳ ናኣ̈ዲ ሳምባታብ ላ̈” ጌይዴ።