Read basketo ማ̈ርቆ̈ሳ 4 Bible Online

ማ̈ርቆ̈ሳ 4 - basketo bible

ማ̈ርቆ̈ሳ 4

¹ሜላ ጋላስ ዬሱ̈ሲ ባሃ̈ሪን ቡጊድ ጋልዳ ታማ̈ርሲ ኤ̈̇ዴ። ዎይሊን ዎርዦ ኢ̈ክ ሺ̈ቂኖኮታ̇ቦ፥ ኢ ባሃ̈ሪን ጋልዳ ዎ ጎጚን ጋርታ̇ ጌላር ዶኢዴ። ዎርዣ̈ዳር ዎይ ባሃ̈ሪን ቡጊዲምባ̇ር ሺ̈ቂዴ።

²ኢያሬ ዎይሊን ባዝ ሚሳ̇̈ሊባር ኢንታ̇ ታማ̈ርሲ̇ዴ። ታማ̈ርሲ̈ርዶሪ፥

³“ሲስኪ̇ብቴ̇! ፔቲ̇ ኣሲ ዜር ዜርቃ̇ንዳብ ኬስኪ̇ዴ።

⁴ኢ ዜ̈ርቃ̇ዚምባራ ዜርን ጋርታ̇ፖ̇ ዶካ̇ን ጎይ ቡጊድ ኬዲ̇ን ካፊ ዬ̈ሪ ሱ ሙይዴ።

⁵ፔታ̇ኒን ቁ̈ኣ ጋልዳ ኬዲ̇ን ዎይሊን ሳ̈ዚ ባዮ̇ኮታ̇ቦ ኤሊ̇ባር ፉዳዴ።

⁶ጳሪን ጻጳ ሳ̈ዳ̇ ሚሻካ̇ዮኮታ̇ቦ ኣዋ ኬስኪ̇ን ሹላ̇ር ሜላዴ።

⁷ፔታ̇ኒን ኣጚ ባላ ጋርታ̇ ኬዳ̇ር ፉዲን ኣጚን ዲጫ̇ራ ፉዲኖን ባቂ̇ን ኣ̈ፍ ኤ̈ካ̇ይ ኣታ̇ዴ።

⁸ዶካ̇ን ኢጊስ ሳ̈ዝ ጋልዳ ኬዳ̇ር ፉዲዴ፤ ዪን ዲጫ̇ሪ ፔታ̇ኒ ዓይዚ̇ ታጳ̇፣ ፔታ̇ኒ ሌሂ ታጳ̇፣ ፔታ̇ኒ ጼ̈ታ ኣ̈ፍ ካጺ̇ዴ” ጌይዴ።

⁹ኢናፖ̇ ዬሱ̈ሲ “ሲስኪ̇ዝ ዋይ ዎ ኣሲ ዓኖ̇ ሲስካ̇ጋ̈ቤ” ጌይዴ።

¹⁰ዬሱ̈ሲ ሶ̈ላምባ̇ር ሲስኪ̇ኖ ኣሳንኬ ኢ ታማ̈ራን ታጶ̇ ናምኣን ኢ ፌ̈ብ ዎዶ̈ን ኢ̈ክ ሺ̈ቃሪ ኢ ዓታር ሶ̈ሊኖ ሚሳ̇̈ሊምቦ̇ ኢዝ ቢርሺቺ̇ን ኣብዝኮ ኦይጪ̇ዴ።

¹¹ዬሱ̈ሳር ኢንታ̇ኮ “ታ̈ኒ ጾ̈ሳ̇̇ ካ̈ቲቲምፖ̇ ዛ̈ና ዎንቦ ሚሳ̇̈ሊባር ሶ̈ላ̈ርዶኬ ዪንታ̇ብ ማ̈ቄ̈ጌይንዶ ጾ̈ሳ̇̇ ካ̈ቲቲ ሚስጢሪን ኤራምፔ̈ን ኢሚ̇ንቲ̇ኔ።

¹²ዪ̈ዳሬ ኣባቦ ጌዬጌይንዶ ‘ኢንቲ̇ ቤቂ̇ሙታ̇ዶ̈ር ፌ ቡ̈ዳ ጋርታ̇ ኤ̈ካ̇ይፌ̈ኒ፥ ሲስኪ̇ሙታ̇ዶ̈ር ቆፒ̇ ቤቃካ̇ይፌ̈ኔ፥ ጾ̈ሳ̇̇̈ክ ማ̈ቃሪ ኢንታ ናጋራ ኣቶ̇ ጌዪንታ̇ካ̇ይፌ̈ኒዬ።[5]’ ”

¹³ኢናፖ̇ ዬሱ̈ሲ ኢንታ̇ኮ “ሚሳ̇̈ሊን ዓና̇ ዪንታ̇ብ ጌላካ̇ያ? ዓት ዪዶኮ ሜላ ሚሳ̇̈ላን ዎይ ዪንቲ̇ ዎዛርታ̇ር ኤራንዳ̇ብ ዳንዳኢ̈ራ?

¹⁴ዜርቂ̇ዝ ና̈ሳ̈ዲ ጾ̈ሳ̇̇ ቃ̈ሊን ዜርቂ̈ሬ።

¹⁵ፔቲ̇ ፔቲ̇ ኣሳን ጎይም ጋልዳ ኬዲ̇ኖ ዜርን ማይጺ̈ሬ። ዪን ጾ̈ሳ̇̇ ቃ̈ሊን ሲስካ̇ምባ̇ራ ሴ̈ጣኖ ኤሊ̇ባር ዬ̈ሪ ኢንታ̇ ጋርታ̇ ጌሊኖን ጾ̈ሳ̇̇ ቃ̈ሊን ቦቲን̈ሬ።

¹⁶ዶካ̇ንር ቁ̈ኣ ቤስ̇ ጋልዳ ዜርቂንቲ̇ኖ ዜርን ማይጺ̈ሬ። ዪን ጾ̈ሳ̇̇ ቃ̈ሊን ሲስኪ̈ርዶሪ ኡፋይስባር ኤኪ̇̈ሬ።

¹⁷ማ̈ቂ̇ናካሬ ዪንቦ ጻጳ ባዮ̇ኮታ̇ቦ ዎይሊን ዶኢባ̈ሴ። ጾ̈ሳ̇̇ ቃ̈ሊን ጊሽ ሜታኬ ዳስ̇ፌ̈ኖ ባዝ ኢንታ̇ ጋል ዬያፌ̈ን ዎቴጌይን ፌ ኣማ̇ኒን ኤሊ̇ባር ኣሺ̇̈ሬ።

¹⁸ማ ዶካ̇ን ኣጚ ባላ ጋርታ̇ ዜርቂ̇ንቲ̇ኖ ዜርን ማይጺ̈ሬ። ዪን ጾ̈ሳ̇̇ ቃ̈ሊን ሲሲ̇ን ሲስኪ̈ርዶ̈ን፥

¹⁹ዓና̇ ኣላሚን ጋልዳ ዎ ቲ̈ሪሲ፣ ዱሪቲ ካ፣ ዱማ ዱማ ባዛብ ኢና̇ ኢንታ ቡ̈ዳ ጋርታ ጌላሪ ጾ̈ሳ̇̇ ቃ̈ሊን ሚሪ ኤ̈̇ር ኢንታ̇ ኣ̈ፍ ባዪ ኣሺ̇̈ሬ።

²⁰ዶካ̇ን ኢጊስ ሳ̈ዝ ጋልዳ ዜርቂ̇ንቲ̇ኖ ዜርን ማይጺ̈ሬ። ዪን ጾ̈ሳ̇̇ ቃ̈ሊን ሲስካ̇ሪ ፌ ቡ̈ዳ ጋርታ̇ ኤኪ̇ዛን። ዪንሬ ዓይዚ̇ ታጳ̇፣ ሌሂ ታጳ̇፣ ጼ̈ታ ኣ̈ፍ ኣ̈ፊዛን” ጌይዴ።

²¹ማ̈ቃ̇ር ዬሱ̈ሲ ኢንታኮ “ኣሲ ታማ ፎ̈ኢሳሪ ፎኢንን ቤ̈ንታምፔ̈ኒ ሾክ̇ ጌይኖ ቤስ̇ ጋልዳ ጋዲ̇ርዶኬ፥ ኦት ጋርታ ዎይ ኣርሳ ጻና ጋዲ̇̈ራ?

²²ዪና̇ ኢዝፌ̈ኒ ባዪንታ̇ር ቤንታ̇ካ̇ይ፥ ኣ̈ቺንታ̇ር ኤሪንታ̇ካ̇ይ ኣቲ̇ዝ ባዚ ባዬ̇።

²³ዪዚ ሲስኪዝ ዋይ ዎ ኣሲ ዪኖ̇ ሲስካ̇ ጋ̈ቤ” ጌይዴ።

²⁴ማ̈ቃ̇ሪ “ዪንቲ̇ ሲስኪ̇ዝ ባዛን ዎይ ኮሺንቻ̇ር ሲስኪብቴ! ዪንቲ̇ ማኪ̇ዝ ኢቂ̇ንባር ዪንታ̇ብ ማ̈ቃ̇ር ማኪንቲ̈ሬ፤ ኢዝፓ̇ር ሺሻር ዪንታ̇ብ ጉጂንቲ̈ሬ።

²⁵ዎ ና̈ሳቦ ዓኒ ኢ̈ብ ጉጂንቲ̈ሬ፤ ባዮ̇ ና̈ሳፖ̇ ኢ̈ብ ዎ ጊሊ̇ን ኢዛር ጌዳ ኤኪንታ̈ሬ።

²⁶ኢናፖ̇ ዬሱ̈ሲ ኢንታኮ “ጾ̈ሳ̇̇ ካ̈ቲቲንዳ̇ ኣሲ ሳ̈ዝ ጋልዳ ዜርቂ̇ኖ ዜር ማይጻ̈ሬ፤

²⁷ዜርቂ̇ኖ ና̈ሳ ቃም ሱርቂ፥ ጋላስ ዲንዲ̇ ዎታምባራ ኢዛ ዎዛርታ̇ር ዲጫ̇̈ርኮ ኢ̈ብ ኤሪንታ̇ካ̇ይዶ̈ን ዜርን ፉዳ̇ር ዲጫ̇̈ሬ።

²⁸ኢዝ ጋልዳ ዜርቂኖ ካንዶ ሳ̈ዚን ፌ̈ብዶ̈ራ ቲ̈ን ጫ̈ች ማሃ̈ሪ፣ ኢናፖ̇ ጫ̈ቺ̇ን ፊልጺጛሬ፣ ፊልጺን ጋልዳ ማ ኣ̈ፍ ኤ̈̇̈ሬ።

²⁹ኢናፖ̇ ካን ካጻ̇ራ ሺ̈ሺ̇ዝ ኬሊ̇ ዬሊ̇ ና̈ሳ ቴይሲ ኤ̈̇̈ሬ” ጌይዴ።

³⁰ማ̈ቃ̇ር ዬሱ̈ሲ “ኑ̈ኒ ጾ̈ሳ̇̇ ካ̈ቲቲን ኣብዝ ማይጻ̈ሬ ጋ̈ኔ? ኣብዝ ሚሳ̇̈ሊ ኤካ̇ር ሶ̈ላኔ?

³¹ጾ̈ሳ̇̇ ካ̈ቲቲንዳ̇ ሳ̈ዝ ጋልዳ̇ ዜር ዎይፖ̇ ጉ̈ጻዚን ሳና̈ፊጫ ጋ̈ዝ ሚ ኣ̈ፊን ማይጻ̈ሬ።

³²ኢዛ ዜርቂ̇ንታር ዲጪ̇ኖፖ̇ ዓኒ ዱጫ ጌይዛ ዎይፖ̇ ሺ̈ሬ። ካፊ ዎይ ኢዝ ጋልዳ ዶኣምፔ̈ን ዳንዳኢሲዝ ሻቃ ኬሳ̇̈ሬ” ጌይዴ።

³³ዬሱ̈ሲ ኣሳንቦ ጌሊዝ ጎይባራ ዪን ፌ̈ኖ ዎይሊን ሚሳ̈ሊባራ ቃ̈ላ ሶ̈ሊዴ።

³⁴ሚሳ̇̈ሊ ባዪ ኢንታብ ኣባካር ሶ̈ሊባ̈ሴ። ማ̈ቂ̇ናካሬ፥ ፌ ታማ̈ራንቦ ኢንታኬ ኢያክ ሙታ̇ ዎ ቤሲ̇ ኢንታቦ ዎይ ባዝ ቢላ̇ር ሶ̈ሊሬ።

³⁵ዪና̇ ኢዝ ጋላስ ኦማ ዬሱ̈ሲ ፌ ታማ̈ራንኮ “ባሃ̈ሪምፖ̇ ጌዳ ፊ̈ን ፊ̈ጚስቶ” ጌይዴ።

³⁶ኢንታ̇ሬ ዎርዣ ኣሻ̇ሪ ዬሱ̈ሲ ዎ ጎጚን ጋርታ̇ ጌላሪ ኢዝባር ኢያ ኤኪ̇ ሉኪ̇ዴ። ሜላ ዎይሊን ጎጛንር ኢንታባር ሉኪ̇ዴ።

³⁷ሉካ̇ምባራ ባሃ̈ሪን ጋልዳ ጴች ዉርጊ ዲንዳሪ ጎጚንባር ዋ̈ ኩማንዳብ ዎቲዝ ዲራ̈ስ ጎጚን ዡጪች ኤ̈̇ዴ።

³⁸ዬሱ̈ሲ ጎጚን ጋርታ ጋስ ኣ̈̇ሪ ቲራ̈ሳ ፌ ቆም ኣቻ ጋዳ̇ር ሱርቂንዶ̈ን፥ ኢ ታማ̈ራን ኢያ ዲንር ጌዪ “ኣስታማ̈ራ̈ዶ! ኑ ያምባ̇ር ኔ ዚምዶኣ̈ራ?” ጌይዴ።

³⁹ኢያር ዲንዳር ዉርጊን ቆዲ̇ዴ። ባሃ̈ሪንኮ “ዚምዶኣቤ!” ጌይን ዉርጊን ዚክ ጌይን ባሃ̈ሪን ዚምዶኣዴ።

⁴⁰ኢያር ፌ ታማ̈ራንኮ “ዪ̈ፌ̈ን ዎይ ዪንቲ ኣባብ ኢ̈ጪ̇̈ራ? ኣማ̇ና ዪንታ̇ብ ዎዛርፌ̈ን ዬ?” ጌይዴ።

⁴¹ኢንታ̇ር ዎይሊን ኢ̈ጫ̇ሪ ዎልዎልኣ “ናኣ̈ዶ! ዉርጊሬ ባሃ̈ራሬ ኢ̈ብ ኪ̈ቲንቲዛ ዓ̈ ኢ ኦ̈ኖ?” ጌይዴ።