Read basketo ሉቃ̈ሳ 10 Bible Online

ሉቃ̈ሳ 10 - basketo bible

ሉቃ̈ሳ 10

¹ዪኒ̇ፖ ዎሃ ጎዳ̈ዲ ሜላ ታብዛ ታጶ̇ ናምኢ ኣሳን ዎጛላ ታማርሳምፔ̈ን ማራ̇ጺዴ። ኢ ሉካ̇ንዳ̇ብ ኮዪኖ ቤሳ̇ን ጋርታ̇ኬ ካታማን ጋርታ̇ ዎይ ኢንቲ̇ ቲ̈ኒታር ሉካ̇ምፔ̈ኒ ናምኢ ናምኢ ማሃር ሚሺዴ።

²ኢ ኢንታ̇ ሚሺ̈ርዶሪ “ሺ̈ሺ̈ንቲ̇ዝ ካ ዎይሊን ዎቲናካር ዪን ሺ̈ሺ̇ ኦ̈ዝ ኣሳን ሙቃ̇። ዪ̈ኮታ̇ቦ ካን ላ̈̈ዲ ኦ̈ዝ ኣሳን ፌ ካን ሺ̈ሻ̇ዝ ቤሲ̇ንኮ̇ ሚሻምፔ̈ን ጌሺብቴ።

³ዪዚ ዪንቲ̇ ሉኪ̇ብቴ፤ ቴ ዪንታ̇ ዶራንፌ̈ን ዬያ ጊዳ̇ባር ሚሻ̈ሬ።

⁴ዪንቲ̇ ሉኪ̇̈ርዶሪ ሚ̈ሺ̇ ኤ̈̇ዝ ቃርጺሪ̈ታ ዎይ ኮራጃ̇ ዎይ ጫ̈ማ̇ር ማ̈ቂ̇ን ኤ̈ፒ̇ቴ። ጎይም ጋልዳ̇ ኦ̈ናካር ሳሮ ጋፒ̇ቴ።

⁵ዪንቲ̇ ኦ ኣ̈ልካር ማ̈ቂ̇ን ጌሊ̈ርዶሪ ቲ̈ኒታሪ ‘ሳሪቲ ኣ̈ል ዓኒ̇ብ ማ̈ቆ̇’ ጌብቴ̇።

⁶ሳሪቲ ካዝ ኣስ ኢና ዎኮ ዪንቲ̇ ሳሪኖ ሳሪቲንዳ̇ ኢንታ̇ብ ማ̈ቃ̇̈ሬ። ዪ ባዪ ኣቴ̇ጌይንዶ̇ ዪንታ̇ ሳሪቲንዳ̇ ዪንታ̇ክ ማ̈ቃ̇̈ሬ።

⁷ኢንቲ̇ ዪንታ̇ቦ ኤሄይኖ ባዝ ዎይ ሙዪ ኡሽኪ̇ ኣ̈ል ኢና ዶኢብቴ̇። ኣባቦ ጌይን ኦ̈ስ ኦ̈ዝ ኣሲ ዳሞ̈ዛ ዲጛንዳ̇ብ ኮሺ̇̈ሬ። ፔቲ̇ ኣሳ ኣ̈ላፖ̇ ሜል ኣሳ ኣ̈ላሬ ቢሪንታ̇ፒ̇ቴ።

⁸ዪንቲ̇ ዎይዲካር ካታማ ጋርታ̇ ጌሌጌይንዶ ኣሲ ዪንታ̇ ሞኪ̇ ኤኬ̇ጌይን ዪንታ̇ብ ኤሄይኖ ባዝ ጶ̈ካ̇ይ ሙብቴ።

⁹ኢና ካታሚን ጋርታ̇ ዎ ማዝ ኣሳን ፋሙታ̇ዶ̈ሪ ዎርዣ̈ቦ ‘ጾ̈ሳ̇̇ ካ̈ቲቲን ዪንታ̇ክ ኡኪ̇ኔ’ ጋ̈ሪ ሶ̈ሊብቴ̇።

¹⁰ዪንቲ̇ ፔቲ̇ ካታማ ጋርታ̇ ጌላምባራ ኣሳን ዪንታ̇ ሞኪ̇ ኤካካ̇ይ ኣቴ̇ጌይን ኣሲ ዎይሊን ሺ̈ቂዝ ቤሳ̇ ጋልዳ̇ ኬስካ̇ሪ፥

¹¹‘ዪንቲ̇ ኑ̈ና ሞኪ̇ ኤካ̇ብዳ ጌይኖምቦ̇ ማርካ ማ̈ቃ̇ምፔ̈ኒ ኑ ሜላ ኣቲ̇ን ኑ ቶሂን ጋልዶ̇ን ዪንታ̇ ካታሚን ጋርቶ̇ ቡልኢን ዪንታ̇ብ ኢና ፊታ̇ር ኣሻ̇ንዳ̇። ዎቲናካሬ ጾ̈ሳ̇̇ ካቲቲ ኡኪ̇ኖን ዪኖ̇ ዪንቲ̇ ኤራንዳብ ኮሺ̇̈ሬ’ ዪዝ ጌብቴ̇።

¹²ቴ ዪንታ̇ብ ሶ̈ሎ፥ ጊዳክ ፊርዳ ጋላስ ዓና̇ ካታሚንፖ̇ ሶዶማ ካታሚን ጋልዳ̇ ዬ̈ዝ ጎይሊን ጊላ̇።

¹³ኮራዚን ካታሚንዴ̇! ኔ̈ና ኣዬ̇! ቤ̈ቴሳይዴ! ኔ̈ና ኣዬ̇! ዪንታ̇ብ ኦ̈ሲንቲ̇ኖ ታ̈ሚራ̈ታ̈ዲ ጢሮ̈ሳኬ ሲዶ̈ና ካታማን ጋርታ̇ ኦ̈ሲንቲኔፌ̈ንኮ̇ ዎን ሚን ሚን ኢንቲ̇ ኣዛና ኣፊላ ማኢ ቡዳ ቆቲ̇ ጾ̈ሳ̇̇ ቲ̈ን ማ̈ሪቲ ጌሊ̈ርዶን።

¹⁴ዎቲናካሬ ፊርዳ ጋላስ ዪንታ̇ ጋል ዬ̈ዝ ፊርዲ̇ምፖ̇ ጢሮ̈ሳ ጋልዳኬ ሲዶ̈ና ጋልዳ ዬ̈ዝ ፊርዲንዳ ጊላ̇።

¹⁵ኣ̈ሽ ቂፊርና̈ሆ̈ሜ! ኔ ማ ፉዳ ኣፋ ኬስካ̇ንዳብ ኮዪዬ? ጾ̈ሲ̇ ኔ̈ና ቶ̈ራ ዓይቂ̇ኖ ኣሳን ጌሊዝ ቤስ̇ ጌልሲ̇̈ሬ።

¹⁶“ዪንታ̇ኮን ሲስኪ̇ዝ ኣሲ ታ̈ኮንዳ̇ር ሲስኪ̇̈ሬ፤ ዪንታ̇ ኢጺ̇ዝ ኣሲ ታ̈ና ኢጺ̇̈ሬ፤ ታ̈ና ኢጺ̇ዝ ኣሲ ታ̈ና ኪ̈ቲ̇ ሚሺኖ ኢጺ̇̈ሬ” ጌይዴ።

¹⁷ታብዛ ታጳ̇ ናምኢ ኣሳን ኡፋይስባር ማ̈ቂ̇ ዬ̈ሪ “ጎዳ̈ዶ! ሜላ ኣቲ̇ን ኢ̈ታ ኣያ̇ናንሬ ኔ ሱምባራ ኑ̈ቦ ኪ̈ቲንቲ̇ዴ” ጌይዴ።

¹⁸ኢያር ኢንታ̇ኮ “ሴ̈ጣኖ ዳዳፌ̈ኒ ኣፋፖ̇ ኬዳ̇ምባ̇ር ቴ ቤቃ̇ዴ።

¹⁹ዪዝ ዪንቲ̇ ሾ̈ሽ ጋልዳኬ ዓጛርጫ̇ ጋልዳ̇ ዬ̇ምፔ̈ን ጻላ̈ታ ዎልቃ ዎይ ጋልዳ̇ ሲልጣ̈ና ዪንታ̇ብ ኢሚ̇ኔ። ዪንታ̇ ጎዳ̇ኢዝ ባዝ ኣባክ ፔታ̇ናር ባዬ̇።

²⁰ማ̈ቂ̇ናካሬ ኢ̈ታ ኣያ̇ኖ ዪንታ̇ብ ኪ̈ቲንቲ̇ኖምቦ̇ ኡፋይታ̇ፒ̇ቴ። ዪንታ̇ ሱምንዳ̇ ኣፎ ማዝጋባ ጋልዳ̇ ጻ̈ፊንቲ̇ኖ̈ምቦ ኡፋይቲ̇ብቴ” ጌይዴ።

²¹ዪኒ̇ባራ ዬሱ̈ሲ ጌ̈ሻ̇ ኣያ̇ናባር ኡፋይታ̇ሪ “ኣፋ ጪሊምቢኬ ሳ̈ዶ ሳ̈ዚምቦ ጎዳ ማ̈ቂ̇ኖ ቴ ባ̈ባ̈ዶ! ባዛን ዪን ኔ̈ኒ ኤጫንፕኬ ኤራንፖ̇ ኣ̈ቻ̇ራ ኣቂሊ ናኣንቦ ቤይሲኖኮታ̇ቦ ቴ ኔ̈ና ጋላታ̈ሬ። ኣ̈ ቴ ባ̈ባ̈ዶ ዓና̇ ኔ ዶሲኖንዲፌ̈ኒ ማ̈ቂ̇ኔ” ጌይዴ።

²²“ዎይ ባዚ ቴ ባ̈ባ ጋልዳፖ̇ ታ̈ቦ ኢሚንቲ̇ኔ። ማ ናኣ ኢ ኦ̈ናኮ ባ̈ባ̈ፖ̇ ኣቲ̇ን ሜላ ኤሪዝ ኣሲ ባዬ̇። ማ ባ̈ባ̈ ኦ̈ናኮ ናኣ̈ፖ̇ ኣቲ̇ን ዎይ ናኣ ቤይሳንዳ̇ብ ኮዪኖ ኣሳፖ̇ ኣቲን ሜላ ኤሪዝ ኣሲ ኦ̈ናካር ባዬ̇” ጌይዴ።

²³ኢ ፌ ታማ̈ራንኮ ቢሪንታ̇ሪ ኢንታ̇ብ ሙታ̇ “ዪንቲ̇ ቤቃ̇ዚን ቤቂ̇ኖ ኣ̈ፋን ኣንጂንቲ̇ኔ።

²⁴ቴ ዪንታ̇ብ ሶ̈ላዚንዳ̇፥ ዎይሊን ናባንኬ ካ̈ቲንታ̇ን ዪንቲ̇ ቤቃ̇ዚን ቤቃ̇ንዳ̇ብ ኮያሪ ቤቃካ̇ይ ኣቲ̇ኔ። ዪንቲ̇ ሲስካ̇ዚን ሲስካ̇ንዳ̇ብ ኮያሪ ሲስካ̇ካ̇ይ ኣቲ̇ኔ” ጌይዴ።

²⁵ፔቲ̇ ጋላስ ሙ̈ሳ ሂጋ̇ ታማ̈ርሲዝ ፔቲ̇ ኣስዶ̈ሪ ዬሱ̈ሳ ፋታ̇ናንዳ̇ብ ኮያሪ ኢ̈ኮ “ኣስታማ̈ራ̈ዶ! ታ̈ኒ ሜናብ ሼምፓባር ዶኢን ዲጛንዳ̇ቦ ኣብዝ ዎታንዳ̇ብ ኮሻ̇̈ራ?” ጌዪ ኦይጪ̇ዴ።

²⁶ዬሱ̈ሲ ኢ̈ኮ “ሙ̈ሳ ሂጋ̇ ማጻ̈ፊን ጋልዳ ኣብዝ ጌዪ ጻ̈ፊና? ኢዝ ቢርሺቺ̇ን ኔ̈ብ ኣብዝ ማይጻ̈ራ?” ጌዪ ኦይጪ̇ዴ።

²⁷ና̈ሳ ኢ̈ብ ማሂ̈ርዶሪ “ኔ ጎዳ ጾ̈ሳ̇̇ ኪን ቡ̈ዳባር፣ ኪን ሼምፓባር ኪን ዎልቃባርኬ ኪን ቆፊባር ካቤ፤ ማ ኔ ላጋ̇̈ዳሬ ኔ ኔ̈ና ካዚንዲፌ̈ኒ ካቤ” ጌይሬ ጋ̈ር ማሂዴ።

²⁸ዬሱ̈ሲ ኢ̈ኮ “ኔ ኮሽ ማሂኔ፥ ኔ̈ናር ዪና̇ ኢዝፌ̈ን ዎታቤ ሼምፓባር ዶኣ̈ሬ” ጌይዴ።

²⁹ና̈ሳ̈ዳር ፌ̈ና ጺላ̇ ኣስ ማሃንዳ̇ብ ኮያሪ “ኢ ቴ ላጋ̇ ኦ̈ኖ?” ጌዪ ኦይጪ̇ዴ።

³⁰ዬሱ̈ሲ ኢ̈ቦ ማሂ̈ርዶሪ “ፔቲ̇ ኣሲ ዬሩሳ̈ላማፖ̇ ቶ̈ራ ያ̈ሪኮ ሉካ̇ምባራ ፋ̈ና̇ን ኢያ ኤ̈̇ር ኢ ኣፊሊን ጋ̈ሪ ኤካ̇ሪ፥ ኢያ ቡኪ̇ ቡካ̇ሪ ዓይቃ̇ንዳ ዎታምባራ ኣሻ̇ር ሉኪ̇ዴ።

³¹ፔቲ̇ ቄ̈ሳዶ̈ሪ ዪና̇ ጎይንባራ ጎርጎራ ኣ̈̇̈ርዶ̈ሪ ኢያ ቤቃ̇ሪ ባያር ኢ ካንቲ̇ንባር ኣ̈̇ዴ።

³²ማ ፔቲ̇ ሌ̈ዊ ዜርዶ̈ሪ ቤስ̇ ኢዝ ጋልዳ ዬላ̇ር ኢያ ቤቃ̇ሪ ዚምጌዪ ባያር ኣ̈̇ዴ።

³³ፔቲ̇ ሳማ̈ራ ጋዶ̇ ኣስዶ̈ሪ ኢ ፌ ጎይ ሉኪ̇̈ርዶር ና̈ሳ ዎ ቤሲ̇ን ዬላ̇ር ኢያ ቤቃ̇ር ኢ̈ብ ሚጪንቲ̇ዴ።

³⁴ኢናፖ̇ ኢ̈ክ ኡካ̇ር ኢ ኪሲን ጋልዳ ዛይታኬ ዎይና ጃ̇ ጾኪሳር ጫርቃባር ቃቺ̇ ዎታሪ ፌ ዬራ ጋልዳ ቶጊሲ ኢያ ኤካ̇ር ዛቃ̇ ሼምፒ̇ዝ ኬ̈ ጋርታ̇ ኤ̈ጛሪ ኢና ኮሺንቺ̇ ሙሲ ኡሺ̇ ኢያ ና̈ጊዴ።

³⁵ኢዝ ዎንን ዛቃ̇ን ሼምፓዝ ኣ̈ሊን ባ̈ባ̈ቦ ናምኢ ዲና̈ራ ኢማ̇ሪ “ዓኒ̇ባራ ኣባክ ዎ̈ጛራ ና̈ሳ ዓ̈ ጋ̈ል ኡሻ̇ ኢያ ማሳቤ። ዓኒ̇ ጋልዳ̇ ሜላ ኔ̈ና ጉጂሻዶኮ ቴ ማ̈ቃ̇ ዬ̈ርዶራ ኔ̈ብ ጪጋ̇ንዳ̇” ጌይዴ።

³⁶“ዪዚ ዪን ኣስ ዓይዛ̇ን ጋርታ̇ፖ ና̈ሳ ፋ̈ና̇ን ኢያ ቡኪ̇ኖ̈ቦ ላጋ̇ ማ̈ቃ̇ሪ ኮሽ ኦ̈ኖ ኔ̈ብ ዎ ማይጺ̈ራ?” ጌይዴ።

³⁷ሂጋ̇ ታ̈ማ̈ርሲ̇ዝ ና̈ሳዲ “ኢ̈ብ ኮሽ ኦ̈ኖ ና̈ሳ̈ዳ” ጋ̈ር ማሂዴ። ዬሱ̈ሳር ኢ̈ኮ “ኔ̈ናር ሉካ̇ራ ዪና̇ ኢዝፌ̈ኒ ዎታቤ” ጌይዴ።

³⁸ዬሱ̈ሳኬ ኢ ታማ̈ራንኬ ዎልኣ ጎይ ሉካ̇ምባራ ዬሱ̈ሲ ፔቲ̇ ሳፋራ ጋርታ̇ ጌሊዴ። ኢና ማ̈ርታ ጋ̈ዚን ፔቲ̇ ማጪ̇ንዳ̇ ፌ ኣ̈ል ኬ̈ ኢያ ጌልሳ̇ዴ።

³⁹ኢዝቦ ማ̈ራሚ ጋ̈ዚን ፔቲ̇ ሚሺዶ̈ር ዎ። ኢዛር ጎዳ ሶ̈ላዝ ቃ̈ሊን ሲስካ̇ሙታ̇ ኢ ቶሂን ጻና ዶኢኔ።

⁴⁰ማ̈ርታ ጋልዳ̇ ኦ̈ሲ ዎይሊን ጌዳክ ዓኒክ ዎጺታሙታ̇ዶ̈ራ ኢ̈ክ ኡካ̇ራ “ጎዳ̈ዶ! ቴ ሚሺን ኦ̈ሲን ዎይ ቴ ጋልዳ ኣሻ̇ራ ዚምዶኣዚምባ̇ራ ኔ ዚምዶኣ̈ራ? ታ̈ና ማ̈ዳ̇ምፔ̈ን ኢዝቦ ሶ̈ላቤ” ጋ̈ዴ።

⁴¹ጎዳ ኢዝኮ “ማ̈ርቴ! ማ̈ርቴ! ኔ ዎይሊን ባዛብ ሜቲንታ̇̈ርዶ̈ን፥

⁴²ኮሻ̇ዚንዳ̇ ፔቲ̇ ባዝ ሙታ̇፤ ማ̈ራማ ሺ ኮሽ ማ̈ቂ̇ኖ ባዚን ኤ̈̇ኔ። ዪኖ̇ ኢዝ ጋልዳፖ̇ ኦ̈ናካር ኤኪ̇ባ̈ሴ” ጋ̈ሪ ማሂዴ።