Read basketo ሉቃ̈ሳ 14 Bible Online

ሉቃ̈ሳ 14 - basketo bible

ሉቃ̈ሳ 14

¹ፔታ̈ብ ሳምባታ ጋላስ ዬሱ̈ሲ ቡና ኡሽካ̇ንዳ̇ብ ፋራሳ̈ዋንቦ ኣላቃ ማ̈ቂ̇ኖ ፔቲ̇ ና̈ሳ ኣ̈ል ጌሊንዶ̈ን ኢ ዎቲዝ ባዝ ቤቃ̇ንዳ̇ቦ ኣሳን ኢያ ና̈ጋ ኤ̈̇ዴ።

²ዪና̇ ኢዝባራ ኢና ኢ ጋሊ̇ን ዎይ ኪጺ̇ኖ ፔቲ̇ ኣሲ ዬሱ̈ሳክ ቲ̈ና ጎይ ዎዶ̈ን፥

³ዬሱ̈ሲ ሂጋ̇ ኤሪዛንኬ ፋራሳ̈ዋንኮ “ሳምባታ ጋላስ ማዝ ኣስ ፋንዳ̇ብ ሂጊ̇ን ካያ̈ርቤ ካያባሳ?” ጌዪ ኦይጪ̇ዴ።

⁴ኣሳንር ዚምዶኢዴ። ኢናፖ̇ ኢ ና̈ሳ ኤ̈̇ ፋር ሚሺዴ።

⁵ዪኒ̇ፖ ዎሃ ዬሱ̈ሲ ኢንታኮ “ዪንታ̇ ጋርታ̇ፖ ፔታ̇ና̈ቦ ናኢ ዎይ ኣቴ̇ጌይን ጌ̈ን ሳምባታ ጋላስ ዶ̈ቻ̇ ጋርታ̇ ኬዴ̇ጌይን ኤሊ̇ር ኬሲ̇ባ̈ሶ ኦ̈ኖ?” ጋ̈ር ኦይጪ̇ዴ።

⁶ኢንታ̇ሬ ዪኒ̇ቦ ኣባካር ማሃንዳ̇ቦ ዳንዳኣካ̇ይ ኣቲ̇ዴ።

⁷ጊብዣ ሞ̈ምፔ̈ን ጼይጊንታ̇ር ዬይኖ ዛቃ̇ን ጋላ̇ ቦንች ቤስ̇ ጋልዳ ዶኣንዳ̇ብ ኮያር ቲ̈ኒታዚምባ̇ር ዬሱ̈ሲ ቤቃ̇ሪ ሚሳ̇̈ሊባር ኢንታ̇ብ ሶ̈ሊ̈ርዶሪ፥

⁸“ፔቲ̇ ኣሲ ኔ̈ና ኢሳ̇ ጋርታ̇ ጼይጌ̈ጌንዶ̇ ጋላ̇ ቦንች ቤሳ̇ ጋልዳ̇ ዶኣፔ̇። ቦንችባር ኔ̈ፖ̇ ሺዝ ሜላ ኣሲ ጼይጊንቲ̇ኒኪሼ?

⁹ናምኣን ዪንታ̇ ጼይጊኖ ና̈ሳ ዬ̈ሪ ‘ዓና̇ ቤሲ̇ን ና̈ሳ ዓ̈ብ ኣሻ̇ቤ’ ኔ̈ክ ጌዬጌይን ኔ̈ኒ ዬ̈ልቃ̇ሙታ̇ዶ̈ር ቶ̈ራ ጋርሳ̇ ኣ̈̇̈ሬ።

¹⁰ኔ ጊዳን ጊብዣ ሞ̈ንዳ̇ብ ጼይጊንቲ̇ኖ ጋላስ ዬ̈ራ ቶ̈ራ ዪርካ̇ ቤስ̇ ቤቃ̇ር ዶኣቤ። ኔ̈ና ጼይጊኖ ና̈ሳ ዬ̈ሪ ‘ቴ ላጋ̇̈ዶ! ኔ ፉዳ ጋላ̇ ኮሽ ቤስ̇ ዓና̇ ጋል ኣ̈̇ቤ’ ጌይሬ ዪኒ̇ባራ ኔባር ዶኢኖ ዛቃ̇ን ዎይን ቲ̈ን ኔ ቦንቺ̇ንታ̇̈ሬ።

¹¹ኣባ ጌይን ፌ̈ና ሾክ ሾክ ዎቲዝ ኣሲ ዎይ ዪርክ ጌይሬ፤ ፌ̈ና ዪርክ ዪርክ ዎቲዝ ኣሲ ዎይ ሾክ ጌይሬ” ጌይዴ።

¹²ዬሱ̈ሲ ኣሳን ጊብዣ ሞ̈ንፔ̈ን ፌ ኣ̈ል ጼይጊኖ ና̈ሳ̈ኮ “ኔ̈ኒ ጋላሳ̇ ቡና ዎይ ኣቴጌይን ኢራታ ጊ̈ግሳራ ሙሲኖ ኬሊ̇ ማ ኢንታር̇ ታራባር ኔ̈ና ጼይጊ ሙሳካ̇ይፌ̈ንኬ ኔ ዎቲኖንዲፌ̈ን ኔ̈ብ ዎቲ ማሃካ̇ይፌ̈ኒ ኔ ላጋ̇ን፣ ኔ ኢሺንታ̇ን፣ ኔ ዳባ̇ንኬ ኔ ዶ̈ ዱራን ጼይጋፔ̇።

¹³ኔ ጊዳን ጊብዣ ጊ̈ጊሳራ ዎርባያን፣ ቶሂ ኩሺ ዎባ̇ን፣ ሜቂንኬ ኣ̈ፍ ዎባ̇ን ጼይጋቤ።

¹⁴ዪኒ̇ፌ̈ን ዎቴጌይን ኔ ኣንጂንታ̇̈ሬ። ዪን ኔ̈ና ጼይጊ ጊብዣ ሙሳንዳ̇ቦ ዳንዳኢባ̈ሶኮታ̇ቦ ጺላ̇ ኣሳን ዓይቃ ጋርታ̇ፖ ዲንዲዝ ጋላሲ̇ ዪኖ̇ ኔ ኦ̈ኖ ኦ̈ሲምቦ̇ ጾ̈ሲ̇ ኔ̈ብ ማሂ̈ሬ” ጌይዴ።

¹⁵ዬሱ̈ሳባር ዎልኣ ቡና ኡሽካ̇ንዳቦ ዶኢኖን ጋርታ̇ፖ̇ ፔታ̇ና ኢ ሶ̈ሊኖን ሲስካ̇ሪ “ጾ̈ሳ̇̇ ካ̈ቲቲን ጋርታ̇ ዬ̈ሪ ጊብዣ ሞ̈ንዳብ ዳንዳኢኖ ዎዛርፌ̈ን ኣንጂንቲ̇ኖ ኣሳ!” ጌይዴ።

¹⁶ዬሱ̈ሲ ኢ̈ኮ “ፔቲ̇ ኣሲ ጴች ጊብዣ ጊ̈ጊሳሪ ዎይሊን ኣስ ጼይጊዴ።

¹⁷ሙንቲ̇ ኡሺ̇ ዎይ ጊ̈ጊኖፖ̇ ዓኒ ጼይጊንቲ̇ኖ ዛቃ̇ንኮ ‘ዎይ ባዝ ጊ̈ጊኔ፤ ዬብቴ’ ጋ̈ር ኢንታ̇ ጼይጋምፔ̈ኒ ፌ ኣይላ ኢንታ̇ክ ሚሺዴ።

¹⁸ኣሳን ዎይ ፌ̈ና ኣሺ̇ዝ ዱማ ዱማ ሶ̈ላ ሺ̈ሺ ኤ̈̇ዴ። ኢንታ̇ ጋርታ̇ፖ ፔታ̇ና̈ዲ ‘ቴ ቢርት ሳ̈ዝ ዎጚኖኮታ̇ቦ ሉካ̇ር ቤቃ̇ንዳብ ኮሻ̇̈ሬ፤ ዋ̈ዴ ታ ጋልዳ ቃያማፔ̇’ ጌይዴ።

¹⁹ማ ሜላ̈ዲ ‘ታ̈ኒ ኢሺ̇ን ዋጻ ጌ̈ን ዎ̈ጚኔ፤ ቴ ኢንታ̇ ቃቻ̇ ጋራ̇ፋ ቤቃ̇ንዳ̇ብ ሉኪ̇ዛኮታ̇ቦ ዋ̈ዴ ታ ጋልዳ ቃያ̇ማፔ̇’ ጌይዴ።

²⁰ማ ሜላ̈ዲ ‘ታ ቢርት ማጫ̇ ኤኪ̇ኖኮታ̇ቦ ሉካ̇ንዳ̇ብ ዳንዳኣባሴ’ ጌይዴ።

²¹ኪ̈ቲንቲ̇ ሉኪ̇ኖ ና̈ሳ̈ዲ ማ̈ቂ̇ ዬ̈ሪ ዪን ኣሳን ሶ̈ሊኖ ባዛን ዎይ ፌ ላ̈̈ብ ሶ̈ሊን ኢናፖ ላ̈̈ዲ ዎይሊን ጎይላሪ ፌ ኣይላ̈ኮ ‘ዓት ኔ ኤሊ̇ባር ካታማ ሉካ̇ራ ኮካ̇ ጋልዳ፣ ጎይ ቡጊድ ዎ ዎርባያን፣ ሜቂን፣ ኣ̈ፍ ዎባ̇ንኬ ቶሂ ዎባ̇ን ዓይዲ ኤካ̇ር ዬ̈ቤ’ ጌይዴ።

²²ኣይላ ማ̈ቃ̇ር ዬ̈ሪ ‘ላ̈! ዪንቲ̇ ታ̈ና ኪ̈ቲ̇ኖን ዎይ ዎቲንዶ̈ን ዓታ̇ር ቤሲ̇ ዎ ኩሚ ዉራካ̇ዬ’ ጌይዴ።

²³ላ̈̈ዲ ፌ ኣይላ̈ኮ ‘ኔ ኮካ̇ ጋልዳኬ ጌዳ ጋጻራ ኤ̈ጚዝ ጎይ ጋልዳ ሉካ̇ቤ፤ ቴ ኬ̈ን ኩማንፌ̈ኒ ኔ ኣ̈ፊታ̇ ቤንቲ̇ኖ ኣስ ዎይ ኤካ̇ ዬ̈ር ጌልሳ̇ቤ።

²⁴ዪዚ ቴ ዪንታ̇ብ ሶ̈ላዚንዳ̇፥ ቲ̈ን ቴ ጼይጊን ኢጺ̇ኖ ኣሳን ዪን ጋርታ̇ፖ ፔቲ̇ ኣሳር ቴ ጊብዢን ዓኖ̇ ፌ ኖ̈ኒታ ኣ̈ባ̈ሴ’ ” ጌይዴ።

²⁵ዎይሊን ዎርዦ ዬሱ̈ሳባር ዎልኣ ሉኪ̇̈ርዶን ኢ ቢሪንታ̇ር ኢንታ̇ኮ

²⁶“ታ̈ክ ዬይዝ ኣሲ ዎይ ፌ ባ̈ባኬ ፌ ኢንዲ̇ኬ፣ ፌ ማጪ̇ንዲኬ ፌ ናኣንኬ፣ ፌ ኢሺንታ̇ንኬ ፌ ሚሺንታ̇ንኬ፣ ፌ ሼምፒ̇ንዳ̇ሬ ጉጃር ታ̈ፖ̇ ሺሻር ካዝ ኣሲ ቴ ታማ̈ሪ ማ̈ቃ̇ንዳብ ዳንዳኢባ̈ሴ።

²⁷ታ̈ና ኣማ̇ኒኖኮታ̇ቦ ኢያ ዬሊ̇ዝ ሜታን ዎይ ቶ̈ካ̇ንዳብ ኮዪባ̈ሶ ኣሲ ቴ ታማ̈ሪ ማ̈ቃ̇ንዳብ ዳንዳኢባ̈ሴ።

²⁸“ዪንታ̇ ጋርታ̇ፖ ፔቲ̇ ኣሲ ሹች ኬ̈ ኬ̈ጻ̇ንዳብ ኮያሪ ኬ̈ን ኬ̈ጻ̇ናፖ̇ ቲ̈ን ኣ̈ፊን ቢራ ኢያ ኮይሳ̈ርኮ ዶኣር ቆፒ̇ባ̈ሶ ኦ̈ኖ?

²⁹ኢ ኬ̈ን ዣማ̇ራሪ ኬ̈ጺ̇ ኬሳ̇ንዳ̇ብ ኢያ ጋሜጌይን ቤቂ̇ኖ ኣሲ ዎይ

³⁰‘ዓ ና̈ሳ̈ዲ ኬ̈ ኬ̈ጻንዳ̇ብ ኤ̈̇ሪ ኬ̈ጺ̇ ኬሳ̇ንዳ̇ብ ኢያ ጋማካ̇!’ ዪዝ ጋ̈ር ኢ ጋል ሚ̈ጪ̇̈ሬ።

³¹ዎይ ፔቲ̇ ካ̈ታ̈ዲ ሜላ ካ̈ቲባራ ኦሊንታ̇ንዳ̇ብ ዲንዲ ላምታም ሙኩላ ዎታ̇ዳራ ጊጺሳር ኢ ጋል ዬይዛ̈ዳ ታጳ̇ ሙኩላ ዎታ̇ዳራባራ ማሃንዳ̇ብ ዳንዳኣዚን ዎይ ዳንዳኢባ̈ሶን ዶኣር ፌ ባሮ ኣሳንባር ዞሪንቲ̇ባ̈ሶ ኦ̈ኖ?

³²ኢ ማሃንዳ̇ብ ዳንዳኢባ̈ስኮ ካ̈ታ ሴክ ቢርት ጎት ዎዶ̈ን ኢ̈ክ ኣስ ኪቲ̇ ሚሻሪ ‘ኑ ዎልኣ ኢጊንቲ̇ስቶ!’ ጋ̈ር ኦይጪ̇̈ሬ።

³³ዪና̇ ኢዝፌ̈ኒ ዪንታ̇ ጋርታ̇ፖ ኦ̈ናካር ማ̈ቂ̇ን ፌ̈ብ ዎ ባዚን ዎይ ኣሽባ̈ሶ̈ዲ ታ̈ብ ታማ̈ሪ ማ̈ቃ̇ንዳብ ዳንዳኢባ̈ሴ።

³⁴ማጺኖ ኮሽዶ̈ን፥ ቃ̈ ኢዝቦ ባዪ ማ̈ቄ̇ጌይን ዎዛርታ̇ር ኢዞ ማሂ ቃ̈ጻምፔ̈ን ዎታንዳ̇ብ ዳንዳኢ̈ራ?

³⁵ኢዛ ሜላ ኣቲ̇ን ሳ̈ዝ ኢጊ̇ሳ̇ንዳቦ ማ̈ዳ̇ባሶኮታ̇ቦ ኬሳ̇ሪ ዛ̈ና ቶጚ̈ሬ። “ዪዚ ሲስኪ̇ዝ ዋይ ዎ ኣሲ ዓኖ̇ ሲስካ̇ጋ̈ቤ” ጌይዴ።