Read basketo ሉቃ̈ሳ 18 Bible Online

ሉቃ̈ሳ 18 - basketo bible

ሉቃ̈ሳ 18

¹ዬሱ̈ሲ ፌ ታማ̈ራንቦ፥ ኢንቲ̇ ዎይ ጋላስ ሚ̈ጛር ዎ̈ሳንዳብ ኮሻ̇ዚን ኤራምፔ̈ን ሚሳ̇̈ሊ ኢንታ̇ብ ሶ̈ሊ̈ርዶሪ፥

²“ፔቲ̇ ካታሚን ጋርታ̇ ጾ̈ሳ̇̇̈ብ ኢ̈ጪ̇ባ̈ሲ ኣሳር ቦንቺ̇ባ̈ሶ ፔቲ̇ ዳይና ዎ።

³ማ ዪና̇ ኢዝ ካታሚን ጋርታ̇ ኣስኒ ዓይቂ̇ኖ ፔቲ̇ ኣሲ ዎዶ̈ራ ኢዛ ዳይና̈ክ ዬ̈ራ ‘ቴ ጻላ̈ታብኬ ታ̈ብኬ ጊዳ̇ ዎ ሞ̈ቲን ታ̈ቦ ፊርዲሼ’ ዪዝ ጋ̈ራ ዎይ ጋላስ ኢ̈ክ ዬ̈ሬ።

⁴ዳይና̈ዳሬ ኣሲን ዎይ ጋላስ ኢ̈ክ ዬ̈ዚምባራ ኢ ኢዝ ሶ̈ሊን ሲስካ̇ካ̇ይ ጋምኢዴ። ፔታ̇̈ብ ፌ ቡ̈ዳ ጋርታ̇ ቆፓ̇ር ጌዪ ‘ታ̈ኒ ኣባካር ጾ̈ሳ̇̇̈ብ ኢ̈ጫ̇ባስካዶናሬ፥ ኣሳር ቦንቻ̇ባስካዶናሬ፥

⁵ዓና̇ ኣስኒ ዓይቂ̇ኖ ኣሲንዳ̇ ዎይ ጋላስ ታ̈ክ ዬያ ታ̈ና ዋ̈ይዚንኮታ̇ ቴ ኢዝቦ ፊርዳንዳ̇፥ ቴ ዪዝ ዎታካ̇ይ ኣቴ̇ጌይን ዎይ ጋላስ ታ̈ክ ማ̈ቃ̇ ማ̈ቃ̇ ዬያ ሙታ̇ ታ̈ና ዋ̈ይ̈ሬ’ ” ጌይዴ።

⁶ኢናፖ̇ ጎዳ̈ዲ “ዉጫ ዳይና ጌይኖን ዪኖ̇ ሲስኪ̇ብቴ።

⁷ጾ̈ሲ̇ ፌ̈ክ ጋላሲ̇ ቃሚ̇ ዉይሲዝ ፌ ማራ̇ጺኖ ኣሳንቦ ፊርዲ̇ባ̈ሳ? ዓሪ ኢንታ̇ኮን ሲስካ̇ካ̇ይ ኣታ̇ንዳዶ̈ኔ?

⁸ቴ ዪንታ̇ብ ሶ̈ሎ፥ ዪን ፌ̈ኖንቦ ኤሊ̇ባር ፊርዲ̈ሬ። ዎቲናካሬ ታ ኣሳ ናኣ ዬ̈ዝ ጋላሲ̇ን ሳ̈ዝ ጋልዳ̇ ኣማ̇ና ዎ ኣሲ ቤንታ̇ንዳዶ̇̈ኔ?” ጌይዴ።

⁹ፌ̈ና ጺላ̇ ኣስፌ̈ን ፋይዳር ኬርፊዛንብኬ ሜላን ሌቃ̇ር ሳ̈ዝባር ጎ̈ቺ̇ዝ ኣሳንቦ ዬሱ̈ሲ ሚሳ̇̈ሊ ሶ̈ሊ̈ርዶሪ፥

¹⁰“ናምኢ ኣሳን ዎ̈ስ ዎ̈ሳንዳቦ ጾ̈ሳ̇̇ ኬ̈ ጋርታ̇ ጌሊዴ። ፔታ̇ና̈ዲ ፋራሳ̈ዋ ሜላ̈ዲ ቃራጻ ቃጺሲዝ ኣስዶ̈ር፥

¹¹ፋራሳ̈ዋ ኤቃ̇ር ፌ̈ብ ዎ̈ሲ̇̈ርዶሪ ‘ጾ̈ሳ̇̇̈ዶ! ቴ ሜላንፌ̈ኒ ኣሳ ባዝ ቡሪዝ ኣሲ፣ ኢ̈ት ኣሲ፣ ኦሎላ ጋዲ̇ዝ ኣሲ፣ ማ ዎይ̈ፖ̇ ቃራጻ ቃጺዛ ና̈ሳ ዓ̈ዲፌ̈ኒ ማ̈ቃካ̇ዮኮታ̇ቦ ቴ ኔ̈ና ጋላታ̈ሬ።

¹²ታ̈ኒ ፔቲ̇ ሳ̈ሚንታ̇ ጋርታ̇ ናምኢ ቃም ጾ̈ማ̈ሬ። ቴ ዴጚኖ ባዝ ዎይ ጋርታ̇ፖ̇ ኣስራ̈ታ ኬሳ̇̈ሬ’ ጌይዴ።

¹³ቃራጻ ቃጺሲዛ̈ዲ ፋራሳ̈ዋፖ̇ ጌዳ ጎት ኤቃ̇ሪ ሜላ ኣቲ̇ን ፉዳ ኣፋ ሾክ ጋ̈ር ቤቃ̇ንዳብ ኢ̈ጫ̇ሪ ፌ ቲሪን ቆጺ̇ ሙታ̇ዶ̈ሪ ‘ጾ̈ሶ̇! ታ̈ና ናጋራንቻ̇ ኔ ማ̈ራቤ’ ጌይዴ።

¹⁴ዪዚ ቴ ዪንታ̇ብ ሶ̈ሎ፥ ና̈ሳ ፋራሳ̈ዋፖ̇ ቃራጻ ቃጺሲዝ ና̈ሳ ዪ̈ዲ ጾ̈ሳ̇̇ ቲ̈ን ጺላ̇ ማ̈ቃ̇ር ፌ ኣ̈ል ሉኪ̇ዴ። ፌ̈ና ሾክ ሾክ ዎቲዛ ዎይ ዪርክ ጌይሬ፤ ፌ̈ና ዪርክ ዎቲዛ ዎይ ሾክ ጌይሬ” ጌይዴ።

¹⁵ዬሱ̈ሲ ኣቂሊ ናኣን ኣንጃምፔ̇̈ኒ ኣሳን ኢ̈ክ ኤኪ̇ ዬይን ኢ ታማ̈ራን ዪኖ̇ ቤቃ̇ር ኣሳን ቆዲ̇ዴ።

¹⁶ኢ ኣቂሊ ናኣን ፌ̈ክ ዬ̈ምፔ̇̈ን ጼይጋሪ ፌ ታማራንኮ “ኣቂሊ ናኣን ታ̈ክ ዬያጋ̈ቤ ካያፒ̇ቴ፤ ጾ̈ሳ̇̇ ካ̈ቲቲንዳ ኣቂሊ ናኣን ዓንፌ̈ኖንዬ።

¹⁷ቴ ዪንታ̇ክ ኪን ጋ̈ሬ፥ ኦ̈ናካር ማ̈ቂ̇ን ጾ̈ሳ̇̇ ካ̈ቲቲን ናኢ ኣቂሊፌ̈ኒ ኤኪ̇ባ̈ሶ ኣሲ ኣባካር ጌይን ኢና ጌሊባ̈ሴ” ጌይዴ።

¹⁸ኣይሁድ ኣላቃን ጋርታ̇ፖ̇ ፔታ̇ና̈ዲ “ኮሽ ኣስታማ̈ራ̈ዶ! ታ̈ኒ ሜናብ ሼምፓባር ዶኣንዳቦ ኣብዝ ዎቲን ኮሻ̇?” ጋ̈ሪ ዬሱ̈ሳ ኦይጪ̇ዴ።

¹⁹ኢያር ኢ̈ኮ “ኔ ታ̈ና ኣ ኮታ̇ብ ኮሻ̇̈ዶ ጋ̈ራ ጾ̈ሳ̇̇ ፔታ̇ና̈ፖ̇ ኣቲ̇ን ኦናካር ኮሺ̇ ባዬ̇፥

²⁰ኔ̈ኒ ጾ̈ሳ̇̇ ኪ̈ቲን ኤራ̈ሬ። ዪንሬ፦ ‘ኦሎላ ጋዳፔ̇፣ ኣስ ዎፔ̇፣ ዉ̈ቃፔ፣ ዎርዳ̇ ማርኪታፔ፣ ኔ ባ̈ቢክ ኔ ኢንዲ̇ክ ቦንቻ̇ቤ’ ጌይዛን።

²¹ና̈ሳ̈ዳር “ዪንኮ ታ̈ኒ ናኢቲፖ̇ ኤ̈̇ር ና̈ጋ ዎ” ጌይዴ።

²²ዬሱ̈ሲ ዪኖ̇ ኢ ሶ̈ሊኖን ሲስካ̇ሪ “ዓት ፔቲ̇ ባዝ ኔ ጋልዳ̇ፖ ኣቲ̇ኔ። ኔ̈ብ ዎ ባዝ ዎይ ዎጛራ ዎርባያንቦ ኢማ̇ቤ። ቆሊን ኣፋ ጾ̈ሳ̇̇ ቲ̈ን ኔ̈ብ ዶኢ̈ሬ። ዪኒ̇ፖ ዓኒ ዬ̈ራ ቴ ዎሂን ዬ̇ቤ” ጌይዴ።

²³ና̈ሳ ዪኖ̇ ሲስካ̇ሪ፥ ኢ̈ብ ዎይሊን ቆሊን ዎኮታ̇ቦ ጴች ሙዲዲዴ።

²⁴ዬሱ̈ሲ ና̈ሳ ቤቃ̇ር ኢ̈ኮ “ዎይሊን ቆሊን ዎ ኣሳን ጾ̈ሳ̇̇ ካ̈ቲቲን ጋርታ̇ ጌላንዳ̇ቦ ኢንታ̇ ዎይሊን ዋዪ̈ሬ!

²⁵ዱር ኣሲ ጾ̈ሳ̇̇ ካቲቲን ጋርታ̇ ጌላዚምፖ̇ ጊማሊ ናርፓ̇ ፉላባራ ኣንዳ̇ብ ኢ̈ብ ̈ጻ̇ባሴ” ጌይዴ።

²⁶ዪ ሲስኪ̇ኖ ኣሳን “ዓት ዪ̈ዲኮ ኦ̈ኖ ጾ̈ሳ̇̇ ካቲቲን ጋርታ̇ ጌላንዳብ ዳንዳኢዛ̈ዲ?” ጌይዴ።

²⁷ዬሱ̈ሲ ኢንታ̇ኮ “ኣሳብ ዳንዳኢንቲ̇ባ̈ሶ ባዚ ጾ̈ሳ̇̇̈ብ ዳንዳኢንቲ̇̈ሬ” ጌይዴ።

²⁸ጴ̈ጥሮ̈ሲ ኢ̈ኮ “ዓዲሼ ኑ̈ኒ ኑ̈ብ ዎ ባዝ ዎይ ኣሻ̇ሪ ኔ ዎሂን ዬይኔ” ጌይን፥

²⁹ኢያሬ “ቴ ዪንታ̇ክ ኪን ጋ̈ሬ፥ ጾ̈ሳ̇̇ ካቲቲንቦ ጋ̈ሪ ፌ ኣ̈ሊንዶ፣ ፌ ማጪ̇ንዶ፣ ፌ ኢሺንታ̇፣ ፌ ባ̈ባዲኬ ፌ ኢንዲ̇ንዶ̇ ዎይ ፌ ናኣን ኣሺ̇ኖ ኣሲ፥

³⁰ዓና̇ ላይን ጋርታ̇ ቲ̈ኖምፖ̇ ናምኢ ኩሽ ዲጚ̈ሬ። ቢርት ዬ̈ዝ ላይን ጋርታ̇ሬ ሜናብ ሼምፓባር ዶኢ̈ሬ” ጌይዴ።

³¹ዬሱ̈ሲ ፌ ታማ̈ራን ታጶ̇ ናምኣን ዱማ ጌዳ ኤ̈ጛሪ ኢንታ̇ኮ “ዪዚ ኑ ዬሩሳ̈ላም ሉካ̇ንዳ፥ ናባን ታ ኣሳ ናኣ̈ኮን ጻ̈ፊኖ ባዛን ዎይ ፎቲንቲ̇̈ሬ።

³²ኣሳን ታ̈ና ኣይሁድ ዜር ማ̈ቃካ̇ዮ ኣሳንቦ ኣ̈ ኢሚ̇̈ሬ፥ ኢንታ̇ር ታ ጋልዳ ቃልዲ፣ ታ ጋል ጩቲ̇፣ ታ̈ና ጋራ̇ፊ ኢናፖ̇ ዓኒ ታ̈ና ዎ̈ሬ።

³³ታ̈ናር ዓይቃ ጋርታ̇ፖ̇ ዓይዚ ቃምባራ ዲንዳ̇̈ሬ” ጌይዴ።

³⁴ኢ ታማ̈ራንቦ ኢ ጌይኖን ዪን ዎይን ጋርታ̇ፖ̇ ኣባክ ፔቲ̇ ባዚ ኢንታ̇ብ ጌሊኖ ባዚ ባዬ̇። ኢ ሶ̈ላዝ ሶ̈ሊን ኢንቲ̇ ኤራካ̇ይፌ̈ኒ ኢንታ̇ብ ኣ̈ቺንቲ̇ኔ፤ ኢ ኣብዝ ሶ̈ሊኖኮ ኢንቲ̇ ኤራካ̇ዬ።

³⁵ዬሱ̈ሲ ያ̈ሪኮ ካታሚንኮ̇ ዬላ̇ንዳብ ዎታዚምባራ፥ ፔቲ̇ ኣ̈ፊ ዎብ ኣሲ ጎይ ቡጊድ ዶኣር ጌሺ̈ርዶ̈ን፥

³⁶ኢያር ዎርዣ ኢ ላፍባር ኣ̈̇ዚምባ̇ር ሲስካ̇ር “ዪ ኣብዛ” ጋ̈ር ኢንታ̇ ኦይጪ̈ዴ።

³⁷ኣሳንሬ “ና̈ዝሬ̈ት ዬሱ̈ሲ ዓኒ̇ባር ኣ̈̇̈ሬ” ጋ̈ር ኢ̈ብ ሶ̈ሊዴ።

³⁸ኢያሬ “ዳ̈ዊታ ናኣ ዬሱ̈ሶ! ታ̈ብ ሚጪንታ̇ር ታ̈ና ፋሼ” ጌዪ ዉይሳር ጌሺዴ።

³⁹ቲ̈ን ኣ̈̇ኖ ኣሳን ኢያ ቆዲ̇ዴ። ዎቲናካሬ ኢ “ዳ̈ዊታ ናኣ̈ዶ! ታ̈ብ ሚጪንታ̇ር ታ̈ና ፋሼ” ጋ̈ር ኤስኤሳ ዉይሳር ጌሺዴ።

⁴⁰ዬሱ̈ሲ ኤቃ̇ሪ ና̈ሳ ፌ̈ክ ኤሄ̈ምፔ̇̈ን ኪ̈ቲ̇ዴ። ና̈ሳ̈ዳር ኢ̈ክ ዬዪ ዬሊ̇ኖፖ̇ ዓኒ ኢ̈ኮ፥

⁴¹“ቴ ኔ̈ብ ኣብዝ ዎታምፔ̈ን ኔ ኮያ̈ራ?” ጋ̈ር ኢያ ኦይጪ̇ዴ። ኣ̈ፊ ዎባ̇̈ዳሬ “ጎዶ! ቴ ኣ̈ፊን ቤቃ̇ምፔ̈ን ኮያ̈ሬ” ጌይዴ።

⁴²ዬሱ̈ሳር ኢ̈ኮ “ኔ ኣ̈ፊን ቤቃ̇ ጋ̈ቤ፥ ኔ ኣማ̇ኒን ኔ̈ና ፋኔ” ጌይዴ።

⁴³ና̈ሳ ኣ̈ፊን ኤሊ̇ባር ፊርቂንቲ̇ን ቤቃ̇ንዳብ ዳንዳኢዴ። ጾ̈ሳ̇̇ ቦንቺ̇ሙታ̇ ዬሱ̈ሳ ዎሂን ዬ̇ዴ። ዎርዣ ዎይ ዪኖ̇ ቤቃ̇ር ጾ̈ሳ̇̇ ጋላቲዴ።