Read basketo ሉቃ̈ሳ 20 Bible Online

ሉቃ̈ሳ 20 - basketo bible

ሉቃ̈ሳ 20

¹ፔቲ̇ ጋላስ ዬሱ̈ሲ ጾ̈ሳ̇̇ ኬ̈ ጋርታ̇ ዎርዣ ታማ̈ርሲ̇ ዎጛላ ኢንታ̇ብ ሳባ̇ካምባ̇ራ ቄ̈ሳ ኣላቃን፥ ሙ̈ሳ ሂጋ̇ ታማ̈ርሲዛንኬ ጋድ ጪጛሻን ዎል ሺ̈ቃር ኢ̈ክ ዬይዴ።

²ኢንታ̇ር ኢ̈ኮ “ኔ ባዝ ዓን ኣ ሲልጣ̈ናባር ኦ̈̈ራ? ኑ̈ብ ሶ̈ላቤ። ኢዛ ዓና̇ ሲልጣ̈ኒን ኔ̈ብ ኢሚ̇ኖ ኢ ኦ̈ኖ” ጋ̈ር ኦይጪ̇ዴ።

³ዬሱ̈ሲ ኢንታ̇ኮ “ቴ ማ ዪንታ̇ ፔቲ̇ ባዝ ኦይጫ̇ስቶ̇ ዪንቲ̇ ታ̈ብ ኢዞ ማሂንቴ፥

⁴ዋ̈ኒ̇ሲ ኣስ ጻማ̇ቃምፔ̈ኒ ኢ̈ብ ሲልጣ̈ና ኢሚ̇ኖ ኦ̈ኖ? ጾ̈ስ̇ቤ̈ ኣሳ?

⁵ኢንታ̇ር ዎል ዎልኣ ዞሪንታ̇ር ጌዪ፥ ኑ ‘ኣፋ ጾ̈ሳ̇̇̈ፖ̇’ ጌዬጌይን፥ ዓት ዪ̈ዶኮ ‘ኣባብ ዪንቲ̇ ኢ̈ኮን ኣማ̇ኒባ̈ሳ?’ ጌይዝዳ̇።

⁶‘ኣሳፖ̇’ ጌዬጌይንዶ̇፥ ዎርዣ ዎይ ዋ̈ኒ̇ሲ ኪንባር ናቢ ማ̈ቂ̇ኖን ኣማ̇ኒዛኮታ̇ቦ ኑ̈ና ሹችባር ቆጺ̇ ዎ̈ሬ” ጌይዴ።

⁷ዪ̈ኮታ̇ቦ “ጻማ̇ቃዝ ሲልጣ̈ኒን ኢ̈ብ ኦ ኢሚ̇ኖኮ ኑ ኤሪባ̈ሴ” ጋ̈ሪ ማሂዴ።

⁸ዬሱ̈ሲ ኢንታ̇ኮ “ዓት ዪ̈ዶኮ ታ̈ናር ኣ ሲልጣ̈ናባር ዪን ፌ̈ኖ ባዛን ኦ̈̈ርኮ̇ ዪንታ̇ብ ሶ̈ላባሴ” ጌይዴ።

⁹ኢናፖ̇ ዓኒ ዬሱ̈ሲ ዪኖ̇ ሚሳ̇̈ሊን ዎርዣ̈ቦ ሶ̈ሊ̈ርዶሪ “ፔቲ̇ ና̈ሲዶ̈ር ዎይና ታ̈ኪልታ̇ ቶካ̇ሪ ኦ̈ዝ ኣሳቦ ኪራያ ኢማ̇ሪ ሜላ ጋዳ̇ ሉካ̇ሪ ዎይሊን ኬል̇ ጋምኢ̇ዴ።

¹⁰ዎይና ካጺ̇ዝ ኬሊ̇ ዬሊ̇ን ዎይና ኣ̈ፊን ጋርታ̇ፖ̇ ኢያ ዬላ̇ዚን ፌ̈ብ ሚሾ ጋ̈ሪ ላ̈̈ዲ ፔቲ̇ ኣይላ ዪን ኣሳንኮ ሚሺን ኣሳን ዪ ኣይላ ኤ̈̇ ቡኪ̇ ቡካ̇ር ሜላ̇ ማሂ ሚሺዴ።

¹¹ዓታ̇ር ኢናፖ̇ ዎሃ ሜላ ኣይላ ፔታ̇ን ኢንታ̇ክ ሚሺን ኢንቲ̇ ኢያ ኤ̈̇ር ቡኪ̇ ቡካ̇ር ዬ̈ሊ̇ር ሜላ̇ ማሂ ሚሺዴ።

¹²ዓታ̇ር ላ̈̈ዲ ዓይዚ̇ ኣይላ ኢንታ̇ክ ሚሺን ኢንቲ̇ ኢያ ቡኪ̇ ቆ̈ቃ̇ር ታ̈ኪልቲ̇ምፖ̇ ቡጊድ ኬሳ̇ር ቶጚዴ።

¹³ኢናፖ̇ ዎይን ታ̈ኪልቲ̇ን ላ̈ዲ ‘ዪዚ ቴ ዎዛርቲ̇ን ታብ ኮሻ̇? ቴ ካዝ ናኣ ኢንታ̇ክ ሚሻንዳ ኢያ ዎይ ኢንቲ ቦንቺ̇ስታ̇’ ጌይዴ።

¹⁴ዎይኒን ና̈ጊዝ ኣሳን ናኣ ቤቃ̇ሪ ‘ዓ ኢ ቤሲ̇ን ኤኪ̇ዛ̈ዲሽዋ፤ ዓይ ዬብቴ̇ ቤሲ̇ን ኑ̈ብ ኣታ̇ምፔ̈ኒ ኑ ኢያ ዎስቶ’ ጋ̈ር ዎልኣ ዞሪንቲ̇ዴ።

¹⁵ኢናፖ̇ ናኣ ዎይና ታ̈ኪልቲ̇ን ቤሲ̇ን ጋርታ̇ፖ̇ ጌዳ ቡጊድ ኬሳ̇ር ዎዴ። ዪዚ ዎይና ታ̈ኪልቲ̇ን ላ̈ዲ ኣሳን ዪን ኣብዝ ዎቲዛ ዪንታ̇ክ ማይጺ̈ራ?

¹⁶ላ̈ ዬ̈ሪ ዪን ኣሳን ዎ̈ሬ። ዎይና ታ̈ኪልቲ̇ንዳሬ ሜላንቦ ኢሚ̇̈ሬ” ጌይዴ። ዎርዣ ዪ ሲስካ̇ሪ “ዪ̈ዲፌ̈ኖ ባዝ ጾ̈ሲ̇ ቴቆ̇” ጌይዴ።

¹⁷ዬሱ̈ሲ ኢንታ̇ ቤቃ̇ሪ “ዓት ዪ̈ዶኮ ‘ሹች ኬ̈ ኬ̈ጺ̇ዛን ሌቃ̇ር ኣሺ̇ኖ ሹች ኢዛ ኬ̈ምቦ̇ ዎይ̈ፖ̇ ኮዪንቲ̇ዛ ማ̈ቃ̇ዴ’ ዪዝ ጌዪ ጻ̈ፊንቲ̇ኖ̈ን ኢዝ ቢርሺቺ̇ን ኣብዛ?

¹⁸“ዪና̇ ሹቺ̇ን ጋልዳ ኬዲ̇ዝ ኣሲ ዎይ ሜቂ̇̈ሬ፤ ሹቺ̇ን ኢ ጋልዳ ኬዲ̇ዝ ኣሲ ዎይ ዳ̈ጺንቲ̇̈ሬ” ጌይዴ።

¹⁹ሙ̈ሳ ሂጋ̇ ታማ̈ርሲዛንኬ ቄ̈ሳ ኣላቃን ዬሱ̈ሲ ዪኖ̇ ሶ̈ሊኖ ሚሳ̇̈ሊን ኢንታ̇ ጋልዳ ማ̈ቂ̇ኖን ኤሪኖኮታ̇ቦ ዪና̇ ኢዝ ሳኣ̈ቲንባር ኢያ ኤ̈̇ንዳብ ኮዪንዶ̈ን ዎርዣ̈ብ ኢ̈ጫ̇ር ኣሺ̇ዴ።

²⁰ኢንቲ̇ ዬሱ̈ሳ ኤ̈̇ ጋዲን ኣቂሲዝ ጋዣቦ ኣ̈ ኢማ̇ንዳ̇ብ ኮያሪ ኢ ሶ̈ላዝ ሶ̈ሊንባር ኢያ ኮራምፔ̇̈ን ጋ̈ሪ ኮሽ ኣስ ማይጺዝ ሜ̈ዛ ኣሳን ኢ̈ክ ሚሺዴ።

²¹ኢንታ̇ር ዬሱ̈ሳክ ዬ̈ሪ “ኣስታማ̈ራ̈ዶ! ኔ̈ኒ ኪን ባዝ ሶ̈ላዚንዲኬ ታማ̈ርሳ̇ዚን ዪኒ̇ፓ̇ር ኣ̈̇ር ጾ̈ሳ̇̇̈ኮ ጎይን ኪን ታማ̈ርሳ̇ዚንዲኬ ኔ ኦ̈ናካር ፔታ̇ና ዪርክ ዎታ ፔታ̇ና ሾክ ዎታር ቤቃ̇ባሶን ኑ ኤሪ̈ሬ።

²²ዓት ኑ ኔ̈ና ኦይጫ̇ዚንዳ̇ ኑ ሂጊ̇ን ጋልዳ̇ ቄ̈ሳ̈ራብ ጊ̈ራ ጊ̈ራንዳብ ኮሺ̈ርቤ ኮሺባ̈ሳ?” ጌዪ ኦይጪ̇ዴ።

²³ዬሱ̈ሲ ኢንታ̇ ኢ̈ታ ቆፊን ኤራሪ ኢንታ̇ኮ፥

²⁴“ዎይዲቴ ዪንቲ̇ ታ̈ብ ፔቲ̇ ሳንቲ̇ ኬሲ̇ ቤይሲብቴ̇፥ ኢዝ ጋልዳ ዎ ሚሲላ̈ዲክ ሱምዲክ ኦያ̇?” ጌይዴ።

²⁵ኢንታ̇ር “ቄ̈ሳ̈ራዬ” ጋር ማሂዴ። “ዪ̈ዲኮ ቄ̈ሳ̈ርኮን ቄ̈ሳ̈ራቦ ጾ̈ሳ̇̇̈ኮን ጾ̈ሳ̇̇̈ብ ኢሚ̇ብቴ̇” ጌይዴ።

²⁶ዪና̇ ኢ ሶ̈ሊኖ ሶ̈ሊንባር ኣሳ ቲ̈ን ኢያ ኮራንዳ̇ብ ዳንዳኣካ̇ዬ። ኢ ኢንታ̇ብ ማሂኖ ማልሲንባር ጋራ̇ሚንታ̇ር ዚምዶኢዴ።

²⁷ዓይቂ̇ኖ ኣሲ ዲንዲ̇ባ̈ሴ ዪዝ ጌይዝ ፔቲ̇ ፔቲ̇ ሳዱቃን ዬሱ̈ሳክ ዬ̈ር ኢያ ኦይጪ̇̈ርዶሪ፥

²⁸“ኣስታማ̈ራ̈ዶ! ሙ̈ሳ ኑ̈ብ ጻ̈ፊ̈ርዶሪ ‘ፔቲ̇ ኣሲ ማጫ̇ ኤካ̇ሪ ናኢ ዬላካ̇ይዶ̈ር ዓይቄጌይን ኢ ጌ̈ዳዲ ኢ ማጪ̇ን ማሂ ኤካ̇ር ናኢ ዬላሪ ፌ ኢሻ ሱምን ጼይጊሳጋ̈ቤ’ ጌይኔ።

²⁹ዓት ዪ̈ዶኮ ፔቲ̇ ኢንዲ̇ ናእ ማ̈ቂ̇ኖ ታብዛ ኣሳን ዎዶሪ ኢንታ̇ ጋርታ̇ፖ̇ ኢሻ ባይራ̈ዲ ማጫ̇ ኤካ̇ር ናኢ ዬላካ̇ይዶ̈ር ዓይቂ̇ዴ።

³⁰ኢ ኡንኪ̇ን ጋልዶ̇̈ዳሬ ኣሲን ኢዞ ማሂ ኤካ̇ሪ ና̈ኢ ዬላካ̇ይዶ̈ር ዓይቂ̇ዴ።

³¹ዓይዚ̇̈ዳሬ ማ ኢዞ ማሂ ኤካ̇ሪ ኢያር ዓይቂ̇ዴ። ዪዝ ዎቲ ሙታ̇ ታብዛን ዎይ ናኢ ዬላካ̇ይዶ̈ሪ ዓይቂ̇ዴ።

³²ዉርሲ ጋልዳ̇ ኣሲንዳ̇ር ዓይቃ̇ዴ።

³³ዪዚ ታብዛን ዎይ ኢዞ ኤኪ̇ኖኮታ̇ቦ ኢንቲ̇ ዓይቃ ጋርታ̇ፖ̇ ዲንዲዝ ቃምባራ ኢዛ ዎ̈ቦ ማጫ̇ ማ̈ቃ̇̈ራ?” ጋ̈ር ኦይጪ̇ዴ።

³⁴ዬሱ̈ሲ ኢንታ̇ኮ “ዓና̇ ሳ̈ዚን ጋልዳ̇ ዎ ኣሳን ኣቲኖ ማጫ̇ ኤኪ̇̈ሬ ማጫ̇ር ኣቲና ኣ̈ል ኢስቲ̈ሬ።

³⁵ዓይቃ ጋርታ̇ፖ̇ ዲንዳ̇ሪ ዬ̈ዝ ኦራ ኣላሚን ጋርታ̇ ዶኣንዳ̇ብ ኮሺዛን ኣቲናር ማጫ̇ ኤኪ̇ባ̈ሲ ማጫ̇ር ኣቲን ኣ̈ል ኢስታ̇ባ̈ሴ።

³⁶ኢንቲ̇ ኪ̈ታንቻ̇ንፌ̈ን ማ̈ቂ̇ኖኮታ̇ቦ ኢናፖ̇ ዎሃ ኢንቲ̇ ዓይቂ̇ባ̈ሴ። ጾ̈ሲ̇ ኢንታ̇ ዓይቃ ጋርታ̇ፖ̇ ዲንሪ ሼምፓባር ጋዲ̇ኖኮታ̇ቦ ኢንቲ̇ ጾ̈ሳ̇̇ ናኤ።

³⁷ዓይቂ̇ኖ ኣሲ ዓይቃ ጋርታ̇ፖ̇ ዲንዳዚን ሙ̈ሶ ቆን ጋርታ̇ ታማ ኤይታ̇ራ ቆን ሚጫ̇ካ̇ይ ኣቲ̇ኖ̈ኮን ታ̈ሪኪን ጻ̈ፊኖን ጋልዳ̇ ኤሪሲኔ። ዪና̇ሬ ኢ ጾ̈ሳ̇̇̈ዳ ‘ኣብራሃ̈ማ ጾ̈ሳ̇̈ዶ፣ ዪሳ̈ቃ ጾ̈ሳ̇̈ዶ፣ ዓይቆ̈ባ ጾ̈ሳ̇̈ዶ’ ጌዪ ጼይጊኔ።

³⁸ኢንቲ̇ ዎይን ኢ̈ቦ ሼምፓባሮ ኣስ ማ̈ቂ̇ኖኮታ̇ቦ ኢ ሼምፓባሮንቦ ጾ̈ስዶኬ ዓይቂ̇ኖን ጾ̈ስ̇ ጊዳካ̇ዬ” ዪዝ ጋ̈ር ኢንታ̇ብ ማሂዴ።

³⁹ፔቲ̇ ፔቲ̇ ሙ̈ሳ ሂጋ̇ ታማ̈ርሲዛን ኢ̈ኮ “ኣስታማ̈ራ̈ዶ! ኔ ዓት ኮሽ ሶ̈ላዴ” ጌይዴ።

⁴⁰ዪኒ̇ፖ ዓኒ ኦ̈ናካር ኢያ ኦይች ኦይጫንዳ̇ቦ ኢ̈ጪ̇ዴ።

⁴¹ኢናፖ̇ ዓኒ ዬሱ̈ሲ ኢንታኮ “ኣሳን ክርስቶ̈ሳ ዎዛር ‘ዳ̈ዊታ ናኤ’ ጌይራ?

⁴²ዳ̈ዊቲ ፌ ቆሚ̇ምቦ̇ ማዝሙራ ማጻ̈ፋ ጋልዳ̇፥ “ ‘ጎዳ̈ዲ ቴ ጎዳ̈ኮ፥ ቴ ኔ ጻላ̈ታን ቶ̈ራ ኔ ቶህ ጻና ኣ̈ዝ ዲራ̈ስ ኔ ታ̈ብ ኡሻች ጎይ ቦንቻ̇ ቤስ̇ ዶኣቤ ጌይኔ’ ጌይሬ።

⁴³

⁴⁴ዪዚ ዳ̈ዊቲ ክርስቶ̈ሳ ‘ጎዳ’ ጌዪ ጼይጋምባ̇ራ ዎዛርፌ̈ን ኢ ዳ̈ዊ̈ታብ ናኢ ማ̈ቃ̇ንዳቦ ዳንዳኢ̈ራ?” ጌይዴ።

⁴⁵ዎርዣ ዎይ ኢ̈ኮን ሲስካ̇ምባራ ዬሱ̈ሲ ፌ ታማ̈ራንኮ፥

⁴⁶“ጳሪን ኣፊላ ማኣር ጌዳክ ዓኒክ ዬ̇ ዶሲዛንፖ̇፣ ጋቢ ጋልዳ̇ ኣሲ ኢንታ̇ብ ዪርክ ጌዪ ሳሮ ጋ̈ምፔ̈ን ኮዪዛንፕኬ ኣይሁድ ዎ̈ሳ ኬ̈ ጋርታ̇ ቦንች ቤሲ̇፣ ዲጊ̇ሳ ቤስ̇ ጋርታ̇ ቦንች ቤሲ̇ ኮዪዛን ሙ̈ሳ ሂጋ̇ ታ̈ርሲ̇ዝ ኣሳን ጋልዳፖ ዪንቲ̇ ዪንታ̇ ና̈ጊብቴ̇።

⁴⁷ኢንቲ̇ ኣስኒ ዓይቂ̇ኖ ማጫ̇ን ኣ̈ሊን ዳሂ̈ሬ፤ ኣሲ ፌ̈ና ቤቆ̇ ጋ̈ሪ ዎ̈ሳ ጳሪን̈ሬ፤ ዪን ኣሳን ኣስ ዎይ̈ፖ̇ ሺ ፊርዳ ኤኪ̇̈ሬ” ጌይዴ።