Read basketo ሉቃ̈ሳ 23 Bible Online

ሉቃ̈ሳ 23 - basketo bible

ሉቃ̈ሳ 23

¹ኢና ሺ̈ቂኖ ኣሳን ዎይ ዲንዳ̇ሪ ዬሱ̈ሳ ጲላ̈ጦ̈ስኮ ኤ̈ጚዴ።

²ኢንቲ̇ ኢያ ሞ̈ቲ̈ርዶ̈ር ጌዪ “ና̈ሳ ዓ̈ዲ ኑ ዎርዣ ባሊምባር ኑ ኢያ ዲጚኔ። ሮ̈ማ ካ̈ታ ቄ̈ሳ̈ርቦ ጊ̈ራ ጊ̈ራካ̇ይፌ̈ን ኑ̈ና ካዪ̈ሬ፤ ማ ማ̈ቃ̇ሪ ‘ታ̈ኒ ክርስቶ̈ሳ፥ ካ̈ቴ’ ዪዝ ጋ̈ምባ̇ር ኑ ኢያ ዲጚኔ” ጌይዴ።

³ጲላ̈ጦ̈ሳር “ኔ̈ኒ ኣይሁዳን ካ̈ታ” ጋር ኢያ ኦይጪ̇ዴ። ዬሱ̈ሳር ኢ̈ኮ “ኔ ጌይኖንዲፌ̈ኒዬ” ጌይዴ።

⁴ጲላ̈ጦ̈ሳር ቄ̈ስ ኣላቃንብኬ ዎርዣንቦ “ቴ ና̈ሳ ዓ̈ ጋልዳ̇ ኣባካር ኢ̈ት ኢ ኦ̈ኖ ባዝ ዲጛካ̇ዬ” ጌይዴ።

⁵ኢንቲ̇ ኢ̈ኮ “ዓ ና̈ሳ ጋሊላፖ̇ ኤ̈̇ሪ ዓይዲ ዲራ̈ስ ዪሁዳ ዎይ ኣታካ̇ይ ታማርሲ̇ሙታ̇ ዎርዣ ዋቻ̇ብ ዲንኔ” ዪዝ ጋ̈ር ሚ̈ንር ኢያ ሞ̈ቲዴ።

⁶ጲላ̈ጦ̈ሲ ጋሊላ ጌዪኖ̇ን ሲስካ̇ሪ “ና̈ሳ ዓ̈ ጋሊላ ኣስዶኔ?” ጋ̈ር ኦይጪ̇ዴ።

⁷ዬሱ̈ሲ ዬይኖ̈ዲ ሄሮዶ̈ስ ጋዳ̇ፖ̇ ማ̈ቂ̇ኖን ጲላ̈ጦ̈ሲ ኤራሪ ኢያ ሄሮዶ̈ስኮ ሚሺዴ። ሄሮዶ̈ስ ዪና̇ ኢዝ ኬሊ̇ን ጋርታ ዬሩሳ̈ላም ካታሚን ጋርታ̇ ዎ።

⁸ሄሮዶ̈ሲ ዬሱ̈ሳ ቤቃ̇ንዳ̇ብ ቲ̈ናፓ̇ሬ ዎይሊን ኮዪ̈ርዶኒ ዓት ኢያ ቤቃ̇ሪ ዎይሊን ኡፋይቲ̇ዴ። ዬሱ̈ሳ ኦ̈ሲን ኢ ዓኒፖ ቲ̈ን ሲስኪ̇ኖኮታ̇ቦ ዓት ታ̈ሚ̇ራ̈ታ ኢ ኦ̈ን ቤቃ̇ንዳቦ ኢኒ̇ቲዴ።

⁹ሄሮዶ̈ሲ ዎይሊን ኦይች ኢያ ኦይጪ̇ን ኢ ኣባካር ማሃካ̇ይ ኣቲ̇ዴ።

¹⁰ቄ̈ሳ ኣላቃንኬ ሙ̈ሳ ሂጋ̇ ታማ̈ርሲዛን ኢና ኤቃ̇ሪ ሚ̈ንር ኢያ ሞ̈ቲዴ።

¹¹ሄሮዶ̈ሲ ፌ ዎታ̇ዳራንባር ዎል ማ̈ቃ̇ሪ ኢያ ሌቃ̇ር ኢ ጋልዳ ቃልዲዴ። ኢያ ቦንቻ̇ ኣፊላ ማኢሳሪ ማሂ ጲላ̈ጦ̈ስኮ ሚሺዴ።

¹²ሄሮዶ̈ስኬ ጲላ̈ጦ̈ስኬ ሚን ባኢንዶሪ ዪና̇ ኢዝ ጋላስ ዎልኣ ኢጊንቲ̇ዴ።

¹³ጲላ̈ጦ̈ሳር ቄ̈ስ ኣላቃን፥ ዳይናንኬ ዎርዣን ዎል ፔታ̇ን ሺ̈ሻ̇ሪ፥

¹⁴ኢንታ̇ኮ “ዪንቲ̇ ‘ዓ ና̈ሳዲ ኢ̈ት ኦ̈ሳብ ዎርዣ ዲን̈ሬ’ ጋ̈ር ታ̈ክ ኤሄይንዶ̈ን ታ̈ናሬ ዪንታ̇ ቲ̈ን ኢያ ኦይጫ̇ራ ዪንቲ̇ ኢ ጋልዳ ሺ̈ሺ̇ኖ ሞ̈ቲምቦ ፔቲ̇ ኢ̈ታ ባዝ ኢ ጋልዳፖ̇ ዲጛካ̇ዬ።

¹⁵ማ ሄሮዶ̈ሳር ዪና̇ ኢዝፌ̈ኒ ኣባካር ኢ ጋልዳ ዲጛካ̇ዮኮታ̇ቦ ዓይ ኑ̈ክ ማሂ ሚሺኔ። ዪንቲ̇ ቤቃ̇ዚንዲፌ̈ኒ ዓ̈ ና̈ሳ̈ዲ ኢያ ዎብ ዬልዝ ኣባክ ፔቲ̇ ባዛር ኢ ዎቲኖ ባዚ ባዬ̇።

¹⁶ዪ̈ኮታ̇ቦ ቴ ኢያ ቃጣ̇̇ኣር ቢላ̇̈ንዳ̇” ጌይዴ። [

¹⁷ላይን ላይን ፋ̈ሲጋ ባ̈ልባር ቃቺንቲ̇ኖ ኣስ ጋርታ̇ፖ̇ ፔታ̇ን ቢሊ̇̈ሬ።]

¹⁸ዎርዣ ዎይ ፔቲ̇ ኖ̈ናባራ “ና̈ሳ ዓ̈ ኤሊ̇ባር ኑ̈ብ ይሳ̇ቤ! ና̈ሳ ባርባ̈ና ኑ̈ብ ቢላ̇ቤ” ጋ̈ሪ ዎል ፔታ̇ን ዉይሲዴ።

¹⁹ባርባ̈ኒ ካታማ ጋርታ̇ ዎርዣ ጊዳ̇ ዋች ዲንርኬ ኣስ ዎሪ ቃቺንቲ̇ኖ ኣሴ።

²⁰ጲላ̈ጦ̈ሲ ዬሱ̈ሳ ቢላ̇ንዳቦ ኮዪኖኮታ̇ቦ ዓታ̇ር ማሃር ኢንታ̇ብ ሶ̈ሊዴ።

²¹ኢንቲ̇ ማ̈ቃ̇ሪ “ኢያ ሶታ̇ቤ! ኢያ ሶታ̇ቤ!” ጋ̈ር ዉይሲዴ

²²ጲላ̈ጦ̈ሲ ኢንታ̇ኮ “ኣባ ዓ̈ ና̈ሳ ኣብዝ ኢ ኦ̈ኖ ኢ̈ት ባዚ ዎ? ኢያ ዎብ ዬልዝ ኣባክ ፔቲ̇ ኢ̈ት ባዝ ቴ ኢ ጋልዳ ዲጛካ̇ዬ፤ ዪ̈ኮታ̇ቦ ቴ ኢያ ቃጣ̇ኣር ቢላ̇ንዳ” ጌይዴ።

²³ኢንቲ̇ ፌ ቆ̈ ሾክ ዎታሪ “ኢያ ሶታ̇ቤ!” ጋ̈ር ሚ̈ንር ጌሺዴ፤ ኢንታ̇ ዉይሲንዳሬ ዎይላዴ።

²⁴ዪ̈ኮታ̇ቦ ጲላ̈ጦ̈ሲ ኢንቲ̇ ጌይኖን ፎቲንታ̇ምፔ̈ኒ ጋ̈ሪ ፋራ̇ዲዴ።

²⁵ዎርዣ ጊዳ̇ ዋች ኬሲሲኖ̈ዳኬ ኣስ ዎር ቃቺንቲ̇ኖ ባርባ̈ና ቢላ̇ሪ ዬሱ̈ሳ ኢንቲ̇ ኮዪኖንዲፌ̈ኒ ኢንታ̇ብ ኣ̈ ኢሚ̇ዴ።

²⁶ዬሱ̈ሳ ኤ̈̇ ኤኪ̇ ሉካ̇ዚምባራ ሲሞ̈ና ጌይዛ ቄሬ̈ና ጋዶ̇ ና̈ሳ ጋጻራፖ̇ ዬ̈ዚምባራ ዲጛሪ ማስቃሊን ቶ̈ሳ̇ር ዬሱ̈ሳ ዎሂን ሉካ̇ምፔ̈ኒ ዎቲዴ።

²⁷ዎይሊን ዎርዣኬ ፌ ቲራ ቆጺ̇ ዬ̈ኪ̇ዝ ማጫ̇ን ኢ ዎሂን ሉኪ̇ዴ።

²⁸ዬሱ̈ሲ ቢሪንታ̇ር ኢንታኮ “ዬሩሳ̈ላም ጋዶ̇ ማጫ̇ን! ዪንቲ̇ ዪንታ̇ ቆማ̇ብኬ ዪንታ̇ ናኣንቦ ዬ̈ኪብቴዶኬ ታ̈ብ ዬ̈ካፒ̇ቴ!

²⁹‘ዉርሲ ዬሊባ̈ሶ ማጫ̇ን፤ ዬሊ ቤኣካዮ ዬላ ኬንኬ ኣባካር ኣሚ̇ሲ ቤኣካ̇ዮ ኣማ̇ን ኢንቲ̇ ኣንጂንቲ̇ኖን’ ዪዝ ጌይዝ ኬሊ̇ ቢርት ዬይሬ።

³⁰ዪና̇ ኢዝ ኬሊ̇ንባራ ኢንዳን ‘ኑ ጋል ኬዲ̇ብቴ’ ዴሃንሬ ‘ኑ̈ና ኣ̈ቺ̇ብቴ̇’ ጌይሬ።

³¹ዪዚ ዪፌ̈ኖ ባዝ ዎይ ታ ጋልዳ ዎቲ̈ንቲ̇ኖንዳ ዪንታ̇ ጋልዳ ዎዛ̈ርታ̇ንዳዶ̈ኔ” ጌይዴ።

³²ኢባር ዎልኣ ዎምፔ̈ኒ ኢ̈ት ኦ̈ኖ ናምኢ ኣሳን ኤኪ̇ ሉኪ̇ዴ።

³³ቃራ̈ኖ ጋ̈ዝ ቤሲ̇ን ዬሊ̇ኖፖ̇ ዓኒ ኢያ ሶቲ̇ዴ። ኢ̈ት ኦ̈ኖ ናምኢ ኣሳንሬ ፔታ̇ና ኡሻች ጎይ ፔታ̇ና ዓዲርስ ጎይ ኢንታ̇ ሶቲ̇ዴ።

³⁴ኢናፖ̇ [ዬሱ̈ሲ “ታ ባ̈ባዶ! ኢንቲ̇ ፌ ዎታዝ ባዚን ኤሪባ̈ሶኮታ̇ቦ ኢንታ̇ብ ኣቶ̇ ጋ̈ቤ!” ጌይዴ። ዎታ̇ዳራንሬ ኢጻ ቃጻ̇ሪ ኢ ኣፊሊን ፋጊንቲ̇ ኤኪ̇ዴ።

³⁵ዎርዣ ኤቃ̇ር ቤቂ̇̈ርዶ̈ን፥ ኣይሁድ ኣላቃንሬ “ኢ ሜላን ፋዴ ዪዚ ኢ ጾ̈ሳ̇̇̈ባር ማራ̇ጺንቲ̇ኖ ክርስቶ̈ስ ኢያ ኮ ፌ̈ና ፋጋ̈ቤ!” ጌዪሙታ̇ ኢ ጋልዳ ቃልዲ̇ዴ።

³⁶ዎታ̇ዳራንሬ ኢ̈ክ ዬ̈ሪ ኢ ጋልዳ ቃልዲ̇ዴ። ሶ̈ሪኖ ዎይና ጃ̇ ኤሄ̈ር ኢ̈ብ ኢሚ̇ ሙታ̇ዶ̈ሪ፥

³⁷“ኔ̈ኒ ኣይሁድ ካ̈ትኮ ኔ ኔ ቆሚ̇ን ፋኔ!” ጌንት ኤ̈̇ዴ።

³⁸ፉዳ ኢ ቆማ̇ ማስቃሊን ጋልዳ̇ “ዓዲ ኣይሁዳን ካ̈ቴ” ዪዝ ጌዪዝ ጹ̈ፋ ኤ̈ጚ ካጲዴ።

³⁹ኢባር ሶቲንቲ̇ኖ ኢ̈ት ኦ̈ኖን ጋርታ̇ፖ̇ ፔታ̇ና̈ዲ ዬሱ̈ሳኮ “ኔ̈ኒ ክርስቶ̈ስ ጊዳካ̇ያ? ዪዚ ዎይዳ ኔ ኔ ቆሚ̇ንዳሬ ኑ̈ናር ዎይ ፋቤ!” ጌዪ ሙታ̇ ኢያ ቆ̈ዴ።

⁴⁰ማ ሜላዲ “ኔ̈ናር ኢፌ̈ን ዓይቃብ ጊ̈ጊንታ̇ ዶኣራሬ ጾ̈ሳ̇̇̈ብ ኢ̈ጫ̇ባሳ?

⁴¹ኑ ኦ̈ኖ ኢ̈ታ ኦ̈ሲንባራ ኑ̈ብ ኮሻ̇ዝ ቂጣ̈ቲን ኑ ኤኪ̇̈ሬ፤ ና̈ሳ ዓ̈ ማ̈ቄ̇ጌይንዶ̇ ኢ ኣባካር ኢ̈ት ኦ̈ኖ ባዚ ባዬ̇” ጌይዴ።

⁴²ኢናፖ̇ ና̈ሳ̈ዲ ዬሱ̈ሳኮ “ጎዳ̈ዶ! ኔ ኔ ካ̈ቲቲንባራ ዬ̈ዚምባራ ታ̈ና ቆፓ̇ቤ!” ጌይዴ።

⁴³ዬሱ̈ሳሬ ኢ̈ኮ “ቴ ኔ̈ክ ኪን ጋ̈ሬ ዓታ̇ብ ኔ ታባር ጋና̇ታ ጋርታ̇ ዶኣ̈ሬ!” ጌይዴ።

⁴⁴ዪኒ̇ባራ ሌሂ ሳኣ̈ታ ማ̈ቃ̇ምፔ̈ንዶ̈ን ኣጚ ሳ̈ካሊ ሳኣ̈ታ ዬሊ̇ዝ ዲራ̈ስ ኣዋ̈ፊን ሚ̇ኖኮታ̇ቦ ሳ̈ዝ ጋልዳ ዎይ ም ማ̈ቂ̇ዴ።

⁴⁵ጾ̈ሳ̇̇ ኬ̈ ጋርታ̇ ዎ ማጋ̈ራጃ̈ዳሬ ጊዲ̇ንባር ዳርኣር ናምኢ ኬስኪ̇ዴ።

⁴⁶ዬሱ̈ሲ ፌ ቆ̈ ሾክ ዎታሪ “ታ ባ̈ባ̈ዶ፥ ቴ ሼምፒ̇ን ኔ̈ብ ዓዳራ ኢማ̇̈ሬ!” ዪዝ ጋ̈ር ዉይሲኖፖ̇ ዓኒ ኢ ካሲን ኬስካ̇ዴ።

⁴⁷ማታላቃ ዪኖ̇ ቤቃ̇ሪ “ኪን ና̈ሳ ዓ̈ ጺላ̇ ኣሴ!” ጋ̈ሪ ጾ̈ሳ̇̇ ጋላቲዴ።

⁴⁸ዪኖ̇ ቤቃ̇ንዳብ ኢና ሺ̈ቂኖ ኣሳን ዎይ፥ ማ̈ቂ̇ኖ ባዚን ቤቂ̇ኖፖ̇ ዓኒ ፌ ቲራ ቆጺ̇ ሙታ̇ዶ̈ሪ ፌ ኣ̈ል ማ̈ቂ̇ዴ።

⁴⁹ዬሱ̈ሳ ኮሺንቺ̇ ኤሪዝ ኣሳን ዎይኬ ጋሊላፖ̇ ኤ̈̇ር ኢ ዎሂን ዬ̇ ሙታ̇ ዎ ኣሳን ዪኖ̇ ቤቂ̇ሙታ̇ዶ̈ሪ ጎትባራ ኤቂ̇ኔ።

⁵⁰ኣርማ̈ታ̈ሳ ጋ̈ዝ ኣይሁዳን ካታሚን ጋርታ̇ ዎ፥ ኣይሁድ ፊርድ ኣ̈ሎ ኣሳን ጋርታ̇ፖ ፔታ̇ና ዮ̈ሴ̈ፋ ጌይዝ ኣሲ ዎ። ና̈ሳ ዪ̈ዲ ጺላ̇ኬ ኮሽ̇ ኣሴ።

⁵¹ኢ ኣይሁዳን ዞራ ጋርታ̇ኬ ኢንታ̇ ኢ̈ታ ሶ̈ላ ጋርታ̇ ጌላካ̇ዬ። ኢ ጾ̈ሳ̇̇ ካ̈ቲቲን ዬ̈ዚን ኢና̇ባራ ና̈ጊሙታ̇ ዎ ኣሴ።

⁵²ኢ ጲላ̈ጦ̈ሳክ ሉካ̇ሪ ዬሱ̈ሳ ኣሂን ፌ̈ብ ኢማ̇ምፔ̇̈ኒ ጌሺዴ።

⁵³ኢናፖ̇ ኣሂን ሶ̈ቢሳሪ ዱ̈ፊ ኣፊላባራ ጻቃሪ፥ ዓኒ̇ፖ ቲ̈ን ኣሲ ዱ̈ኪንታ̇ካዮ ቤስ̇ ሹች ማሳ̇ሪ ጊ̈ጊሲኖ ዱ̈ፊ ጋርታ̇ ዱ̈ኪ̇ዴ።

⁵⁴ኢዝ ጋላሲ̇ን ሳዚን ቃማ̇ምባር ሳምባታ ማ̈ቂ̇ኖኮታ̇ቦ ኢዝቦ ኣሳ ጊ̈ጊንቲ̇ዝ ኬሌ፤ ሳምባቲንዳር ጌላንዳቦ ኡኪ̇ኔ̇።

⁵⁵ጋሊላፖ̇ ኤ̈̇ሪ ዬሱ̈ሳ ዎሂን ዬይኖ ማጫ̇ን ዮ̈ሴ̈ፋባር ሉካ̇ሪ ዱ̈ፊን ቤቂ̇ዴ። ኢ ኣሂንዳሬ ዎርዛርፌ̈ን ጋዲ̇ኖኮ ቤቂ̇ዴ።

⁵⁶ኢናፖ̇ ኢንቲ̇ ፌ ኣ̈ል ማ̈ቃ̇ሪ ሺታ̇ኬ ቂባ̈ታክ ጊ̈ጊሲዴ። ሂጊ̇ን ጋ̈ዚንዲፌ̈ኒ ሳምባታ ጋላስ ኣባካር ኦ̈ካ̇ይ ሼምፒ̇ ፌ̈ሽኪ̇ዴ።