Read basketo ሉቃ̈ሳ 5 Bible Online

ሉቃ̈ሳ 5 - basketo bible

ሉቃ̈ሳ 5

¹ፔቲ̇ ጋላስ ዬሱ̈ሲ ጌ̈ንሳ̈ሬጥ ጋዝ ባሃ̈ሪን ላፍ ኤቃ̇ር ዎዶ̈ን ዎይሊን ዎርዦ ኢ ቡጊድባር ሺ̈ቃሪ ጾ̈ሳ̇̇ ቃ̈ላ ሲስካ̇ንዳ̇ብ ዎልዎልኣ ሱጊንቲ̇ ኤ̈̇ዴ።

²ዪና̇ ኢዝባራ ናምኢ ጎጛን ባሃ̈ሪን ቡጊዲን ጋልዳ̇ ኤቂ̇ንዶ̈ን ቤቂ̇ዴ። ሞላ ኤ̈̇ዛን ጎጚን ጋልዳ̇ፖ̇ ሶ̈ባሪ ፌ ማግላባን ሜ̈ጪ̇̈ርዶ̈ን፥

³ዬሱ̈ሲ ጎጛን ጊዳ̇ፖ̇ ሲሞ̈ና ጎጚን ጋርታ̇ ጌላሪ ኢ̈ኮ “ጎጚን ኔ ታ̈ብ ባሃ̈ሪን ጊዳ̇ ሙቃ̇ ሺ̈ሺ̇ሼ” ጌይዴ። ኢናፖ̇ ኢ ጎጚን ጋልዳ ዶኣሪ ዎርዣ ታማ̈ርሲ ኤ̈ዴ።

⁴ዬሱ̈ሲ ዎርዣ ታማ̈ርሳ̇ዚን ዉርሲኖፖ̇ ዓኒ ሲሞ̈ናኮ “ጎጚን ባሃ̈ሪን ጊዳ̇ ጌ̈ኒ̇ንኮ ኤ̈ጛራ ኔ̈ናክ ኔ ላጋ̇ንኬ ሞላ ኤ̈̇ንዳቦ ዪንታ̇ ማግላቢን ኢና ሚሺብቴ” ጌይዴ።

⁵ሲሞ̈ናሬ “ኣስታማ̈ራ̈ዶ! ኑ̈ኒ ቃሚ̇ን ጋርታ̇ ዎይ ዋ̈ዪሙታ̇ ኣቃሪ ኣባካር ኤ̈ካ̇ዬ፤ ዓት ኔ ኑ̈ና ዪስቶ ጋ̈ዶኮ፥ ማግላባን ሚሻንዳ” ጌይዴ።

⁶ኢንታ̇ር ኢ ጌይኖንዲፌ̈ኒ ዎቲን ኢንታ̇ ማግላቢን ዱጳ̇ንድ ዬሊ̇ዝ ዲራ̈ስ ዎይሊን ሞላ ኤ̈̇ዴ።

⁷ሜላ ጎጛ ጋርታ̇ ዎ ላጋ̇ን ዬ̈ር ፌ̈ና ማ̈ዳ̇ምፔ̈ን ካች̇ ጋ̈ር ዉቲ̇ዴ፤ ኢንታ̇ር ዬ̈ሪ ናምኢ ጎጛንባር ሞላ ኩምን ጎጛን ቶኪንቲ̇ ኤ̈̇ዴ።

⁸ሲሞ̈ን ጴ̈ጥሮ̈ሳር ዪኖ̇ ቤቃ̇ሪ ዬሱ̈ሳ ቶሂን ጋልዳ ኬዳ̇ሪ “ላ̈! ታ̈ኒ ናጋራንቻ̇ ማ̈ቂ̇ኖኮታ̇ቦ ታ̈ክ ኡካፔ̇” ጌይዴ።

⁹ኢያኬ ኢባር ዎን ዎይ ዎይሊን ሞላ ኤ̈̇ኖኮታ̇ቦ ጋራ̇ሚንታሪ ኢ ዪኖ̇ ጌይኔ።

¹⁰ማ ሲሞ̈ና ላጋ̇ን ዛብዶ̈ሳ ናኣን ዓይቆ̈ባኬ ዋ̈ኒ̇ሲ ጋራ̇ሚንቲ̇ዴ። ዬሱ̈ሳር ሲሞ̈ናኮ “ኢ̈ጫፔ̇፤ ቴ ኔ̈ና ታ̈ብ ኣስ ሺ̈ሺ̇ዝ ኣስ ማሃንዳ” ጌይዴ።

¹¹ኢንታ̇ር ፌ ጎጛን ዓኒ ቡጊድ ኬሲ̇ኖፖ̇ ዓኒ ዎይ ባዝ ኣሻ̇ሪ ኢ ዎሂን ዬዴ።

¹²ፔቲ̇ ጋላስ ዬሱ̈ሲ ፔቲ̇ ካታማ ጋርታ̇ ዎዶ̈ን ኢ ጋሊ̇ን ዎይ ሹያ ሙይኖ ፔቲ̇ ኣሲ ኢ̈ክ ዬይዴ፤ ዪ ና̈ሳ ዬሱ̈ሳ ቤቃ̇ር ኢ ቲ̈ን ጉጲጛሪ “ላ̈! ኔ ታ̈ና ማ̈ዳ̇ንዳ̇ብ ኮያዶኮ ታ̈ና ፋንዳ̇ብ ዳንዳኣ̈ርሽዋ” ጋ̈ር ጌሺዴ።

¹³ዬሱ̈ሳሬ ፌ ኩሺን ኢ ጋል ጋዳ̇ሪ “ቴ ኔ̈ና ፋንዳብ ዶሳ̈ሬ፥ ፋጻቤ!” ጌይዴ። ኢናፖ̇ ሹዪንዳ̇ ኤሊ̇ባር ኢ ጋልዳ̇ፖ ያዴ።

¹⁴ዬሱ̈ሳር ኢ̈ኮ “ኔ ዓኖ̇ ኦ̈ባካር ሶ̈ላፔ̇፤ ሉካ̇ራ ቄ̈ሳብ ኔ ኔ̈ና ቤይሳቤ። ዎርዣ̈ብ ማርካ ማ̈ቃ̇ምፔ̈ኒ ኔ ዓርጊን ዓና̇ ጋልዳፖ̇ ፋጺኖምቦ̇ ሙ̈ሶ ኪ̈ቲ̇ኖ ዣ̈ርሺ̇ን ሺ̈ሻ̇ቤ” ጋ̈ሪ ኢያ ኪ̈ቲ̇ዴ።

¹⁵ዬሱ̈ሳ ኦ̈ሳ̈ዲ ቲ̈ኖፖ̇ ኣ̈̇ሪ ሲስኪ̇ንቲ̇ሙታ̇ ዎይ ቤስ̇ ዬሊ̇ዴ፤ ዎይሊን ኣሲ ኢ ሶ̈ሊን ሲስካ̇ንዳብኬ ፌ ዓርጊ̇ን ጋልዳ̇ፖ ፋጻንዳ̇ቦ ኢ̈ክ ሺ̈ቂሬ።

¹⁶ዎቲናካር ኢ ዎይሊን ኬል̇ ኣሲ ባዮ̇ ቤስ̇ ሉካ̇ር ዎ̈ሳ ዎ̈ሲ̇̈ሬ።

¹⁷ፔቲ̇ ጋላስ ዬሱ̈ሲ ታማ̈ርሳ̇ዚምባራ ጋሊላፕኬ ዪሁዳ ጋርታ̇ ዎ ቤሳ̇ን ጋርታ̇ፖ̇ ዎይ ማ ዬሩሳ̈ላማፖ̇ ዬይኖ ፋራሳ̈ዋንኬ ሙ̈ሳ ሂጋ̇ ታማ̈ርሲዛን ኢ ላፍ ዶኢንዶ̈ን፥ ኢ ማኖ ኣሳን ፋምፔ̈ኒ ጾ̈ሳ̇̇ ዎልቃ̇ ኢባር ማ̈ቂ̇ዴ።

¹⁸ዪና̇ ኢዝባራ ኣሳን ፔቲ̇ ዎብ̇ ኣስ ኣርሳባር ቶ̈ካ̇ር ኤኪ̇ ዬ̈ሪ ዬሱ̈ሲ ዎ ኬ̈ን ጋርታ̇ ጌልሳር ኢ ቲ̈ን ጋዳ̇ንዳብ ኮዪንዶ̈ን፥

¹⁹ዎርዣ ዎይሊኖኮታ̇ቦ ኬ̈ ጌልሳ̇ንዳብ ኢንታ ጋሚን ኬ̈ን ጋል ኣፋ ኬስካ̇ሪ ኬ̈ን ኣፎን ሾክ ዎታሪ ና̈ሳ ማዛ ኢ ኣርሲንባር ኣሳ ጊዳ̇ባር ዬሱ̈ሳ ቲ̈ን ሶ̈ቢሲዴ።

²⁰ኢያሬ ኢንታ̇ብ ኣማ̇ና ዎን ቤቃ̇ሪ “ኣ̈ን ና̈ሳ̈ዶ! ኔ ናጋራ ኔ̈ብ ኣቶ̇ ጌዪንቲኔ” ጌይዴ።

²¹ሙ̈ሳ ሂጋ̇ ታማ̈ርሲዛንኬ ፋራሳ̈ዋን “ዓፌ̈ኖ ጾ̈ሳ̇̇ ቆ̈ዛ ኢ ኣ ኣሳ? ፔቲ̇ ጾ̈ሳ̇̇̈ፖ̇ ኣቲ̇ን ሜላ ኣሳ ናጋራ ኣቶ̇ ጋ̈ንዳ̇ቦ ዳንዳኢዝ ኣሲ ዎ?” ጋ̈ሪ ቆፒ̇ዴ።

²²ዬሱ̈ሳር ኢንታ̇ ቆፊን ኤሪኖኮታ̇ቦ ኢንታኮ “ዪንቲ̇ ኣባብ ዪ̈ዲፌ̈ን ዪንታ̇ ቡ̈ዳ ጋርታ̇ ቆፒ̇̈ራ?

²³‘ኔ ናጋ̈ሪን ኔ̈ብ ኣቶ̇ ጌይንቲ̇ኔ’ ጋ̈ዚምፔኬ ‘ዲንዳ̇ር ሉካ̇ቤ’ ጋ̈ዚምፖ̇ ዎና̇ ዴ̈ጻ̇̈ራ?

²⁴ዪና̇ ቴ ጌይኖንዳ̇ ታ̈ኒ ኣሳ ናኣ̈ዲ ሳ̈ዝ ጋልዳ̇ ኣሳ ናኣን ናጋራ ኣቶ̇ ጋ̈ንዳ̇ቦ ሲልጣ̈ና ታ̈ብ ዎን ዪንቲ̇ ኤራምፔ̈ኒ ጋ̈ሪ ና̈ሳ ዎባ̇̈ኮ “ዲንዳ̇ር ኔ ኣርሲን ቶ̈ካ̇ር ኔ ኣ̈ል ሉካ̇ቤ” ጌይዴ።

²⁵ኢያሬ ኤሊ̇ባር ዲንዳ̇ር ኢንታ̇ ቲ̈ን ኤቂ̇ዴ። ኢናፖ̇ ፌ ሱርቂ̇ኖ ኣርሲን ቶ̈ካ̇ር ጾ̈ሳ̇̇ ጋላቲ ሙታ̇ ፌ ኣ̈ል ሉኪ̇ዴ።

²⁶ዪና̇ ኢዝባራ ዎይን ጋራ̇ሚንታ̇ሪ ጾ̈ሳ̇̇ ጋላቲ ሙታ̇ “ዓታ̇̈ቦ ኑ̈ኒ ጉዳ ባዝ ቤቃ̇ሽ” ጌዪ ኢ̈ቺ̇ ኢንታ̇ ኤ̈̇ዴ።

²⁷ዪኒ̇ፖ ዓኒ ዬሱ̈ሲ ኢናፖ̇ ኬስኪ̇ ሉካ̇ሪ ቃራጻ ቃጺሲዛ ሌ̈ዊ ጌይዝ ና̈ሳ̈ዲ ቃራጻ ቃጺሲዝ ቤስ̇ ጋልዳ ዶኣር ዎዶ̈ን ቤቃ̇ሪ “ታ ዎሂን ዬ̈ቤ” ጌይዴ።

²⁸ኢያር ዎይ ባዝ ኣሻ̇ሪ ዲንዳር ኢ ዎሂን ሉኪ̇ዴ።

²⁹ሌ̈ዊ ዬሱ̈ሳቦ ፌ ኣ̈ል ጴች ጊብዣ ጊ̈ጊሲዴ፤ ቃራጻ ቃጺሲዝ ዎይሊን ኣሳንኬ ሜላ ኣሳንሬ ኢንታ̇ባራ ጊብዣ ሞ̈ንዳ̇ብ ዶኢዴ።

³⁰ፋራሳ̈ዋንኬ ሙ̈ሳ ሂጋ̇ ታማ̈ርሲዛን ኢንታ̇ኮ “ዪንቲ̇ ቃራጻ ቃጺሲዛንባርኬ ናጋራንቻ̇ንባራ ዎልኣ ኣባቦ ሙዪ ኡሽኪ̇ ዎቲራ?” ጌዪ ኢ ታማ̈ራን ጋልዳ̇ ጉንዲሚዴ።

³¹ዬሱ̈ሳሬ ኢንታ̇ኮ “ማዛንቦዶኬ ማባ̈ሶንቦ ኣኪማ ኮሺ̇ባ̈ሴ።

³²ታ̈ናር ናጋራቻ̇ን ማ̈ሪቲ ጌላምፔ̈ንዶኬ ጺላ̇ን ጼይጋንዳ̇ብ ዬ̈ካ̇ዬ” ጋ̈ር ማሂዴ።

³³ኢንታ̇ሬ ዬሱ̈ሳኮ “ዋ̈ኒ̇ሳ ታማ̈ራን ዎይሊን ጋላስ ጾ̈ሚ ዎቲ̈ሪ፤ ፋራሳ̈ዋን ታማ̈ራንሬ ዪና̇ ኢዝፌ̈ን ዎቲ̈ሬ። ኔ̈ኮን ሙዪ ኡሽኪ̇ ዎታዚን ኣባ?” ጌይዴ።

³⁴ዬሱ̈ሲ ኢንታ̇ኮ “ኢሳ̇ ኢንታ̇ባር ዶኣምባ̇ራ ቱሪን ኣሳን ጾ̈ማምፔ̈ን ዎታ̈ንዳ̇ቦ ዪንቲ̇ ዳንዳኢ̈ራ?

³⁵ዎቲናካሬ ኢሳ̇̈ዲ ኢንታ̇ ጋልዳ̇ፖ ሉኪ̇ዝ ቃሚ̇ ዬይሬ፥ ዪና̇ ኢዝባራ ኢንቲ̇ ጾ̈ሚ̈ሬ” ጌይዴ።

³⁶ማ ኢንታ̇ኮ ሚሳ̇̈ሊባራ “ኦራ ኣፊላ ጋልዳፖ̇ ቃጺ̇ ኤካ̇ሪ ሲላ ኣፊላ ጋልዳ̇ ኪቢዝ ኣሲ ኦ̈ናካር ባዬ̇፤ ዪኒ̇ፌ̈ን ዎቴጌይንዶ ኦራ ጫርቂን ኢ ሜላ̇ ዳርሲ̇ ኢ̈ሲ̇ኔ። ኦራ ጫርቂ̇ንዳ̇ ሲላ ኣፊሊምቦ̇ ማ̈ቃ̇ባሴ።

³⁷ቢርት ኤ̈ሲ̇ኖ ኤ̈ስ ኤካ̇ሪ ሲላ ኦካራ ጋርታ̇ ጋዲ̇ዝ ኣሲ ኦ̈ናካር ባዬ። ዪኒፌ̈ን ዎቴጌይንዶ̇ ኤ̈ሲ̇ንዳ̇ ኦካሪን ዳርሳ̇̈ሬ። ኤ̈ሲ̇ንዳ̇ር ዉልኢንታ̇ሬ፤ ኦካሪንዳ̇ር ቶጚንታ̇ ኣታ̇̈ሬ።

³⁸ዪ̈ኮታ̇ቦ ቢርት ኤ̈ሲ̇ኖ ኤ̈ስ ኦራ ኦካራ ጋርታ̇ ሚሻንዳ̇ብ ኮሺ̇̈ሬ።

³⁹ዪዚ ‘ሜሊኖ ኤ̈ሲ̇ ኮሼ̇’ ጌይዛኮታ̇ቦ ሜሊኖ ኤ̈ስ ኡሽኪ̇ ማ̈ቃ̇ሪ፥ ቢርት ማ̈ኖ ኤ̈ስ ኡሽካ̇ንዳብ ኮዪዝ ኣሲ ባዬ̇” ጋ̈ር ሶ̈ሊዴ።