Read basketo ሉቃ̈ሳ 8 Bible Online

ሉቃ̈ሳ 8 - basketo bible

ሉቃ̈ሳ 8

¹ዪኒ̇ፖ ዓኒ ዬሱ̈ሲ ጾ̈ሳ̇̇ ካ̈ቲቲ ዎጛላ ሳባ̇ኪሙታ̇ዶ̈ሪ ካታማ ጋርሳ̇ባርኬ ሳፋራ ጋርሳ̇ባራ ኣ̈̇ዴ። ኢ ታማ̈ራን ታጶ̇ ናምኣን ኢባር ዎ።

²ሜላሬ ኢ̈ታ ኣያ̇ናባርኬ ዱማ ዱማ ዓርጋባር ማር ፋጺኖ ፔቲ̇ ፔቲ̇ ማጫ̇ንር ኢባር ዎ። ዪንሬ፦ ታብዛ ኢ̈ታ ኣያ̇ና ኢዝ ጋልዳፖ ኬስኪ̇ኖን ማ̈ራማ ማግዳሎንዶ፣

³ካ̈ታ ሄሮዶ̈ስ ኣ̈ሊምቦ ኣላቃ ማ̈ቂ̇ኖ ና̈ሳ ኩ̈ዛ ጌይዛ ማጪ̇ን ዮሃ̈ኖ፣ ሶ̈ሲኖ፣ ሜላሬ ዎይሊን ማጫ̇ን ዎ። ዪን ማጫ̇ን ፌ ሚ̈ሻ̇ባራ ዬሱ̈ሳኬ ኢ ታማ̈ራንኬ ማ̈ዲ̇̈ሬ።

⁴ዎይሊን ዎርዦ ዎል ፔታ̇ን ሺ̈ቃር ዎዶ̈ን ማ ኣሳን̇ ዱማ ዱማ ካታማ ጋርታ̇ፖ̇ ኢ̈ክ ዙግራምባራ ሚሳ̇̈ሊባር ኢንታ̇ብ ሶ̈ሊ̈ርዶሪ ጌዪ፥

⁵“ፔቲ̇ ዎት ዎቲዝ ኣሲ ዜር ዜርቃ̇ንዳብ ኬስኪ̇ዴ። ኢ ዜርቃ̇ምባራ ዜርን ጋርታ̇ፖ̇ ፔታ̇ን ፔታ̇ናን̇ ጎይ̇ ቡጊድ ኬዳ̇ሪ ቶህባራ ዬንቲ̇ዴ፤ ካፋሬ ሱ ሙይዴ።

⁶ዶካ̇ን̇ ቁ̈ኣ ሳ̈ዝ ጋልዳ ኬዲ̇ዴ፥ ፉዲኖንዲፌ̈ኒ ቤሲ̇ን ሻይና ማ̈ቃካ̇ዮኮታ̇ቦ ሜሊዴ።

⁷ሜላን̇ ኣጚ ባላ ጋርታ̇ ኬዲ̇ዴ፤ ኣጚ̇ን ኢዝባር ዎልኣ ዲጫ̇ራ ኢዞ ባቃ̇ ይሳ̇ዴ።

⁸ሜላን̇ ኢጊስ ሳ̈ዝ ጋልዳ̇ ኬዲ̇ዴ፤ ፉዳሪ ጼ̈ታ ኩሽ ካጺ̇ዴ” ጌይዴ። ዪኖ̇ ኢ ሶ̈ሊ ዉርሲ̇ኖፖ̇ ዓኒ ፌ ቆ̈ን ሾክ ዎታሪ “ሲስኪ̇ዝ ዋይ ዎ ኣሲ ዓኖ̇ ሲስካ̇ጋ̈ቤ” ጌይዴ።

⁹ኢ ታማ̈ራንሬ ዪና̇ ኢ ሶ̈ሊኖ ሚሳ̇̈ሊንኮን ቢርሺቺ̇ን ኢያ ኦይጪ̇ዴ።

¹⁰ኢያሬ ኢንታ̇ኮ “ጾ̈ሳ̇̇ ካ̈ቲቲ ሚስጢራ ኤራምፔ̈ን ዪንታ̇ብ ኢሚ̇ንቲ̇ኔ። ሜላንቦ ሚሳ̇̈ሊባር ሶ̈ላ̈ሬ፤ ዪዳ̈ሬ፥ “ ‘ቤቂ̇ ሙታ̇ ቆፓ̇ካ̇ይፌ̈ኒ፤ ሲስኪ̇ሙታ̇ ኤልቅ ዎታካ̇ይፌ̈ኔ’ ጌይዴ።

¹¹ዪዚ ሚሳ̇̈ሊን ቢርሺቺ̇ን ዓኖ̇፦ ዜርንዳ̇ ጾ̈ሳ̇̇ ቃ̈ሊንዶ̇።

¹²ጎይ ቡጊድ ኬዲ̇ኖን፥ ጾ̈ሳ̇̇ ቃ̈ሊን ሲስኪ̇̈ርዶ̈ን ኢዝባር ኣማ̇ናር ፋጻካ̇ይፌ̈ን ሴ̈ጣኖ ቃ̈ሊን ኢንታ̇ ቡ̈ዲን ጋርታ̇ ዶኣካ̇ይፌ̈ን ዎቲዛን።

¹³ቁ̈ኣ ሳ̈ዝ ጋል ኬዲ̇ኖን፥ ጾ̈ሳ̇̇ ቃ̈ሊን ሲስካ̇ሪ ኡፋይስባራ ኤኪ̇ዛን። ኢንቲ̇ ጊሊ̇ ጊዛብ ኣማ̇ኒ̈ርዶኬ ጻጳ ኢንታ̇ብ ባዮ̇ኮታ̇ቦ ሜታ ኢንታ̇ ዬሊ̇ኖ ኬል̇ ኤሊ̇ባር ካ̈ዲ̈ሬ።

¹⁴ኣጚ ጊዳ̇ ኬዲ̇ኖን፥ ጾ̈ሳ̇̇ ቃ̈ሊን ሲስኪ̇̈ርዶ̈ኒ ሳ̈ዝ ጋልዶ̇ ዶኢ ቲ̈ሪስ፣ ዱሪቲ ቆፊባራኬ ኣላሚን ጋልዶ̇ ኡፋይስባር ኤ̈ንታ̇ሪ ኮሽ ኣ̈ፍ ኣ̈ፋካ̇ይ ሾሊታር ኣቲ̇ዛን።

¹⁵ኢጊስ ሳ̈ዝ ጋልዳ̇ ኬዲ̇ኖን፥ ጾ̈ሳ̇̇ ቃ̈ሊን ኮሻ̇ ቡ̈ዳባራ ሲስካ̇ሪ ና̈ጊ፥ ጋርዢ ኢዝባር ሚ̈ጛር ዶኣሪ ኣ̈ፍ ኣ̈ፊዛን።

¹⁶“ታማ ፎ̈ኢሳሪ ኦት ጋርታ̇ ዎይ ኣርሳ ጻና ጋዲ̇ዝ ኣሲ ኦ̈ናካር ባዬ̇። ኣሲ ኬ̈ ጌላምባ̇ር ኢንታ̇ብ ፎ̈ኣምፔ̈ን ሾክ ጌይኖ ቤሳ̇ ጋልዳ̇ ጋዲ̇̈ርዶኬ።

¹⁷ኤሪንታ̇ካ̇ይዶ̈ር ኣ̈ቺንታ̇ርኬ ባያር ኣቲ̇ዝ ባዚ ፔታ̇ናር ባዬ̇።

¹⁸ዪዚ ዪንቲ̇ ዎዛርፌ̈ን ቃ̈ሊን ሲስካ̇ንዳብ ኮሺ̇̈ርኮ ና̈ጊንቲ̇ብቴ። ዎዳ ዎ̈ቦ ጉዢንቲ̇̈ሬ። ባዮ̇ ና̈ሳ ጋልዳፖ̇ ኢ ፌ̈ብ ዎ ባዚን ጊሊ̇ን ኢዛር ጌዳ ኤኪንታ̇̈ሬ” ጌይዴ።

¹⁹ዪኒ̇ፖ ዓኒ ዬሱ̈ሳ ኢንዲ̇ኬ ኢ ኢና̇ኣንኬ ዎልኣ ኢ ዎ ቤስ̇ ዬይዴ። ኢንታ̇ሬ ዎርዣ ዎይሊኖኮታ̇ቦ ኢ̈ክ ኡካ̇ንዳቦ ዳንዳኣካ̇ዬ።

²⁰ዪና̇ ኢዝባራ “ኔ ኢንዲ̇ኬ ኔ ኢና̇ኣን ኔ̈ና ቤቃ̇ንዳ̇ብ ኮያሪ ዛ̈ና ኤቂ̇ኔ” ጋ̈ር ኣሳን ኢ̈ብ ሶ̈ሊዴ።

²¹ኢ ኢንታ̇ኮ “ቴ ኢንዲ̇ኬ ቴ ኢሺንታ̇ን ጾ̈ሳ̇̇ ቃ̈ሊን ሲስኪ̇ ኪ̈ቲንቲ̇ዛን ዎይዬ” ጋ̈ር ማሂዴ።

²²ፔቲ̇ ጋላስ ዬሱ̈ሲ ፌ ታማ̈ራንባር ዎልኣ ጎጛ ጋርታ̇ ጌላሪ “ኑ ባሃ̈ሪምፖ̇ ጌዳ ፊ̈ን ፊ̈ጚስቶ” ጌይዴ። ኢንታ̇ር ጎጛ ጋርታ̇ ጌላሪ ሉፊ ኤ̈̇ዴ።

²³ኢንቲ̇ ሉፊ ጋል ዎዶ̈ን ዬሱ̈ሳክ ሱርሲ ዬይን ሱርቂ̇ዴ። ዪኒ̇ባራ ባሃ̈ሪን ጋልዳ̇ ዉርጊ ዲንዳ̇ሪ ጎጚን ጋርታ̇ ዋ̈ ጌላር ኩማንዳብ ዎቲኖኮታ̇ቦ ኢና ዱ̈ኪንቲ̇ ያንዳ̇ብ ዬሊ̇ዴ።

²⁴ኢ ታማ̈ራን ኢ̈ክ ዬ̈ሪ “ላ̈! ላ̈! ኑ ያሼ!” ጋ̈ሪ ኢያ ዲንዴ። ኢ ባርካ̇ሪ ዉርጊንዲኬ ዋ̈ን ጌዳክ ዓኒክ ኤንኣዚን ቆዲ̇ዴ። ዪና̇ ኢዝባራ ዉርጊንዲኬ ዋ̈ን ኤንኣዚን ኣታ̇ራ ዚክ ጋ̈ዴ።

²⁵ኢያር ፌ ታማ̈ራንኮ “ዪንቲ̇ ታ̈ና ኣማ̇ናዚን ዎይዳ?” ጌይዴ። ኢንታ̇ር ኢ̈ጪ̇ሙታ̇ኬ ጋራ̇ሚንቲ̇ ሙታ̇ ዎልዎልኣ “ዉርጊሬ ዋ̈ሬ ኢ ኪ̈ቲ̇ን ኢ̈ብ ኪ̈ቲንቲ̇ዛ ዓ̈ ፌ̈ኖ ኢ ኦ̈ኖ?” ጌይዴ።

²⁶ዪኒ̇ፖ ዓኒ ዬሱ̈ሲ ፌ ታማ̈ራንባር ዎልኣ ባሃ̈ሪምፖ̇ ፊ̈ን ዎ ጌርሴኖ̈ና ጋ̈ዝ ጋዲን ጋርታ̇ ጎጛባር ፊ̈ጚዴ።

²⁷ኢ ጎጚን ጋርታ̇ፖ̇ ሳ̈ዳ̇ ሶ̈ባምባራ ኢ̈ታ ኣያ̇ናባር ኤ̈ንቲ̇ኖ ፔቲ̇ ኣሲ ካታሚን ጋርታ̇ፖ̇ ኬስካ̇ሪ ኢያ ዬሊ̇ዴ። ዪ ና̈ሳ̈ዲ ፌ ኣፊሊን ቃ̈ሪ ቶጛር ካላ̇ ዬ ኤ̈̇ን ዎይሊን ላይ ኢ̈ብ ማ̈ቂ̇ኔ። ኢ ዶኣዚንዳ̇ሬ ኬ̈ ጋርታ̇ ጊዳካ̇ይዶ̈ን ዛ̈ና ጎሪ ጋርታ̇ ዶኢ̈ሬ።

²⁸ዪ ና̈ሳ ዬሱ̈ሳ ቤቃ̇ሪ ዉይሲሙታ̇ዶ̈ር ኢ ቲ̈ን ኬዳ̇ር ፌ ቆ̈ ሾክ ዎታሪ “ዎይ̈ፖ̇ ሾክ ጌይኖ ጾ̈ሳ̇̇ ናኣ ዬሱ̈ሶ! ታ̈ናክ ኔ̈ናክ ኣብዚ ዎል ዬል̈ራ? ታ̈ና ቢጻ ቤይሳካ̇ይፌ̈ኒ ቴ ኔ̈ና ጌሻ̈ሬ” ጌይዴ።

²⁹ኢ̈ታ ኣያ̇ና ዪኖ̇ ጌይኖንዳ̇ ኢ ና̈ሳ ጋልዳ̇ፖ̇ ኬስኪ̇ ሉካ̇ምፔ̈ኒ ዬሱ̈ሲ ኢያ ኪ̈ቲ̇ኖኮታ̇ቦ። ኢ̈ታ ኣያ̇ና̈ዲ ዎይ ጋላስ ኢ ጋልዳ ዲንዲ̇ዛኮታ̇ቦ ኢያ ሳንሳላታባርኬ ካ̈ቲናባራ ቃቺ̇ ሙታ̇ ና̈ጋዚምባራሬ ኢ ፌ̈ና ቃቺ̇ኖ ሳንሳላቲን ዱ̈̈፥ ቶሂን ጋርታ ኣ̈ኖ ካ̈ታኒን ሜይሲ̇̈ሬ። ኢ̈ታ ኣያ̇ና̈ዳር ኢያ ኣሲ ባዮ̇ ቤስ̇ ባራሃ ጋርታ̇ ኤኪ̇ ሉኪ̇̈ሬ።

³⁰ዬሱ̈ሲ ና̈ሳ̈ኮ “ኔ ሱም ኦ̈ኖ?” ጋ̈ሪ ኦይጪ̇ን፥ ኢያር ኢ ጋል ዎይሊን ኢ̈ታ ኣያ̇ና ዎኮታ̇ቦ “ቴ ሱም ሌ̈ጎ̈ና” ጌይዴ።

³¹ኢ̈ታ ኣያ̇ናን “ዋ̈ዴ ሜናብ ቢጻ ቤቂ̇ሙታ ዶኣዝ ቤሲ̇ን ጋርታ̇ ኑ̈ና ሚሻፔ” ጋ̈ሪ ሚ̈ንር ጌሺዴ።

³²ኢና ፔቲ̇ ቤስ̇ ጌርባች ጋልዳ̇ ዎይሊን ጉዲን ዉዳ ዬ̈ጚንቲ̇ዛ ዎዶ̈ን ኢ̈ታ ኣያ̇ናን ዬሱ̈ሳኮ “ኑ̈ኒ ጉዲንን ጋርታ̇ ጌላምፔ̈ኒ ኑ̈ና ሚሺሼ” ጋ̈ሪ ጌሺን ኢያር ኢንታ ሚሺዴ።

³³ኢ̈ታ ኣያ̇ና̈ዳሬ ና̈ሳ ጋልዳ̇ፖ̇ ኬስካ̇ሪ ጉዲንን ጋርታ̇ ጌሊን ጉዲንን ጌርባቺ̇ን ጋልዳፖ̇ ጎርጎራ ዎጻ̇ር ባሃ̈ራ ጋርታ̇ ጌላር ዱ̈ኪንቲ̇ዴ።

³⁴ጉዲንን ዬ̈ጚዝ ጋይጫ ናኣን ዪኖ̇ ማ̈ቂ̇ኖ ባዚን ቤቃ̇ሪ ዎጺ̇ ሉካ̇ር ካታማ ጋርታ̇ኬ ጋጻራ ጋርታ̇ ሶ̈ሊዴ።

³⁵ዎርዣ̈ዳር ዪኖ̇ ኦ̈ንቲ̇ኖ ባዚን ቤቃ̇ንዳቦ ፌ ዎ ቤሳ̇ፖ̇ ዎይ ኬስካ̇ሪ ዬሱ̈ሳክ ዬይዴ። ኢ̈ታ ኣያ̇ና ኢ ጋልዳ̇ፖ ኬስኪ̇ኖ ና̈ሳ̈ዲ ፋጻሪ ኣፊላ ማኢ ኢ ቡ̈ዲን ኢ ጋልዳ̇ ዬይን ዬሱ̈ሳ ላፍ ዶኢንዶ̈ን ቤቃ̇ሪ ኢ̈ጪ̇ዴ።

³⁶ኢ̈ታ ኣያ̇ናባር ኤ̈ንቲ̇ኖ ና̈ሳ ፋጻምባ̇ር ቤቂ̇ኖ ኣሳን ኢ ዎዛር ፋጺኖኮ ዎርዣ̈ብ ሶ̈ሊዴ።

³⁷ጌርሴኖ̈ና ጋዳ̇ ዎ ኣሳን ዎይ ዎይሊን ኢ̈ጪ̇ኖኮታ̇ቦ ዬሱ̈ሲ ኢናፖ̇ ኬስኪ̇ ሉካ̇ምፔ̈ን ኢያ ጌሺዴ። ኢያሬ ጎጚን ጋርታ̇ ጌላሪ ማ̈ቂ̇ ሉኪ̇ዴ።

³⁸ኢ̈ታ ኣያ̇ና ኢ ጋልዳፖ ኬስኪ̇ን ፋጺኖ ና̈ሳ̈ዲ ዬሱ̈ሳ “ቴ ኔባር ሉካ̇ስቶ” ጋ̈ር ጌሺን ኢ ኢ̈ኮ፥

³⁹“ኔ ኔ ኣ̈ል ማ̈ቃ̇ ሉካ̇ራ ጾ̈ሲ̇ ኔ̈ብ ዎቲኖ ጴች ባዛን ዎይ ሶ̈ላቤ” ጋ̈ር ሚሺዴ። ና̈ሳ̈ዳር ዬሱ̈ሲ ኢ̈ብ ዎቲኖ ባዚን ካታማ ዎይ ጋርታ̇ ሶ̈ሊሙታ̇ዶር ሉኪ̇ዴ።

⁴⁰ዎርዣ ዎይ ዬሱ̈ሲ ኢንታ̇ክ ዬንቲ̇ን ና̈ጊ ሙታ̇ ዎኮታ̇ቦ ኢ ማ̈ቃ̇ር ኢንታ̇ክ ዬይን ኡፋይስባር ኢያ ኤኪ̇ዴ።

⁴¹ዪና̇ ኢዝባራ ያ̈ሮ̈ሳ ጌይዛ ኣይሁዳን ዎ̈ሳ ኬ̈ቦ ኣላቃዶ̈ሪ ዬ̈ሪ ኢ ቶሂን ጋልዳ ኬዳ̇ሪ “ዋ̈ዴ ታ ኣ̈ል ዬ̇ሼ” ጋ̈ር ኢያ ጌሺዴ።

⁴²ዪና̇ ኢ ጌሺኖንዳ̇ ታጶ̇ ናምኢ ላይ ማ̈ቂ̇ኖ ፔቲ̇ ማጫ̇ ናኢ ኢ̈ብ ዎዶ̈ራ ኢዛ ኣይቃ̇ንዳብ ካሳ ና̈ጊኖኮታ̇ቦ። ኢ ኢና ሉካ̇ምባራ ዎይሊን ዎርዦ ኢ ዎሃ ዬ̇ዛ̈ዲ ሱጊ ዎይሊን ኢያ ዋ̈ይዴ።

⁴³ታጶ̇ ናምኢ ላይ ኩም ሱ̈ ጎጊንታ̇ሙታ̇ ዎ ፔቲ̇ ማጫ̇ዶ̈ራ ፌ̈ብ ዎ ባዛን ዎይ ጋ̈ላ̇ቦ ጋ̈ር ዉርሲ̇ንዶ̈ን፥ ኦ̈ናካር ኢዞ ፋንዳብ ዳንዳኣካ̇ዬ።

⁴⁴ኢዛ ጋስ ጎይ ኢ̈ክ ዬያ ኡካ̇ራ ኢ ኣፊሊን ሲ̈ንን ኤ̈̇ን ኢዝ ሱ̈ን ጎጋ̇ዚን ኤሊ̇ባር ኤቃ̇ዴ።

⁴⁵ዬሱ̈ሳር “ታ̈ና ኤ̈̇ ኦ̈ኖ?” ጋ̈ር ኦይጪ̇ን፥ ዎይን “ኑ ኔ̈ና ኤ̈ካ̇ዬ” ጌይን፥ ጴ̈ጥሮ̈ሲ ኢ̈ክ ጋ̈ሪ “ጎዶ! ዎርዣ ዓ̈ ዎይ ኔ ቡጊድባር ሺ̈ቃር ሱጊባር ኔ̈ና ዋ̈ዪ̈ር ባያ?” ጌይዴ።

⁴⁶ኢ ጋ̈ሪ “ፔቲ̇ ኣሲ ታ̈ና ኤ̈̇ኔ። ታ ጋልዳ̇ፖ ፋዝ ዎልቃ ኬስኪ̇ኖን ታ̈ብ ኤሪንቲ̇ኔ” ጌይዴ።

⁴⁷ኣሲንዳ̇ ፌ̈ና ኤሪሳካ̇ይ ሉካ̇ንዳ̇ብ ዳንዳኣካ̇ዮን ኤሪኖፖ̇ ዓኒ ኢ̈ጫ̇ር ጋንዳ̇ሙታ̇ዶ̈ራ ዬያ ኢ ቶሂን ጋል ኬዳ̇ራ ኢያ ኣባብ ኤ̈̇ኖኮ ማ ዎዛር ኤሊ̇ባር ፋጺኖኮ ዎርዣ ዎይ ቲ̈ን ሶ̈ላዴ።

⁴⁸ኢ ኢዝኮ ጋ̈ሪ “ቴ ናኢንዴ̇! ኔ ኣማ̇ኒን ኔ̈ና ፋኔ፤ ዪዚ ሳራ ሉካ̇ቤ” ጌይዴ።

⁴⁹ኢ ዪኖ̇ ቢርት ሶ̈ላምባራ ፔቲ̇ ኣሲ ያ̈ሮ̈ሳ ኣ̈ላፖ̇ ዬ̈ሪ “ኔ ናኢን ዓይቂ̇ኔ፤ ዪዚ ኣስታማ̈ራ ዳ̈ቡርሳፔ̇” ጌይዴ።

⁵⁰ዬሱ̈ሲ ዪኖ̇ ሲስካ̇ሪ ያ̈ሮ̈ሳኮ “ኣባካር ባዬ̇፥ ኣማ̇ናብዶኬ ኢ̈ጫፔ̇፤ ኔ ናኢን ፋጻ̈ሬ” ጌይዴ።

⁵¹ኢ ያ̈ሮ̈ሳ ኣ̈ል ጌሊ̈ርዶሪ ጴ̈ጥሮ̈ሳ፣ ዋ̈ኒ̇ሳ፣ ዓይቆ̈ባ ማ ናኢን ባ̈ባዲኬ ኢንዲንዲክ ዪንፖ ሜል ኣሲ ፌባር ጌላካ̇ይፌ̈ን ካዪዴ።

⁵²ዪና̇ ኢዝባራ ኣሲ ዎይ ናኢን ጊሽ ዬ̈ኪ̇ ዉይሲ̈ርዶ̈ን ዬሱ̈ሲ ኢንታኮ “ዬ̈ካፒ̇ቴ፤ ናኢን ሱርቂ̇ንዶኬ ዓይቃካ̇ዬ” ጌይዴ።

⁵³ኣሳን ኢዛ ዓይቂ̇ኖን ኤሪኖኮታ̇ቦ ኢ ጋልዳ̇ ሚ̈ጪ̇ዴ።

⁵⁴ኢያር ናኢን ኩሺን ኤ̈̇̈ሪ “ቴ ናኢንዴ! ዲንዳ̇ቤ” ጌይዴ።

⁵⁵ኢዛር ኢዝ ሼምፒ̇ን ማ̈ቂ̇ን ኤሊ̇ባር ዲንዳራ ኤቃ̇ዴ። ኢናፖ̇ ዬሱ̈ሲ “ናኢምቦ̇ ሙይዝ ባዝ ኢሚ̇ብቴ̇” ጋ̈ር ኢንታ̇ ኪ̈ቲ̇ዴ።

⁵⁶ናኢን ባ̈ባ̈ዲኬ ኢንዲንዲክ ጋራ̇ሚንቲዴ፤ ኢያር “ባዝ ዪኖ̇ ኦ̈ባካር ሶ̈ላፒ̇ቴ” ጋ̈ር ኢንታ ኪ̈ቲ̇ዴ።