Read basketo ዋ̈ኒ̇ሳ 15 Bible Online

ዋ̈ኒ̇ሳ 15 - basketo bible

ዋ̈ኒ̇ሳ 15

¹“ኪን ዎይና ሚዲ ታ̈ና፤ ኢዝ ጋርሲን ጎሽኪ̇ዛ̈ዲ ቴ ባ̈ባ̈ዳ፤

²ኢያሬ ቴ ጋልዳ̇ ዎ ኣፍ ካጺ̇ባ̈ሶ ሻቃን ዎይ ቃጻ̇ር ቶጚ̈ሬ፤ ኣ̈ፍ ካጺ̇ዝ ሻቃን ዎይ ኮሺንቺ̇ ኣ̈ፍ ካጻ̇ምፔ̈ን ሳሂ̈ሬ።

³ቴ ዪንታ̇ብ ሶ̈ሊኖ ቃ̈ሊንኮታ̇ቦ ዪንቲ ዓት ጌሼ̇።

⁴ዪንቲ̇ ታባር ፔታ̇ን ማ̈ቃ̇ር ዶኢብቴ̇፤ ታ̈ናር ዪንታ̇ባር ፔታ̇ን ማ̈ቃ̇ር ዶኣንዳ̇። ዎይና ሻቆ ፌ ኡቢ̇ን ጋልዳ̇ ዶኣካ̇ይ ኣቴ̇ጌይን ፌቆማ̇ብ ኣ̈ፍ ካጻ̇ንዳብ ዳንዳኣባሶንዲፌ̈ኒ ዪንታ̇ር ታባር ዶኣካ̇ይ ኣቴጌይን ኣ̈ፍ ካጻ̇ንዳብ ዳንዳኢባ̈ሴ።

⁵“ዎይኒምቦ̇ ኡባ̇̈ዲ ታ̈ና፤ ዪንታ̇ር ታ̈ብ ሻቃን። ዎይሊን ኣ̈ፍ ካጺ̇ዛዲ ታባር ዶኢዛዲኬ ታናር ኢባር ዎዳ፤ ቴ ባዪዶ̈ን ዪንቲ̇ ዪንታ̇ ዎልቃባር ኣባካር ዎታንዳ̇ብ ዳንዳኢባ̈ሴ።

⁶ታባር ዶኢባሶ̈ዲ ቃጺንታ̇ር ዛ̈ና ቶጚንታ̇ር ሜሊዝ ሻቃፌ̈ኔ፤ ዪንፌ̈ኖ ሻቃን ሺ̈ሻ̇ር ታማ̇ ጋርታ ቶጚንታ̇ር ኢና ሚጪ̈ሬ።

⁷ዪንቲ̇ ታባር ፔታ̇ን ማ̈ቃ̇ር ዶኤጌይንዶ̇ ቴ ቃሊንዳ̇ር ዪንታ̇ባር ዶኤጌይን፥ ዪንቲ̇ ኮዪኖ ባዝ ዎይ ጌሺብቴ ቴ ዪንታ̇ብ ኢማ̇ንዳ።

⁸ዪንቲ̇ ዎይሊን ኣፍ ካጼጌይን ዪኒ̇ባር ቴ ባ̈ባ ቦንቺ̇ንቲ̈ሬ፥ ዪንታ̇ር ታ̈ብ ታማ̈ሪ ማ̈ቂ̇ኖን ዪና̇ ኢዝባራ ቤይሲ̈ሬ።

⁹ቴ ባ̈ባ ታ̈ና ካኖንዲ̇ፌ̈ን ታ̈ናር ዪንታ̇ ካኔ፤ ዪዚ ዪንቲ̇ ቴ ካምባ̇ር ዶኢብቴ̇።

¹⁰ታ̈ኒ ቴ ባ̈ባ ኪ̈ቲን ና̈ጋራ ኢ ካንምባር ዶኣዚንዲፌ̈ን፥ ዪንታ̇ሬ ቴ ኪ̈ቲን ና̈ጌጌይን ዪንቲ̇ ቴ ካምባ̇ር ዶኢ̈ሬ።

¹¹ዪኖ̇ ቴ ዪንታ̇ብ ሶ̈ሊኖንዳ̇ ቴ ኡፋይሲንዳ ዪንታ̇ባራ ማቃምፔ̈ንኬ ማ ዪንታ̇ብ ኡፋይሲ ዎይላምፔ̈ኔ።

¹²ቴ ዪንታ̇ ኪ̈ታዝ ኪ̈ቲንዳ ዓኖ̇፥ ቴ ዪንታ̇ ካኖንዲፌ̈ኒ ዪንታ̇̇ሬ ዎል ዎልኣ ካብቴ̇።

¹³ኣሲ ፌ ሼምፒ̇ን ፌ ካዛንቦ ዓይቃብ ኣር ኢማ̇ዚምፖ̇ ሺዝ ሜላ ካን ኦ̈ባካር ባዬ።

¹⁴ዪንታ̇ሬ ቴ ዪንታ̇ ኪ̈ቲኖ ኪ̈ታን ና̈ጊ ፎቲዝ ባዝ ማ̈ቄጌይን ዪንታ̇ር ቴ ካን ኣሴ።

¹⁵ኣሽካሮ ኢ ላ̈ ኦዝ ባዚን ኤሪባ̈ሶኮታ̇ቦ ዓኒፖ̇ ጌዳ ቴ ዪንታ̇ ቴ ኣሽካራ ጋንዳባዬ̇። ቴ ታ ባ̈ባ̈ ጋልዳ̇ፖ̇ ሲስኪ̇ኖ ባዛን ዎይ ቴ ዪንታ̇ ቤይሲኖኮታ̇ቦ ቴ ዪንታ̇ ቴ ካን ኣሳን ጋ̈ዴ።

¹⁶ቴ ዪንታ̇ ማራ̇ጺንዶኬ ዪንቲ̇ ታ̈ና ማራ̇ጻካ̇ዬ፤ ዪንቲ̇ ሉ̈ካ̇ሪ ዎይሊን ኣ̈ፍ ካጻ̇ምፔ̈ን ማ ካጺ̇ኖ ኣ̈ፊንዳር ያካ̇ይ ዶኣምፔ̈ኒ ቴ ዪንታ̇ ኦ̈ሳ ጋ̈ልዳ ሹ̈ማዴ። ዪዚ ዪንቲ̇ ቴ ሱ̈ምባር ዎ̈ሲዝ ባዝ ዎይ ቴ ባ̈ባ̈ ዪንታ̇ብ ኢሚ̇̈ሬ።

¹⁷ቴ ዪንታ̇ ኪ̈ታ̇ዝ ኪቲ̇ን ዓኖ̇፥ ዪንቲ̇ ዎልዎልኣ ካብቴ̇” ጌይዴ።

¹⁸“ዓና̇ ኣላሚን ጋልዶ̇ ኣሳን ዪንታ̇ ኢጺ̇ዝ ባዝ ማ̈ቄ̇ጌዪን ዪንታ̇ፖ̇ ቲ̈ን ታ̈ና ኢጺ̇ኖን ኤሪብቴ̇።

¹⁹ዪንቲ̇ ዎን ኣላሚን ጋልዳ ዎ ኣሳን ማይጺ ዎኮ ኢንቲ̇ ፌባዝ ማ̈ቂ̇ኖን ካ̈ርዶን፥ ዎቲናካሬ ዪንቲ ዓና̇ ኣላሚን ኣስ ጊዳካ̇ዮኮታ̇ብኬ ታ̈ኒ ዪንታ̇ ኣላሚን ጋልዳ̇ ዎ ኣሳን ጋርታ̇ፖ̇ ቆራር ኤኪ̇ኖኮታ̇ቦ ኣላሚን ዪንታ̇ ኢጻ̇̈ሬ።

²⁰‘ኣይላ ፌ ላፖ̇ ሺባ̈ሴ’ ጋ̈ር ቴ ዪንታ̇ብ ሶ̈ሊኖን ቆ̈ፒ̇ብቴ፤ ታ̈ና ዳኪ̇ኖኮ ዪንታ̇ር ዳኪ̇̈ሬ። ቴ ቃ̈ሊምቦ̇ ኪ̈ቲንቲ̇ኖኮ ዪንታ̇ ቃ̈ሊንባሬ ኪ̈ቲንቲ̇̈ሬ።

²¹ታ̈ና ኪ̈ታር ሚሺኖ ኢንቲ̇ ኤሪባ̈ሶኮታ̇ቦ ቴ ጊሻቦ ዓ̈ ዎይ ዪንታ̇ ጋልዳ ኤሄይሬ።

²²ቴ ዬ̈ራ ኢንታ̇ብ ሶ̈ላካ̇ይኮ ዎን ኢንታ̇ብ ናጋራ ማ̈ቃ̇ባስዶ̈ን፥ ዓት ኢንቲ̇ ፌ ናጋሪምቦ ኦይጪንታ̇ምባ̇ራ ሶ̈ላር ማሂዝ ባዚ ኢንታ̇ብ ባዬ̇።

²³ታ̈ና ኢጺ̇ዛ̈ዲ ቴ ባ̈ባ̈ዳር ኢጺ̇̈ሬ።

²⁴ሜላ ኣሲ ኦ̈ካዮ ባዝ ቴ ኢንታ ጊዳ̇ ኦካ̇ይኮ ዎን ኢንታ̇ብ ናጋራ ማቃ̇ባስዶ̈ን፥ ዓት ዎቲናካሬ ዪኖ̇ ዎይ ታ̈ሚ̇ራ̈ቲን ቤቂኖፖ̇ ዓኒ ኢንቲ̇ ታ̈ናሬ ቴ ባ̈ባ̈ዳሬ ዎይ ኢጺ̇ዴ።

²⁵ዪና̇ ማ̈ቂኖንዳ̇ ኢንታ̇ ሂጋ̇ ማጻ̈ፊን ጋልዳ̇ ‘ጋሻ̇ ባዪ ታ̈ና ኢጺ̇ዴ’ ጋ̈ር ጻ̈ፊንቲ̇ኖን ፎቲንታ̇ምፔ̈ኔ።

²⁶ቴ ባ̈ባ ጋልዳፖ̇ ኬስኪ̇ዛ̈ዲክ ታ̈ናር ኢ ጋልዳፖ̇ ዪንታ̇ብ ሚሺዛ ሚ̈ንዛ ማ ጾ̈ሲ ኦ̈ናኮ ኣሳብ ኤሪሲዝ ኣያ̇ና ዬ̈ሪ ኢ ቴ ባዝ ዪንታ̇ብ ማርኪቲ̈ሬ።

²⁷ዪንታ̇ር ቲ̈ናፖ̇ ኤ̈̇ሪ ታባር ዎኮታ̇ቦ ታባዝ ማርኪ̇ቲ̈ሬ።