Read basketo ዋ̈ኒ̇ሳ 16 Bible Online

ዋ̈ኒ̇ሳ 16 - basketo bible

ዋ̈ኒ̇ሳ 16

¹“ታ̈ኒ ዓና ዎይ ዪንታ̇ብ ሶ̈ሊኖንዳ ዪንቲ̇ ዪንታ̇ ኣማ̇ኒን ጋልዳፖ̇ ጋስ ማ̈ቃካ̇ዮ̈ዲፌ̈ኒዬ።

²ኣሳን ኣይሁዳ ዎ̈ሳ ኬ̈ ጋርታ̇ፖ̇ ዪንታ̇ ዳኪ̇ ኬሲ̇̈ሬ። ማ ዪኒፖ̇ ኣ̈ር ዪንታ̇ ዎዝ ኣሲ ዎይ ፌ̈ና ጾ̈ሳ̇̇̈ቦ ኦ̈ዝ ኣስፌ̈ን ፋይዲንቲ̇ዝ ኬሊ̇ ዬይሬ።

³ዪኖ̇ ዎይ ኢንቲ̇ ዎታዚንዳ ኢንቲ̇ ቴ ባ̈ባ̈ዳር ማ̈ቂ̇ን ታ̈ና ኤራካ̇ዮኮታ̇ቦ።

⁴ቴ ዪንታ̇ብ ቲ̈ኒታር ዓኖ̇ ሶ̈ሊኖንዳ ዪና̇ ማ̈ቃ̇ዝ ኬሊ̇ን ዬሌ̇ጌይን ቴ ዪንታ̇ብ ሶ̈ሊኖን ዪንቲ̇ ኤልቅ ዎታምፔ̈ኔ። ቴ ዪኖ̇ ዎይ ቲ̈ኒታር ዪንታ̇ብ ሶ̈ላካ̇ዮንዳ̇ ቴ ዪንታ̇ባር ዎኮታ̇ቦ።”

⁵“ዪዚ ዓት ታ̈ኒ ታ̈ና ኪ̈ቲ̇ ሚሺኖ̈ኮ ሉካ̇̈ሬ፤ ማ̈ቂናካሬ ዪንታ̇ ጋርታ̇ፖ̇ ኦ̈ናካሬ ታ̈ና ‘ኔ ዎይ ሉካ̇̈ራ’ ጋ̈ር ኦይጪ̇ዝ ኣሲ ባዬ።

⁶ዓት ዪኖ̇ ቴ ዪንታ̇ብ ሶ̈ሊኖኮታ̇ቦ ዪንታ̇ ቡ̈ዳ ጋርታ̇ ዪንቲ̇ ዎይሊን ሙዲዲኔ።

⁷ዎቲናካር ቴ ዪንታ̇ብ ኪን ጋ̈ሬ፥ ቴ ሉካ̇ዚንዳ̇ ዪንታ̇ብ ኮሼ̇። ቴ ሉካ̇ካይ ኣቴጌይን ዪንታ̇ ሚንዛ ዪንታ̇ክ ዬ̈ባሴ፤ ቴ ሉኬ̇ጌይን ኢያ ዪንታ̇ብ ሚሻንዳ̇።

⁸ኢ ዬ̈ሪ ኣላሚን ጋልዳ ዎ ኣሳን ናጋራ ጎይ፥ ጺሊ̇ቲ ጎይኬ ጾ̈ሳ̇̇ ፊርዲን ጎይ ኢንታ̇ብ ዎ ኢ̈ቲኖ ቆፊን ፋላ̇ ጋልዳ ኬሳ̇ር ኢንታ̇ ቤይሲ̈ሬ።

⁹ኢ ናጋራ ጎይ ሶ̈ላዚንዳ̇፥ ኢንቲ̇ ታ̈ና ኣማ̇ኒባሶኮታ̇ቦ፥

¹⁰ጺሊ̇ቲ ጎይ ሶ̈ላዚንዳ̇፥ ታ̈ኒ ቴ ባ̈ባ̈ኮ ሉካ̇ዚምቤኬ ዓኒፖ̇ ጌዳ ዪንቲ̇ ታ̈ና ቤቂ̇ባ̈ሶንኮታ̇ቦ።

¹¹ፊርዳ̇ ጎይ ሶ̈ላዚንዳ፥ ዓና ኣላሚን ላ̈[8] ጋልዳ ጾ̈ሲ̇ ፊርዲ̇ኖኮታ̇ቦ።

¹²“ቢርት ቴ ዪንታ̇ብ ዎይሊን ሶ̈ሊዝ ባዚ ዎ፤ ቴ ዓት ዪንታ̇ብ ሶ̈ሌጌዪን ዪንቲ̇ ቦቲጛካ̇ይ ዎይ ዪንታ̇ ቡ̈ዳ ጋርታ̇ ጋዳ̇ንዳብ ዪንታ̇ ዴ̈ጻ̇̈ሬ።

¹³ዎቲናካሬ ጾ̈ሳ̇̇ ኪንባር ኢ ኦ̈ናኮ ኢ̈ኮን ኤሪሲዝ ኣያ̇ና ዬ̈ዬጌዪንዶ ኢ ኪን ጎይ ዎይ ዪንታ̇ ቲ̈ኒሬ። ኢ ሶ̈ላዚንዳ ፌ ሲስኪ̇ኖ ባዚንዶዶኬ ፌ ጋልዳፖ̇ ኬሲ̇ ሶ̈ሊባሴ፤ ኢ ቢርት ቲ̈ን ዬይዝ ባዝ ዪንታ̇ብ ሶ̈ሊ̈ሬ።

¹⁴ታ̈ፖ̇ ኤካ̇ሪ ዪንታ̇ብ ሶ̈ሊዛኮታ̇ቦ ታ̈ና ቦንቺ̇̈ሬ።

¹⁵ቴ ባ̈ባ ባዝ ማ̈ቂኖን ዎይ ቴ ባዜ፤ ዪዚ ዪኒ̇ኮታ̇ቦ ታ̈ኒ ‘ኢ ታ̈ፖ̇ ኤካ̇ር ዪንታ̇ብ ሶ̈ሊሬ’ ጋ̈ር ቴ ዪንታ̇ብ ሶ̈ሊኖንዳ̇።

¹⁶“ጊላ̇ ቃማ̇ፖ̇ ዎሃ ዪንቲ ታ̈ና ቤቂባ̈ሴ፤ ማ ጊላ̇ ቃማ̇ፖ̇ ዎሃ ታ̈ና ቤቂ̇̈ሬ” ጌይዴ።

¹⁷ኢ ታማ̈ራን ጋርታፖ̇ ፔታ̇ን ፔታ̇ናን ዎልዎልኣ “ ‘ጊላ̇ ቃማ̇ፖ̇ ዎሃ ዪንቲ̇ ታ̈ና ቤቂ̇ባ̈ሴ፤ ማ ጊላ̇ ቃማ̇ፖ̇ ዎሃ ታና ቤቂ̈̇ሬ’፥ ማ ‘ቴ ቴ ባ̈ባ̈ኮ ሉካ̇̈ሬ’ ዪና̇ ኢ ጋ̈ዚን ኣብዛ?” ጌይዴ።

¹⁸“ዪዚ ዪና̇ ‘ጊላ̇ ቃማ̇ፖ̇ ዎሃ’ ጌይኖ ባዚን ኣብዛ? ኢ ሶ̈ላዝ ባዚንዳር ኑ̈ብ ጌላባሴ” ጋ̈ሪ ማሂ ማሂ ዎልዎልኣ ኦይጪ̇ዴ።

¹⁹ዬሱ̈ሳሬ ኢንቲ̇ ኢያ ኦይጫ̇ንዳብ ኮዪኖን ኤራሪ ኢንታ̇ኮ “ዪንቲ̇ ዎልዎልኣ ኦይጫ̇ዚንዳ̇ ቴ ዪንታ̇ኮ ‘ጊላ̇ ቃማ̇ፖ̇ ዎሃ ዪንቲ̇ ታ̈ና ቤቂዝዳ፤ ማ ጊላ̇ ቃማ̇ፖ̇ ዎሃ ታ̈ና ቤቂ̇ባ̈ሴ’ ጌይኖንኮቲ̇ያ?

²⁰ቴ ዪንታ̇ብ ኪን ሶ̈ላ̈ሬ፥ ኣላሚን ጋልዳ ዎ ኣሳን ኡፋይታ̇ምባራ ዪንቲ̇ ዬ̈ኪ̈ሬ ማ ሙዲዲ̈ሬ፤ ዪንቲ̇ ሙዲዲ̈ርዶ̈ን ዪንታ̇ ሙዲዲንዳ̇ ኡፋይስ ላ̈ሚንታ̇̈ሬ።

²¹ማጮ̇ ዎዳ ኣታ̇ራ ዬላ ቃሚ̇ ኡኬ̇ጌይንዶ̇ ‘ቴ ዎዛ̈ርታ̇ርዶኔ’ ጋ̈ራ ቲ̈ራ̈ሬ፤ ዬሊኖፖ̇ ዓኒ ናኢ ኣላሚን ዓኒ ጋልዳ ዬሊንቲ̇ኖኮታ̇ቦ ኡፋይታ̇ራ ኢዛ ቲ̈ን ጫና̇ቂንቲ̇ኖን ዎይ ቦቲጛ̈ሬ።

²²ዪንታ̇ሬ ዪና̇ ኢዝፌ̈ን ዓት ሙዲዲ̈ርዶ̈ን ማ̈ቃ̇ር ቴ ዪንታ̇ ቤቂ̇ዛኮታ̇ቦ ዪንቲ̇ ኡፋይቲ̇̈ሬ፥ ዪንታ̇ ኡፋይሲ̇ንዳሬ ዪንታ̇ ጋልዳፖ̇ ኦ̈ናካር ኤኪ̇ዝ ኣሲ ባዬ̇።

²³ዪና̇ ኢዝ ቃሚ̇ንባራ ዪንቲ̇ ቴ ጋልዳ̇ፖ̇ ኣባካር ጌሺባ̈ሴ። ቴ ዪንታ̇ክ ኪን ጋ̈ሬ፥ ቴ ባ̈ባ̈ዲ ዪንቲ̇ ቴ ሱ̈ምባር ጌሻዝ ባዚን ዎይ ዪንታ̇ብ ኢሚ̇̈ሬ።

²⁴ዪንቲ̇ ዓኖ̇ ዬላ̇ር ቴ ሱምባራ ኣባካር ጌሻካ̇ዬ። ጌሺብቴ̇ ዪንቲ̇ ኤኪ̇̈ሬ፤ ዪንታ̇ ኡፋይሲንዳ̇ሬ ፎቲ ማ̈ቃ̈ሬ።

²⁵“ዓኖ̇ ዬሊ̇ዝ ዲራ̈ስ ቴ ዪንታ̇ብ ሚሳ̇̈ሊባር ሶ̈ላዴ። ዓኒ̇ፖ̇ ጌዳ ታ̈ኒ ሚሳ̇̈ሊባር ሶ̈ላባሶ ኬሊ̇ ዬይሬ፤ ቴ ባ̈ባ̈ ባዝ ፋል̇ ዪንታ̇ብ ሶ̈ላ̈ሬ።

²⁶ዪና̇ ኢዝ ቃሚ̇ንባራ ዪንቲ ቴ ሱምባር ጌሺ̈ሬ፤ ታ̈ኒ ዪንታ̇ ጊሻቦ ቴ ባ̈ባ̈ ጌሻንዳ̇ ጋ̈ባሴ።

²⁷ኣባ ጌይን ቴ ባ̈ባ̈ ፌ ቆማ̇ብ ዪንታ̇ ካ̈ሬ። ኢ ዪንታ̇ ካዚንዳ̇ሬ ዪንቲ̇ ታ̈ና ካዚንኮታ̇ብኬ ቴ ጾ̈ሳ̇̇ ቲ̈ናፖ̇ ዬይኖን ዪንቲ ኣማ̇ኒኖኮታ̇ቦ።

²⁸ታ̈ኒ ቴ ባ̈ባ̈ ቲ̈ናፖ̇ ዓና̇ ኣላሚን ጋልዳ̇ ዬይኔ። ዓት ዓና̇ ኣላሚን ኣሻ̇ራ ማ̈ቃ̇ ቴ ባ̈ባ̈ኮ ሉካ̇̈ሬ” ጌይዴ።

²⁹ኢናፖ̇ ኢ ታማ̈ራ̈ን ኢ̈ኮ “ኔ ዓት ሚሳሊባር ጊዳካ̇ይዶ̈ን ፋል̇ ሶ̈ላዴ።

³⁰ዓት ኔ ዎይ ባዝ ኤራዚንዲ̇ኬ ኦ̈ናካር ኣባክ ኔ̈ና ኦይጫ̇ንዳብ ኮሺ̇ባ̈ሶን ኑ ኤሪኔ፤ ዪኒ̇ባራ ኔ̈ኒ ጾ̈ሳ̇̇ ቲ̈ናፖ̇ ዬይኖን ኑ ኣማ̇ኒ̈ሬ” ጌይዴ።

³¹ዬሱ̈ሲ ኢንታ̇ኮ “ዓት ዪንቲ̇ ኣማ̇ኒኔ!

³²ማ̈ቂ̇ናካሬ ዪንቲ̇ ላ̈ሊ̇ንታ̇ር ዎይ ዪንታ̇ ኣ̈ል ዪንታ̇ ኣ̈ል ሉካ̇ር ታ̈ና ሙታ̇ ኣሺ̇ዝ ኬሊ̇ ዬይሬ፤ ኬል̇ ኢዛር ዓት ዓኖ̇። ዎቲናካር ቴ ቴ ቆማ̇ብ ኣታ̇ባሴ፤ ታ ባ̈ባ̈ ታባር ዎ።

³³ዪኖ̇ ቴ ዪንታ̇ብ ሶ̈ሊኖንዳ̇ ዪንቲ̇ ታባር ዶኤጌይን ሳሪቲ ዪንታ̇ብ ዶኣምፔ̈ኔ። ዪንቲ̇ ኣላሚን ጋልዳ ዎምባራ ሜታ ዪንታ̇ብ ዎ፤ ዎቲናካሬ ዓይዞ ኢ̈ጫ̇ፒ̇ቴ! ታ̈ኒ ኣላሚን ጋሚኔ” ጌይዴ።