Read basketo ዋ̈ኒ̇ሳ 2 Bible Online

ዋ̈ኒ̇ሳ 2 - basketo bible

ዋ̈ኒ̇ሳ 2

¹ዓይዚ̇ ቃም̇፥ ጋሊላ ጋዳ̇ ዎ ቃ̈ና ጋ̈ዝ ካታሚን ጋርታ̇ ኢሲ̇ ዎዶ̈ን፥ ዬሱ̈ሳ ኢንዳ̇ሬ ኢና ኢሲ̇ን ጋርታ̇ ዎ።

²ዬሱ̈ሳኬ ኢ ታማ̈ራንኬ ኢሲ̇ን ጋርታ̇ ዬ̈ምፔ̈ን ጼይጊንቲ̇ኔ።

³ኢሳ̇ቦ ጋ̈ር ማስኪ̇ኖ ዎይና ጂ̇ን ዉሪንዶ̈ን፥ ዬሱ̈ሳ ኢንዳ̇ ዬሱ̈ሳኮ “ኢንታ̇ ዎይና ጂ̇ን ዉሪኒሽዋ!” ጋ̈ዴ።

⁴ኢያር ኢዝኮ “ቴ ኢንዲንዴ! ዪ̈ዲፌ̈ኖ ባዝ ጋርታ̇ ኔ ታ̈ና ኣባብ ጌልሳ̈ራ? ቴ ኬሊ̇ን ቢርት ዬላ̇ካ̇ዬ” ጌይዴ።

⁵ኢ ኢንዳ̇ር ኢና ዎ ኣሽካራንኮ “ኢ ዪንታ̇ክ ጋ̈ዚን ዎይ ኦ̈ብቴ̇” ጋ̈ዴ።

⁶ኣይሁዳን ዋ̈ባር ፌ̈ና ቃሺ ጌ̈ሺ̇ዝ ዎጋ ኢንታ̇ብ ዎኮታ̇ቦ ዪኒ̇ቦ ሹችባር ኦ̈ንቲ̇ኖ ሌሂ ኮል ኢና ዎ፤ ፔቲ̇ ኮልን ፌ ቆማ̇ብ ናምኢ ዎይ ዓይዚ̇ ኦት ዋ̈ ኤ̈̇̈ሬ።

⁷ዬሱ̈ሲ ኣሽካራንኮ “ኮልን ዋ̈ ኩምብቴ” ጌይን ኢንታ̇ር ኮልን ዋ̈ ኩምዴ።

⁸ኢናፖ̇ ዬሱ̈ሲ ኣሽካራንኮ “ዪዚ ዱ̈ቃ̇ሪ ኢሲ̇ን ባ̈ባ̈ቦ ኢሚ̇ብቴ̇” ጌይን ኢንታ̇ር ኤ̈ጚ ኢ̈ብ ኢሚ̇ዴ።

⁹ኢሲ̇ን ባ̈ባ̈ዳር ዎይና ጃ̇ ላ̈ሚንቲ̇ኖ ዋ̈ን ቁ̈ቂ̇ ቤቂ̇ዴ፥ ዎቲናካሬ ኢዛ ዎይዲፖ ዬይኖኮ ኤራካ̇ዬ። ዋ̈ን ዱ̈ቂ̇ኖ ኣሽካራን ሙታ̇ ኤሪ̈ሬ። ኢናፖ ኢ ኢሳ̇ ጼይጋሪ፥

¹⁰“ኣሲ ዎይ ቲ̈ን ኣሳብ ኮሽ ቃ̈ጺኖ ዎይና ጃ̇ ኢሚ̇̈ሬ፥ ኣሲ ኡሽኪ̇ ማሲቲኖፖ̇ ዓኒ ቃ̈ጺባ̈ስፌ̈ኖ ኢሚ̇̈ርዶ̈ን፥ ኔ̈ኒ ኮሽ ቃ̈ ዓኖ̇ ዬል ጋዳ̇ ዎባያ!” ጌይዴ።

¹¹ዬሱ̈ሲ ኦ̈ኖ ታ̈ሚ̇ራ̈ታን ጋርታ̇ፖ̇ ቲ̈ን ኦ̈ንቲ̇ኖንዳ̇ ኣና̇ ኢዞዶ̈ን፥ ኢ ዪኖ̇ ኦ̈ኖንዳ ጋሊላ ጋዳ̇ ቃ̈ና ጌይዝ ካታማ ጋርታ̇። ዪና̇ባር ኢ ፌ ቦንቺ̇ን ቤይሲዴ። ኢ ታማ̈ራንር ኢያ ኣማ̇ኒዴ።

¹²ዪኒ̇ፖ ዓኒ ዬሱ̈ሲ ፌ ኢንዲ̇ባራ ፌ ኢና̇ኣንባርኬ ፌ ታማ̈ራንባራ ዎልማ̈ቃ̇ሪ ቶ̈ራ ቂፊርና̈ሆ̈ም ሶ̈ባር ኢና ጊላ̇ ቃም ጋምኢዴ።

¹³ኣይሁዳንቦ ፋ̈ሲጋ ባ̈ሊን ቦንቺ̇ዝ ቃሚ̇ ኡኪ̇ንዶ̈ን ዬሱ̈ሲ ፉዳ ዬሩሳ̈ላም ኬስኪ̇ዴ።

¹⁴ጾ̈ሳ̇̇ ኬ̈ ጊቢ̇ን ጋርታ̇ሬ ጌ̈ን፣ ዶሪኬ፣ ዶላ ዎ̈ጚዝ ኣሳን ማ ሚ̈ሺ̇ ላሚ̇ዝ ኣሳንሬ ዶኣር ሚ̈ሺ̇ ላ̈ሚ̇ርዶ̈ን ኢንታ̇ ዲጚዴ።

¹⁵ጋ̈ዲ ኤካ̇ር ዢራ̈ፋ ሱካ̇ሪ ዶራንኬ ሜሃን ዎይ ጾ̈ሳ̇̇ ኬ̈ ጊቢ̇ን ጋርታ̇ፖ̇ ዳኪ̇ዴ። ሚ̈ሺ̇ ላ̈ሚ̇ዝ ኣሳን ኢንታ̇ ሚ̈ሺ̇ንዳር ላ̈ሊ̇ዴ። ኢንታ̇ ጻርጴ̈ዛ̈ር ዎይ ሱጊ ቶጚዴ።

¹⁶ዶላ ዎጚዝ ኣሳንካሬ “ዶላን ዓንር ዓንዳፖ̇ ኬሲ̇ብቴ̇። ቴ ባ̈ባ̈ ኣ̈ሊን ዛላ ዛልኢዝ ኣ̈ል ማሃፒ̇ቴ!” ጌይዴ።

¹⁷ኢ ታማራ̈ን ዪኒ̇ባራ ጾ̈ሳ̇̇ ቃ̈ላ ጋልዳ̇ “ታ̈ብ ኔ ኣ̈ሊምቦ ዎ ካንንዳ̇ ታማፌ̈ን ታ̈ና ሚቻ̇̈ሬ” ጋ̈ር ጻ̈ፊኖን ኢንታ̇ክ ኤልቅ ጋ̈ዴ።

¹⁸ኣይሁዳንር ኢ̈ኮ “ኔ̈ኒ ዪኖ̇ ዎታንዳ̇ቦ ሲልጣ̈ና ኔ̈ብ ዎን ኤርሳንዳቦ ኣብዝ ታ̈ሚራ̈ታ ባዝ ኦ̈ ኑ̈ና ቤይሳንዳ?” ጌይዴ።

¹⁹ዬሱ̈ሳር ኢንታ̇ኮ “ዓና̇ ጾ̈ሳ̇̇ ኬ̈ን ዪርዲሲብቴ̇፥ ታ̈ኒ ዓይዚ̇ ቃምባራ ኢዞ ማሃ ኬ̈ጻ̇ንዳ̇” ጌይዴ።

²⁰ኣይሁዳንር ኢ̈ኮ “ዓና̇ ጾ̈ሳ̇̇ ኬ̈ን ኬ̈ጺ̇ ዉርሳንዳ̇ቦ ኦይዲ̇ ታጳ̇ ሌሂ ላይ ዉርሲ̇ኔ። ኔ ዓት ካኣ ኪን ኢዞ ዓይዚ̇ ቃምባራ ማሃ ኬ̈ጻ̇ራ?” ጌይዴ።

²¹ዎቲናካር ዬሱ̈ሲ “ጾ̈ሳ̇̇ ኬ̈” ጌይኖንዳ ፌ̈ ጋሊ̇ንዶዶኬ ሜላባዝ ጊዳካ̇ዬ።

²²ዪ̈ኮታ̇ቦ፥ ዬሱ̈ሲ ዓይቃ ጋርታ̇ፖ̇ ዲንዲ̇ኖፖ̇ ዎሃ ኢ ታማ̈ራን ኢ ዓና̇ ሶ̈ሊኖን ኤልቅ ዎቲዴ። ማ ጌ̈ሻ̇ ማጻ̈ፋ ጋልዳ̇ ጻ̈ፊንቲ̇ኖንዲኬ ዬሱ̈ሲ ሶ̈ሊኖ ቃ̈ሊን ኣማ̇ኒዴ።

²³ዬሱ̈ሲ ፋ̈ሲጋ ባ̈ልባራ ዬሩሳ̈ላም ዎዶሪ፥ ኢ ዎቲኖ ታ̈ሚ̇ራ̈ቲ̇ን ቤቃ̇ሪ ዎይሊን ኣሲ ኢያ ኣማ̇ኒዴ።

²⁴ዎቲናካሬ ኢ ኣስ ጌይዛ ዎይ ኤሪዛኮታ̇ቦ ኢ ኢንታ̇ ኣማ̇ኒባ̈ሴ።

²⁵ኢ ኣሳ ቡ̈ዳ ጋርታ ዎ ባዝ ኤሪዛኮታ̇ቦ ኦ̈ናካር ኣሳ ባዝ ኢ̈ብ ሶ̈ላንዳ̇ብ ኮሺ̇ባ̈ሴ።