Read basketo ዋ̈ኒ̇ሳ 20 Bible Online

ዋ̈ኒ̇ሳ 20 - basketo bible

ዋ̈ኒ̇ሳ 20

¹ዎጊ̇ ጋላስ ጌ̈ሽ ቢርት ጋማ ዳርኣዚምባ̇ራ ማ̈ራማ ማግዳሎ̈ንዳ ዬሱ̈ሳ ዱ̈ፊንኮ̇ ሉካ̇ዴ። ኢዛ ኢና ዬላ̇ምባራ ዱ̈ፊን ካሪን ጋልዳ ዎ ሹቺ̇ን ፊራር ፋኪ̇ንዶ̈ን ቤቃ̇ዴ።

²ኢዛር ሲሞ̈ን ጴ̈ጥሮ̈ሳኬ ዬሱ̈ሳ ካዝ ኢ ታማ̈ራ ሜላ̈ኮ ዎባር ሉካ̇ራ ኢንታኮ “ጎዳ ዱ̈ፊን ጋርታ̇ፖ̇ ኬሲ̇ ኤኪ̇ኔ፤ ኢንቲ̇ ኢያ ዎይዲ ጋዲ̇ኖኮ ኑ ኤሪባ̈ሴ” ጋ̈ዴ።

³ኢናፖ̇ ጴ̈ጥሮ̈ሳኬ ኢ ታማ̈ራ ሜላ̈ዲኬ ዎልኣ ኬስካ̇ሪ ዱ̈ፊንኮ̇ ሉኪ̇ዴ።

⁴ናምኣን ዎልኣ ዎጺ̈ርዶሪ ሜላ ኢ ታማራ̈ዲ ጴ̈ጥሮ̈ሳፖ̇ ቲ̈ኒታር ዱ̈ፊንኮ̇ ዬ̈ሊ̇ዴ።

⁵ኢ ዪርክ ጋ̈ሪ ቤቃ̇ምባራ ኢያ ጻቂኖ ኣፊሊን ኢና ዎን ቤቂ̇ዴ፤ ዎቲናካር ዱ̈ፊን ጋርታ̇ ጌላካ̇ዬ።

⁶ኢ ዎሂን ዬንት ጋልዳ ዎ ሲሞ̈ን ጴ̈ጥሮ̈ሲ ዬላ̇ሪ ዱ̈ፊን ጋርታ ጌሊዴ፤ ኢያር ዱ̈ፋ ኣፊሊን ኢዞ ቤቂ̇ዴ።

⁷ማ ዬሱ̈ሳ ቆሚ̇ን ጋልዳ ጻ̈ጺንቲ̇ኖ ኣፊሊንዳ ኢያ ጻቂኖ ኣፊሊንባር ዎልኣ ጊዳካ̇ይዶ̈ን ፌ̈ብ ዱማ ቁርቂ̇ንታ̇ር ዎን ቤቂ̇ዴ።

⁸ዪኒ̇ፖ ዎሃ ቲ̈ኒታር ጎሪንኮ̇ ዬሊ̇ኖ ዬሱ̈ስ ታማ̈ራ̈ዲ ጎሪን ጋርታ̇ ጌላር ቤቃ̇ሪ ኪን ጋ̈ሪ ኣማ̇ኒ̇ዴ።

⁹ኢ ዓይቃ ጋርታ̇ፖ̇ ዲንዳንዳብ ኮሻ̇ዚን ጌ̈ሻ̇ ማጻ̈ፋ ጋልዳ̇ ሶ̈ሊኖን ኢንታ̇ብ ጌላካ̇ዬ።

¹⁰ዪኒ̇ፖ ዎሃ ኢ ታማራን ማ̈ቃ̇ር ፌ ኣ̈ል ሉኪ̇ዴ።

¹¹ማ̈ራማ ዱ̈ፊን ላፍ ኤቃ̇ራ ዬ̈ካ̈̇ሬ፤ ኢዛ ዬ̈ካሙታ̇ዶ̈ራ ዱ̈ፊን ጋርሲን ቤቃ̇ንዳ̇ቦ ዪርክ ጋ̈ዴ።

¹²ዬሱ̈ሳ ኣሂን ዎ ቤሲ̇ን ጋልዳ̇ ቦ̈ርስ ኣፊላ ማኢኖ ናምኢ ኪ̈ታ̇ንቻ̇ን ፔታ̇ና ቆማቻ̇ ጎይ ፔታ̇ና ቶሃቻ̇ ጎይ ዶኢንዶ̈ን ቤቃ̇ዴ።

¹³ኢንታ̇ር ኢዝኮ̇ “ኣ̈ሽ! ኔ ኣባብ ዬ̈ካ̇̈ራ?” ጋ̈ሪ ኢዞ ኦይጪ̇ዴ። ኢዛር ኢንታ̇ኮ “ቴ ጎዳ ኦ̈ናክ ኤኪ̇ኔ፤ ኢያ ዎንዳ̇ ጋዲ̇ኖኮ ቴ ኤራባሴ” ጋ̈ዴ።

¹⁴ዪና̇ ጋ̈ራ ኢዛ ጋስ ቢሪንታ̇ምባ̇ራ ዬሱ̈ሲ ኢና ኤቃ̇ር ዎዶ̈ን ቤቃ̇ዴ። ዎቲናካር ኢ ዬሱ̈ሳ ማ̈ቂ̇ኖን ኢዛ ኤራካ̇ዬ።

¹⁵ኢያር ኢዝኮ̇ “ኣ̈ሽ! ኔ ኣባብ ዬ̈ካ̇̈ራ? ኔ ኦ̈ና ኮያ̈ራ?” ጌይዴ። ኢዛር ኢ ኣታኪልቲን ጋርታ̇ ኦ̈ዝ ኣስ ኢዝኮ̇ ማይጺን ኢ̈ኮ “ጎዳ̈ዶ! ኔ ኤኪ̇ኖኮ ዋ̈ዴ̇ ዎንዳ̇ ጋዲ̇ኖኮ ታ̈ብ ሶ̈ሊሼ፥ ቴ ሉካ̇ ኢያ ኤካ̇ንዳ̇” ጋ̈ዴ።

¹⁶ዬሱ̈ሳር ኢዝኮ “ማ̈ራሜ!” ጌዪ ኢዞ ጼይጊዴ። ኢዛር ኢ̈ኮ ጌዳ ማ̈ቃ̇ራ ኣይሁድ ኖ̈ናባራ “ሬቡ̈ኒ!” ጋ̈ዴ። ኢዝ ቢርሺቺ̇ንዳ “ኣስታማ̈ራ̈ዶ” ጌንቴ̇።

¹⁷ዬሱ̈ሳሬ ኢዝኮ̇ “ታ̈ና ኤ̈ፔ̇፥ ቴ ቴ ባ̈ባ̈ኮ ቢርት ማ̈ቃ̇ ሉካካ̇ዬ፤ ዓት ኔ̈ኒ ቴ ታማ̈ራንኮ ሉካ̇ራ ‘ታ̈ብኬ̇ ዪንታ̇ቦ ዎልኣ ባ̈ባ̈ኮ፥ ታ̈ብኬ ዪንታ̇ቦ ዎልኣ ጾ̈ሳ̇̇̈ኮ ሉካ̇̈ሬ ጌይኔ’ ጋ̈ራ ኢንታ̇ብ ሶ̈ላቤ” ጌይዴ።

¹⁸ማ̈ራማ ማግዳሎንዳ̇ ዬሱ̈ሳ ታማ̈ራ̈ንኮ ዬ̈ራ “ታ̈ኒ ጎዳ ቤቃ̇ሼ!” ጋ̈ዴ። ማ ኢ ኢዝቦ ሶ̈ሊኖን ኢንታ̇ብ ሶ̈ላዴ።

¹⁹ዪና̇ ኢዝ ቃሚ̇ን ዎጊ̇ ጋላስ ኦማ ዬሱ̈ሳ ታማ̈ራን ኣይሁዳንቦ ኢ̈ጫ̇ር ፌ ጋልዳ ካሪን ዪብጻር ዎልኣ ሺ̈ቃሪ ዎዶን፥ ዬሱ̈ሲ ዬ̈ሪ ኢንታ̇ ጊዳ̇ ኤቃ̇ር ኢንታኮ “ሳሪቲ ዪንታ̇ብ ማ̈ቆ̇” ጌይዴ።

²⁰ዪኖ̇ ጋ̈ሪ ፌ ኩሻንኬ ፌ ባሪንን ኢንታ̇ ቤይሲዴ፤ ኢ ታማ̈ራንሬ ጎዳ ቤቃ̇ሪ ዎይሊን ኡፋይቲ̇ዴ።

²¹ዬሱ̈ሲ ማ̈ቃ̇ሪ ኢንታ̇ኮ “ሳሪቲ ዪንታ̇ብ ማ̈ቆ̇! ቴ ባ̈ባ̈ዲ ታ̈ና ኪ̈ቲ̇ ሚሺኖንዲፌ̈ኒ ታ̈ናሬ ዪንታ̇ ኪ̈ታ̇ ሚሻ̈ሬ” ጌይዴ።

²²ዪኖ̇ ጌይኖፖ̇ ዎሃ ኢንታ̇ ጋልዳ̇ ኡፍ ጋ̈ር ፉጋ̇ሪ “ጌ̈ሻ̇ ኣያ̇ና ኤኪ̇ብቴ፤

²³ኣሳ ናጋራ ዪንቲ̇ ኢንታ̇ብ ኣቶ̇ ጌዬጌይን ኢንታ̇ብ ኣቶ̇ ጌዪንታ̇̈ሬ፤ ኢንታ̇ ናጋሪን ዪንቲ̇ ኢንታ̇ብ ኣቶ̇ ጋ̈ካ̇ይ ኣቴ̇ጌዪን ኢንታ̇ብ ኣቶ̇ ጌዪንታ̇ባሴ” ጌይዴ።

²⁴ዬሱ̈ሲ ፌ ታማ̈ራንኮ ዬ̈ዚምባ̇ራ ታጶ̇ ናምኣን ጋርታ̇ፖ̇ ፔታ̇ና ዲዲሞ̈ስ ጌይዛ ቶ̈ማ̈ሲ ባዬ̇።

²⁵ኢ ታማ̈ራን ዶካ̇ን ቶ̈ማ̈ሳኮ “ኑ̈ኒ ጎዳ ቤቃ̇ሼ!” ጌይዴ። ኢያር ኢንታ̇ኮ “ታ̈ኒ ሚስማ̈ራባር ኡሪንቲ̇ኖ ኢ ኩሺን ፉሊን ቤቃካ̇ይዶ̈ራ፥ ሚስማ̈ራን ጌሊኖ ፉሊምባር ቴ ጊልኢን ሚሻካ̇ይዶ̈ርኬ፥ ኢ ባሪንን ጫዲንቲ̇ኖን ካሪንባር ቴ ኩሺን ጌልሳ ቤቃካይዶ̈ራ ኪን ጌያ ኣማ̇ናባሴ” ጌይዴ።

²⁶ላማካይ ቃማ̇ፖ̇ ዎሃ ዓታ̇ር ኢ ታማራን ኬ̈ ጋርታ̇ ዎዶ̈ን ቶ̈ማ̈ሳሬ ኢንታ̇ባር ዎ። ካሪን ዪብጺንቲንዶ̈ን ዬሱ̈ሲ ዬ̈ሪ ኢንታ ጊዳ̇ ኤቃ̇ሪ “ሳሪቲ ዪንታ̇ብ ማቆ̇!” ጌይዴ።

²⁷ኢናፖ̇ ቶ̈ማ̈ሳኮ “ኔ ጊልኢን ዓይ ኤሄ̈ራ ቴ ኩሻን ቤቃ̇ቤ፤ ቴ ባሪንን ጫዲንቲ̇ኖ ካሪንባር ኔ ኩሽ ሚሻራ ቤቃ̇ቤ፤ ኣማ̇ናብዶኬ ኣማናካ̈ዮ ኣስ ማ̈ቃፔ” ጌይዴ።

²⁸ቶ̈ማ̈ሳሬ ኢ̈ኮ “ቴ ጎዳ̈ዶ! ቴ ጾ̈ሳ̇̇̈ዶ!” ጌይዴ።

²⁹ዬሱ̈ሳር ኢ̈ኮ “ኔ ታ̈ና ቤቂ̇ኖኮታ̇ብ ኣማ̇ኒኔ፤ ታ̈ና ቤቃካ̇ይ ኣማ̇ኒዛን ኢንቲ̇ ኣንጂንቲ̇ኖን” ጌይዴ።

³⁰ዬሱ̈ሲ ዓና̇ ማጻ̈ፊን ጋልዳ ጻ̈ፊንታ̇ካ̇ዮ ሜላ ዎይሊን ታ̈ሚ̇ራታ ፌ ታማ̈ራን ቲ̈ን ኦ̈ኔ።

³¹ዎቲናካሬ ዬሱ̈ሲ ኢ ክርስቶ̈ስ ጾ̈ሳ̇̇ ናኢ ማ̈ቂ̇ኖን ኣማ̇ናምፔ̈ን ማ ኣማ̇ናር ኢ ሱምባር ዪንታ̇ብ ሜናብ ሼምፓባር ዶኢ ዶኣምፔ̈ን ዓና̇ ዪንታ̇ብ ጻ̈ፊንቲ̇ኔ።