Read basketo ዋ̈ኒ̇ሳ 21 Bible Online

ዋ̈ኒ̇ሳ 21 - basketo bible

ዋ̈ኒ̇ሳ 21

¹ዪኒ̇ፖ ዎሃ ዬሱ̈ሲ ጢብራ̈ዶ̈ሳ[9] ባሃ̈ሪን ላፍ ዓታ̇ር ማ̈ቂ̇ ፌ ታማራንቦ ቤንቲ̇ዴ። ኢ ቤንቲ̇ኖንዳ̇ሬ ዪዜ፦

²ሲሞ̈ን ጴ̈ጥሮ̈ሲ፣ ዲዲሞ̈ሳ ጌይዛ ቶ̈ማ̈ሲ፣ ጋሊላ ቃ̈ናፖ̇ ዬይኖ ና̈ቲኔ̈ላ፣ ዛብዶ̈ሳ ናኣንኬ ሜላን ኢ ታማራን ጋርታፖ̇ ናምኣን ዎልኣ ፔታ̇ን ዎ።

³ሲሞ̈ን ጴ̈ጥሮ̈ሲ ኢንታ̇ኮ “ቴ ሞላ ኤ̈̇ንዳቦ ሉካ̇ንዳ” ጌይዴ። ኢንታ̇ር ኢ̈ኮ “ኑ̈ናር ኔባር ሉካ̇ንዳ” ጋ̈ሪ ዲንዳ̇ር ሉካ̇ር ጎጛ ጋርታ ጌሊዴ፤ ዪና̇ ኢዝ ጋላስ ቃ̈ም ኣባካር ሞላ ኤ̈ካ̇ይ ኣቲ̇ዴ።

⁴ሳ̈ዚ ዎንቲ̇ን ዬሱ̈ሲ ባሃ̈ሪን ቡጊድ ኤቂ̇ንዶ̈ን ኢ ታማ̈ራን ኢያ ማ̈ቂ̇ኖን ኤራካ̇ዬ።

⁵ኢያር ኢንታ̇ኮ “ናኣን! ሞላ ዪንታ̇ክ ዎ?” ጌይን ኢንታ̇ር ኢ̈ኮ “ኑ̈ክ ኣባካር ባዬ̇” ጌይዴ።

⁶ኢያር ኢንታ̇ኮ “ዪንቲ̇ ዪንታ̇ ማግላቢን ጎጚምፖ̇ ኡሻች ጎይ ባሃ̈ሪን ጋርታ̇ ሚሺብቴ̇፤ ዪንቲ̇ ዲጚ̈ሬ” ጌይዴ። ኢንታ̇ር ኢ ጌይኖንዲፌ̈ን ሚሺን ዎይሊን ሞላ ማግላቢን ጋርታ̇ ጌሊኖኮታ̇ቦ ዴ̈ጻር ኢንታ ጋቻ̇ር ኬሳ̇ንዳብ ጋማዴ።

⁷ዬሱ̈ሲ ኢያ ካዝ ኢ ታማ̈ራ ጴ̈ጥሮ̈ሳኮ “ዪ ጎዳ̈ዲሽዋ!” ጌይን ሲሞ̈ን ጴ̈ጥሮ̈ሳሬ “ጎዳ̈ዲሽዋ!” ጌዪኖን ሲስካ̇ሪ ዎዳ ኦሳ̇ቦ ጌይ ኬ̈ሲ ጋዲ̇ኖ ኣፊሊን ማሂ ማኣሪ ባሃ̈ሪን ጋርታ̇ ዶ̈ጛር ጌሊዴ።

⁸ሜላን ኢ ታማ̈ራ̈ን ባሃ̈ሪን ቡጊዲምፖ̇ ናምኢ ጼ̈ታ ዋ ማ̈ቃ̇ምፔ̈ኖ ቤስ̇ ሙታ̇ ጎታ̇ር ዎኮታ̇ቦ ሞላ ኩሚኖ ማግላባ ጎቺ̇ሙታ̇ዶ̈ር ጎጚምባር ዬይዴ።

⁹ኢንቲ̇ ባሃ̈ሪምፖ̇ ቡጊድ ኬስካ̇ሪ ሳ̈ዳ̇ ሶ̈ባምባ̇ራ ታማ ዬ̈ርጭ ጋልዳ ጋዲ̇ኖ ሞላ፥ ማ ሶ̈ላ̇ር ኢና ዎዶን ቤቂ̇ዴ።

¹⁰ዬሱ̈ሳር ኢንታ̇ኮ “ዪንቲ̇ ዓት ኤ̈̇ኖ ሞላን ጋርታ̇ፖ̇ ዓይ ኤኪ̇ ዬብቴ̇” ጌይዴ።

¹¹ሲሞ̈ን ጴ̈ጥሮ̈ሲ ጎጚን ጋርታ̇ ጌላሪ ማግላቢን ሳ̈ዳ ጎ̈ቺ̇ዴ፥ ማጋላቢን ጋርታ̇ ፔቲ̇ ጼ̈ታኬ ኢሺ̇ን ታጶ̇ ዓይዚ̇ ጴች ሞላ ጌሊንዶ̇̈ን፥ ዪ̈ፌ̈ን ዎይ ኤ̈̇ራ ማግላቢንዳ̇ ዳርኣካ̇ዬ።

¹²ዬሱ̈ሲ ኢንታ̇ኮ “ዓይ ዬ̈ሪ ዓና̇ ሙብቴ̇” ጌይዴ። ኢ ጎዳ̈ ማ̈ቂ̇ኖን ኢ ታማ̈ራን ኤሪኖኮታ̇ቦ ኢንታ̇ ጋርታ̇ፖ̇ “ኔ ኦኖ̇?” ጋ̈ሪ ኦ̈ናክ ኢያ ኦይጪ̇ኖ ኣሲ ባዬ።

¹³ዬሱ̈ሲ ዬ̈ሪ ሶ̈ሊ̇ንዲኬ ማ ሞሊንዲክ ኢንታብ ኢሚ̇ዴ።

¹⁴ዪዚ ኢ ዓይቃ ጋርታ̇ፖ̇ ዲንዲኖፖ̇ ዎሃ ዪና̇ባር ዓይዚ ቶህ ፌ ታማ̈ራ̈ንቦ ቤንቲ̇ኔ።

¹⁵ኢንቲ̇ ሙዪ ጊዲሲኖፖ̇ ዓኒ ዬሱ̈ሲ ሲሞ̈ን ጴ̈ጥሮ̈ሳኮ “ዋ̈ኒ̇ሳ ናኣ ሲሞ̈ኖ! ዓን ታ̈ና ካዚምፖ̇ ሺ ኔ ታ̈ና ካ̈ራ?” ጌይዴ። ኢያሬ “ኣ̈ ጎዳ̈ዶ! ቴ ኔ̈ና ካዚን ኔ ኤራ̈ሬ” ጌይዴ። ዬሱ̈ሳር ኢ̈ኮ “ቴ ዶሪ ናኣን ዬ̈ጛቤ” ጌይዴ።

¹⁶ዬሱ̈ሳሬ ናምኢ ኢ̈ኮ “ዋ̈ኒ̇ሳ ናኣ ሲሞ̈ኖ! ኔ ኪን ታ̈ና ካ̈ራ?” ጌይዴ። ኢያሬ “ኣ̈ ጎዳ̈ዶ! ቴ ኔ̈ና ካዚን ኔ ኤራ̈ሬ” ጌይዴ። ዬሱ̈ሲ ኢ̈ኮ “ቴ ዶራን ና̈ጋቤ” ጌይዴ።

¹⁷ዓይዚ̈ ቶህ ዬሱ̈ሲ ኢ̈ኮ “ዋ̈ኒ̇ሳ ናኣ ሲሞ̈ኖ! ኔ ታ̈ና ካራ?” ጌይዴ። ጴ̈ጥሮ̈ሳር ዓይዚ̇ ቶህ ዬሱ̈ሲ ኢ̈ኮ “ኔ ታ̈ና ካ̈ራ” ጋ̈ሪ ኦይጪ̇ኖኮታ̇ቦ ፌ ቡ̈ዲንባር ኣዛ̇ናሪ ኢ̈ኮ “ጎዳ̈ዶ! ኔ ዎይ ባዝ ኤራ̈ሬ፤ ቴ ኔ̈ና ካዚን ኔ ኤራ̈ሬ” ጌይዴ። ዬሱ̈ሳር ኢ̈ኮ “ቴ ዶራን ዬ̈ጛቤ” ጌይዴ።

¹⁸ዬሱ̈ሳሬ “ቴ ኔ̈ክ ኪን ጋ̈ሬ፤ ኔ ሚን ናኢቲዶ̈ራ ኔ ፌ̈ብ ኔ ኣፊሊን ማኣራ ኔ ኮዪኖ ቤስ̇ ሉካ̇̈ርዶ̈ን፥ ኔ ጪጚኖ ኬል̇ ኔ ኩሺን ሾክ ዎታር ዚምዶኢን ኣሲ ኔ̈ና ኔ ኣፊሊን ማኢሲ ኔ ሉካ̇ንዳ̇ብ ኮያካ̇ዮ ቤስ̇ ኔ̈ና ኤ̈ጚ̈ሬ” ጌይዴ።

¹⁹ዬሱ̈ሲ ዪኖ̇ ጌይኖንዳ̇ ጴ̈ጥሮ̈ሲ ዎዛርፌ̈ኖ ዓይቃ ዓይቃ̇ሪ ጾ̈ሳ̇̇ ቦንቺ̇ሲ̈ርኮ ኢያ ቤይሳንዳ̇ቦ። ኢናፖ̇ ኢ̈ኮ “ቴ ዎሂን ዬ̇ቤ” ጌይዴ።

²⁰ጴ̈ጥሮ̈ሲ ጋስ ቢሪንታ̇ምባ̇ራ ዬሱ̈ሲ ኢያ ካዝ ኢ ታማ̈ራ ኢ ዎሂን ዬ̇ዚን ቤቂ̇ዴ። ዪ ኢ ታማ̈ራ̈ዲ ዚቃንታ̇ ኢንቲ̇ ኢራ̈ታ ሞ̈ምባ̇ራ ዬሱ̈ሳክ ኡካ̇ሪ “ጎዳ̈ዶ! ኔ̈ና ኣ̈ ኢሚ̇ዛ ኦ̈ኖ?” ጌዪ ኦይጪ̇ኖ̈ዳ።

²¹ጴ̈ጥሮ̈ሳሬ ኢያ ቤቃ̇ሪ “ጎዳ̈ዶ! ዓ ኢያ ኣብዚ ዬላ̇ንዳዶ̈ኔ?” ጋ̈ሪ ኦይጪ̇ዴ።

²²ዬሱ̈ሳሬ ኢ̈ኮ “ቴ ማ̈ቃ̇ ዬይዝ ዲራ̈ስ ኢ ዓይቃካ̇ይ ዶኣምፔ̈ን ኮዪናካር ኔ̈ና ኣ ሜቴ? ኔ ኔ ቆ̈ሚ̇ን ቴ ዎሂን ዬ̇ቤ” ጌይዴ።

²³ዪኒ̇ኮታ̇ቦ “ዪ ኢ ታማ̈ራ̈ዲ ዓይቂ̇ባ̈ሴ” ጌይዝ ሶ̈ሎ ዬሱ̈ሳ ኣማ̇ኒኖ ኣሳን ጊዳ̇ ሶ̈ሊንቲ̇ዴ። ዎቲናካሬ ዬሱ̈ሲ “ሜላ ኣቲ̇ን ቴ ማ̈ቃ̇ ዬይዝ ዲራ̈ስ ኢ ዓይቃካ̇ይ ዶኣምፔ̈ን ኮዪን ኔ̈ና ኣ ሜቴ?” ጌይዶ̇ኬ ኢያ ዓይቂ̇ባ̈ሴ ጋ̈ካ̇ዬ።

²⁴ዓን ባዛን ማርኪ̇ቲኖ̈ዲኬ ዓና̇ ጻ̈ፊኖ ዪ ኢ ታማ̈ራ̈ዳ። ኢ ማርኪቲንዳ̇ሬ ኪን ማ̈ቂ̇ኖን ኑ ኤሪ̈ሬ።

²⁵ዬሱ̈ሲ ኦ̈ኖ ሜላር ዎይሊን ባዚ ዎ። ኢ ኦ̈ኖ ባዛን ዎይ ፔታ̇ን ኣታካ̇ይ ጻ̈ፊ̈ርኮ፥ ጻ̈ፊንቲ̇ኖ ማጻ̈ፋን ጋዳ̇ንዳብ ኣላሚን ዓና̇ ጋልዳ ቤሲ̇ ጊዲዛ ታ̈ክ ማይጺባ̈ሴ።