Read basketo ዋ̈ኒ̇ሳ 3 Bible Online

ዋ̈ኒ̇ሳ 3 - basketo bible

ዋ̈ኒ̇ሳ 3

¹ፋራሳ̈ዋን ጋርታ̇ፖ̇ ኣይሁዳንቦ ኣላቃ ማ̈ቂ̇ኖ ኒቆ̈ዲሞ̈ስ ጌይ ፔቲ̇ ኣሲ ዎ።

²ዪ ና̈ሳ̈ዲ ቃም ዬሱ̈ሳክ ዬ̈ሪ “ኣስታማ̈ራ̈ዶ! ኦ̈ናካር ማ̈ቂ̇ን ጾ̈ሲ̇ ኢባር ማ̈ቃካ̇ይ ኣቴ̇ጌይንዶ̇ ኔ ዓን ኦ̈ዝ ታ̈ሚ̇ራ̈ታን ኦ̈ንዳብ ዳንዳኢባ̈ሶኮታ̇ቦ ኔ̈ኒ ጾ̈ሳ̇̇̈ፖ̇ ዬይኖ ኣስታማ̈ሪ ማ̈ቂ̇ኖን ኑ ኤሪ̈ሬ” ጌይዴ።

³ዬሱ̈ሳር ኢ̈ኮ “ኦ̈ናካር ናምኢ ዬሊንታ̇ካ̇ይ ኣቴ̇ጌይንዶ̇ ጾ̈ሳ̇̇ ካ̈ቲቲን ቤቃ̇ንዳ̇ብ ዳንዳኢባ̈ሴ” ጌይዴ።

⁴ኒቆ̈ዲሞ̈ሳሬ ኢ̈ኮ “ኣሲ ጪጚኖፖ̇ ዓኒ ዎዛርታ̇ር ዬሊንታ̇ንዳብ ዳንዳኢ̈ራ? ማ̈ቃ̇ር ፌ ኢንዲ ጋርታ̇ ጌላር ናምኢን ዬሊንታ̇ንዳብ ዳንዳኢ̈ራ?” ጌይዴ።

⁵ዬሱ̈ሳር ኢ̈ኮ “ቴ ኔ̈ክ ኪን ጋ̈ሬ፥ ኦ̈ናካር ማ̈ቂ̇ን ዋ̈ፔኬ ጌ̈ሻ̇ ኣያ̇ናፖ̇ ዬሊንታ̇ካ̇ይ ኣቴ̇ጌይንዶ̇ ጾ̈ሳ̇̇ ካ̈ቲቲን ጋርታ̇ ጌላንዳ̇ብ ዳንዳኢባ̈ሴ።

⁶ኣሳ ጋልዳፖ ዬሊንቲ̇ኖ̈ዲ ኣሴ፥ ኣያ̇ና ጋልዳፖ̇ ዬሊንቲ̇ኖ̈ዲ ኣያ̇ና።

⁷ዪዚ ‘ናምኢ ዬሊንታ̇ንዳ ኮሺ̇̈ሬ’ ቴ ጌይኖምቦ ጋራ̇ሚንታ̇ፔ።

⁸ኣይጊ ፌ ኮዪኖ ጎይ ባቂ̇̈ሬ። ኔ ጊርሲ̇ን ሲስካ̇̈ርዶኬ ዎይዲፖ ዬይኖኮ ማ ዎይዲ ሉኪ̇̈ርኮ ኤራባሴ። ኣያ̇ና ጋልዳፖ ዬሊንቲ̇ኖ ኣሲ ዎይ ዪና̇ ኢዝ ፌ̈ኔ” ጌይዴ።

⁹ኒቆዲሞ̈ሳሬ “ዪ ዎዛርታ̇ር ማ̈ቃ̇ንዳ̇ብ ዳንዳኢ̈ራ?” ጋ̈ር ኦይጪ̇ዴ።

¹⁰ዬሱ̈ሳር ኢ̈ኮ “ኔ̈ኒ ኢስሬ̈ላንቦ ኣስታማ̈ሪዶ̈ራ ባዛን ዪን ኔ ኤራካ̇ይ ዎ?

¹¹ቴ ኔ̈ክ ኪን ጋ̈ሬ፥ ኑ ኤራዝ ባዚን ሶ̈ሊሬ፤ ኑ ቤቂ̇ኖን ማርኪ̇ቲ̈ሬ፤ ዎቲናካሬ ዪንቲ̇ ኑ ማርኪ̇ቲን ኪን ጌዪ ኤኪ̇ባ̈ሴ።

¹²ቴ ዪንታ̇ብ ሳ̈ዝ ጋልዶ ባዝ ሶ̈ሊን ኣማ̇ኒባሶን ኣፎ̈ ባዝ ሶ̈ሊን ዎዛ̈ርታ̇ር ዪንታ̇ብ ጌላ̈ራ?

¹³ኣፋፖ̇ ሶ̈ቢኖ ቴ ኣሳ ናኣ̈ፖ̇ ኣቲ̇ን ሜላ ፉዳ ኣፋ ሉኪ̇ኖ ኦ̈ናካር ባዬ̇።

¹⁴ሙ̈ሶ ባራሃ ጋርታ̇ ሾ̈ሽ ሶቲ̇ኖንዲፌ̈ኒ፥ ቴ ኣሳ ናኣ̈ዲ ዪና̇ ኢዝፌ̈ኒ ሶቲንታ̇ንዳብ ኮሻ̇̈ሬ።

¹⁵ዪና̇ሬ ታ̈ና ኣማ̇ኒዝ ኣሲ ዎይ ሜናብ ሼምፓባር ዶኢ ዴጛምፔ̈ኔ።

¹⁶“ጾ̈ሳ̇̇ ናኣ ኣማ̇ኒዝ ኣስ ዎይ ሜናብ ሼምፓባር ዶኢ ዲጛምፔ̈ንዶኬ ያካ̇ይፌ̈ኒ፥ ጾ̈ሲ̇ ኣላሚን ዓና̇ ጋርታ̇ ዎ ኣሳን ዎይሊን ካኖኮታ̇ቦ፥ ፌ ናኣ ፔታ̇ና ኢያ ኢሚ̇ዴ።

¹⁷ጾ̈ሲ̇ ፌ ናኣ ኣላሚን ጋልዳ ሚሺኖ̈ዲ፥ ኣላሚን ጋርታ̇ ዎ ኣሳን ኢያ ኣማ̇ናር ፋጻምፔ̈ንዶኬ ኢንታ̇ ጋልዳ̇ ፊርዳምፔ̈ን ጊዳካ̇ዬ።

¹⁸“ጾ̈ሳ̇̇ ናኣ ኣማ̇ኒዝ ኣሲ ዎይ ፊርዲንቲ̇ባ̈ሴ፥ ኢያ ኣማ̇ኒባ̈ሶ ኣሲ፥ ጾ̈ሳ̇̇ ናኣ ፔታ̇ና ኣማ̇ናካ̇ይ ኣቲ̇ኖኮታ̇ቦ ዓት ኢ ጋል ፊርዲን ዎ።

¹⁹ጾ̈ሲ̇ ፊርዲዛ̈ዲ፥ ፎኢን ኣላሚን ጋልዳ̇ ዬይንዶ̈ን ኣሳን ኢንታ̇ ኦ̈ሲን ኢ̈ት ማ̈ቂ̇ኖኮታ̇ቦ ፎኢንምፖ̇ ሚ̇ን ዶሲኖኮታ̇ቦ።

²⁰ኦ̈ናካር ማ̈ቂ̇ን ኢ̈ታ ባዝ ኦ̈ዝ ኣሲ ዎይ ፎኢን ኢጺ̇̈ሬ። ኢ ኦ̈ሲን ኢ̈ቲን ቤንታ̇ካ̇ይፌ̈ኒ ፎኢንን ጋልዳ̇ ኬስኪ̇ባ̈ሴ።

²¹ኪን ባዝ ኦ̈ዝ ኣሲ ኢ ኦ̈ሲን ጾ̈ሳ̇̇ ኪ̈ቲ̇ኖንዲፌ̈ን ኦ̈ንቲ̇ኖ ማ̈ቂ̇ኖን ቤንታ̇ምፔ̈ኒ ፎኢንንኮ ዬይሬ” ጌይዴ።

²²ዪኒ̇ፖ ዎሃ ዬሱ̈ሲ ፌ ታማ̈ራንባር ዎልኣ ዪሁዳ ጋዳ̇ ሉኪ̇ዴ። ኢና ጻማ̇ቂ ሙታ̇ ኢንታ̇ባር ጊላ̇ ቃም ጋምኢዴ።

²³ማ ዋ̈ኒ̇ሳሬ ሳ̈ሌሚ ላፍ ዎ ኤ̈ኖና ጋዝ ቤሲ̇ን ጋልዳ̇ ዎይሊን ዋ̈ ዎኮታ̇ቦ ኢ ኢና ጻማ̇ቂ̈ሬ። ኣሳንሬ ዬዪ ዬዪ ኢ̈ክ ጻማ̇ቂንቲ̇̈ሬ።

²⁴ዪኒ̇ባራ ዋ̈ኒ̇ሲ ቢርት ቃሺ ኣ̈ል ጌላካ̇ዬ።

²⁵ዪና̇ ኢዝባራ ዋ̈ኒ̇ሳ ታማ̈ራንኬ ፔቲ̇ ኣይሁዳ ዜር ማ̈ቂኖ ኣስኬ ዋ̈ባር ቃሺዝ ጎይ ዎልኣ ፋላሚ ኤ̈̇ዴ።

²⁶ዋ̈ኒ̇ሳ ታማ̈ራን ኢ̈ክ ዬ̈ሪ “ኣስታማ̈ራ̈ዶ! ዋ̈ን ዮርዳ̈ኖ̈ሳ ፊ̈ን ኔባር ዎ፥ ኔ ኢ ባዝ ማርኪቲኖ ና̈ሳ፥ ዓ̈ዲሼ ኢያር ጻማ̇ቂ̈ሬ፤ ኣሳንር ዎይ ኢ̈ክ ሉኪ̈ሬ” ጌይዴ።

²⁷ዋ̈ኒ̇ሲ ኢ̈ኮ “ኦ̈ናካር ማ̈ቂ̇ን ጾ̈ሲ̇ ኢ̈ብ ኢማ̇ካ̇ይ ኣቴ̇ጌይን ኣባካር ኢ̈ብ ዶኣንዳ̇ብ ዳንዳኢባ̈ሴ፥

²⁸‘ታ̈ኒ ኢ̈ፖ̇ ቲ̈ን ኪ̈ቲንታ̇ር ዬ̈ዶ̇ኬ ቴ ክርስቶ̈ሳ ጊዳካ̇ዬ’ ጋ̈ራ ቴ ዪንታ̇ብ ሶ̈ሊኖምቦ̇ ዪንቲ̇ ዪንታ̇ ቆሚ̇ን ታ̈ብ ማርካ̇።

²⁹ኢሲ̇ንዳ ኢሳ̇ዳዬ፥ ቱሪን ና̈ሳዲ ኢሳ̇ ላፍ ኤቃ̇ሪ ኢ ሶ̈ላዚን ሲስኪ̇ሬ፤ ኢ ሶ̈ላምባር ሲስካ̇ሪ ዎይሊን ኡፋይቲ̇̈ሬ፤ ቴ ኡፋዪሲ̇ንዳር ዪና̇ ኢዚዶ̈ራ ዓት ፎቲንቲ̇ኔ።

³⁰ኢ ሾክ ሾክ ጋ̈ንዳቦ ቤይሲ̈ሬ፤ ታ̈ኒ ዪርክ ዪርክ ጋ̈ንዳቦ ቤይሳ̈ሬ።

³¹ሎክ ኣፋፖ̇ ዬይዛ̈ዲ ዎይፖ̇ ሺ̈ሬ። ሳ̈ዝ ጋልዳፖ̇ ቤንቲ̇ኖ̈ዲ ሳ̈ዝ ጋልዶ ባዜ ሶ̈ላዚንዳሬ ሳ̈ዝ ጋልዶ̇ ባዝ ሶ̈ሊ̈ሬ። ኣፋፖ̇ ዬይኖ̈ዲ ኢ ዎይፖ̇ ሺ̈ሬ።

³²ኢ ፌ ቤቂ̇ኖንዲኬ ፌ ሲስኪ̇ኖን ማርኪ̇ቲ̈ሬ፥ ዎቲናካሬ ኢ ማርኪንቲኖን ኤኪ̇ዝ ኣሲ ባዬ̇።

³³ኢ ማርኪ̇ቲኖን ኤኪ̇ዝ ኣሲ፥ ጾ̈ሲ̇ ኪን ጾ̈ስ ማ̈ቂ̇ኖን ማርኪ̇ቲ̈ሬ።

³⁴ጾ̈ሲ̇ ፌ ኣያ̇ና ሱ̈ቂታካ̇ይ ኢሚ̇ዛኮታ̇ቦ ጾ̈ሲ̇ ኪ̈ቲ̇ ሚሺኖ̈ዲ ጾ̈ሳ̇̇ ቃ̈ሊን ሶ̈ሊ̈ሬ።

³⁵ጾ̈ሳ̇̇ ባ̈ባ̈ ፌ ናኣ ካ̈ሬ፤ ማ ዎይ ባዝ ኢ ኩሽት ኢሚ̇ኔ።

³⁶ጾ̈ሳ̇̇ ናኣ ኣማ̇ኒዝ ኣሲ ሜናብ ሼምፓባር ዶኢ ኢ̈ብ ዎ፤ ጾ̈ሳ̇̇ ናኣ ኣማ̇ኒባ̈ሶ ኣሳ ጋልዳ̇ ጾ̈ሳ̇̇ ጎይላ ዬይርዶኬ ኢ ሼምፓ ዴጚባ̈ሴ” ጌይዴ።