Read basketo ዋ̈ኒ̇ሳ 4 Bible Online

ዋ̈ኒ̇ሳ 4 - basketo bible

ዋ̈ኒ̇ሳ 4

¹ዬሱ̈ሲ ዋ̈ኒ̇ሳፖ̇ ሺ ዎይሊን ኣስ ፌ ታማ̈ሪ ማሂ ሙታ̇ ዎንዲኬ ጻማ̇ቃዚን ፋራሳ̈ዋን ሲስኪ̇ኖን፥

²ዬሱ̈ሲ ኤሪኖኮታ̇ቦ፥ ዪሁዳ ጋዲን ኣሻ̇ሪ ጋሊላ ማ̈ቂ̇ ሉኪ̇ዴ። ዎቲናካሬ ጻማ̇ቂኖን ኢ ታማራንዶኬ ዬሱ̈ስ ኢ ቆሚ̇ን ጊዳካ̇ዬ።

⁴ኢ ጋሊላ ሉኪ̇ርዶ̈ሪ ኣባካር ጌይን ሳማ̈ራ ጎይባር ኣ̈ካ̇ይ ሉካ̇ንዳብ ዳንዳኣካ̇ዬ።

⁵ዪ̈ኮታ̇ቦ ኢ ሲካ̈ራ ጋ̈ዝ ሳማ̈ራ ካታሚን ጋርታ̇ ዬይዴ። ዪና̇ ሲካ̈ራ ጋ̈ዚንዳ ዓይቆ̈ቢ ፌ ናኣ ዮ̈ሴ̈ፋብ ኢሚ̇ኖ ቤሲ̇ን ላፍ ዎ ካታማ።

⁶ኢና ዓይቆ̈ባ ዋ̈ ዶ̈ቺ̇ ዎዶ̈ን፥ ዬሱ̈ሲ ጎይን ኢያ ዳ̈ቡርሲን ኢና ዋ̈ ዶ̈ቺ̇ን ላፍ ዶኢዴ። ዪኒ̇ባራ ጋላስ̇ ሌሂ ሳኣ̈ታ ማ̈ቃ̇ምፔ̈ኔ።

⁷ሳማ̈ራ ጋዶ̇ ኣስ ፔታ̇ንዶ̈ራ ኢና ዋ̈ ኪታ̇ንዳቦ ዬ̈ዴ። ዬሱ̈ሳር ኢዝኮ “ኣ̈ሼ! ዋ̈ዴ ኔ ታ̈ና ዋ̈ ኡሺ̇ሼ!” ጌይዴ።

⁸ዪኒ̇ባራ ኢ ታማራን ፊ̈ሺ ዎ̈ጛንዳብ ካታማ ሉኪ̇ኔ።

⁹ሳማ̈ራ ጋዶ̇ ኣሲን ኢ̈ኮ “ኔ̈ኒ ኣይሁዳ ዜርዶራ ታ̈ና ሳማ̈ራ ጋዶ̇ ኣሲን ዎዛርፌ̈ን ‘ታ̈ና ዋ̈ ኡሻ̇ቤ’ ጋ̈ራ?” ጋ̈ዴ። ዪና̇ ኢዛ ጌይኖንዳ̇ ኣይሁዳንኬ ሳማ̈ራን ዎል ዬሊ̇ባ̈ሶኮታ̇ቦ።

¹⁰ዬሱ̈ሳር ኢዝኮ “ጾ̈ሳ̇̇ ኢሚ̇ዝ ባዝኬ፥ ማ ኔ̈ክ ‘ታ̈ና ዋ̈ ታ̈ና ኡሺ̇ሼ’ ጌይዛ ኢ ኦ̈ናኮ ኔ ኤሪኖኮ፥ ኢያ ጌሻንዳ̇ ኮሻ̇ዚን ኔ̈ናዶ̈ን፥ ኢያር ኔ̈ቦ ሼምፓ ኢሚ̇ዝ ዋ̈ ኢሚ̇̈ርዶ̈ን” ጌይዴ።

¹¹ኣሲንዳ̇ር ኢ̈ኮ “ላ̈! ኪ̈ቲ̇ዝ ባዚ ኔ̈ብ ባዪ፥ ዶ̈ቺ̇ንዳ̇ር ጎቴ̇፤ ዪዚ ዪ ሼምፓ ዋ̈ ኔ ዎይዲፖ̇ ዲጛራ?

¹²ኔ̈ኒ ዶ̈ቺ̇ን ዓና̇ ኑ̈ብ ኢሚ̇ኖ ኑ ባ̈ባ̈ ዓይቆ̈ባፖ̇ ሺ̈ራ? ኢያኬ ኢ ናኣንኬ ኢ ሜሃን ዎይ ዶ̈ቺ̇ን ዓና̇ ጋርታ̇ፖ̇ ኡሽኪ̇ኔ” ጋ̈ዴ።

¹³ዬሱ̈ሳር ኢዝኮ “ዋ̈ን ዓኖ̇ ኡሽኪ̇ዝ ኣሲ ማ̈ቂ̇ ባርሲንቲ̇̈ሬ፥

¹⁴ቴ ኢማ̇ዝ ዋ̈ን ኡሽኪ̇ዝ ኣሲ ኣባካር ጌይን ዉርሲ ባርሲንቲ̇ባ̈ሴ። ቴ ኢማ̇ዝ ዋ̈ን ኢ ጋርታ̇ፖ̇ ፉዳ ኬስኪ̇ዝ ዶቃ ዋ̈ፌ̈ን ሜናብ ሼምፓባር ዶኢ ኢሚ̇ዝ ዋ̈ ማ̈̇ቃ̇̈ሬ” ጌይዴ።

¹⁵ኣሲንዳር ኢ̈ኮ “ጎዳ̈ዶ! ታ̈ና ባርሳካ̇ይፌ̈ንኬ ቴ ዋ̈ ኪታ̇ንዳብ ዓንዳ ዬ̈ካ̇ይፌ̈ኒ ዋ̈ዴ ዪኖ̇ ዋ̈ን ታ̈ብ ኢሚ̇ሼ” ጋ̈ዴ።

¹⁶ኢያር ኢዝኮ “ሉካ̇ር ኔ ኣስና ጼ̈ጋ ኤካ̇ር ዬ̈ቤ” ጌይዴ።

¹⁷ኣሲንዳር ኢ̈ኮ “ታ̈ብ ኣስኒ ባዬ̇” ጋ̈ር ማሃዴ። ዬሱ̈ሳር ኢዝኮ̇ “ኔ̈ኒ ‘ኣስኒ ታ̈ብ ባዬ̇’ ጌይኖንዳ ኪን።

¹⁸ኔ̈ኒ ዓኒፖ ቲ̈ን ኢሺ̇ን ኣስና ኣ̈ል ኢስቲኔ፥ ዓት ኔባር ዎ̈ዳሬ ኔ ኣስኒ ጊዳካዬ፤ ኔ ዓት ታ̈ብ ሶ̈ሊኖንዳ̇ ኪን” ጌይዴ።

¹⁹ኢዛር ኢ̈ኮ “ጎዳ̈ዶ! ኔ ናቢ ማ̈ቂ̇ኖን ቴ ዓት̇ ኤራዴ።

²⁰ኑ ባ̈ቢንታን ዓና̇ ኢንዲ̇ን ጋልዳ̇ ጎሽቲ̇ኔ፥ ዪንቲ̇ ኣይሁዳን ‘ኣሲ ጾ̈ሳ̇̇̈ቦ ጎሽታንዳብ ኮሺ̇ዛ̈ዲ ዬሩሳ̈ላም ጋርታ̇’ ጌይሬ” ጋ̈ዴ።

²¹ዬሱ̈ሳር ኢዝኮ “ኣሺንዴ! ዪንቲ̇ ዓና̇ ኢንዲን ጋልዳ̇ ዎይ ዬሩሳ̈ላም ጋርታ̇ ጾ̈ሳ̇̇ ባ̈ባ̈ቦ ጎሽታንዳብ ዳንዳኢባ̈ሶ ኬሊ̇ ዬ̈ዚን ኤራቤ።

²²ዪንቲ̇ ሳማ̈ራ ጋዶ̇ ኣሳን ዪንቲ̇ ኤሪባ̈ሶቦ ጎሽቲ̈ሬ፥ ኑ̈ኒ ፋቲ ቤንቲ̇ዛ̈ዲ ኣይሁዳፖ̇ ማ̈ቂኖኮታ̇ቦ ኑ ኤሪዛ̈ቦ ጎሽቲ̈̇ሬ።

²³ኪንባር ጎሽቲ̇ዛን፥ ጾ̈ሳ̇̇ ባ̈ባ̈ቦ ኣያ̇ናባርኬ ኪንባራ ጎሽቲ̇ዝ ኬሊ̇ ዬይሬ። ኬሊ̇ን ኢዛር ዓት ዬይኔ። ጾ̈ሲ̇ ዪኒ̇ፌ̈ን ኪንባር ፌ̈ብ ጎሽቲ̇ዛን ኮዪ̈ሬ።

²⁴ጾ̈ሲ̇ ኣያ̇ና፤ ማ ኢ̈ብ ጎሽቲ̇ዝ ኣሳን ኣያ̇ናባርኬ ኪንባራ ጎሽታንዳብ ኮሺ̇̈ሬ” ጌይዴ።

²⁵ኣሲንዳር ኢ̈ኮ “ክርስቶ̈ሳ ጌይዝ ሜሲሃ ዬ̈ዚን ቴ ኤራ̈ሬ። ኢ ዬ̈ሪ ዎይ ባዝ ኑ̈ብ ሶ̈ሊ̈ሬ” ጋ̈ዴ።

²⁶ዬሱ̈ሳር ኢዝኮ “ኔባር ሶ̈ሊንቲ̇ዛ ታ ዓ ኢያ” ጌይዴ።

²⁷ኢንቲ̇ ዪኖ̇ ሶ̈ሊንታ̇ምባራ ኢ ታማ̈ራን ፌ ሉኪ̇ኖ ቤሲ̇ምፖ̇ ማ̈ቂ̇ ዬይዴ። ዬሱ̈ሲ ማጫ̇ባር ሶ̈ሊንታ̇ምባር ቤቃ̇ሪ ዎይሊን ጋራ̇ሚንቲ̇ዴ። ማ̈ቂ̇ናካር ኢ̈ኮ “ኔ ኣብዝ ኮዪ?” ዎይ “ኔ ኢዝባር ኣብዝ ሶ̈ሊንታ̇̈ራ?” ጋ̈ሪ ኦይጪ̇ኖ ኣሲ ኦ̈ናካር ባዬ̇።

²⁸ኣሲንዳ̇ር ፌ ኦቲን ቤስ̇ ኢና ታክ̇ ኣሻ̇ራ ካታማ ማ̈ቃ̇ ሉካ̇ራ ዎርዣ̈ኮ፥

²⁹“ቴ ኦ̈ኖ ባዛን ዎይ ታ̈ብ ሶ̈ሊኖ ና̈ሳ ዓይ ዬ̈ር ቤቂ̇ብቴ̇። ኢ ክርስቶ̈ሳዶኔ?” ጋ̈ዴ።

³⁰ኣሳንር ካታማፖ̇ ዲንዳ̇ሪ ኢ ዎ ቤሲ̇ን ሉኪ̇ዴ።

³¹ዪኒ̇ባራ ኢ ታማ̈ራን ኢ̈ኮ “ኣስታማ̈ራ̈ዶ! ኔ ጊላ̇ ኣባክ ሙይሼ” ጋ̈ር ጌሺዴ።

³²ኢያር ኢንታ̇ኮ “ቴ ሙይዛ ዪንቲ̇ ኤሪባ̈ሶ ፊ̈ሺ ታ̈ብ ዎ” ጌይዴ።

³³ኢ ታማ̈ራንሬ ዎልዎልኣ “ኣሲ ኢ̈ብ ፊ̈ሺ ኤሄይንዶኔ?” ጌይዴ።

³⁴ዬሱ̈ሳር ኢንታ̇ኮ “ቴ ፊ̈ሺንዳ̇ ታ̈ና ኪ̈ታ̇ር ሚሺኖ ጾ̈ሳ̇̇ ቆፊን ኦ̈ዚንዲኬ ኢ ኦ̈ሲን ፎታዚንዶ̇።

³⁵ዪንቲ̇ ‘ኦይዲ̇ ኣጋናፖ̇ ዓኒ ካ ዬሊ̇̈ሬ’ ጌይር ባያ? ቴ ዪንታ̇ኮ፥ ሾክ ጋ̈ሪ ካን ካጻ̇ ዬሊ̇ኖን ቤቂ̇ብቴ̇ ጋ̈ሬ።

³⁶ካ ቴይሲ̇ዝ ና̈ሳ̇̈ዲ ዓታ̇ር ማ̈ቂ̇ን ፌ ዳሞ̈ዚን ኤኪ̇̈ሬ፤ ማ ሜና ሼምፓባር ዶኢብ ማ̈ቃ̇ምፔ̈ኒ ካ ኣ̈ፍ ሺሺ̈ሬ፤ ዪ̈ዳሬ ዜርቂ̇ዛ̈ዲኬ ቴይሲ̇ዛ̈ዲ ዎልኣ ኡፋይታ̇ምኒዬ።

³⁷ዪዚ ‘ፔታ̇ና ዜርቂ̇̈ሬ፤ ሜላ ቴይሲ̇ሬ’ ጋ̈ዝ ሶ̈ሊንዳ̇ ኪን።

³⁸ታ̈ኒ ዪንቲ̇ ዜርቂ̇ ዋ̈ዪ ዳ̈ቡራካ̇ይዶ̈ን ዪንታ̇ ቴይሶ ጌያ ሚሻዴ። ሜላን ኦ̈ ዳ̈ቡሪዴ፥ ኢንቲ̇ ዳ̈ቡሪኖን ዪንቲ̇ ሺ̈ሺ̇ ኤኪ̇ዴ።”

³⁹ኣሲንዳ̇ “ቴ ኦ̈ኖ ባዛን ዎይ ታ̈ብ ሶ̈ሊኔ” ጋ̈ራ ማርኪቲኖኮታ̇ቦ ዪና̇ ካታሚን ጋርታ̇ ዎይሊን ሳማ̈ራ ኣሳን ኢያ ኣማ̇ኒዴ።

⁴⁰ዪ̈ኮታ̇ቦ ሳማ̈ራ ጋዶ̇ ኣሳን ኢ̈ክ ዬ̈ሪ ፌባር ጋምኣምፔ̈ን ኢያ ጌሺን ኢያር ናምኢ ቃም ኢንታ̇ክ ኣቂዴ።

⁴¹ኢ ሶ̈ሊኖ ቃ̈ሊንኮታ̇ቦ ሜላንሬ ዎይሊን ኣሳን ኢያ ኣማ̇ኒዴ።

⁴²ዪዚ ኣሳን ኣሲንኮ̇ “ዪዚ ዓኒ̇ፖ̇ ጌዳ ኑ ኢያ ኣማ̇ኒዛ̈ዲ ኔ ኑ̈ብ ሶ̈ሊኖኮታ̇ብ ጊዳካ̇ይዶ̈ን ኑ ፌ̈ብ ሲስኪ̇ኖብኬ ኢ ኪን ኣላሚን ዓኖ̇ ፋዛ ማ̈ቂ̇ኖን ኑ ኤሪኖኮታ̇ቦ” ጌይዴ።

⁴³ዬሱ̈ሲ ሳማ̈ራ ጋዳ̇ ናምኢ ቃም ኣቃሪ ኢናፖ̇ ጋሊላ ሉኪ̇ዴ።

⁴⁴ኢ ፌ ቆሚ̇ን “ናቢ ፌ ጋዳ̇ ቦንቺንቲባ̈ሴ” ጋ̈ሪ ቲ̈ን ሶ̈ሊኔ።

⁴⁵ዎቲናካር ኢ ጋሊላ ሉኪ̇ን ኢኖ ኣሳን ኢያ ኮሺንቺ̇ ሞኪ̇ ኤኪ̇ዴ። ዪና̇ሬ ኢንቲ̇ ፋ̈ሲጋ ባ̈ሊምቦ ዬሩሳ̈ላም ሉኪ̇ኖንባራ ኢ ኢና ኦ̈ኖ ባዛን ዎይ ቤቂ̇ኖኮታ̇ቦ።

⁴⁶ዪኒ̇ፖ ዓኒ ዬሱ̈ሲ ዋ̈ን ዎይና ጃ ላ̈ሚ̇ኖን ጋሊላ ጋዳ̇ ዎ ቃ̈ና ካታሚን ጋርታ̇ ማ̈ቂ̇ ሉኪ̇ዴ። ዪና̇ ኢዝባራ ቂፊርና̈ሆ̈ም ጋ̈ዝ ካታሚን ጋርታ̇ ኢ ናኢ ማኖ ካ̈ታ ኣ̈ል ኦ̈ዝ ፔቲ̇ ሲልጣ̈ናባሮ ኣስ ዎ።

⁴⁷ኢያር ዬሱ̈ሲ ዪሁዳ ጋዳ̇ፖ̇ ጋሊላ ዬይኖን ሲስካ̇ር ኢ̈ክ ሉካ̇ሪ ቶ̈ራ ቂፊርና̈ሆ̈ም ሶ̈ባር ማር ዓይቃ̇ንዳብ ዬሊ̇ኖ ናኣ ኢ̈ብ ፋምፔ̈ን ኢያ ጌሺዴ።

⁴⁸ኢያር ኢ̈ኮ “ዪንቲ̇ ታ̈ሚ̇ራ̈ታኬ ማላ̇ ባዝ ቤቃካ̇ይዶ̈ር ኣባካር ኣማ̇ኒባ̈ሴ!” ጌይዴ።

⁴⁹ና̈ሳዳር ኢ̈ኮ “ጎዳ̈ዶ! ቴ ናኣ ዓይቃካ̇ይዶን ኤሊ̇ባር ዬሊ̇ሼ” ጌይዴ።

⁵⁰ዬሱ̈ሳር ኢ̈ኮ “ኔ ኔ ኣ̈ል ሉካ̇ቤ፥ ኔ ናኣ ፋጺኔ” ጌይዴ። ና̈ሳ̈ዳር ዬሱ̈ሲ ሶ̈ሊኖ ቃ̈ሊንባር ኣማ̇ናር ፌ ኣ̈ል ሉኪ̇ዴ።

⁵¹ኢ ሉካ̇ምባራ ኢ ኣሽካራን ጎይምጋልዳ ኢያ ዬላ̇ሪ ፥“ኔ ናኣ ፋጺኔ” ጋ̈ር ኢ̈ብ ሶ̈ሊዴ።

⁵²ኢያር ናኣ ፋጺኖ ሳኣ̈ቲን ኢንታ̇ ኦይጪ̇ን፥ ኢንታ̇ር ኢ̈ኮ “ዚና̈ብ ታብዛ ሳኣ̈ታ ጋልዳ̇ ኢ ጋሊ̇ን ሶ̈ላዚን ኣሻ̇ዴ” ጌይዴ።

⁵³ናኣ ባ̈ባ̈ዲ ዬሱ̈ሲ ኢ̈ኮ “ኔ ናኣ ፋጺኔ” ጌይኖን ዪና̇ ሳኣ̈ቲንባር ማ̈ቂ̇ኖን ኤሪዴ። ዪ̈ኮታ̇ቦ ዪኖ̇ ኢዝ ቃሚ̇ምፖ̇ ኤ̈̇ሪ ኢያኬ ኢ ኣ̈ሎ ኣሳን ዎይ ዬሱ̈ሳ ኣማ̇ኒዴ።

⁵⁴ዪና̇ ታ̈ሚ̇ራ̈ቲንዳ̇ ዬሱ̈ሲ ዪሁዳፖ̇ ጋሊላ ዬ̈ሪ ኦ̈ኖ ናምኢ ታ̈ሚ̇ራ̈ታ።