Read basketo ሃዋ̈ 12 Bible Online

ሃዋ̈ 12 - basketo bible

ሃዋ̈ 12

¹ዪና̇ ኢዝ ኬ̈ሊ̇ንባራ ካ̈ታ ሄ̈ሮዶ̈ሲ ፔቲ̇ ፔቲ̇ ኣማ̇ኒኖ ኣሳን ዳስ̇ ኤ̈̇ዴ።

²ዋ̈ኒ̇ሳ ኢሻ ዓይቆ̈ባ ማሻ̇ባር ዎሲዴ።

³ዪና̇ ኢ ኦ̈ሲንዳ ኣይሁዳን ኡፋይሲ̇ኖን ቤቃ̇ሪ ጴጥሮ̈ሳር ጉጃ̇ር ኤ̈ሲዴ። ኢ ኤ̈̇ንቲ̇ኖ̈ዲ ኣይሁዳን ቂጻ̇ ሙይዝ ባ̈ሊን ቦንቺሙታ̇ ዎን ጋርታ̇።

⁴ጴ̈ጥሮ̈ሳ ኤ̈ሳሪ ቃሺ ኣ̈ል ጌልሲኖፖ̇ ዓኒ ኦይዲ ኦይዲ ዎታ̇ዳራ ማ̈ቃ̇ሪ ና̈ጋምፔ̈ኒ ታጶ ሌሂ ዎታ̇ዳራንቦ ኢያ ኢሚ̇ዴ። ሄሮዶ̈ሲ ኣይሁድ ባ̈ሊን ኣ̈ጌይንዶ̇ ኢያ ዎርዣ ቲ̈ን ፊርዳብ ሺ̈ሻ̇ንዳቦ ቆፓ̇ሪ ዎቲኔ።

⁵ጴ̈ጥሮ̈ሳ ቃሺ ኣ̈ል ጌልሳር ና̈ጊሙታ̇ ዎ ዎቲናካሬ ኣማ̇ኒዝ ኣሳን ኢ ጊሻ̇ቦ ሚ̈ጛር ጾ̈ሳ̇ ዎሲ̇ሙታ̇ ዎ።

⁶ሄ̈ሮዶ̈ሲ ጴ̈ጥሮ̈ሳ ዎርዣ ቲ̈ን ሺ̇̈ሻ̇ንዳብ ቆፒ̇ኖ ቃሚ̇ን ጴ̈ጥሮ̈ሲ ናምኢ ካ̈ቲናባር ቃቺ̇ንታሪ ናምኢ ዎታ̇ዳራንቦ ጊዳ̇ ሱርቂ̇ኔ፤ ቃሺ ኣ̈ሊን ና̈ጊዛንሬ ኢና ካሪን ጋልዳ ኤቃ̇ር ዎ።

⁷ዪኒ̇ባራ ጎዳ ኪ̈ታንቻ̇ ኦ̈ናካር ቆ̈ፓካይዶን ቤንታ̇ሪ ኬ̈ን ጋርሲ̇ን ፎ̈ኢሲዴ። ኢያር ጴ̈ጥሮ̈ሳ ባሪንን ቡ̈ካ̇ር ባርኪ̇ሳሪ “ኣን ኤሊ ዲንዳ̇ቤ!” ጌይዴ። ዪና̇ ኢዝባራ ካ̈ቲናን ኢ ኩሽታፖ̇ ዱ̈ጳ̇ር ኬዲ̇ዴ።

⁸ኪ̈ታንቻ̇ዳሬ ኢ̈ኮ “ኔ ኣፊሊን ማኣቤ ኔ ጫ̈ሚ̇ንዳር ኣ̈ቤ!” ጌይዴ። ጴ̈ጥሮ̈ሳሬ ኪ̈ቲንቲ̇ኖንዲፌ̈ን ዎቲዴ። ኪ̈ታንቻ̇̈ዳሬ “ኔ ላጻኒን ማኣራ ቴ ዎሂን ዬ̈ቤ” ጌይዴ።

⁹ኢያር ዲንዳር ኢ ዎሂን ዬ ኤ̈̇ዴ፤ ዪ̈ ዎይ ማ̈ቃ̇ምባራ ጴ̈ጥሮ̈ሲ ኣይባባር ዎቲዛ ኢ̈ክ ማይጺንዶኬ ኪ̈ታንቻ̇ ዎታዚንዳ ኪን ማ̈ቂ̇ኖን ኢ̈ብ ኤሪንታካ̇ዬ።

¹⁰ቲ̈ንኬ ጋስኬ ዱማ ዱማ ቤስ̇̇ ኤቃ̇ር ና̈ጊዝ ዛባን ኣ̈ሪ ካታ̇ማ ኬሳ̇ዝ ጎይሚን ጋልዳ ዎ ሲ̈ላ ዪብን ዬሊ̇ዴ። ዪና ዪብንዳ ኣሲ ኦ̈ናክ ኢዞ ዎ̈ሻካ̇ይዶን ዚምዶኣር ፊርቂንታ̇ዴ፤ ኢንታ̇ር ኬስካ̇ሪ ሙቃ̇ ዬ̇ምባ̇ራ ኪ̈ታንቻ̇ ኤሪንታ̇ካ̇ይ ኢ ጋልዳፖ̇ ባዪዴ።

¹¹ጴ̈ጥሮ̈ሳሬ ኣይባፌኖን ጋርታፖ ባርካሪ “ጎዳ̈ዲ ፌ ኪ̈ታ̇ንቻ̇ ሚሻር ሄሮ̈ዲሳ ኩሽታፕኬ ኣይሁዳን ታ ጋልዳ ዬላ̇ዚን ቤቃ̇ንዳብ ና̈ጊ ዎን ጋልዳፖ̇ ዎይ ታ̈ና ኬሲ̇ኖን ኪንሲ̇ ታ ዓት ኤራዴ” ጌይዴ።

¹²ዪኖ̇ ኢ ኤሪኖፖ̇ ዓኒ ዎይሊን ኣሳን ሺ̈ቃሪ ዎል ፔታ̇ን ዎ̈ሲ̇ዝ ቤስ̇ ማ̈ርቆ̈ሳ ጌዪ ጼይጊኖ ዋ̈ኒ̇ሳ ኢንዲ̇ን ማ̈ራሚ ኣ̈ል ሉኪ̇ዴ።

¹³ኢና ዬላ̇ሪ ዛ̈ኖ ካሪን ቆንኪን ሮ̈ዳ ጋ̈ዚን ኢና ኣ̈ሎ ኣሽካራዶ̈ራ ካሪን ቆንኪኖ ኦ̈ናኮ ቤቃ̇ንዳቦ ካሪንኮ ሉካ̇ዴ።

¹⁴ጴ̈ጥሮ̈ሳ ቆ̈ ማ̈ቂ̇ኖን ኤራራ ዎይሊን ኡፋይቲ̇ኖኮታ̇ቦ ካሪን ፊርቃካ̇ይዶራ ዎባር ጋስ ማ̈ቃ̇ራ “ጴ̈ጥሮ̈ሲ ካራ ጋልዳ ኤቂ̇ኔ!” ጋ̈ራ ሶ̈ላዴ።

¹⁵ኣሳንር ኢዝኮ “ኣ̈ሽ ዣ̈ሽታ̈ራ!” ጌይዴ። ኢዛር ኢያ ማ̈ቂ̇ኖን ማሃር ኮሺንቻር ኢንታ̇ብ ሶ̈ሊን ኢንቲ̇ “ዪዚ ዪ̈ዶኮ ዪ̈ዲ ኢያ ና̈ጊዝ ኢ ኪታ̇ንቻ̇ ዶኢዝዳ” ጌይዴ።

¹⁶ጴ̈ጥሮ̈ሲ ካሪን ቆንካዚን ኣሻካ̇ዬ፤ ኢንታ̇ር ካሪን ፊርቂ ቤቃ̇ሪ ጋራ̇ሚንቲ̇ዴ።

¹⁷ኢያሬ ኢንቲ ዚም ዶኣምፔ̈ን ፌ ኩሺንባር ቤይሳሪ፥ ጎዳ ቃሺ ኣ̈ላፖ̇ ዎዛ̈ርታር ኢያ ኬሲ̇ኖኮ ኢንታ̇ብ ሶ̈ሊዴ። ኢናፖ̇ “ባዝ ዪኖ̇ ዓይቆባብኬ ኣማ̇ኒኖ ኣሳንቦ ሶ̈ሊብቴ̇” ጋ̈ሪ ኢናፖ̇ ኬስካ̇ር ሜላ ቤስ̇ ሉኪ̇ዴ።

¹⁸ኢዝ ዎንን ጌ̈ሽ ዎታ̇ዳራን “ጴ̈ጥሮ̈ሲ ዎይዲ ጌሌ̇?” ጌዪ ሙታ̇ ኢንታ ጊዳ̇ ጴች ዋ̈ቺ̇ ኬስኪ̇ዴ።

¹⁹ሄሮ̈ዲ̈ሳሬ ጴ̈ጥሮ̈ሳ ኮይሲን ዪኖፖ̇ ዓኒ ዛባ ናጊዛን ኮሺንቺ̇ ኦይጪዴ፤ ኢናፖ̇ ዛባን ዎምፔን ኪቲ̇ዴ። ኢናፖ ሄሮ̈ዶሲ ይሁዳፖ̇ ቶ̈ራ ቂሳ̈ራ ሉካ̇ሪ ኢና ዶኢዴ።

²⁰ሄሮ̈ዶ̈ሲ ጢሮ̈ሳኬ ሲዶ̈ና ካታማ ኣሳንባራ ጎይልዶሪ ኢንቲ ዎልኣ ፔታ̇ን ዬ̈ሪ ኢ ኣ̈ሊን ጋርታ̇ ሹ̈ሚንቲ̇ኖ ቢላስጦሳ ጌይዛ ኢንታ̇ ማ̈ዳ̇ምፔ̈ን ኢያ ጌሻር ኤ̈ኤ ዎታሪ ዎልኣ ማ̈ቃ̇ሪ ካ̈ታ̈ባር ኢጊንታ̇ንዳብ ኦይጪ̇ዴ። ዪና̇ ዎቲኖንዳ̇ ኢንቲ̇ ፊ̈ሺ ዲጛዚንዳ̇ ኢ ጋዲምፖ̇ ማ̈ቂ̇ኖኮታ̇ቦ።

²¹ኢንቲ̇ ኢጊንታ̇ንዳብ ዎል ሺ̈ቂ̈ሬ ጌይኖ ቃ̈ሚንባር ሄ̈ሮዶ̈ሲ ፌ ካ̈ቲንታ̇ ኣፊሊን ማኣሪ ካ̈ቲ ዶኣዝ ቦንች ኩልሚን ጋልዳ ዶኣሪ ዎርዣቦ ሶ̈ሊዴ።

²²ዎርዣ̈ዳሬ “ዪ̈ ጾ̈ሳ̇ ቆ̈ዶኬ ኣሳ ቆ̈ ጊዳካ̇ዬ” ጋ̈ሪ ዉይሲዴ።

²³ሄሮዶ̈ሳሬ ጾ̈ሳ̇ቦ ቦንች ኢማ̇ካዮኮታ̇ቦ ጎዳ ኪ̈ታ̇ንቻ̈ዲ ኢያ ኢና ጎይሊን ጉጺንታ̇ር ዓይቂ̇ዴ።

²⁴ጾ̈ሳ̇ ቃ̈ላ̈ዲ ሻኪ̇ ሙታ̇ ሉኪ̇ዴ።

²⁵ባርናባ̈ሳኬ ሳ̈ኦ̈ላክ ዎልኣ ፌ ኪ̈ቲንቲ̇ ሉኪ̇ኖ ኦ̈ሲን ዉርሳ̇ሪ ዬሩሳ̈ላማፖ̇ ኣንጾ̈ካ̇ ማ̈ቂ̇ዴ፤ ማ̈ርቆ̈ሳ ጌዪ ጼይጊኖ ዋ̈ኒ̇ሳ ፌባር ኤኪ̇ ዬይዴ።