Read basketo ሃዋ̈ 19 Bible Online

ሃዋ̈ 19 - basketo bible

ሃዋ̈ 19

¹ኣጵሎ̈ሲ ቆሮንቶ̈ሳ ካታሚን ጋርታ ዎዶን ጳውሎ̈ሲ ፉዳ ጊዶ̇ ጋዲን ጋርሲምባር ኣ̈̇ሪ ኤፍሶ̈ና ዬሊ̇ዴ፤ ኢና ኣማ̇ኒኖ ኣሲ ሙቃ̈ ዬላ̇ሪ

²ኢንታኮ “ዪንቲ̇ ኣማኒኖ ኬል̇ባራ ጌ̈ሻ̈ ኣያ̇ና ኤኪ̇ና?” ጋ̈ር ኢንታ ኦይጪ̇ዴ፤ ኢንታር ኢ̈ኮ “ኑ ኤካካ̇ዬ፤ ሜላ ኣቲን ጌ̈ሻ̈ ኣያ̇ና ጌይዝ ባዝ ዎንዳር ኑ ሲስካካ̇ዬ” ጋ̈ር ማሂዴ።

³ጳውሎ̈ሳር ኢንታኮ “ዓት ዪዶኮ! ዪንቲ ኣ ጺንቃታ ጻማ̇ቂንቲ̇ቴ?” ጌይን ኢንታ̇ር ኢ̈ኮ “ኑ̈ኒ ዋ̈ኒ̇ሳ ታማ̈ርሲ̇ኖ ጺንቃቲን ጻማ̇ቂን̇ቲኔ” ጌይዴ።

⁴ጳውሎ̈ሳር ኢንታ̇ኮ “ዋ̈ኒ̇ሳ ጺንቃቲንዳ ኣሲ ማ̈ሪቲ ጌላምፔ̈ን ኦ̈ንቲኖ ባዜ፤ ዋ̈ኒ̇ሲ ፌ ቆማ̇ብ ጌይርዶሪ ‘ታ̈ፖ ጋስ ዬ̈ይዛ ዬ̈ሱ̈ሳ ኢያ ኣማ̇ኒብቴ’ ጋሪ ዎርዣ̈ቦ ሶ̈ሊኔ” ጌይዴ።

⁵ኢንታር ዪኖ̇ ሲስካ̇ሪ ጎዳ ዬ̈ሱ̈ስ ሱ̈ምባር ጻማ̇ቂንቲ̇ዴ።

⁶ጳውሎ̈ሳር ፌ ኩሽ ኢንታ ጋልዳ ጋዲ̇ን ጌ̈ሻ̇ ኣያ̇ና ኢንታ ጋልዳ ሶ̈ቢን ኢንታር ዱ̈ማ ዱ̈ማ ኖ̈ና ሶ̈ሊዴ፤ ማ ካ̈ያር ካ̈ዪ ኤ̈ዴ።

⁷ኢና ዎ ኣሳንሬ ታጶ ናምኢ ኣስ ማ̈ቃ̇ምፔ̈ኔ።

⁸ጳውሎ̈ሲ ኣይሁዳን ዎ̈ሳ ኬ̈ ጋርታ ጌላሪ ዓይዚ̇ ኣጋና ማ̈ቃ̇ምፔ̈ኖ ኬል̇ ጾ̈ሳ̇̈ ካቲ̈ቲ ጎይ ፋላሚ ኢንታ̇ ጋሚሙታ̇ ኢ̈ጫካይዶር ዎርዣ ታማ̈ርሲዴ።

⁹ኢንታ ጋርታፖ ፔቲ̇ ፔቲ̇ ኣሳን ጎዳ ጎይን ሺሪንቲ፤ ዎርዣ ቲ̈ን ቆ̈ ዎታሪ ኣማናብዳ ጌዪ ቅ ኢጺ̇ን ጳውሎ̈ሲ ኢንታ ኣሺ̇ዴ፤ ኣማ̇ኒኖ ኣሳን ዱማ ኤካ̇ሪ ጢራ̈ኖስ ጌይዝ ቲሚርታ ኬ̈ን ጋርታ ዎይ ጋላስ ኢንታ̇ ታማርሲ̈̇ሬ።

¹⁰ጳውሎ̈ሲ ዪኖ̇ ኦ̈ሲን ናምኢ ላይ ኦ̈ኔ፤ ዪዚ ዪኒ̇ባራ ኢ̈ሳ ጋዳ̇ ዎ ኣይሁዳንኬ ኣይሁድ ባዮ̇̇ ኣሳን ዎይ ጎዳ ቃ̈ሊን ሲስካ̇ንዳብ ዳንዳኢዴ።

¹¹ጾ̈ሳ̇̈ዲ ዎይሊን ጋራ̇ሚሲዝ ባዝ ጳውሎ̈ሳ ጎይባር ኦ̈ዴ።

¹²ዪ̈ኮታ̇ቦ ሜላ ኣቲ̇ን ጳውሎ̈ሳ ጋሊ̇ን ኤ̈ኖ ጫርቃ ማ̈ቆ ዎይ ማ̈ራ̈ባ ኤካ̇ሪ ማኖ ኣሳን ዬልጌይን ማኖ ናሳ̈ዲ ፌ ዓርጊን ጋርታፖ ፋጺ̈ሬ፤ ኢ̈ታ ኣያ̇ናር ኬስኪ̇̈ሬ።

¹³ፔቲ̇ ፔቲ̇ ኣይሁዳን ኢ̈ታ ኣያ̇ና ኬሲ̇ሙታ ዱማ ዱማ ቤስ̇ ቢሪንቲዛን “ጳውሎ̈ሲ ሳባ̇ኪዛ ጎዳ ዬ̈ሱ̈ሳ ሱ̈ምባር ኬስካምፔ̈ን ኑ ዪንታ̇ ኪቲሬ” ጌዪሙታ̇ ኢ̈ታ ኣያ̇ና ኣሳን ጋልዳፖ ኬሳ̇ንዳቦ ሞካ̇ሪዴ።

¹⁴ኣይሁድ ቄ̈ሳንቦ ኣላቃ̈ቦ ኣላቃ ማ̈ቂ̇ኖ ኣስቃዋ ጌይዛ ናኣን ታብዛን ዪና̇ ኢዝፌ̈ን ዎቲ̈ሬ።

¹⁵ዎቲናካሬ ኢ̈ታ ኣያ̇ና̈ዲ ኢንታ̇ኮ “ቴ ዬ̈ሱ̈ሳ ኤራ̈ሬ! ጳውሎ̈ሳር ኤራ̈ሬ! ዓት ዪንቲ̇ ኦ̈ኖ?” ጌይዴ።

¹⁶ኢ̈ታ ኣያ̇ና ኤ̈ጲኖ ፔቲ̇ ኣስዶሪ ኢንታ ጋልዳ ዶ̈ጚ ኬዳ̇̇ር ኢንታ ጩሊ̇ዴ፤ ኢንታ̇ ቡኪ ቡኪ̇ ኣሺ̇̇ን ፌ ሱ̈ ኤካ̇ር ጺ̈ሪ ካላ̇ ዎጻ̇ር ኣላፖ ኬሲኪዴ።

¹⁷ባዝ ዪና̇ሬ ኤፍሶ̈ና ካታማ ጋርታ ዎ ኣይሁዳንኬ ኣይሁድ ባዮ̇ ኣሳን ሲስካ̇ሪ ዎይ ኢ̈ጪ̇ዴ፤ ዪኒ̇ባራ ጎዳ ዬ̈ሱ̈ሳ ሱምን ዎይሊን ጴች ቦንቺንታ̇ዴ።

¹⁸ኣማ̇ኒኖ ኣሳን ጋርታፓር ዎይሊንን ፌ ኢ̈ታ ኦ̈ሲን ፋ̈ጺ̇ሙታ ዬይሬ።

¹⁹ቢታ ቢቲዝ ኣሳን ፌ ቢታ ማጻ̈ፋን ሺ̈ሻ̇̈ሪ ዎርዣ ዎይ ቲ̈ን ሚቺ̇ዴ፤ ማጻ̈ፋን ዋ̈ጊን ኣ̈ፊን ማ̈ቂ̇̈ርኮ ቆፓ̇ምባራ ኢሺ̇ን ታጳ ሙኩላ ቢራ ማቃ̇ዴ።

²⁰ዪ̈ፌ̈ኖ ጎይባራ ጎዳ ቃ̈ላ ዎይሊን ዳልጊሙታ̇ኬ ዲጪ̇ሙታ ሉኪ̇ዴ።

²¹ዪ ዎይ ማ̈ቂ̇ኖፖ ዓኒ ጳውሎ̈ሲ ሜቂዶናኬ ኣካ̈ያ ጎይባር ዬሩሳ̈ላም ሉካ̈ንዳቦ ቆፓ̇ሪ ማ ኢና ዬ̈ሊኖፖ ዓኒ ሮማ ሉካ̈ንዳ ጌይዴ።

²²ኢ ፌ̈ና ማ̈ዲዛን ጋርታፖ ናምኣን፤ ጢማ̈ቶሳኬ ኤራስጦ̈ሳክ ዎልኣ ማቂዶና ኪ̈ቲ̇ ሚሻሪ ኢ ፌ ቆሚ̇ን ኢ̈ሳ ጋዳ̇ ጊላ̇ ቃም̇ ጋምኢዴ።

²³ዪና̇ ኢዝባራ ጎዳ ኣማ̇ናዚን ጎይ ጴች ዋ̈ቺ ኤፍሶ̈ና ጋዳ ኬስኪ̇ዴ።

²⁴ቢራ ቆጺ̇ዝ ፔቲ ኣሲ ዲማጢሮ̈ሳ ጌይዛ̈ዲ ኣሪጢሚሳ ዛቢ̇ን ሚሲሊን ሹች ቢራባር ኦ̈ሪ ዎይሊን ሚ̈ሽ ጌልሲ̈ሬ።

²⁵ዪ̈ኮታ̇ቦ ዪ ና̈ሳ̈ዲ ቢራ ቆጺ̇ዝ ኣሳንኬ ኢንታኮንዲፌ̈ን ኦ̈ዝ ሜላ ኣሳን ዎይ ሺ̈ሻ̇ሪ ኢንታኮ “ኣሳን! ኑ̈ኒ ቆሊን ዲጛዚንዳ ዓኒ̇ ኦ̈ሲምባር ማ̈ቂ̇̇ኖን ዪንቲ̇ ኤሪ̈ሬ።

²⁶ዪ ና̈ሳ ጳውሎ̈ሲ ‘ኣሳ ኩሽባር ኦ̈ሲንቲ̇ኖ ሚሲላን ጾ̈ስ ጊዳካ̇ዬ’ ጌዪ ሙ̈ታ ኤፍሶ̈ና ካታሚን ጋርታ ሙታ̇ ጊዳካ̇ይዶን ኢ̈ሳ ጋርታ ፌ̈ብ ጊላ̇ ጋዲ ኣቲኔኮማ̈ሬ ዎይን ጋርታ ዎይሊን ኣስ ኣማን ባሊኖን ዪንቲ ሲስኪ ቤቂ̇ኖንዶ።

²⁷ዪ̈ፌ̈ን ማ̈ቄ̇ጌዪን ዓና̇ ኑ̈ኮ ኮሻ ኦ̈ሲን ሌቂንታ̇̈ሬ ዪ ሙታ̇̇ ጊዳካ̇ይዶን ኢ̈ሳ ጋዳ̇ኬ ኣላማ ጋልዳ ኣሲ ዎይ ጎሽታዚን ጴች ጾ̈ሲ̇ን ኣርጣሚሳ ዛቢ̇ን ሜላ̇ ዓሪ ኣታ̇̈ሬ፤ ማ ኢዝ ቦንቺ̇ንዳር ኣታ̇̈ሬ።”

²⁸ኣሳንሬ ዪኖ̇ ሲስካ̇ሪ ጎይሊዴ “ኤፍሶ̈ና ጋዳ̇ ዎን ኣርጣሚሳ ጴቼ!” ጌዪሙታ̇ ዉይሲዴ።

²⁹ካታሚን ዎይ ዋ̈ችባር ኩማዴ፤ ዎርዣ̈ዳሬ ማቂዶ̈ና ጋዶ̇ ኣስ ማ̈ቂ̇ኖን ናምኣን ጳውሎ̈ሲ ሉኪ̇ዝ ቤስ̇ ዎይ ኢባር ሉኪ̇ዛን ጋ̈ዮ̈ሳኬ ኣርስጢሮኮ̈ሳ ኤ̈ር ጎ̈ቺ̇ሙታ̇ዶር ዎርዣ ሺ̈ቂዝ ቤስ̇ ዎጺ̇ዴ።

³⁰ጳውሎ̈ሲ ዎርዣ̈ክ ሉካ̇ንዳብ ኮዪንዶን ኣማ̇ኒዝ ኣሳን ኢ ሉካካ̇ይፌ̈ን ኢያ ካዪዴ።

³¹ኢ̈ሳ ጋዳ̇ ዎ ዳይናን ጋርታፖ ጳውሎ̈ሳብ ላጋ̇ ማ̈ቂ̇ኖ ፔቲ̇ ፔቲ̇ ኢ̈ክ ጳውሎ̈ሳክ ኣስ ሚሻሪ “ዎርዣ ሺ̈ቂዝ ቤሳ̇ ጋልዳ ሉካ̇ር ኢንታባር ቤንታፔ” ጋ̈ሪ ኢያ ጌሺዴ።

³²ኢንቲ ኣብዛብ ሺ̈ቂኔኮ ዎይሊን ኣሳን ኤሪባ̈ሴ፤ ፔታ̇ና̈ዲ ፔቲ̇ ባዝ ጋ̈ሪ ዉይሲን ማ̈ ሜላ̈ዲ ሜላ ባዝ ጌዪሙታ ዉይሲ̈ሬ ዪ̈ኮታ̇ቦ ኢና ሺ̈ቂኖ ዎርዣ ጊዳ̇ ጴች ዋቺ̇ ዎ።

³³ፔቲ̇ ፔቲ̇ ኣይሁድ ኣሳን ኢስኪንዲ̇ራ ጌይዛ ና̈ሳ ዎርዣ ጊዳ̇ፖ ሱጋሪ ኢያ ቲ̈ን ኬሲ̇ዴ፤ ዎርዣ ጊዳፖ ፔታ̇ን ፔታ̇ናን ኢ ኢንታ̇ብ ኮሺንቺ ዋጫምፔ̈ን ኢያ ዞሪዴ፤ ኢያሬ ዎርዣ ዚም ዶኣምፔ̈ኒ ፌ ኩሽባር ማላ̇ ቤይሳሪ ኢንታ ጊሽ ዋጫንዳቦ ጊ̈ጊንቲ̇ዴ።

³⁴ዎቲናካሬ ኢስኪንዲሪ ኣይሁዳ ኣስ ማ̈ቂኖን ኣሳንሲ ዎይ ኤራሪ “ኤፍሶ̈ና ጋዶ̇ ኣርጣሚ̈ሳ ጴቼ!” ጌዪሙታ̇ ናምኢ ሳኣታ ማ̈ቃምፔ̈ን ዎይን ፔቲ̇ ቃ̈ላባር ዉይሲዴ።

³⁵ዉርሲ ጋልዳ ካታሚን ጋርቶ ጻ̈ፋዲ፤ ዎርዣ̈ኮ ዚምዶኣምፔ̈ን ዎታሪ ኢንታ̇ኮ “ኤፍሶ̈ና ጋዶ̇ ኣሳን! ኤፍሶ̈ና ካታሚን ጋርታ ዶኢዝ ኣሳን ጴቺን ኣርጣሚሲ ዛቢ̇ንዲኬ ኣፋፖ ሶ̈ቢኖ ኢዝ ሚሲሊን ና̈ጋዚን ዎይ ኣሲ ኤሪ̈ሬ።

³⁶ዪኖ̇ ቴ ኤራባሴ ጌይዝ ኣሲ ኦ̈ናካር ባዮ̇ኮታ̇ቦ ዚም ዶኣምፔ̈ንኬ ባርቢባር ኢ̈ታ ባዝ ኦ̈ካይፌ̈ን ና̈ጊንታ̇ንዳብ ኮሺ̇̈ሬ።

³⁷ዛባ̇ ጋርቶ ባዝ ቡራካ̇ዮንኬ ኑ ጾ̈ሲ̇ን ቆ̈ካዮ ኣሳን ዓን ዪንቲ̇ ዓይዲ ኤሄይኔ።

³⁸ዲማ̈ጥሮሳኬ ኢባር ዎን ሲላ ቆ̈ጺዝ ኣሳን፥ ኢንቲ ሞ̈ቲዝ ኣሲ ዎኮ ዳይናን ፊርዲዝ ቃሚ̇ ዎ፤ ዳይናንር ዎ ኢና ዎልኣ ሞ̈ቶጋ̈ቤ።

³⁹ሜላ ዪንቲ ኮዪዝ ባዚ ዎኮ ሂጋ̇ ቲ̈ን ቤንቲ̇̈ሬ።

⁴⁰ዪ ባዪኮ ዓታ̇ብ ኦ̈ንቲ̇ኖ ዓና̇ ዋቺ̇ንኮታ̇ቦ ኑ̈ና ‘ኢንቲ̇ ዋች ዲንኔ’ ጋ̈ሪ ሞ̈ቲዝዳ ጋ̈ር ኑ ኢ̈ጪ̇̈ሬ፤ ዪ ዋቻ̇̈ዲ ኣ ጊሻ̇ብ ዲንዴ ጋ̈ር ኦይጬጌይን ኑ ኢሚ̇ዝ ማልሳ ኑ̈ብ ባዬ̇።

⁴¹ዪኖ̇ ሶ̈ላሪ ሺ̈ቂኖ ኣሳን ላ̈ሊንታምፔ̈ን ዎቲዴ።