Read basketo ሃዋ̈ 22 Bible Online

ሃዋ̈ 22 - basketo bible

ሃዋ̈ 22

¹“ቴ ኢሺንታ̇ንኬ ታ ባ̈ቢንታን! ቤቂ̇ብቴ! ታና̈ ሞ̈ቲኖ ሞ̈ቲምቦ ቴ ዓት ኢማዝ ማልሲን ዪንቲ ሲስኪብቴ።”

²ጳውሎ̈ሲ ኢብራይስጣ ኖ̈ናባር ሶ̈ላዚን ኢንቲ ሲስካ̇ሪ ቲ̈ኖምፖ ሺ ዚክ ጌይዴ፤ ጳውሎ̈ሳሬ ሶ̈ሊርዶሪ፤

³“ታ̈ኒ ኪልቃ̈ ጋዳ̇ ዎ ጤርሴስ ካታሚን ጋርታ ዬሊንቲ̇ኖ ኣይሁድ ዜር፤ ቴ ዲጪ̇ኖንዳሬ ዓንዳ ዬሩሳ̈ላም ካታሚን ጋርታ፤ ታ̈ና ታማ̈ሪሲኖዳሬ ጋማ̈ላ̈ላ፤ ባ̈ቢንታን ሂጊ̇ን ኮሺንቻ ታማ̈ራራ ዓታ̇̈ብ ዪንቲ̇ ዎታዚንዲፌ̈ን ታ̈ናር ጾ̈ሳ̇̈ ኦ̈ሳቦ ሚጪንታ ኦ̈ዝ ኣሴ።

⁴ታ̈ኒ ኣማ̇ኒዝ ኣሳን ዎይ ኣቲናንር ማ̈ቂ̇ን ማጫ̇ንር ቃሺ ኣ̈ል ጌልሲሳ ቃቺሻ ዎታ̈ርዶን።

⁵ዪና̇ ኪን ማ̈ቂ̇ኖን ቄ̈ሳ̈ ኣላቃ̈ዲኬ ጋዳ ጪጛሻን ዎይ ታ̈ብ ማርኪቲ̈ሬ፤ ማ ታ̈ኒ ዳማ̈ስቃ ዎ ኣሳን ዓንር ቃቺሻ ዬሩሳ̈ላም ኤሄ̈ንዳብኬ ቃጣ̇ኢሳንዳብ ዳንዳኣምፔ̈ኒ ዳማ̈ስቃ ዎ ኢንታ ኣሳን ጻ̈ፊኖ ዳብዳ̈ቢ̇ ኢንታ ጋልዳፖ ኤኪ̇ኔ።

⁶“ታ̈ኒ ዳማ̈ስቃ ሉካ̇ምባራ ካታሚን ዬላ̇ንዳብ ዎታ̈ርዶን ሳ̈ዚ ጋላስ ኣዋ ኩሊላዶን ቴ ቆፓካ̇ይዶን ጴች ፎኢን ኣፋፖ ቴ ቡጊዲምባር ፎ̈ኢዴ።

⁷ታ̈ናር ሳ̈ዳ̇ ኬዳ̇ዴ፤ ኢናፖ “ሳ̈ኦ̈ሎ! ሳ̈ኦ̈ሎ! ኔ ኣባብ ታ̈ና ዳካ̇̈ራ?” ጌይዝ ቆ̈ ሲስካ̇ዴ።

⁸ታና̈ሬ “ ‘ጎዳ̈ዶ! ኔ ኦ̈ኖ?’ ጌያ ኦይጫ̇ዴ፤ ኢያሬ ‘ታ̈ኒ ኔ ታ̈ና ዳኪ̇ዛ ናዝሬ̈ቶ ዬ̈ሱ̈ሳ’ ጋ̈ር ማሂዴ።

⁹ታባር ዎ ኣሳንሬ ፎኢንን ቤቂ̇ንዶኬ ኢ ታ̈ብ ሶ̈ላዚን ኢንቲ ሲስካካ̇ዬ።

¹⁰“ታና̈ሬ ‘ጎዳ̈ዶ! ታ ኣብዝ ዎታኖ?’ ጋ̈ዴ፤ ጎዳዳሬ ታ̈ኮ ‘ዲንዳ̇ራ ዳማ̈ስቃ ሉካ̇ቤ፤ ኔ ኦ̈ንዳብ ኮሻ̇ዝ ባዚን ዎይ ኢና ኔ̈ብ ሶ̈ሊ̈ሬ’ ጌይዴ።

¹¹ፎኢን ቦልቂ̇ዛኮታ̇ቦ ቴ ቤቃ̇ንዳብ ዳንዳኣካ̇ዬ፤ ታባር ዎ ኣሳን ቴ ኩሺን ኤ̈ሪ ቲ̈ኒሙታ̇ዶ̈ሪ ዳማ̈ስቃ ታ̈ና ዬልዴ።

¹²“ኢና ሃና̈ና ጌይዛ ፔቲ̇ ኣሲ ዎ፤ ዪ ና̈ሳ̈ዲ ዳማ̈ስቃ ዶኢዝ ኣይሁዳን ዎይንፖ ኣንጂንቲ̇ኖ ኣሴ፤ ሙ̈ሳ ሂጊ̇ን ቦንቺ ጾ̈ሳ̇̈ባር ኢ̈ጪ̇ዝ ኣሴ።

¹³ኢ ታ̈ክ ዬ̈ር ታ ላፍ ኤቃ̇ሪ ‘ቴ ኢሻ ሳ̈ኦ̈ሎ! ኔ ኣ̈ፊን ማ̈ቃ̇ ቤቃ̇ጋቤ!’ ጌይዴ፤ ዪና̇ ኢዝባራ ታ ኣ̈ፊን ፊርቂንቲ̇ን ኢያ ቤቃ̇ ዲጛዴ።

¹⁴ኢያር ታ̈ኮ ‘ኑ ባ̈ቢንታ̇ን ጾ̈ሳ̇̈ዲ ኣብዝ ኮዪ̈ርኮ ኔ ኤራምፔ̈ኒ ጎዳ ጌ̈ሻ̇ ቤቃ̇ምፔ̈ንኬ ኢ ቃ̈ሊን ሲስካምፔ̈ን ኔ̈ና ቲ̈ኒታር ማራ̇ጺኔ።

¹⁵ዪኖ̇ ኢ ዎቲኖንዳ ኔ ቤቂ̇ኖ ባዚምቤኬ ኔ ሲስኪ̇ ባዚምቦ ኣስ ዎይ ቲ̈ን ኢብ ማርካ ማ̈ቃ̇ምፔ̈ኔ።

¹⁶ዪዶኮ ዓት ዪዚ ኔ ኣብዝ ና̈ጋ̈ራ? ዲንዳ̇ራ ኢ ሱምን ጼ̈ይጋሙታ̇ ጻማ̇ቂንታ̇ቤ፤ ኔ ናጋሪን ጋርታፓ̇ሬ ሜ̈ጪንታ̇ቤ።’ ጌይዴ።

¹⁷“ቴ ዬሩሳ̈ላም ማ̈ቃ̇ ዬ̈ራ ጾ̈ሳ̇̈ ኬ̈ ጋርታ ጌላር ዎ̈ሳ̇ምባራ፤

¹⁸ጎዳ ታ̈ክ ጋ̈ሪ ‘ኔ ታ ባዝ ሶ̈ላዚን ሲስኪባ̈ሶኮታ̇ቦ ኔ̈ኒ ዓት ኤሊ̇ር ዬሩሳ̈ላማፖ ኬስካ̇ቤ’ ጌይዴ።

¹⁹“ታ̈ናር ኢ̈ኮ “ጎዳዶ! ታ̈ኒ ኣይሁዳን ዎ̈ሳ ኬ ጋርሳባር ቢሪንታሙታ̇ ኔ̈ና ኣማ̇ኒዝ ኣሳን ቡኪ̇ኖንዲኬ ቃቺሺኖን ዓን ኣሳን ኢንቲ̇ ፌ ቆሚ̇ን ኤሪ̈ሬ” ጋ̈̈ዴ።

²⁰ኔ̈ብ ማርካ̇ ማ̈ቂ̇ኖ ኢስጣፋ̈ኖ̈ሳ ዎዚምባር ታ̈ናር ኢንታ ላፍ ኤቃ̇ራ ዎዶን ኢንቲ̇ ዎቲኖ ባዚን ታ̈ናር ኮሼ ጌይኔ፤ ማ ዪኒ̇ባር ኢንታ ኣፊሊን ናጊዛ ታ̈ና።

²¹“ጎዳ̈ዳሬ ታ̈ኮ ‘ቴ ኔ̈ና ጎት̇ ዎ ኣይሁድ ባዮ̇ ኣሳንኮ ሚሺዛኮታ̇ቦ ዲንዳ̇ራ ሉካብ!’ ጌይዴ።”

²²ዪኖ̇ ዬሊ̇ዝ ዲራስ ዎርዣ ዎይ ጳውሎ̈ሳ ሶ̈ሊን ሲስኪ̈ርዶን፤ ዪኒፖ ዎሃ ፌ ቆ̈ ሾክ̇ ዎታሪ “ዓ̈ፌ̈ኖ ና̈ሳ ሳ̈ዝ ጋልዳፖ ዮ! ዓ̈ፌ̈ኖ ኣሲ ሼምፓባር ዶኣንዳብ ኮሺ̇ባ̈ሴ!” ጌዪሙታ ዉይሲዴ።

²³ኢንቲ ዉይሲሙታ̇ ፌ ኣፊላ ዡጊዲ ሳ̈ዳ̇ፖ ቡልኣ ኤካ̇ሪ ኣፋ ኣይጊ ጋልዳ ላ̈ሊ ኤ̈ዴ።

²⁴ኢንታ ኣላቃ̈ዲ ዪኖ̇ ቤቃ̇ሪ ጳውሎ̈ሳ ኤ̈ሪ ዎታ̈̇ዳራን ዶኣዝ ቤሲን ኤ̈ጛር ጌልሳምፔ̈ን ኪ̈ቲ̇ዴ፤ “ዎርዣዲ ኣባብ ኢ ጋልዳ ዓ̈ፌ̈ን ዉይሲ̈ርኮ ኤራንዳ̇ቦ ጋራ̇ፊሙታ̇ ኢያ ኦይጪ̇ብቴ” ጋ̈ር ኪ̈ቲ̇ዴ።

²⁵ኣሳን ጳውሎ̈ሳ ጋማ̇ባር ቃቻ̇ር ጋራ̇ፋንዳብ ዎታዚምባራ ጳውሎ̈ሲ ፌ ላፍ ኤቂ̇ኖ ማታላቃ̈ኮ “ሂጋ̇̈ዲ ሮ̈ማ ጋዶ̇ ኣስ ማ̈ቂኖዳ ፊርዳ ቤይ ቡኮ̇ ጌይራ?” ጌይዴ።

²⁶ማታላቃ̈ዲ ዪኖ̇ ሲስካ̇ሪ ፌ ኣላቃ̈ክ ሉካ̇ሪ “ኔ ዓት ዎዛርታ̇ንዳ? ዓ ና̈ሳ̈ዲ ሮ̈ማ ጋዶ̇ ኣሴ!” ጌይዴ።

²⁷ኣላቃ̈ዲ ጳውሎ̈ሳክ ዬ̈ሪ “ኔ ታ̈ብ ሶ̈ላቤ፤ ኔ̈ኒ ሮ̈ማ ጋዶ̇ ኣሳ?” ጋ̈ር ኦይጪ̇ን ኢያር “ኣዓ” ጌይዴ።

²⁸ኣላቃ̈ዳሬ ኢ̈ኮ “ታ̈ኒ ዎይሊን ሚ̈ሽ̇ ጪጋ̇ራ ግሪካ ኣስ ማ̈ቂ̇ኔ” ጌይን፤ ጳውሎ̈ሲ ማ̈ቃ̇ር ኢ̈ኮ “ታ̈ኒ ዬሊንታ̇̈ርዶራር ግሪክ ኣሴ” ጌይዴ።

²⁹ዪዚ ኢያ ኦይጪ ማርማራንዳ̇ብ ጊ̈ጊንቲ̇ኖ ኣሳን ኤሊ̇ባር ኢያ ኣሻ̇ር ፋኪ̇ዴ፤ ና̈ሳ ኣላቃ̈ዳሬ ሮ̈ማ ኣስ ማ̈ቂ̇ኖዳ ሳንሳላታባር ቃቺ̇ኖኮታ̇ቦ ኢ̈ጪ̇ዴ።

³⁰ኢዝ ዎንን ና̈ሳ ኣላቃ̈ዲ ኣይሁዳን ጳውሎ̈ሳ ሞ̈ቲኖ ጋሺ̇ን ኣብዛብኮ ኤራንዳ̇ብ ኮያሪ ቄ̈ሳንቦ ኣላቃንኬ ኣይሁድ ፊርዳ ኣሎ ኣሳን ዎይ ሺ̈ቃምፔ̈ን ኪ̈ቲ̇ዴ፤ ጳውሎ̈ሳ ቃሺ ኣ̈ላፖ ቢሊ̇ ኤ̈ጛር ኢንታ ቲ̈ን ሺ̈ሺ̇ዴ።