Read basketo ሃዋ̈ 23 Bible Online

ሃዋ̈ 23 - basketo bible

ሃዋ̈ 23

¹ጳውሎ̈ሲ ፊርዳ ኣ̈ሎ ኣሳን ኮት̇ ዎቲ ቤቃ̇ሪ “ቴ ኢሺንታ̇ን! ታ̈ኒ ዓኖ̇̈ ዬላ̇ራ ዎይ ጋላስ ጾ̈ሳ̇̈ ቲ̈ን ዎንዳ ኮሻ ቆፊባራ” ጌይዴ።

²ቄ̈ሳ̈ ኣላቃንቦ ኣላቃ ሃና̈ኖ ጳውሎ̈ሳ ኖ̈ኒን ባቃ̇ምፔ̈ን ኢ ላፍ ዎ ኣሳን ኪ̈ቲ̇ዴ።

³ዪኒ̇ባራ ጳውሎ̈ሲ ሃና̈ናኮ “ኔ̈ኒ ቦቃባር ሜ̈ሺንቲ̇ኖ ጎፓ ማይጺዛ̈ዲ! ጾ̈ሲ̈ ኔ̈ና ቡኪ̇̈ሬ! ሂጊ̇ን ጋ̈ዚንዲፌ̈ን ታ ጋልዳ ፊርዳንዳብ ዶኣራ ማ ኔ ቆሚ̇ን ሂጊ̇ን ኣሻ̇ራ ታ̈ና ቡካ̇ምፔ̈ን ኪ̈ታ̇̈ራ? ዪዚ ኔ ኔ ቆሚ̇ን ሂጊ̇ን ና̈ጋካ̇ዬ” ጌይዴ።

⁴ጳውሎ̈ሳ ላፍ ኤቃ̇ር ዎን ኢ̈ኮ “ኣን ኔ̈ኒ ጾ̈ሳ̇ ቄ̈ሳ̇ንቦ ኣላቃ̈ ቆራ?” ጌይዴ

⁵ኢያር ኢንታ̇ኮ “ቴ ኢሺንታ̇ን! ኢ ቄ̈ሳ̈ንቦ ኣላቃ ማ̈ቂ̇ኖን ቴ ኤራካ̇ዬ፤ ኣባጌዪን ‘ኔ ዎርዣ̈ቦ ኣላቃ ጋልዳ ኢ̈ት ባዝ ሶ̈ላፔ’ ጋ̈ር ጻ̈ፊንቲ̇ኔ” ጌይዴ።

⁶ጳውሎ̈ሲ ኢና ዎ ኣሳን ጋርታፖ ባጋ̇ን ሳዱቃ ባጋ̇ን ፋራሳ̈ዋ ማ̈ቂ̇ኖን ኤራሪ “ቴ ኢሺንታን! ታ̈ኒ ፋራሳዋን ጋርታፖ ዬሊንቲ̇ኖ ፋራሳ̈ዋ፤ ቤቂ̇ብቴ ዓይቂ̇ኖ ኣሲ ዲንዲ̈ሬ ጌያ ታ ኣማ̇ናዚንኮታ̇ቦ ታ̈ና ፊርዳ ኣ̈ል ሺ̈ሺ̇ኔ” ጋ̈ሪ ፌ ቆ̈ን ሾክ̇ ዎታር ኣይሁድ ፊርዳ ኣ̈ሎ ኣሳን ቲ̈ን ሶ̈ሊዴ።

⁷ጳውሎ̈ሲ ዪኖ̇ ሶ̈ሊን ፋራሳ̈ዋን ጊዳ̇ኬ ሳዱቃን ጊዳ̇ ዋቺ̇ ዲንዲን ኣይሁዳን ፊርዳ ኣሊን ናምኢ ፋጊንታ̇ዴ።

⁸ሳዱቃን “ዓይቂ̇ኖ ኣሳቦ ዲንዳ ባዬ̇፤ ኪ̈ታንቻ̇ር ባዬ̇፤ ኣያ̇ናር ባዬ̇” ጌይን ፋራሳዋን “ዪን ዎይ ዎ” ጋሪ ኣማ̇ኒ̈ሬ።

⁹ዪኒ̇ባራ ኢንታ ጊዳ̇ ጴች ዋቺ̇ ኬስኪ̇ን ፋራሳዊ ማ̈ቂ̇ኖ ፔቲ̇ ፔቲ̇ ሙ̈ሳ ሂጋ̇ ኣስታማ̈ራን ዲንዳ̇ሪ “ኑ̈ኒ ና̈ሳ ዓ ጋልዳ̇ ኣባካር ኢታ ባዝ ዲጛካዬ፤ ኣያ̇ና ዎይ ኪታንቻ ኢ̈ብ ሶ̈ሊኖ ማ̈ቃ̇ንዳብ ዳንዳኢ̈ሬ፤ ኑ ኣብዝ ኤሪ̈ራ?” ጋ̈ሪ ዎልዎልኣ ዋጪዴ።

¹⁰ኢንታ ጊዶ̇ ዋቺ̇ን ሚ̈ጛሙታ ሉኪ̇ኖኮታ̇ቦ ኣሳን ጳውሎ̈ሳ ኤ̈ር ሾይላካዮ̈ዲፌ̈ን ዎታ̇ዳራን ኣላቃ̈ዲ ኢ̈ጫ̇ሪ ዎታ̈̇ዳራንኮ “ዪንቲ ሶ̈ባሪ ጳውሎ̈ሳ ኣሳን ጊዳ̇ፖ ዎልቃባር ኬሲ̇ ኤካ̇ር ዓይ ዬ̈ሪ ዎታ̇̈ዳራን ዶኣዝ ቤሲ̇ን ኤ̈ጚብቴ!” ጋ̈ሪ ኢንታ̇ ኪ̈ቲ̇ዴ።

¹¹ኢዝ ዎንን ቃም̇ ጎዳ̈ዲ ጳውሎ̈ሳ ላፍ ኤቃ̇ሪ ኢ̈ኮ “ኢ̈ጫፔ ዬሩሳ̈ላም ጋርታ̇ ኔ ታ̈ብ ማርኪቲኖንዲፌ̈ኒ ማ ሮ̈ማ ጋዳር̇ ማርኪታንዳ̇ብ ኮሻ̇̈ሬ” ጌይዴ።

¹²ሳ̈ዚን ዎንቲ̇ን ኣይሁዳን ሺ̈ቃሪ “ኑ̈ኒ ጳውሎ̈ሳ ዎካይዶሪ ፊ̈ሻር ሞ̈ብዳ፤ ዋ̈ር ኡሽኪባ̈ዳ” ጋ̈ሪ ዎል ዎልኣ ጫ̈ቂ̇ዴ።

¹³ዪኖ ዎል ዎልኣ ዞሪንቲ̇ኖን ኦይዲ ታጳ ኣሳፖ ሺ̈ሬ።

¹⁴ኢንቲ ቄ̈ሳ ኣላቃንኬኬ ጋዳ ጪጛሻንኮ ሉካ̇ሪ “ኑ̈ኒ ጳውሎ̈ሳ ዎካ̇ይዶሪ ካ ሞ̈ንዳባዬ ጋ̈ሪ ዎልዎልኣ ሚን ጫ̈ቂ̇ኔ፤

¹⁵ዪ̈ኮታ̇ቦ ዪንቲ ኣይሁድ ፊርዳ ኣሎ ኣሳንባር ዎልኣ ማ̈ቃ̇ሪ ኮሺንቺ ኢያ ኦይጪ̇ዝ ባዚ ዎዲፌን ማይጺሳሪ ጳውሎ̈ሳ ዪንታ̇ብ ኤሄይሳምፔ̈ን ዎታ̇̈ዳራን ኣላቃ ኦይጪ̇ብቴ፤ ኑ̈ናሬ ኢ ዓንዳ ዬላ̇ካ̇ይዶን ኑ ኢያ ዎንዳብ ጊ̈ጊንቲ̇ኔ” ጋ̈ሪ ኢንታ̇ብ ሶ̈ሊዴ።

¹⁶ዎቲናካር ጳውሎ̈ሳ ሚሺ ናኣ̈ዲ ኢንቲ ዞሪንታዚን ሲስኪ̇ኖኮታ̇ቦ ዎታ̇ዳራን ዶኣዝ ቤሲ̇ን ጋርታ ሉኪ̈ ጌላሪ ጳውሎ̈ሳብ ሶ̈ሊዴ።

¹⁷ጳውሎ̈ሳሬ ማታላቃን ጋርታፖ ፔታ̇ና ጼ̈ይጋሪ “ዓ ና̈ራ̈ዲ ዎታ̇̈ዳራን ኣላቃ̈ቦ ሶ̈ሊዝ ባዚ ዎኮታ̇ቦ ኢያ ኢ̈ክ ዬልቤ” ጌይዴ።

¹⁸ማታላቃ̈ዲ ና̈ራ ዎታ̇̈ዳራን ኣላቃ̈ኮ ኤኪ̇ ጌላሪ “ቃ̈ሺ ኣ̈ል ዎ ጳውሎ̈ሲ ታ̈ና ጼይጋሪ ዓ ና̈ራ ኔ̈ብ ሶ̈ሊዝ ባዚ ዎኮታ̇ቦ ኔ̈ክ ኤካር ዬምፔ̈ን ታ̈ና ጌሺኔ” ጌይዴ።

¹⁹ዎታ̇̈ዳራን ኣላቃ̈ዲ ናኣ ኩሺን ኤ̈ር ጌዳ ዱማ ኣ̈ሪ ኢ̈ኮ “ኔ ታ̈ብ ሶ̈ላንዳ̇ብ ኮዪኖ ባዚን ኣብዛ?” ጋ̈ሪ ኢያ ሙታ̇ ኦይጪ̇ዴ።

²⁰ና̈ራ̈ዳር ኢ̈ኮ “ኣይሁዳን ጳውሎ̈ሳ ኮሺንቺ ኦይጪ̇ዛ̈ዲፌ̈ን ማይጺሳሪ ጊያ̈ባቦ ኣይሁዳን ፊርዳ̈ሎ ኣሳን ቲ̈ን ሺ̈ሻ̇ምፔ̈ን ኔ̈ና ኦይጫ̇ንዳብ ዎልዎልኣ ዞሪንቲ̇ኔ።

²¹ዎቲናካሬ ኔ ኢንታ̇ኮን ሲስካፔ̇ ‘ኑ ኢያ ዎካይዶር ካ ሞ̈ንዳባዬ፤̇ ዋ̈ ኡሽካ̇ንዳባዬ̇’ ጋ̈ሪ ዎልኣ ዞሪንቲ̇ኖ ኦይዲ ታጳፓ ሺዝ ኣሲ ኢያ ዎንዳብ ባያር ና̈ጊ ዎ፤ ዪ̈ኮታ̇ቦ ኢንቲ ዓት ኔ ጋ̈ዝ ባዚን ሙታ̇ ሲስካ̇ንዳብ ና̈ጊ̈ኔ” ጌይዴ።

²²ዎታ̇̈ዳራን ኣላቃ̈ዲ ና̈ራ̈ኮ “ዪና̇ ኔ ታ̈ብ ሶ̈ሊኖን ኦ̈ባካር ሶ̈ላፔ” ጋ̈ሪ ኢያ ሚሺዴ።

²³ዪኒፖ ዎሃ ዎታ̇̈ዳራን ኣላቃ̈ዲ ማታላቃን ጋርታፖ ናምኣን ጼይጋሪ ኢንታ̇ኮ “ሳ̈ዚ ቃማ̇ር ዓይዚ̇ ሳኣ̈ታ ማ̈ቄ̇ጌይን ቂሳ̈ራ ሉኪ̇ዝ ናምኢ ጼታ ዎታ̇̈ዳራ፤ ፋራ ጋልዳ ቶጋ̇ር ኦሊዝ ኣስ ታብዛ ታጳኬ ቶ̈ራባር ኦሊዛ ናምኢ ጼ̈ታ ኣሲ ጊ̈ጊሲብቴ̇፤

²⁴ጳውሎ̈ሳባር ፋራ ጊ̈ጊሳሪ ጋዲን ኣቂሲዛ ፊልኪሳክ ኮሽ̇ባር ዬላ̇ምፔ̈ን ዎቲብቴ” ጌይዴ።

²⁵ማ ዳብዳ̈ባ̇ር ዪዝ ጌይዛ ጻፊዴ፤

²⁶“ቄላውዶዎሳ ሉሲዮሳፖ፤ ጋዲን ኣቂሲዛ ቦንቺንቲ̇ኖ ፊልካሳቦ! ሳሪቲ ኔ̈ብ ማ̈ቆ̇።

²⁷ኣይሁዳን ና̈ሳ ዓ ኤ̈ሪ ዎንዳብ ዎቲ̈ርዶን፤ ታ̈ኒ ዎቲናካር ኢ ሮ̈ማ ጋዶ̇ ኣስ ማ̈ቂ̇ኖን ኤሪኖኮታ̇ቦ ዎታ̇̈ዳራንባር ዎልኣ ማ̈ቃ̇ር ዬላ̇ር ኢያ ቡ̈ቲሳዴ።

²⁸ኢንቲ ኢያ ኣባብ ሞ̈ቲኖኮ ታ̈ኒ ኤራንዳብ ኮያራ ኢንታ ፊርዳ ኣ̈ል ኢያ ሺ̈ሻ̇ዴ።

²⁹ኢንቲ ኢያ ሞ̈ቲኖንዳ ፌ ሂጊ̇ን ጊሻ̇ብዶኬ ኢያ ዓይቃቦ ዎይ ቃሺብ ዬ̈ልዝ ባዚ ባዮ̇ን ቴ ኤራዴ።

³⁰ኣይሁዳን ና̈ሳ ዓ ዎንዳብ ዎልኣ ዞሪንቲ̇ኖን ቴ ሲስካ̇ራ ኤሊር ኔ̈ክ ሚሻዴ፤ ኢያ ሞ̈ቲዝ ኣሳንር ኢ ኢ̈ሲ̇ኔ ጌይዝ ባዛን ኔ ቲ̈ን ሶ̈ላምፔ̈ን ቴ ኢንታ ኪ̈ታ̇ዴ።

³¹ዪ̈ኮታ̇ቦ ዎታ̇̈ዳራን ኢንታ̇ ኪ̈ቲ̇ኖንዲፌ̈ን ጳውሎ̈ሳ ቃም̇̇ ኤ̈ጛር ኣንቲጳጥሪሳ ዬሊዴ።

³²ኢዝ ዎንን ፋራ ጋልዳ ቶጋ̇ር ኦሊዛን ጳውሎ̈ሳባር ዎልኣ ሉካምፔ̈ን ዎታሪ ኢንቲ ዎታ̇̈ዳራን ዶኣዝ ቤሲ̇ን ማ̈ቂ̇ዴ።

³³ፋራ ጋልዳ ቶጋ̇ር ኦሊዛን ቂሳ̈ራ ዬላ̇ሪ ዳብዳ̈ቢን ጋዲን ኣቂሲዛ̈ቦ ኢማ̇ሪ ጳውሎ̈ሳ ኢ ቲ̈ን ሺ̈ሺ̇ዴ።

³⁴ጋዲን ኣቂሲዛ̈ዲ ዳብዳቢ̇ን ናባ̇ቢኖፖ ዓኒ ጳውሎ̈ሳኮ “ኔ ዎይዲ ጋዶ̇ ኣሳ?” ጋ̈ሪ ኢያ ኦይጪ̇ዴ፤ ኢ ኪልቃ ጋዶ̇ ኣስ ማ̈ቂ̇ኖን ኤራሪ፤

³⁵ኢኮ “ኔ̈ና ሞ̈ቲዝ ኣሳን ዬ̈ዬጌይንዶ ኔ ሶ̈ሊን ሲስካ̇ንዳ” ጋ̈ሪ ዎታ̇̈ዳራን ካ̈ታ ሄሮ̈ዲሳ ኬ̈ን ጋርታ ኢያ ና̈ጋምፔ̈ን ኪ̈ቲ̇ዴ።