Read basketo ሃዋ̈ 24 Bible Online

ሃዋ̈ 24 - basketo bible

ሃዋ̈ 24

¹ኢሺ̇ን ቃማ̇ፖ ዎሃ ቄ̈ሳን ኣላቃ ሃና̈ኖ ፔቲ̇ ፔቲ̇ ጪጛሻንኬ ጣርጣሎስ ጌይዛ ጻባቃባር ዎልኣ ማ̈ቃ̇ር ቂሳ̈ራ ካታማ ሉኪ̇̇ዴ፤ ኢንታ̇ሬ ጋዲን ኣቂሲዝ ካ̈ታ ፊልካ̈ሳ ቲ̈ን ሺ̈ቃር ጳውሎ̈ሳ ሞ̈ቲዴ።

²ጳውሎ̈ሲ ጼይጊንታር ዬይን ጣርጣሎ̈ሲ ጌይርዶሪ “ቦንቺንቲ̇ኖ ፊልኮ̈ሶ! ኔ ካዉቲኖፖ ዓኒ ኑ̈ኒ ሳሪቲ ዲጚኔ፤ ኔ̈ኒ ኮሽ ኣቂሳዚንዳ ኑ ዎርዣባር ኮሽባዝ ቤይሲኔ፤

³ቦንቺንቲ̇ኖ ፊልኮ̈ሶ! ዓና̇ ኔ̈ኮን ኮሽ̇ ኦ̈ሲን ዎይ ቤሳ̇ ጋልዳኬ ዎይ ጋላስ ዎይሊን ኣንጂሙታ ኑ̈ኒ ኤኪ̇̈ሬ።

⁴ዓት ታ̈ኒ ኔ ጊዚን ሜላ̇ ዉርሳብዳ ቃቢንባር ቴ ሶ̈ላዝ ባዚን ኔ ሲስካምፔ̈ን ቴ ኔና ጌሻ̈ሬ፤

⁵ዓ ና̈ሳዲ ኢ̈ታ ዓርጋ ኑብ ማ̈ቂ̇ኔ፤ ኣላማ ጋልዳ ዎ ኣይሁዳን ዎይን ጋልዳ ዋች̇ ዲንሬ፤ ፌ̈ና ጾ̈ሳ̇̈ቦ ጌይ ኢሚ̇ኖ ና̈ዝራ̈ዋ ጌዪንቲዛን ቲ̈ኒዛ ኢያ ማ̈ቂ̇ኖን ኑ ኤሪኔ።

⁶ዪኒ̇ፓር ኣ̈ሪ ጾ̈ሳ̇̈ ኬ̈̈ ቄንዳብ ዎታምባር ኑ ኢያ ኤ̈ኔ፤ ኑ ሂጊ̇ን ጋ̈ዚንዲፌ̈ን ኑ ኢ ጋልዳ ፊርዳንዳብ ኮዪንዶን፤

⁷ዎታዳራን ኣላቃ ሉ̈ሳ̈ሲ ዬ̈ሪ ዎልቃባር ጋቺ̇ ኑ ኩሽታፖ ኢያ ኤኪ̇ዴ።

⁸ኢያ ሞ̈ቲዝ ኣሳንሬ ኔ̈ክ ዬምፔ̈ን ኪ̈ቲ̇ዴ፤ ዓኖ̇ ኑ ኢ ጋልዳ ሺ̈ሺ̇ኖ ሞ̈ቲን ዎይ ኪን ማ̈ቃ̇ዚን ኔ ኔ ቆሚ̇ን ኢያ ኮሺንቻ ኦይጫ̇ራ ኤራንዳብ ዳንዳኣ̈ሬ” ጋ̈ሪ ኢያ ሞ̈ቲ ኤ̈ዴ።

⁹ኣይሁዳን “ዪ ዎይ ባዛ̈ዲ ኪን” ጌዪ ኢ ሞቲን ማ̈ዲ̇ዴ።

¹⁰ጋዲን ኣቂሲዛ ፊልኮ̈ሲ ጳውሎ̈ሳ ኦይጪ̇ን ኢ ጌይርዶሪ “ኔ̈ኒ ዎይሊን ላይ ዓና̇ ጋዲን ኣቂሲኖን ቴ ኤሪዛኮታቦ ታ ጋልዳ ሺ̈ቂኖ ሞ̈ቲምቦ ማልሳ ኤካ̇ር ኔ ቲ̈ን ሺ̈ቃምባ̇ራ ታ̈ና ዎይሊን ኡፋይሳ̇̈ሬ።

¹¹ታ̈ኒ ዬሩሳ̈ላማ ጾ̈ሳ̇̈ቦ ጎሽታ̇ንዳቦ ሉኪ̇ን ታጶ ናምኢ ቃማፖ ኣባሶ̈ን ኔ̈ኒ ኦይጫ̇ራ ኤራንዳብ ዳንዳኣ̈ሬ፤

¹²ጾ̈ሳ̇̈ ኬ̈̈ ጋርታ̇ር ማ̈ቂ̇ን ኣይሁዳን ዎ̈ሳ ኬ̈ ጋርታ ዎይ ካታማ ጋርታ ቴ ኦባርካር ዋጫምባር ዎይ ዎርዣ ዋቻ̇ብ ዲንምባር ኢንቲ ታ̈ና ዲጛካዬ።

¹³ኢንቲ ዓት ታ ጋልዳ ሺ̈ሺ̇ኖ ሞ̈ቲምቦ ዎይ ኣባካር ማርካ ሺ̈ሻ̇ንዳብ ዳንዳኢባ̈ሴ።

¹⁴ዎቲናካሬ ዪኖ̇ ቴ ኔ̈ብ ፋል ሶ̈ላንዳብ ኮያ̈ሬ፤ ሂጊ̇ን ጋልዳ ዎን ናባን ጻ̈ፊኖን ዎይ ኣማ̇ናራ ታ ባ̈ቢንታን ጾ̈ሳ̇̈ ኢንቲ “ኦራ ኣማ̇ና ጎይ” ጌዪ ጼይጋዚ ጎይንዲፌ̈ን ታ̈ኒ ጾ̈ሳ̇ ጎሽታ̇̈ሬ።

¹⁵ኢንታ̇ር ታስፋ ዎታዚንዲፌ̈ኒ ታ̈̈̈ናሬ ጺላ̇ንኬ ዎርዳን ዓይቃ ጋርታፖ ዲንዳዚን ኣማ̇ና̈ሬ።

¹⁶ዪ̈ኮታ̇ቦ ጾ̈ሳ̇̈ ቲ̈ንኬ ኣሳ ቲ̈ን ኮሽ̇ ቆፊ ታ̈ብ ዶኣምፔ̈ን ዎይ ጋላስ ሚ̈ጛሬ።

¹⁷“ቴ ዬሩሳ̈ላማፖ ኬስኪ̇ን ዎይሊን ላይ ኣ̈ኖፖ ዓኒ ቴ ዎርዣቦ ማ̈ቂ̇ዝ ማ̈ዲ ሚ̈ሽኬ ጾ̈ሳ̇̈ቦ ማባ ሚ̈ሽ ኤ̈ራ ዬ̈ዴ።

¹⁸ጾ̈ሳ̇̈ ኬ̈ ጋርታ̇ሬ ቴ ዪኖ̇ ኢዞ ዎታምባር ኢንቲ̇ ታ̈ና ዲጚኔ፤ ዪኒ̇ባራ ታ̈ኒ ጌ̈ዥጋዝ ዎጊን ኦ̈ ዉርሳራ ጌ̈ዥጋር ዎ፤ ዪና̇ ኢዝ ኬሊ̇ንባራ ታባር ዎይሊን ዎርዣር ባዬ̇፤ ማ ዋቻ̇ር ዲንዳካ̇ዬ።

¹⁹ዎቲናካሬ ኢ̈ሳፖ ዬይኖ ኣይሁዳን ኢና ዎ፤ ኢንቲ ታ̈ና ሞ̈ቲዝ ባዚ ዎኮ ኔ ቲ̈ን ዬር ሶ̈ላጋቤ።

²⁰ዪኒ̇ፖ ዓኒ ኣይሁዳን ፊርድ ኣ̈ሎ ኣሳን ቲ̈ን ቴ ሺ̈ቂኖ ኬል̇ባራ ቴ ኢ̈ሲ̇ኖ ባዚ ዎኮ ዓን ሺ̈ቂኖ ኣሳን ሶ̈ላጋ̈ቤ።

²¹ኪን ቴ ኢንታ ጊዳ̇ ኤቃ̇ራ ‘ዓይቂ̇ኖ ኣሳብ ዲንዶ ዎ ጌይኖንኮታቦ ዓታ̇̈ብ ቴ ዪንታ̇ ቲ̈ን ፊርዳብ ሺ̈ቂኔ’ ጋ̈ራ ቴ ቆን ሾክ̇ ዎታር ሶ̈ሊኔ፤ ዪዚ ዪኒ̇ዶኬ ሜላ ቴ ኦ̈ኖ ባዚ ባዬ̇” ጌይዴ።

²²ፊልካ̈ሲ ዎቲናካሬ ጾ̈ሳ̇̈ ጎይማ ኮሺንቺ ኤሪዛኮታ̇ቦ “ዎታ̇̈ዳራን ኣላቃ ሉሳ̈ሶ ዬዬጌዪን ቴ ዪንታ̇ ባዝ ሶ̈ላንዳ” ጋ̈ሪ ኢንታ ሚሺዴ።

²³ጳውሎ̈ሳ ና̈ጊዝ ማታላቃ̈ኮ “ዎይሊን ኢያ ዋይካ̇ይዶራ ኮሺንቻ̇ር ና̈ጋቤ፤ ኢ ላጋ̇ን ኢ̈ብ ኮሺ̇ዝ ባዝ ዎይ ኤኪ ዬዬጌዪን ካያፔ” ጌይዴ።

²⁴ጊላ̇ ቃማ̇ፖ ዓኒ ፊልካ̈ሶ ዱሩሲላ ጋ̈ዚን ኣይሁዳ ጋዶ̇ ኢ ማጪ̇ምባር ዬይዴ፤ ጳውሎ̈ሳ ጼይጊሳሪ ዬሱ̈ስ ክርስቶ̈ሳ ኣማ̇ኒዝ ጎይ ሶ̈ላምባር ሲስኪ̇ዴ።

²⁵ጳውሎ̈ሲ ጺሊቲ ጎይኬ ኣሲ ፌ̈ና ኢ̈ት ባዝ ጋልዳፖ ና̈ጊዝ ጎይ ቢርት ቲ̈ን ዬይዝ ፊርዳ ጎይ ሶ̈ሊን ፊልኮ̈ሲ ኢ̈ጫ̇ሪ “ዓት ሉካ̇ቤ ታ̈ብ ኮሽኪ̇ኖ ሜላ ቃም̇ ኔ̈ና ጼይጊሳንዳ” ጌይዴ።

²⁶ፊልኮ̈ሲ ጳውሎ̈ሳ ጋልዳፖ ጉባ̇ ኤካ̇ንዳብ ኮዪኖኮታ̇ቦ ዎይሊን ጎይ ጳውሎ̈ሳ ጼይጊሳሪ ኢባር ሶ̈ሊንቲ̇̈ሬ።

²⁷ና̈ምኢ ላይፖ ዓኒ ጶርቆስ ፊስጦ̈ሲ ፊልኮ̈ሳ ቤሲ̇ን ካዉቲዴ፤ ፊልኮሲ ኣይሁዳን ኡፋይሳንዳቦ ኮያሪ ጳውሎ̈ሳ ቃሺ ኣ̈ል ቃቺ̇ሻር ኣሺ̇ዴ።