Read basketo ሃዋ̈ 25 Bible Online

ሃዋ̈ 25 - basketo bible

ሃዋ̈ 25

¹ፊስጦ̈ሲ ፌ ጋዲን ቂሳ̈ራ ጋርታ ጌላሪ ዓይዚ̇ ቃም̇ ኣቃሪ ኢናፖ ዬሩሳ̈ላማ ሉኪ̇̇̇ዴ።

²ቄ̈ሳ ኣላቃንኬ ፔቲ̇ ፔቲ̇ ኣይሁዳን ቲ̈ኒዛን ኢ ቲ̈ን ሺ̈ቃሪ ጳዉሎ̈ሳ ሞ̈ቲዴ።

³ጳውሎ̈ሳ ጎይም ጋልዳ ና̈ጋር ኢያ ዎንዳብ ኮዪኖኮታ̇ቦ ፊስጦ̈ሲ ኢንታ ማ̈ዳ̇ሪ ኢያ ዬሩሳ̈ላማ ጼይጊሳር ኤሄዪሳምፔ̈ን ኮሺንቺ ጌሺዴ።

⁴ፊስጦ̈ሲ ኢንታ̇ክ ጌይርዶሪ “ጳውሎ̈ሲ ቂሳ̈ራ ቃሺ ኣ̈ል ና̈ጊንቲ ዎ፤ ታ̈ናሬ ዓት ኤሊ̇ባር ማ̈ቃ̇ር ኢና ሉካ̇̈ሬ፤

⁵ዪንታ̇ ኣላቃን ታባር ቂሳ̈ራ ሉካ̇ጋ̈ቤ፤ ጳውሎ̈ሲ ኢ̈ሲ̇̇ኖ ባዚ ዎኮ ኢና ኢያ ሞ̈ቶጋ̈ቤ” ጌይዴ።

⁶ፊስጦ̈ሲ ላማካይ ዎይ ታጳ ቃም̇ፌ̈ኒ ኢንታባር ዶኢኖፖ ዓኒ ቂሳ̈ራ ሉኪ̇ዴ፤ ኢና ዬላ̇ሪ ኢዝ ዎንን ፊርዳ ቤስ̇ ጋልዳ ዶኣሪ ጳውሎ̈ሳ ፌ̈ክ ኤሄ̈ምፔ̈ን ኪ̈ቲ̇ዴ።

⁷ጳውሎ̈ሲ ዬዪ ዬሊ̇ን ዬሩሳ̈ላማፖ ዬይኖ ኣይሁዳን ኢ ቡጊዲምባር ቂርጽ ጌዪ ኤቃ̇ሪ ማርካ ዲጛንዳብ ዳንዳኢባሶ ዎይሊን ዴጺ̇ዝ ሞ̈ታ ኢ ጋልዳ ሺ̈ሺ̇ዴ፤

⁸ጳውሎ̈ሳሬ ኢንታ̇ኮ “ታ̈ኒ ኣይሁድ ሂጋ̇ ጋልዳር ማ̈ቆ̇ ጾ̈ሳ̇̈ ኬ̈̈ ጋልዳ ዎይ ሮ̈ማ ካ̈ታ ጋልዳ ኦ̈ኖ ኢ̈ታ ባዚ ባዬ̇” ጋ̈ሪ ማልሳ ማሂዴ።

⁹ፊስጦ̈ሲ ኣይሁዳን ኡፋይሳ̇ንዳቦ ኮያሪ ጳውሎ̈ሳኮ “ኔ ዬሩሳ̈ላማ ሉካ̇ራ ዓና̇ ባዚን ኢና ቴ ቲ̈ን ሞ̈ቲንታ̇ንዳብ ኮያ̈ራ?” ጌይዴ።

¹⁰ጳውሎ̈ሲ ኢ̈ክ ጌይርዶሪ “ዓዲሼ! ታ̈ኒ ሞ̈ቲንታ̇ንዳብ ኮሺ̇ዝ ቤስ̇ ሮ̈ማ ካ̈ታ ቄ̈ሳራ ፊርድ ኣ̈ሊን ጋርታ̇ ኤቂ̇ኔ፤ ማ ኔ̈ናሬ ኮሺንቻ ኤራዚንዲፌ̈ኒ ኣይሁዳን ጋልዳ ቴ ኢ̈ት ኦ̈ኖ ባዚ ኣባካር ባዬ̇፤

¹¹ቴ ኢ̈ሲ̇ኖ ባዚ ዎኮ ዎይ ታ̈ና ዓይቃብ ዬልዝ ባዝ ቴ ኦ̈ኔኮ ታ̈ና ዎፒቴ ጋ̈ባሴ፤ ዎቲናካሬ ኢንታ ሞ̈ቲን ሜላ̇ ዓሪ ማ̈ቄ̇ጌይን ኦ̈ናካር ታ̈ና ኢንታ̇ብ ኣ̈ ኢማ̇ንዳብ ዳንዳኢባ̈ሴ፤ ታ̈ኒ ሮ̈ማ ካ̈ታ̈ዲ ታ̈ኮን ፊርዶጋ̈ቤ ጋ̈ራ ኦይጪ̇ኔ” ጌይዴ።

¹²ዪና̇ ኢዝባራ ፊስጦ̈ሲ ፌባር ኦ̈ዝ ኣሳንባር ሶ̈ሊንታሪ “ኔ̈ኒ ሮ̈ማ ካ̈ታ ታ̈ኮን ማሂ ቤቆ̇ ጌዬጌይንዶ ኢ̈ክ ሉካ̇̈ሬ” ጌይዴ።

¹³ጊላ̇ ቃማፖ̇ ዓኒ ካ̈ታ ኣጊርጳኬ ቤርኒቃኬ ፊስጦ̈ሳኮ “ኔ ዓሹ ኮሽ̇ ዬ̈ዴ” ጋ̈ንዳቦ ቂሳ̈ራ ዬይዴ።

¹⁴ኢና ዎይሊን ቃም̇ ኢንቲ ጋምኢኖኮታ̇ቦ ፊስጦ̈ሲ ጳውሎ̈ሳ ባዚን ካ̈ታ ኣጊርጳቦ ሶ̈ሊርዶሪ “ፊልኮ̈ሲ ቃቻ̇ሪ ቤስ̇ ኢና ኣሺ̇ኖ ፔቲ ኣሲ ዓንዳ ዎ፤

¹⁵ታ̈ኒ ዬሩሳ̈ላም ዎዶን ቄ̈ሳ ኣላቃንኬ ኣይሁድ ጪጛሻን ዪ ና̈ሳ ባዚን ታ̈ብ ሶ̈ሊኖፖ ዓኒ ኢ ጋልዳ ፊርዳምፔ̈ን ታ̈ና ኦይጪ̇ዴ።

¹⁶ታ̈ኒ ዎቲናካሬ ‘ሞ̈ቲንቲዛ̈ዲ ሞ̈ቲዛን ቲ̈ን ኤቂ̇ን ና̈ሳ ፌ ሞ̈ቲንቲኖ ባዚምቦ ፌ ማልሲን ኢማ̇ካይዶን ሞ̈ቲንቲዝ ና̈ሳ ኣ̈ር ኢማ̇ንዳቦ ሮማ ሂጊ̇ን ካያ̈ሬ’ ጋ̈ራ ኢንታ̇ብ ማሃዴ።

¹⁷ዪ̈ኮታ̇ቦ ኢያ ሞ̈ቲዛን ሺ̈ቃር ዓይ ዬይን ጋምኣካይዶር ኢዝ ዎንን ፊርዳ ቤስ̇ ጋልዳ ዶኣራ ጳውሎ̈ሳ ቴ ቲን ሺ̈ሻ̇ምፔ̈ን ኪ̈ታ̇ዴ።

¹⁸ኢያ ሞ̈ቲዛን ሶ̈ላንዳብ ኢ ላፍ ኤቃ̇ሪ ቴ ቆፒ̇ኖንዲፌ̈ን ኢያ ሞ̈ታብ ዬልዝ ባዝ ኣባካር ኢ ጋልዳ ሺ̈ሻ̇ካዬ።

¹⁹ዎቲናካር ኢባር ዋጫዚንዳ ኢንቲ ፌ ሃይማኖታ ጎይብኬ ጳውሎ̈ሲ ‘ሼምፓባር ዎ’ ጌይዛ ዓይቂ̇ኖ ዬሱ̈ሳ ጌይዝ ና̈ሳ ባዝ ዋጪ̈ሬ።

²⁰ታ̈ናሬ ዪ̈ፌ̈ኖ ባዝ ኮሺንቻ ኦይጫ̇ንዳብ ታ̈ና ዋዪኖኮታ̇ቦ ጳውሎ̈ሳኮ ‘ዬሩሳ̈ላም ሉ̈ካ̇ራ ኢና ዓኒ̇ብ ፊርዲንታ̇ንዳብ ኮያ̈ራ?’ ጋ̈ዴ።

²¹ኢ ዎቲናካሬ ኢ ሶ̈ሊን ሮ̈ማ ካ̈ታ ቲ̈ን ቤቂንታ̇ምፔ̈ን ኮያሪ ታ̈ኮን ሮ̈ማ ካ̈ታ ቤቆ̇ ጌይኖኮታ̇ቦ ቴ ኢያ ኢና ሚሺዝ ዲራስ ቃሺ ኣ̈ል ዶኣምፔ̈ን ኪ̈ታ̇ዴ።

²²ኣጊርጳር ፊስጦ̈ሳኮ “ታ̈ናር ዪ ና̈ሳ ሶ̈ሊዝ ባዝ ሲስካ̇ንዳብ ኮያ̈ሬ” ጌይዴ። ፊስጦ̈ሳሬ ኢ̈ኮ “ኔ ጊያብ ሲስካ̈ሬ” ጌይዴ።

²³ዪ̈ኮታ̇ቦ ኢዝ ዎንን ኣጊርጳኬ ቤርኒቃክ ዎልኣ ካ̈ቲንታ ማኢዝ ኣፊላ ማኣሪ ጴች ቦንችባራ ዎታ̇ዳራ ኣላቃንባርኬ ካታሚን ጋርቶ ጴች ጴች ኣሳን ፌ ዎሂን ኤካ̇ር ዬ̈ሪ ፊርዳ ኬ̈ ጋርታ ጌሊዴ፤ ኢናፖ ፊስጦ̈ሲ ጳውሎ̈ሳ ጼይጊሲዴ።

²⁴ፊስጦሳር ጌይርዶሪ “ካታ̈ ኣጊርጶ! ኑባር ዎ ኣሳን ዪንታ̇ር ዎይ ሲስኪብቴ! ኣይሁዳን ‘ዓ ና̈ሳ̈ዲ ዓኒ̇ፖ ጌዳ ሼምፓባር ዶኣንዳብ ኮሺ̇ባ̈ሴ’ ጋ̈ሪ ዉይሲሙታ̇ ዬሩሳ̈ላማሬ ማ ዓይዳር ኢ ጋልዳ ፊርዲንታ̇ምፔ̈ን ታ̈ና ኦይጪ̇ኖ ና̈ሳ ዓ ዪንቲ̇ ቤቂ̇ዛ ኢያ።

²⁵ታ̈ኒ ኢ ጋልዳ ኢያ ዓይቃብ ዬልዝ ኢ̈ታ ኦ̈ሳ ኣባካር ዲጛካዬ፤ ኢ ‘ታ̈ና ሮ̈ማ ካ̈ታ ቲ̈ን ኣ̈ቤ’ ጌይኖኮታ̇ቦ ቴ ኢያ ዓይ ሚሻንዳብ ቆፓ̇ዴ።

²⁶ማ̈ቂ̇ናካሬ ኢ ባዝ ታ ላ̈ቦ ጻ̈ፊዝ ኤሪንቲ̇ኖ ባዚ ባዬ̇ ዪ̈ኮታ̇ቦ ኢ ኦይጪንቲ ማ̈ቂ̇ኖፖ ዓኒ ጻ̈ፊዝ ባዝ ቴ ዲጛንዳዶኔ ጋ̈ራ ዪንታ̇ ቲ̈ን ዎይፓሬ ካታ̈ ኣጊርጶ! ኔ ቲ̈ን ሺ̈ሺ̇ኔ።

²⁷ቃቺንቲኖ ኣስ ፉዳ ኣላቃ ቲ̈ን ኣ̈̈ርዶሪ ና̈ሳ̈ ሞ̈ቲሲኖ ባዚን ሶ̈ላካይ ኣታ̇ዚንዳ ታ̈ብ ቦ̈ዚቲ ማይጻር ቤንታ̇̈ሬ” ጌይዴ።