Read basketo ሃዋ̈ 28 Bible Online

ሃዋ̈ 28 - basketo bible

ሃዋ̈ 28

¹ኑ̈ኒ ባሃ̈ሪን ጋርታ̇ፖ ቡጊድ ሳ̈ዝ ጋልዳ ኮሽ̇ ዬሊ̇ኖፖ ዓኒ ኑ ዬሊ̇ኖ ቤሲ̇ንዳ ማ̈ልታ ጌይዝ ሳ̈ዝ ማ̈ቂ̇ኖን ኤሪዴ።

²ዪና̇ ጋዲን ጋርታ ዶኢዝ ኣሳን ኑ̈ቦ ዎይሊን ኮሽ̇ባዝ ኦ̈ዴ፤ ዪና̇ ኢዝ ኬሊ̇ንዳ ኢሪ ኬዳ̇ር ሳ̈ዚ ዛ̈ኪ̇ዛኮታ̇ቦ ታማ ኤይር ኑ̈ና ሞኪ̇ ኤኪ̇ዴ።

³ጳውሎ̈ሲ ዣፋ ሺ̈ሻ̇ሪ ታማ ጋርታ ሚሻምባ̇ራ ታማ̈ ሚቺ̇ዛኮታ̇ቦ ፔቲ ሾ̈ሽዶ̈ር ኬስካ̇ራ ኢ ኩሺን ቃራ ኢ ጋልዳ ሾላዴ።

⁴ማ̈ልቶ ኣሳን ሾ̈ሺ̇ ጳውሎ̈ሳ ኩሺን ጋልዳ ሾሊኖን ቤቃ̇ሪ “ዓ ና̈ሳ̈ዲ ኪን ሼምፓ ዎኖ ኣሴ! ባሃ̈ሪን ውርጊን ጋልዳፖ ኮሽ̇ ኬስኪ̇ናካሬ ጾ̈ሳ̇ ፊርዳ ጋልዳፖ ቡ̈ታ̇ሪ ሼምፓ̇ባር ዶኣንዳብ ዳንዳኣካ̇ዬ” ጌይዴ።

⁵ጳውሎ̈ሲ ዎቲናካሬ ሾ̈ሺ̇ን ቲቂሳር ታማ ጋርታ ቶጚዴ፤ ኢያ ኣባካር ዬላ̇ካይ ኣቲ̇ዴ።

⁶ኣሳንሬ “ኣ̈ንታፖ ኣ̈ንታ ኢ ጋላ̇ ኪጺ̇̈ራ፤ ዎይ ዓይቃ̇ር ኬዲ̇̈ራ” ጋ̈ሪ ዎይሊን ሳኣ̈ታ ና̈ጊን ኣባካር ኢያ ዎታካ̇ዮን ቤቃ̇ሪ ፌ ቆፊን ኦ̈ሃሪ “ዓ̈ዲ ጾ̈ሴ̇!” ጌይዴ።

⁷ኢና ኑ ዎ ቤሲ̇ን ላፍ ጋዲን ኢዞ ኣቂሲዛ ፑፒሎ̈ሳ ጌይዝ ና̈ሳ ሳ̈ዝ ዎ። ዪ̈ ና̈ሳ̈ዲ ኑ̈ና ፌ ኣ̈ል ጌልሳሪ ዓይዚ̇ ቃም ኮሺንቺ̇ ሞኪ̇ዴ።

⁸ዪና̇ ኢዝባራ ፑፕሎ̈ሳ ባ̈ባ ቆምባር ሙንትኬ ጋርሳርቃ ኢያ ኤ̈̇ን ማ ሱርቂ̈ኔ፤ ጳውሎ̈ሲ ኢ̈ክ ጌላሪ ፌ ኩሽ ኢ ጋልዳ ጋዳ̇ር ዎ̈ሳ̇ር ፋዴ።

⁹ዪ ማ̈ቂ̇ኖፖ ዓኒ ጋዲን ኢዝ ጋርታ ዶኢዝ ኣሳን ሜላን ማዛን ዬ̈ሪ ፋጺዴ።

¹⁰ኣሳን ዎይሊን ኑ̈ና ቦንቺ̇ዴ፤ ኑ̈ኒ ማርካ̇ባባር ሉካ̇ንዳብ ዲንዲን ኑ̈ብ ኮሻ̇ዝ ባዚን ዎይ ማርካ̇ባ ጋልዳ ኑ̈ብ ጫ̈ኒዴ።

¹¹ኑ̈ኒ ዓይዚ̇ ኣጋን ማ̈ልታ ዶኢኖፖ ዓኒ፥ ባርጊን ኬሊ̇ን ዎይ ኢና ኤቃ̇ር ኣ̈ኖ ኢስኪንዲራ ማርካቢን ጋርታ̇ ጌላሪ ዲንዲዴ፤ ማርካ̇ቢን ዪኒ ጋልዳ ዲዮስቆሮ̈ሳ ጌይዛ ሜንቲ ጾ̈ሳ̇ ማላ̇ ዎ።

¹²ሲራኩሳ ጋ̈ዝ ካታሚን ዬላ̇ሪ ኢና ዓይዚ̇ ቃም̇ ኣቂዴ።

¹³ኢናፖ ማርካባባር ሬ̈ጉማ ካታማ ዬላ̇ሪ ኢና ፔቲ̇ ቃም̇ ኣ̈ኖፖ ዓኒ ሲጛሎ ኣይጊ ባቂ̇ን ናምኢ ቃሚንባራ ፑቶሎ̈ሳ ካታሚን ዬሊ̇ዴ።

¹⁴ኢና ኣማኒ̇ኖ ፔቲ̇ ፔቲ̇ ኣስ ዲጚን ኢንታባራ ታብዛ ቃም ዶኣምፔን ኑ̈ና ጌሺዴ፤ ዪኒ̇ፖ ዓኒ ኑ̈ኒ ሮ̈ማ ሉኪ̇ዴ።

¹⁵ሮ̈ማ ዎ ኣማ̈ናን ኑ ባዝ ሲስኪ̇ኖፖ ዓኒ ኣ̈ፊዮስ ጋቢ ጋ̈ዚንዲኬ ዓይዚ ኣቂ ቤሳ̇ን ጌይዝ ቤሳ̇ን ዲራስ ኑ̈ና ኤካ̇ንዳብ ዬይዴ፤ ጳውሎ̈ሲ ኢንታ ቤቃ̇ሪ ጾ̈ሳ̇ ጋላታሪ ሚ̈ጚንቲ̇ዴ።

¹⁶ኑ̈ኒ ሮ̈ማ ጌሊኖፖ ዓኒ ጳውሎ̈ሳ ና̈ጊዝ ዎታ̇̈ዳራ ፔታ̇ን ኢማ̇ሪ ኢ ፌ̈ብ ዶኣምፔ̈ኒ ጌይዴ።

¹⁷ዓይዚ̇ ቃማ̇ፖ ዓኒ ጳውሎ̈ሲ ሮ̈ማ ካታሚን ጋርታ ዶኢዛን ጴች ጴች ኣይሁድ ኣሳን ጼይጊሲዴ፤ ኢንቲ̇ ሺ̈ቂኖፖ ዓኒ ኢንታ̇ኮ “ቴ ዳባ̇ን! ኢስሬ̈ላ ዎርዣ ጋልዳኬ ባ̈ቢንታን ዎጋ ጋልዳ ቴ ዎቲኖ ኢ̈ታ ባዚ ኣባካር ባዬ̇፤ ማ̈ቂ̇ናካሬ ዬሩሳ̈ላም ጋርታ ታ̈ና ቃቻ̇ሪ ሮ̈ማ ጋዶ̇ ካ̈ታ̈ቦ ኣ̈ ኢሚ̇ዴ።

¹⁸ኢንታ̈ር ታ̈ና ኦይጪ̇ኖፖ ዓኒ ዓይቃብ ታ̈ና ዬ̈ልዝ ኢ̈ታ ኦ̈ሳ ታ ጋልዳ ዲጛካዮኮታ̇ቦ ታ̈ና ቢላ̇ንዳ ኮዪዴ።

¹⁹ኣይሁዳን ‘ኢ ሜላ̇ ቢሊንቲ̇ዛ ዪ ኣባ?’ ጌይን ታ̈ኒ ሮ̈ማ ካ̈ታ ቲ̈ን ታ̈ና ሺ̈ሻ̇ምፔ̈ን ጋ̈ዶ̇ኬ ቴ ቴ ዎርዣ ሞ̈ቲዝ ባዚ ባዬ̇።

²⁰ዪዚ ዪኒ̇ኮታ̇ቦ ቴ ዪንታ̇ ጼይጊሲኖንዲኬ ዪንታ̇ ቤቃ̇ንዳብ ኮዪኖንዳ፤ ታ̈ኒ ሳንላታባር ቃቺንቲ̇ኖንዳ ጾ̈ሲ̇ ኢስሬ̈ላንቦ ኢሚ̇ኖ ታስፋ ቃ̈ሊን ሳባ̇ኪኖኮታ̇ቦ” ጌይዴ።

²¹ኢንታ̇ሬ ኢ̈ኮ “ይሁዳ ጋዳ̇ፖ ‘ኢ ዪስቲ̇ኔ’ ጌይዝ ባዝ ጻ̈ፊንቲ̇ኖ ዳባዳ̈ቢ̇ ኑ̈ና ዬሊ̇ኖ ባዚ ባዬ̇፤ ዓይዲ ዬ̈ዪኖ ኣሳን ጋርታፖ ኦ̈ናካር ኔ ባዝ ኑ̈ብ ሺ̈ሺ̇ኖ ኣሲ ዎይ ኢ̈ት ሶ̈ሊኖ ኣሲ ባዬ̇።

²²ዓና̇ ኔ̈ኒ ኣማ̇ናዝ ኣማ̇ኒን ጎይ ዎይ ቤስ̇̇ ጋልዳ ኣሳን ዎይ ኢዞ ኢጻ̇ዚን ኑ ኤሪ̈ሬ፤ ዪኒ̇ቦ ኔ ቆፊን ዎዛርፌ̈ንኮ ኑ̈ ኔ ጋልዳፖ ሲስካ̇ንዳብ ኮዪ̈ሬ” ጌይዴ።

²³ኢንቲ ኢ̈ብ ኬ̈ሪጚኖፖ ዓኒ ዎይሊን ኣስ ማ̈ቃ̇ር ኢ̈ክ ኣ̈ል ዬ̈ይዴ፤ ኢያሬ ጌ̈ሻ̈ፖ ኦማ ዬሊ̇ዝ ዲራስ ጾ̈ሳ̇̈ ካ̈ቲቲኮ ጎይ ኢንታ̇ብ ማርኪቲሙታ̇ኬ ታማ̈ርሲሙታ ፌ̈ሽኪ̇ዴ፤ ኢንታ ዬሱ̈ሳ ጎይ ኣማ̇ንንዳ̇ቦ ሙ̈ሳ ሂጋ̇ኬ ናባን ማጻ̈ፋ ጋልዳ̇ፖ ዲንሙታ̇ዶር ታማ̈ርሲ̇ዴ።

²⁴ፔታ̇ን ፔታ̇ናን ኢ ሶ̈ሊኖ ቃ̈ሊን ኣማ̇ኒዴ፤ ሜላን ኣማ̇ናካ̇ዬ።

²⁵ኢንታ̇ር ዎል ዎልኣ ሳማ̈ማ̇ኣካይዶር ኣቲ̇ዴ ኢናፖ ጳውሎ̈ሲ ዉርሲ ቃ̈ላ ኢንታ̇ብ ሶ̈ሊኖፖ ዓኒ ኢንቲ̇ ሉኪ̇ዴ፤ ኢ ኢንታክ ጌይርዶሪ “ጌ̈ሻ̇ ኣያ̇ኖ ናባ ኢሳ̈ሳ ጎይባራ ዪንታ̇ ባ̈ቢንታንቦ ሶ̈ሊኖንዳ ኪን!

²⁶ኢ ሶ̈ሊኖ ቃ̈ሊንዳ̇ሬ፦ “ኔ̈ኒ ዪን ኣሳንኮ ሉካ̇ራ፥ ‘ዪንቲ̇ ሲሲ̇ን ሲስኪ̈ሬ፤ ዎቲናካር ኤልቅ ዎቲባ̈ሴ፤ ቤቂን ቤቂ̇̈ሬ፤ ዎቲናካሬ ቤቃ̇ር ዲጚባ̈ሴ’ ጋ̈ቤ።

²⁷ዓን ኣሳን ቡ̈ዲን ዛቢኔ፤ ኢንታ ዋ̈ይንዳር ሲስካ̇ባሴ፤ ኣ̈ፊንዳ̇ሬ ጊጲኔ፤ ዪ̈ፌ̈ን ማ̈ቃካ̇ይኮ፥ ፌ ኣ̈ፊንባር ቤቃ̇ሪ፥ ፌ ዋ̈ይምባር ሲስካ̇ሪ፥ ፌ ቡ̈ዲምባር ቆፓ̇ሪ፥ ታ̈ክ ማ̈ቂ̇̈ርዶ̈ን፥ ታ̈ናር ኢንታ ፋ̈ርዶን።

²⁸“ዪዚ ጾ̈ሳ̇̈ ፋቲ ኪ̈ታ ኣይሁድ ባዮ̇ ኣሳንቦ ዬይኖን ዪንቲ ኤሪብቴ፤ ኢንታ̇ር ኤ̈ኤ ጌዪ ኤኪ̇̈ሬ!” ጌይዴ።

²⁹[ጳውሎ̈ሲ ዪኖ̇ ሶ̈ሊኖፖ ዓኒ ኣይሁዳን ዎይሊን ዋ̈ጫር ኢናፖ ኬስካ̇ር ሉኪ̈ዴ።]

³⁰ጳውሎ̈ሲ ኪራያ ኤኪ̇ኖ ኬ̈ን ጋርታ ናምኢ ላይ ኩም ዶኢዴ፤ ፌ̈ክ ዬይዝ ኣሳን ዎይ ሞኪ̇ ኤኪ̇̈ሬ።

³¹ጾ̈ሳ̇ ካ̈ቲቲ̈ ጎይኬ ጎዳ ዬሱ̈ስ ክርስቶ̈ሳ ጎይን ሳባ̇ኪሙታ̇ ኦ̈ናካር ኢያ ካያካይዶ̈ንኬ ኢ̈ች ቤይ ታማ̈ርሲዴ።