Read basketo ሃዋ̈ 3 Bible Online

ሃዋ̈ 3 - basketo bible

ሃዋ̈ 3

¹ፔቲ̇ ጋላስ̇ ጴ̈ጥሮ̈ሳኬ ዋ̈ኒ̇ሳኬ ዎልኣ ዎ̈ሳ ዎ̈ሲ̇ዝ ሳኣ̈ታባራ ጋላስ ሳ̈ካሊ ሳኣ̈ታ ጋልዳ̇ ጾ̈ሳ̇̇ ኬ̈̈ ጋርታ̇ ሉኪ̇̈ርዶ̈ን፥

²ጾ̈ሳ̇̇ ኬ̈ ጋርታ̇ ሉኪ̇ዝ ኣሳን ጋልዳፖ̇̈ ሙጻ̈ታ ጌሻምፔ̈ኒ ኣሳን ዎይ̈ ጋላስ ቶ̈ኪ ኤሄ̈ር “ቆይሲዝ ካራ̈” ጌዪንታ̇̇ዝ ጾ̈ሳ̇̇ ኬ̈ ጋርታ̇ ጌሊዝ ካሪን ጋልዳ ጋዲ̇ዝ፥ ዬሊንቲ̇ኖምፖ̇ ኤ̈̇ር ቶሂ ዎብ ማ̈ቂ̇ኖ̈ ፔቲ̇ ኣሲ ዎ̈።

³ኢያሬ̈ ጴ̈ጥሮ̈ስኬ ዋ̈ኒ̇ስኬ ዎልኣ ኢና ጌላምባር ቤቃ̇ሪ̈ ሙጻ̈ታ ኢንታ̇ ጋልዳ ጌሺዴ።

⁴ኢንቲ̇ ኮት̇ ኢያ ቤቃ̇ሪ፥ ጴ̈ጥሮ̈ሲ ኢ̈ኮ “ኔ ዓይ ኑ̈ና ቤቃ̇ቤ̈” ጌይዴ።

⁵ና̈ሳ̈ዳር ኢንታ̇ ጋልዳ̇ፖ̇ ኣባክ ፔቲ̇ ባዝ ዲጛ̈ሬ̈ ጌዪ ቆፓ̇ሪ̈ ኮሺንቺ̇ ኢንታ̇ ቤቂ̇ዴ።

⁶ጴ̈ጥሮ̈ሲ ጋ̈ሪ “ሚ̈ሺ̇ ታ̈ብ ባዬ̇̈፤ ማ̈ቂናካሬ̈ ታ̈ብ ዎ̈ ባዝ ኔ̈ብ ኢማ̇ንዳ̇፤ ና̈ዝሬ̈ቶ ዬሱ̈ስ ክርስቶ̈ሳ ሱምንባር ዲንዳር ዬ ̇ቢሪንታ̇ቤ” ጌይዴ።

⁷ኢናፖ̇ ኢ ኡሻቻ̇ ኩሺን ኤ̈̇ር ኢያ ዲንን ኤሊ̇ባራ ኢ ቶሃንኬ̈ ቂልጫ̇ንስ ሚ̈ጚዴ̈።

⁸ፉክ ጌዪ ዲንዳር ጺት̇ ኤቃ̇ሪ ዬ ኤ̈̇ዴ፤ ጌዳክ ዓኒክ ዬ̇ሙታ̇ኬ̈ ዶ̈ጚ ሙታ̇ዶ̈ሪ ጾ̈ሳ̇̇̈ዳሬ̈ ጋላቲ ሙታ̇ዶ̈ሪ̈ ኢንታ̇ባር ዎልኣ ጾ̈ሳ̇̇ ኬ̈ ኣሲ ሺ̈ቂዛ ጋርታ̇ ጌሊዴ።

⁹ዎርዣ̈ዳር ዎይ ኢ ዬ̇ሙታ̇ኬ̈ ጾ̈ሳ̇̇̈ ጋላቲሙታ̇ ቢሪንታ̇ዚን ቤቃ̇ሪ፥

¹⁰ዓ̈ ና̈ሳ̈ዲ ዓኒ̇ፖ ቲ̈ን “ቆይሲዝ ካራ” ጋ̈ዚን ጾ̈ሳ̇̇̈ ኬ̈ ጋርታ̇ ጌላዝ ካሪን ጋልዳ ዶኣሪ ሙጻ̈ታ̈ ጌሺዛ ኢያ ማ̈ቂኖን ኤራሪ ኢ ዓት ፋጺኖን ቤቃ̇ሪ̈ ዎይሊን ጋራ̇ሚንቲ̇ዴ።

¹¹ፋጺኖ̈ ና̈ሳ̈ዲ ጴ̈ጥሮ̈ሳኬ ዋ̈ኒ̇ሳ ኣሻ̇ብዳ ጋ̈ሪ ኢንታ̇ባር ዎልኣ ዎዶ̈ን ዎርዣ̈ ዎይ ጋራ̇ሚንታ̇ሪ “ሶሎሞ̈ን ባራንዳ̇” ጌያ ጼይጊንታ̇ዝ ጎይንባር ዎባራ ኢንታ̇ክ ዬይዴ።

¹²ጴ̈ጥሮ̈ሲ ዪና̇ ቤቃ̇ር ኢንታኮ̈ “ኢስሬ̈ላ ዎርዣ̈ዶ! ባዝ ዓኒ̇ባር ዪንቲ̇ ኣባብ ጋራ̇ሚንቲ̇̈ራ? ኑ ኑ ዎልቃባር ዎይ ኑ ጌ̈ሺ̇ቲባራ̈ ዓ̈ ና̈ሳ ፋጻር ዬ̇ምፔ̈ኒ ዎቲኖ̈ዲፌ̈ን ፋይዳር ኑ̈ና ኮት̇ ዎታር ኣባብ ቤቂ̇̈ራ?

¹³ኑ ባ̈ቢንታ̇ን ጾ̈ሳ̇̇፥ ኣብራሃ̈ማ፣ ዪሳ̈ቃኬ̈ ዓይቆ̈ባ ጾ̈ሳ̇̇̈ዲ ፌ ናኣ̈ ዬሱ̈ሳ ቦንቺ̇ዴ። ዪንቲ̇ ኢያ ዓይቃ̇ምፔ̈ኒ ኣ̈ ኢሚ̇ዴ̈። ጲላ̈ጦ̈ሲ ኢያ ቢላ̇ንዳቦ̈ ኮዪንዶ̈ኒ ዪንቲ̇ ኢያ ኢ ቲ̈ን ‘ኑ ኢያ ኮዪባሴ̇’ ጌይዴ።

¹⁴ዪንቲ̇ ጌ̈ሻ̇̈ዳ̇ክ ጺላ̇̈ዳ “ኑ ኢያ ኮዪባ̈ሴ” ጋ̈ሪ ሼምፓ ዎኖ ዪንታ̇ብ ቢላ̇ምፔ̈ን ጌሺዴ።

¹⁵ሼምፓ ኢሚ̇ዛ ዪንቲ̇ ኢያ ዎዴ፤ ዎቲናካሬ̈ ጾ̈ሲ̇ ኢያ ዓይቃ ጋርታ̇ፖ̇ ዲንዴ̈፤ ኑ̈ናር ዪኒ̇ቦ̈ ማርካ̇።

¹⁶ዓ̈ ዪንቲ̇ ቤቂ̇ዛ̈ዲኬ̈ ኤሪዛ̈ ና̈ሳ̈ዲ ፋጺኖ̈ዲ̈ ዬሱ̈ሳ ሱምባ̇ራ̈ ኣማ̇ኒኖ̈ኮታ̇ቦ̈። ዪንቲ̇ ዎይን ቤቃ̇ዚንዲፌ̈ኒ ዪ ና̈ሳ̈ዲ ዉርሲ̇ ፋጻምፔ̈ኒ ዎቲኖ̈ዲ ዬሱ̈ሳ ሱምንዲኬ̈ ዬሱ̈ሳ ጎይባራ̈ ቤንቲ̇ኖ̈ ኣማ̇ኒንዶ̈።

¹⁷“ቴ ኢሺንታ̇ን̈! ዪንታ̇̇ር ዪንታ̇ ኣላቃንፌ̈ኒ ኤራካ̇ይዶ̈ር ዓና̇ ዎቲኖን ቴ ኤራ̈ሬ።

¹⁸ዎቲናካሬ̈ ጾ̈ሲ̇ ፌዪ ማ̈ቂ̇ኖ ክርስቶ̈ሲ ሜታ ኤካ̇ምፔ̈ኒ ቲ̈ኒታር ናባን ዎይን ኖ̈ናባር ሶ̈ሊኖን ፎቲኔ።

¹⁹ዪዚ ዪንታ̇ ናጋራ̈ ዪንታ̇ቦ̈ ኣቶ̇ ጌዪንታ̇ምፔ̇̈ንኬ ጎዳ ዪንታ̇ ማ̈ዲ̇ዝ ላይ ዬ̈ምፔ̈ኒ ማ̈ሪቲ ጌላር ጎዳ̈ክ ማ̈ቂ̇ብቴ።

²⁰ቲ̈ኒታር ዪንታ̇ቦ ጌዪ ዎ̈ ክርስቶ̈ሳ ኢያሬ ዬሱ̈ሳ ዪንታ̇ብ ሚሺ̈ሬ።

²¹ጾ̈ሲ̇ ቲ̈ኒታር ጌ̈ሻ̇ ናባን ኖ̈ናባር ሶ̈ሊኖንዲፌ̈ኒ ፌ ኦ̈ኖ ባዛን ዎይ ኦራ ማሂዝ ዲራ̈ስ ዬሱ̈ሲ ኣፋ ጋምኣንዳብ ኮሺ̇̈ሬ።

²²ሙ̈ሳር ኢንታኮ̈ ‘ዪንታ̇ ጎዳ ጾ̈ሳ̇̇̈ዲ ታ̈ና ኬሲ̇ኖ̈ዲፌ̈ኒ ዪንታ̇ ጋርታ̇ፖ̇̈ ሜላ ናቢ ዪንታ̇̇ቦ ኬሲ̇̈ሬ̈፤ ኢ ዪንታ̇ብ ሶ̈ላዚን ዎይ ሲስኪ̇ብቴ̈።

²³ዪ̈ ናባ̈ኮን ሲስኪባ̈ሶ ኣሲ ዎይ ዎርዣ̈ ጋርታ̇ፖ̇ ቆሪንታ̇ር ዮ’ ጌይኔ።

²⁴“ማ ናባ̈ ሳሞ̈ልኬ̈ ኢ̈ፖ ዎሃ ዎ̈ ናባን ዎይ ኬል̇ ዓና̇ ጋርታ̇ ማ̈ቃ̇ዝ ባዚን ሶ̈ሊኔ።

²⁵ዪንቲ̇ ጾ̈ሲ̇ ፌ ናባንባር ሶ̈ሊኖ̈ ታስፋ ቃ̈ሊንዲኬ ጾ̈ሲ̇ ኣብራሃ̈ማቦ ‘ሳ̈ዝ ጋልዳ̇ ዎ̈ ኣሲ ዎይ ኔ ዜርባራ̈ ኣንጂንቲ̈ሬ̈’ ጌዪ ዪንታ̇ ባ̈ቢንታ̇ንብ ጫ̈ቂ̇ኖ̈ ጫ̈ቂን ኤኪ̇ዝ ኣሴ።

²⁶ዪ̈ኮታ̇ቦ̈ ጾ̈ሲ̇ ቲ̈ኒታር ፌ ናኣ̈ ዪንታ̇ክ ሚሺ̈ዴ̈። ኢ ዪ̈ ዎቲኖ̈ዲ ዪንቲ̇ ዎይ ዪንታ̇ ኢ̈ታ ኦ̈ሲን ጋርታ̇ፖ̇ ማ̈ሃሪ ዪንታ̇̇ ኣንጃንዳቦ” ጌይዴ።