Read basketo ሃዋ̈ 4 Bible Online

ሃዋ̈ 4 - basketo bible

ሃዋ̈ 4

¹ጴ̈ጥሮ̈ሳኬ ዋ̈ኒ̇ሳክ ዎልኣ ቢርት ዎርዣ̈ቦ ሶ̈ላ ጋልዳ ዎዶ̈ን ቄ̈ሳንኬ ጾ̈ሳ̇̇ ኬ̈ን ናጊዛንቦ ኣላቃዳ ማ ሳዱቃን ዎልኣ ኢንታ̇ክ ዬይዴ።

²ኢንቲ̇ ዎርዣ̈ ታማርሲኖንኮታ̇ብኬ ዬሱ̈ሲ ዓይቃ ጋርታ̇ፖ̇ ዲንዲኖንዲፌ̈ኒ ዓይቂ̇ኖ ኣሳብ ዲንዳ ዎን ሳባ̇ኪኖኮታ̇ቦ ኢንታ̇ ዎ̈ይሊን ጎይሊዴ።

³ጴ̈ጥሮሳኬ ዋ̈ኒ̇ሳክ ኤ̈̇ሪ ሳ̈ዚንዳ ቃም ማ̈ቂ̇ኖኮታ̇ቦ ዎንቲዝ ዲራስ ቃሺ ኣ̈ል ኢንታ̇ ኣቂሲዴ።

⁴ዎቲናካሬ ኢንታ̇ ቲሚርቲ̇ን ሲስኪ̇ኖ ኣሳን ጋርታ̇ፖ ዎይሊንን ኣማ̇ኒዴ፤ ዪዚ ኣማ̇ኒኖ ኣሳን ፋይዲንዳ ኢሺ̇ን ሙኩላ ዬላ̇ዴ።

⁵ኢዝ ዎንን ኣይሁድ ኣላቃን፣ ጋዳ ጪጛሻንኬ ሙ̈ሳ ሂጋ ታማ̈ርሲዛን ዬሩሳ̈ላም ካታሚን ጋርታ̇ ሺ̈ቂዴ።

⁶ኢና ሺ̈ቂኖ ኣሳን ጊዳ̇ ቄ̈ሳንቦ ኣላቃ ሃና̈ና፣ ቃያ̈ፋ፣ ዋ̈ኒ̇ሳኬ ኢስኪንዲሮ̈ሳ፣ ማ ቄ̈ሳን ኣላቃ̈ቦ ዳባ̇ን ዎይ ኢና ዎ።

⁷ኢንታ̇ሬ ጴ̈ጥሮ̈ሳኬ ዋ̈ኒ̇ሳክ ጊዳ̇ ኤሳ̇ሪ “ዓኖ̇ ዪንቲ ኦ̈ኖንዳ̇ ኣ ዎልቃባራ ዎይ ኦ ሱምባሪያ?” ጋ̈ሪ ኢንታ̇ ኦይጪ̇ዴ።

⁸ዪና̇ ኢዝባራ ጴ̈ጥሮ̈ሲ ጌ̈ሻ̇ ኣያ̇ናባር ኩማሪ ኢንታ̇ኮ “ዪንቲ̇ ዎርዣ ኣላቃንኬ ጋዳ ጪጛሻን!

⁹ዪንቲ̇ ዓታ̇̈ብ ና̈ሳ ዓ̈ ቶህ ዎባ̇ቦ ኮሽ ባዝ ኦንቲ̇ኖኮታ̇ብኬ ኢ ዎዛርታ̇ር ፋጺኖኮ ዪኒ̇ብ ኑ̈ና ኦይጪ̈ርኮ፥

¹⁰ዪኖ̇ ሲስኪ̇ብቴ፤ ዓ̈ ና̈ሳ ፋጻሪ ዪንታ̇ ቲ̈ን ኤቂ̇ኖንዳ ዪንቲ̇ ኢያ ሶታ̇ር ዎን ጾ̈ሲ̇ ኢያ ዓይቃ ጋርታ̇ፖ ዲንኖ ና̈ዝሬ̈ቶ ዬ̈ሱ̈ስ ክርስቶ̈ሳ ሱምባራ ማ̈ቂ̇ኖን ዪንቲ̇ ዎይን ማ ኢስሬ̈ላ ዎርዣ ዎይ ኤሮጋ̈ቤ።

¹¹ኢያሬ፥ ‘ዪንቲ ሹች ኬ̈ ኬ̈ጺ̇ዝ ኣሳን፥ ኢ̈ቴ ጌዪ ኢጺ̇ ቶጚኖ ሹቼ̇፤ ዎቲናካሬ ኢ ኬ̈ምቦ ኮዪንቲ̇ዝ ዋና̇ ሹች̇ ማ̈ቂ̇ኖ̈ዳ።’

¹²ዪዚ ዪ̈ኮታ̇ቦ ኑ ፋጻምፔ̈ን ጾ̈ሲ̇ ኣሳቦ ኢሚ̇ኖ ሱምን ኢ̈ኮምፖ ሜላ ዓና̇ ኣላሚን ጋልዳ ኦ̈ናካር ባዬ̇። ኣሲ ፋጺዛ̈ዲ ዬሱ̈ሳ ሱምባርዶኬ ሜላ ኦባርካር ጊዳካ̇ዬ” ጌይዴ።

¹³ኣሳንሬ ጴጥሮሳኬ ዋ̈ኒ̇ሳክ ኢ̈ጫካ̇ይዶ̈ር ዪ̈ዲፌ̈ን ሶ̈ሊኖን ቤቃ̇ሪ ኢንቲ̇ ታማ̈ራካ̇ዮ ኣስ ማ̈ቂ̇ኖን ኤራሪ ጋራ̇ሚንቲ̇ዴ፤ ማ ኢንቲ ዓኒ̇ፖ̇ ቲ̈ን ዬሱ̈ሳባር ዎን ኤሪዴ።

¹⁴ፋጺኖ ና̈ሳዳር ኢንታ̇ባር ኢና ዎን ቤቃ̇̈ሪ ሶ̈ሊዝ ባዚ ኢንታ̇ ዪዴ።

¹⁵ዪ̈ኮታ̇ቦ ኣሳን ሺ̈ቂኖ ቤሲ̇ን ጋርታ̇ፖ ጴ̈ጥሮ̈ሳኬ ዋ̈ኒ̇ሳ ኬሳ̇ምፔ̈ን ኪ̈ቲ̇̈ዴ፤ ኢንታ̇ ኬሲ̇ኖፖ̇ ዓኒ

¹⁶ዎል ዎልኣ “ዪዚ ኑ ኣሳን ዓን ዎዛርታ̇ኔ? ዬሩሳ̈ላም ካታሚን ጋርታ̇ ዎ ኣሳን ዎይ ኢንቲ̇ ኦ̈ኖ ጴች ታ̈ሚ̇ራ̈ታ ባዚን ኤሪ̈ሬ፤ ኑ̈ናር ዪዲፌ̈ኖ ባዝ ኦ̈ንታ̇ካ̇ዬ ጋ̈ንዳብ ዳንዳኢባ̈ሴ።

¹⁷ዎቲናካሬ ኢንታ ሶ̈ሊን ዪና̇ ዎርዣ ጊዳ ዎይላ ሙታ̇ ሉካካ̇ይፌ̈ኒ ዓን ኣሳን ናምኢ ዬሱ̈ሳ ሱምባር ኦ̈ባካር ሶ̈ላካይፌ̈ን ኢንታ̇ ካዪስቶ” ጋ̈ር ዞሪንቲ̇ዴ።

¹⁸ኢናፖ̇ ኢንቲ̇ ጴ̈ጥሮ̈ሳኬ ዋ̈ኒ̇ሳክ ጼይጊኖፖ̇ ዓኒ “ዪንቲ̇ ዬሱ̈ሳ ሱምባር ኦ̈ባካር ፔቲ̇ ባዝ ሶ̈ላፒ̇ቴ ኦ̈ናካር ታማ̈ርሳ̇ፒ̇ቴ” ጋ̈ሪ ኢንታ̇ ኪ̈ቲ̇ዴ።

¹⁹ጴጥሮሳኬ ዋ̈ኒ̇ሳክ ዎልኣ ኢንታ̇ክ ጌይርዶሪ “ጾ̈ሳ̇̇ቦ ኪ̈ቲ̇ንታዚምፖ ሺ ዪንታ̇ብ ኪ̈ቲንታ̇ንዳብ ኮሺ̈ርኮ ዪንቲ̇ ፊርዲብቴ።

²⁰ኑ̈ኒ ኑ ቤቂ̇ኖንዲኬ ኑ ሲስኪኖን ሶ̈ላዚን ኣሻ̇ንዳብ ዳንዳኢባ̈ሴ” ጌይዴ።

²¹ኣሳንር ጴ̈ጥሮ̈ሳኬ ዋ̈ኒ̇ሳክ ቃጣ̇ኢሲዝ ጎይ ኢንታ̇ ዪኖኮታ̇ብኬ ማ ዎርዣ̈ባር ኢ̈ጪ̇ኖኮታ̇ቦ ናምኢ ኢንታ̇ ኢ̈ሺቻ̇ሪ ኣሺ̇ዴ፤ ዪኖ̇ ኢንቲ̇ ዎቲኖንዳ̇ ዎርዣ̈ዲ ቲ̈ን ኦ̈ንቲኖ ባዚምቦ̇ ጾ̈ሳ̇̇ ጋላቲሙታ̇ ዎ̈ኮታ̇ቦ።

²²ዪና ኦ̈ንቲኖ ታሚ̈ራቲምባር ፋጺኖ ና̈ሳ ኢ ኦይዲ ታ̈ጳ ላይፖ̇ ኣ̈̇ዝ ዶምዛ ኣሴ።

²³ጴ̈ጥሮ̈ሳኬ ዋ̈ኒ̇ሳክ ቃሺ ኣ̈ላፖ ኬስኪኖፖ̇ ዓኒ ፌ ዎርዣ̈ኮ ዬ̈ሪ ቄ̈ሳ ኣላቃንኬ ኣይሁድ ጋዶ̇ ጪጛሻን ኢንታ̇ክ ጌይኖ ባዛን ዎይ ኢንታ̇ብ ሶ̈ሊዴ።

²⁴ኢንታ̇ር ዪኖ̇ ሲስኪ̇ኖፖ̇ ዓኒ ዎ̈ል ፔታ̇ን ፌ ቆ̈ ሾ̈ክ ዎታር ጾ̈ሳ̇̇ ዎ̈ሲ̇̈ርዶሪ “ኣፎ ሳ̈ዚንዲኬ ሳ̈ዶ ሳ̈ዚንዶ፣ ባሃ̈ሪንዲኬ ኢንታ ጋርታ ዎ ባዝ ዎይ ኮቺ̇ኖ ዎይፖ̇ ሾክ ጌይኖ ጾ̈ሳ̇̇ ጎዳ̈ዶ!

²⁵ኔ̈ኒ ጌ̈ሻ̇ ኣያ̇ናባራ ኔ ኣይላ ኑ ባ̈ባ ዳ̈ዊታ ጎይባራ ሶ̈ላ̈ርዶራ፥ ‘ኣይሁድ ባዮ̇ ኣሳን ኣባብ ጎይልባር ዲንዴ̈ ዎርዣ̈ዳር ኣባብ ሜላ̇ ኢ̈ታ ባዝ ኦ̈ንዳብ ዞሪንቴ?

²⁶ሳ̈ዝ ጋልዶ ካ̈ቲንታ̇ንር ኦላብ ጊ̈ጊንቲ̇ዴ ጋድ ኣቂሲዛንር ዎ̈ልፔታ̇ን ሺ̈ቃሪ፥ ጎዳ ጾ̈ሳ̇ ጋልዳኬ ኢ ማራ̇ጺኖ ክርስቶ̈ሳ ጋልዳ ጻላታ ማ̈ቃ̇ር ዲንዲ̇ዴ’ ጋ̈ር ሶ̈ሊኔ።

²⁷“ኪንባራ ሄሮ̈ዲስኬ ጴንጤና̈ዋ ጲላ̈ጦ̈ሲ ኣይሁድ ባዮ̇ ኣሳንባርኬ ኢስሬ̈ላ ጋዶ̇ ዎርዣባር ዎልኣ ማ̈ቃ̇ር ዓኒ̇ ካታሚን ጋርታ̇ ሺ̈ቃሪ ኔ ኪ̈ታ̇ር ሚሺኖ ኔ ጌ̈ሻ̇ ናኣ ክርስቶ̈ሳ ጋልዳ̇ ኢ̈ታ ባዝ ኦንዳብ ዞሪንታ̇ር ዲንዲ̇ዴ።

²⁸ኢንቲ̇ ኦ̈ኖንዳ̇ ኔኒ ኔ ዎ̈ልቃባርኬ ኔ ዶሲኖ ጎይባራ ኦንዳብ ኮያራ ዓኒ̇ፖ ቲ̈ን ቆፒ̇ኖ ባዜ።

²⁹ዓታ̇ር ጎዳ̈ዶ! ኢንቲ ኢ̈ሺቻ̇ዝ ኢ̈ሺቺ̇ን ኔ ሲስካ̇ቤ፤ ኔ ኣይላን ኔ ቃ̈ሊንዶ ኦ̈ባካር ኢ̈ጫካይዶር ሶ̈ላንዳብ ዳንዳኣምፔ̈ን ዎታቤ̈።

³⁰ኔ ናኣ ጌ̈ሻ̇ ዬሱ̈ስ ክርስቶ̈ስ ሱምባራ ማኖን ፋንዳብኬ ታሚ̇ራ̈ታ ኦ̈ንዳቦ ኔ ዎልቃ ቤይሳቤ” ጋ̈ሪ ዎ̈ሲ̇ዴ።

³¹ኢንቲ ዎ̈ሲኖፖ ዓኒ ኢንቲ ዎ ቤሲን ኤንኣዴ፤ ዎይን ጌ̈ሻ̇ ኣያ̇ናባር ኩሚዴ፤ ጾ̈ሳ̇ ቃ̈ላ ኢ̈ጫካ̇ይዶር ሶ̈ሊዴ።

³²ኣማ̇ኒኖን ዎይ ፔቲ̇ ቡ̈ዳኬ ፔቲ̇ ቆ̈ፊክ ኢንታብ ዎ፤ ኦ̈ናካር ኣሲ “ዓና̇ ቴዬ̇” ጌይዝ ባዚ ባዬ̈፤ ኢንታብ ዎ ባዚ ዎይ ዎ̈ልኣ ኮ።

³³ኢንቲ̇ ጎዳ̇ ዬሱ̈ሲ ዓይቃ ጋርታ̇ፖ ዲንዲኖንዶ ጾ̈ሲ̇ ኢንታ̇ብ ኢሚ̇ኖ ጴች ዎልቃባራ ኣሳቦ ሶ̈ሊ̈ሬ። ዎይን ጋልዳ ጾ̈ሳ̇ ኣንጃ ኢንታ̇ ጋልዳ ዎ።

³⁴ሳ̈ዚ ዎይ ፌ̈ብ ኣሊ ዎ ኣሲ ዎይ ዎጛር ሚሺ̇ን ኢና ኤኪ ዬዪዛኮታ̇ቦ ኢንታ ጊዳ ዎርባዮ ፔታ̇ናር ባዬ̈።

³⁵ሚ̈ሺን ኤኪ̇ ዬ̈ሪ ሃዋራታንኮ ኤሄዪ ጋዲ̇̈ሬ፤ ኢንታ̇ር ሜቲንቲ̇ኖ ኣሳቦ ኢንታ̇ብ ኮሻ̇ዚንዲፌ̈ን ፋጊ ኢሚ̇̈ሬ።

³⁶ቆጲሮ̈ሳ ጋ̈ዝ ጋዲን ጋርታ ዬሊንቲ̇ኖ ዮሴፋ ጌይዛ ኣይሁድ ዜር ጋርታፖ ሌ̈ዊ ኮች̇ ማ̈ቂ̇ኖ ፔቲ̇ ኣስ ዎ። ሃዋ̈ራታን ኢያ “ባርናባ̈ሳ” ጌይ ጼይጊ̈ሬ። ኢዝ ቤርሺቺንዳ “ኣስ ሚ̈ንዝ ኣስ” ጌንቴ̇።

³⁷ናሳ ኢያር ፌ ሳ̈ዚን ዎጛሪ ሚ̈ሺ̇ን ኤኪ̇ ዬ̈ሪ ሃዋ̈ራታንቦ ኢሚ̇ዴ̈።