Read basketo ሃዋ̈ 6 Bible Online

ሃዋ̈ 6 - basketo bible

ሃዋ̈ 6

¹ዪና̇ ኬሊ̇ን ጋርታ ኣማ̇ኒኖ ኣሲ ዎይሊሙታ̇ ዬይን ግሪክ ኖ̈ና ሶ̈ሊዝ ኣይሁዳን ኢብራዪስጣ ኖ̈ና ሶ̈ሊዝ ኣይሁዳን ጋልዳ ጉንዲሚዴ ኣባ ጌዪን ዎይ ጋላስ ፊሽ ቃ̈ጊዝ ጎይ ጋልዳ ኣስኒ ዓይቂ̇ኖ ግሪክ ኖ̈ና ሶ̈ሊዝ ማጫ̇ንስቦ ሜላንባር ዎልፌ̈ን ቃጋ̇ካ̇ይ ኣቲ̇ኖኮታ̇ቦ።

²ታ̈ጶ ናምኢ ሃዋ̈ራታን ኣማ̇ኒዝ ኣሳን ዎይ ዎል ፔታ̇ን ሺ̈ሻ̇ሪ ኢንታ̇ኮ “ኑ̈ኒ ፊ̈ሽ ቃጊ̇̈ሬ ጋ̈ሪ ጾ̈ሳ̇̇ ቃ̈ሊን ታማ̈ርሳዚን ኣሻ̇ንዳብ ኮሺ̇ባ̈ሴ።

³ዪዚ ቴ ዳባ̇ን! ዪንታ̇ ጊዳፖ ጌ̈ሻ̇ ኣያ̇ናባርኬ ኤራባር ኩሚኖ ታብዛ ኣስ ማራ̇ጺብቴ̈። ኑ ዓና̇ ኦ̈ሲን ኢንታ̇ብ ኢማ̇ሪ

⁴ኑ̈ኒ ዎ̈ሳባርኬ ጾ̈ሳ̇̇ ቃ̈ሊን ታማ̈ርሳ̇ዚን ጋልዳ ሚጛንዳ” ጌይዴ።

⁵ዪና̇ ኢንቲ ጌይኖ ሶ̈ሊንዳ̇ ኣሳን ዎይን ኡፋይሳ̇ዴ። ኢናፖ̇ ኢንቲ̇ ኣማ̇ናባርኬ ጌ̈ሻ̇ ኣያ̇ናባር ኩሚኖ ኢስጣፋ̈ኖ̈ሳ፣ ማ ፊልጶ̈ሳ፣ ጲሮኮሮ̈ሳ፣ ኒቃ̈ሮ̈ና፣ ጢሞ̈ና፣ ጴርማኔኬ ኣይሁድ ኣማ̇ና ጋርታ̇ ጌሊኖ ኣንጾ̈ካ ጋዶ̇ ና̈ሳ ኒቆሎ̈ሳ ማራ̇ጺዴ፤

⁶ዪን ኢንታ ኤኪ̇ ዬ̈ሪ ሃዋ̈ራታን ቲ̈ን ሺ̈ሺ̇ዴ፤ ኢንታ̇ር ፌ ኩሽ ኢንታ ጋልዳ ጋዳ̇ር ዎ̈ሲ̇ዴ።

⁷ጾ̈ሳ̇ ቃ̈ላ̈ዲ ዳልጊ ሙታ̇ ሉኪ̇ዴ፤ ኣማ̇ኒኖ ኣሳሬ ዬሩሳ̈ላም ካታሚን ጋርታ ዎይሊዴ፤ ቄ̈ሳን ጋርታፓሬ ዎይሊን ኣማ̇ኒዴ።

⁸ኢስጣፋ̈ኖ̈ሲ ጾ̈ሳ̇ ዎልቃባር ኩማሪ ዎርዣ ጊዳ̇ ታሚ̇ራታኬ ማላ̇ ባዝ ኦ̈̈ርዶኒ፥

⁹ፔቲ̇ ጋላስ “ኣይሊቲ ጋርታፖ ኬስኪ̇ኖ ኣይሁዳን ዎ̈ሳ ኬ̈” ጌዪ ጼይጊንቲ̇ዝ ኣይሁድ ዎ̈ሳ ኬ̈ን ጋርታ̇ ሺ̈ቂዝ ኣስ ማ̈ቂ̇ኖ ቄራ̈ናፕኬ ኢስኪንዲራፖ ማ ኪልቃፔኬ ኢ̈ሳ ጋዳ̇ፖ ዬይኖ ኣሳን ዲንዳር ኢስጣፋ̈ኖ̈ሳ ባዚን ኢጻ̇ሪ ኢባር ዋች ኤ̈̇ዴ።

¹⁰ማ̈ቂ̇ናካሬ ኢስጣፋ̈ኖ̈ሳብ ጌ̈ሻ̇ ኣያ̇ና̈ ኢሚ̇ኖ ኤሪንዶ ኢንቲ̇ ጋማንዳ̇ብ ዳንዳኣካ̇ዬ።

¹¹ኢናፖ̇ ኣሳን “ኢስጣፋ̈ኖ̈ሲ ሙ̈ሳኬ ጾ̈ሳ̇̇̈ዳ ቆ̈ዚን ኑ ሲስኪ̇ኔ” ዪዝ ጌይዝ ኣሳን ጋሳ ጎይ ጊ̈ጊሲዴ።

¹²ዪ ጎይባራ ኢንቲ̇ ዎርዣ̈ዳ፣ ጋዳ ጪጛሻንኬ ሙ̈ሳ ሂጋ̇ ታማርሲዛን ዲንሪ ኢስጣፋ̈ኖ̈ሳ ኤ̈ሳሪ ኣይሁድ ፊርድ ኣ̈ሎ ኣሳን ቲ̈ን ሺ̈ሺ̇ዴ።

¹³ኢ ጋልዳ ማቃ ማርኪቲዝ ኣሳን ኤሄይዴ። ኣሳንር ማርኪቲ̈ርዶሪ “ዓ ና̈ሳ̈ዲ ‘ና̈ዝሬ̈ቶ ዬሱ̈ሲ ዓና ጾ̈ሳ̇̇ ኬ̈ን ዪርዲሲ̈ሬ፤ ሙ̈ሶ ጋልዳፖ̇ ዬይኖ ዎጊን ላሚ̈ሬ’ ጌዪሙታ̇ ጾ̈ሳ̇ ኬ̈ንዲኬ ሂጊ̇ን ቆ̈ዚን ኣሺ̇ባ̈ሴ” ጌይዴ።

¹⁵ኣይሁድ ፊርድ ኣ̈ል ሺ̈ቃር ዶኢኖ ኣሳን ዎይ ኢስጣፋ̈ኖ̈ሳ ኮት̇ ዎቲ ቤቃ̇ምባራ ጾ̈ሳ̇ ኪታ̇ንቻ ፎ̈ኢዛ̈ዲፌ̈ን ኢ ኢንታ̇ክ ፎኣር ቤንቲ̇ዴ።