Read basketo ሃዋ̈ 9 Bible Online

ሃዋ̈ 9 - basketo bible

ሃዋ̈ 9

¹ሳ̈ኦ̈ሊ ጎዳ ኣማ̇ኒኖ ኣሳን ዎ̈ንዳቦ ዪሊ̇ሙታ̇ዶ̈ር ቄ̈ሳ ኣላቃንቦ ኣላቃ̈ኮ ሉኪ̇ዴ።

²ጎዳ̈ ኣማ̇ኒዝ ኣሳን ኣቲናንር ማ̈ቆ ማጫ̇ንር ኢና ዲጜጌዪን ቃቺ̇ሻር ዬሩሳ̈ላም ኤሄ̈ንዳብ ዳማ̈ስቃ ዎ ኣይሁድ ዎ̈ሳ ኬ̈ን ጋርታ̇ ዎ ኣላቃንብ ኪ̈ታ̇ ጻፋር ሚሻምፔ̈ን ቄ̈ሳ ኣላቃንቦ ኣላቃ ጌሺዴ።

³ኢ ዳማ̈ስቃ ዬላ̇ንዳብ ኡኪ̇ንዶን፥ ኢ ቆ̈ፓካይዶን ፎ̈ኢን ኣፋፖ̇ ኢ ቡጊዳባር ፎ̈ኢዴ።

⁴ኢያር ሳ̈ዳ̇ ኬዲ̇ዴ፤ ዪኒባራ ኢ̈ኮ “ኣን ሳ̈ኦ̈ሎ! ሳ̈ኦሎ! ኣባብ ኔ ታ̈ና ዳካ̇̈ራ?” ዪዝ ጌይዝ ኣሳ ቆ̈ ሲስኪ̇ንቲ̇ዴ።

⁵ሳ̈ኦ̈ላሬ “ጎዳ̈ዶ! ኔ ኦኖ̇?” ጌይዴ። ኢያሬ “ታ̈ኒ ኔ ታ̈ና ዳኪ̇ዛ ዬሱ̈ሳ፤

⁶ዓት ዲንዳራ ካታ̇ሚን ጋርታ ሉካ̇ቤ ኔ ዎታዝ ባዚን ኢና ኔብ ሶ̈ላንዳ” ጌይዴ።

⁷ሳ̈ኦላባር ዎልኣ ሉኪ̇ዝ ኣሳን ጌዪንቲኖ ባዚን ሙታ̇ ሲስኪሙታ̇ ኦ̈ናካር ቤቃካ̇ዮኮታ̇ቦ ኢንቲ̇ ሶ̈ሊዝ ባዚ ዪን ዚም ጋር ኤቂ̇ዴ።

⁸ሳ̈ኦ̈ላር ኬዲ̇ኖ ቤሲን ጋልዳፖ̇ ዲንዳ̇ር ፌ ኣፊን ፊርቃምባ̇ራ ኣባካር ቤቃ̇ንዳብ ዳንዳኣካ̇ዬ፤ ዪኮታ̇ብ ኣሳን ኢ ኩሺን ኤ̈̇ር ኢያ ቲ̈ኒ ሙታ̇ ዳማ̈ስቃ ዬልዴ።

⁹ዓይዚ̇ ቃም ኣ̈ፊ ዎብ ማ̈ቂ ካ̈ ዋ̈ ጋ̈ካይ ጋምኢዴ።

¹⁰ዳማ̈ስቃ ጋርታ̇ ሃና̈ና ጌይዛ ዬሱ̈ሳ ኣማ̇ኒዝ ኣስ ፔታ̇ን ዎዶ̈ን፤ ጎዳ̈ዳሬ ሳጻባር ኢ̈ኮ “ሃና̈ኖ!” ጋ̈ር ጼይጊዴ። ኢያር “ጎዳ̇ዶ! ታ ዓይ ዎ” ጌይዴ።

¹¹ጎዳ ኢ̈ኮ “ዲንዳ̇ራ ‘ጺታ̇ ጎይ’ ጋ̈ዝ ጎይምባር ይሁዳ ጌይዝ ና̈ሳ ኣ̈ል ሉካ̇ቤ፤ ኢና ሳ̈ኦ̈ል ጌይዛ ጣርሴሳ ካታሚን ጋርታ̇ፖ̇ ዬይኖ ፔቲ̇ ኣስዶ̈ሪ ዎ ኢያ ኮያቤ፤ ኢ ዓት ዎ̈ሳ ጋልዳ ዎ፤

¹²ኢ ሃና̈ና ጌይዝ ኣሲ ኢ ዎ ቤስ̇ ዬ̈ር ፌ ኩሽ ኢ ጋልዳ ጋዳ̇ር ኢ ኣፊን ቤቃ̇ምፔ̈ን ኢ̈ብ ዎ̈ሳ̇ምባር ሳ̈ጻባር ቤቂ̇ኔ” ጌይዴ።

¹³ሃና̈ኖ ኢ̈ኮ “ጎዳ̈ዶ! ዓ ና̈ሳ̈ዲ ዬሩሳ̈ላም ዎ ኣማ̇ኒዝ ኣሳን ጋልዳ ዎዛርፌ̈ን ሜታ ዬልኖን ቴ ዎይሊን ኣሳ ጋልዳፖ̇ ሲስኪኔ̈።

¹⁴ኢ ኔ ሱ̈ምን ጼይጊዛን ቃቻ̇ንዳብ ቄ̈ሳ ኣላቃን ጋልዳ̇ፖ̇ ሲልጣ̈ና ኤካ̇ሪ ዬይኔ” ጌይዴ።

¹⁵ጎዳ̈ዳሬ ኢ̈ኮ “ሉካ̇ቤ! ዪ ና̈ሳ̈ዲ ቴ ሱምን ኣይሁድ ባዮ̇ ኣሳንኬ ካ̈ቲንታ̇ን ቲ̈ን ማ ኢስሬ̈ላ ዎርዣ ቲ̈ን ዎይ ኤርሲዛ ታ̈ብ ማራጺ̇ንቲ̇ኖ ቴ ሚ̈ሻ̇ ኢያ።

¹⁶ኢ ቴ ሱ̈ምንቦ ጋ̈ሪ ዎዛርፌን ሜታ ኤካ̇ንዳብ ኮሺ̇̈ርኮ ቴ ኢያ ቤይሳንዳ” ጌይዴ።

¹⁷ሃና̈ኖ ሉካ̇ቤ ጌይኖ ኣ̈ሊን ጋርታ ሉኪ̇ ጌላሪ ሳ̈ኦላ ጋልዳ ፌ ኩሺን ጋዳ̇ሪ “ቴ ኢሻ ሳ̈ኦ̈ሎ! ኔ ዓይ ዬዚምባራ ጎይም ጋልዳ ኔ̈ብ ቤንቲ̇ኖ ጎዳ̇ ዬሱ̈ሲ፤ ኔ ኣ̈ፊን ቤቃምፔ̈ንኬ ኔ ጌ̈ሻ̇ ኣያ̇ናባር ኩማንፔ̈ኒ ታ̈ና ኔ̈ክ ሚሺኔ” ጌይዴ።

¹⁸ኢ ዪኖ ጋ̈ምባ̇ራ ኤሊ̇ባር ሳ̈ኦላ ኣፊን ጋልዳፖ̇ ቁራ ማይጺዝ ባዚ ኬዲ̇ዴ። ኢናፖ ኢ ኣ̈ፊን ቤቃ̇ዴ፤ ማ ዲንዳር ጻማ̇ቂንቲ̇ዴ።

¹⁹ፊ̈ሺ ሙ̈ዪ ዎታር ሚ̈ጚዴ፤ ኢና ዳማ̈ስቃ ዎ ኣማ̇ኒዝ ኣሳንባር ሙ̈ቃ ቃም ጋምኢዴ።

²⁰ሳ̈ኦ̈ሊ ዎይሊን ጋምኣካ̇ይዶሪ ዳማ̈ስቃ ጋርታ “ዬሱ̈ሲ ጾ̈ሳ̇ ናኤ” ጌዪ ሙታ̇ ኣይሁዳን ዎ̈ሳ ኬ̈ ጋርታ̇ ታማ̈ርሲ ኤ̈̇ዴ።

²¹ኢ̈ኮን ሲስኪኖንር ዎይ “ዓ ና̈ሳ̈ዲ ዬሩሳ̈ላም ካታ̇ሚን ጋርታ ዬሱ̈ሳ ሱ̈ሚን ጼይጊዝ ኣሳን ዎይ ዳኪ̇ ይሲዛ̈ዳባያ? ማ ኢ ዓይዲ̇ ዬይኖንዳ ኢንታ ቃቺ̇ሙታ̇ ቄሳ ኣላቃንቦ ኤጛንዳብባያ” ጋ̈ር ጋራ̇ሚንቲዴ።

²²ዎቲናካር ሳ̈ኦ̈ሊ ጌዳ ሚጚ ሙታ̇ ሉኪ̇ዴ፤ ዬሱ̈ሲ ኢ ክርስቶ̈ሳ ማ̈ቂ̇ኖን ሶ̈ሊሙታ̇ ዳማ̈ስቃ ዎ ኣይሁዳን ሶ̈ሊዝ ባዝ ኢንታ̇ ይሲ̇ዴ።

²³ዎይሊን ቃ̈ማፖ̇ ዓኒ ኣይሁዳን ሳ̈ኦ̈ላ ዎንዳቦ ዎል ዎልኣ ዞሪንቲ̇ዴ።

²⁴ኢንቲ ኢያ ዎንዳብ ዞሪንቲኖን ኢ ኤሪዴ̈። ኢንታሬ ኢያ ዎንዳቦ ቃ̈ምኬ ጋላስኬ ካታ̇ሚን ጋርታ̇ፖ̇ ኬስኪ̇ዝ ካራን ጋልዳ ና̈ጊ ኤ̈̇ዴ።

²⁵ዎቲናካር ኣማ̇ኒዝ ኣሳንሲ̇ ቃም ካታ̇ሚንቦ ኣጺሪን ጋልባር ዳ̈ቻ̇ ጋርታ̇ ሚሻር ዛ̈ና ኢያ ሶ̈ቢሲ̇ዴ።

²⁶ሳ̈ኦላሬ ዬሩሳ̈ላም ዬ̈ሪ ኢና ዎ ኣማ̇ኒዝ ኣሳን ጋርታ ጌላንዳብ ኮዪዶን ኢንቲ ኢ ኪን ኣማ̇ኒኖ ማ̈ቂ̇ኖን ኣማ̇ናካዮኮታ̇ቦ ዎይን ኢ̈ብ ኢ̈ጪ̇ዴ።

²⁷ዎቲናካር ባርናባ̈ሲ ኢያ ሃዋራታንኮ ኤጛሪ ኢ ዚቃንታ̇ ዳማ̈ስቃ ሉኪ̇̈ርዶሪ ጎይም ጋልዳ ጎዳ ዬሱ̈ሲ ኢ̈ብ ቤንታ̇ር ኢባር ሶ̈ሊኖንዶ ማ ኢ ዳማ̈ስቃዶ̈ሪ ጎዳ ሱ̈ምምባራ ዎዛርፌ̈ን ኢ̈ጫካ̇ይዶር ሳ̈ባ̇ኪኖኮ ኢንታ̇ብ ሶ̈ሊዴ።

²⁸ዪዚ ኢናፖ̇ ሳ̈ኦ̈ሊ ኢንታባር ዎልኣ ዶኢዴ። ዬሩሳ̈ላም ካታሚን ጋርታ̇ ቢሪንቲ̇ ሙታ̇ ጎዳ ዬሱ̈ሳ ሱምባራ ኢ̈ጫካይ ሶ̈ሊ ታማ̈ርሲዴ።

²⁹ግሪ̈ክ ጋዳፖ̇ ዬይኖ ኣይሁዳንባር ሶ̈ሊንቲ ኢንታ̇ባር ፋላሚዴ፤ ዎቲናካሬ ኢንቲ̇ ኢያ ዎንዳብ ጎይ ኮዪዴ።

³⁰ኣማ̇ኒኖ ኣሳንሬ ዪኖ̇ ኤራሪ ቂሳ̈ራ ጌይዝ ቤስ̇ ኤ̈ጛሪ ጣርሴሳ ጌይዝ ካታማ ኢያ ሚሺዴ።

³¹ዪና̇ ኢዝባራ ይሁዳ፣ ጋሊላኬ ሳማ̈ራ ዎ ኣማ̇ኒኖ ኣሳን ሳሪቲ ዲጚዴ፤ ሚ̈ጚዴ፤ ማ ጾ̈ሳ̇̇̈ቦ ኢ̈ጪ̇ሙታ̇ ጾ̈ሳ̇ ቦንቺ̇ ጌ̈ሻ̇ ኣያ̇ናባር ሚ̈ጚሙታ̇ ኣሳር ኢንታ ጋልዳ ጉጂንቲ̇ሙታ̇ ዬይዴ።

³²ጴጥሮ̈ሲ ዱማ ዱማ ጋዳ̇ ቢሪንታ̇ዚምባ̇ራ ሊ̈ዳ ካታሚን ጋርታ̇ ዎ ኣማ̇ኒዝ ኣሳን ቤቃ̇ንዳብ ሉኪ̇ዴ።

³³ኢና ላማካይ ላይ ዎይ ዪ̈ ጋልዳ ሱርቂ ዎ ኤ̈ና̇ ጌይዛ ፔቲ̇ ቶሂ ዎ̈ብ ኣስ ዲጚዴ።

³⁴ጴ̈ጥሮ̈ሳሬ “ኣን ኤ̈ኖ! ዬሱ̈ስ ክርስቶ̈ሲ ኔ̈ና ፋ̈ሬ፤ ዲንዳ̇ራ ኔ ዪ̈ን ዪ̈ጻ̇ቤ” ጌይዴ። ኤ̈ናሬ ኤሊ̇ባር ፉክ ጋ̈ር ዲንዲዴ።

³⁵ሊ̈ዳ ካታሚን ጋርታ̇ኬ ሳ̈ሮና ጋዳ̇ ዶኢዛን ዎይ ኢያ ቤቃ̇ሪ ጎዳ ዬሱ̈ሳ ኣማ̇ኒዴ።

³⁶ኢዮ̈ጳ̇ ካታሚን ጋርታ̇ ጣ̈ቢታ ጋ̈ዚን ኣማ̇ኒዝ ኣስ ፔታ̇ንዶር ዎ። (ኢዝ ሱምን ግሪ̈ክ ኖ̈ናባር ዶርቃ ጌዪንታ̇̈ሬ)[4] ኢዛሬ ዎይ ጋላስ ሚጛር ኮሽ ባዝ ኦሙታ̇ ዎርባያን ማ̈ዳሙታ̇ ዎ ኣሴ።

³⁷ኬል̇ ኢዝባራ ኣሲን ኢዛ ማ̈ራ ዓይቃ̇ዴ፤ ኣሳን ኢዝ ኣሂን ሜ̈ጫ̇ር ፎ̈ቃ ጋልዳ ዎ ፔቲ̇ ኪፊላ ጋርታ̇ ጋዲ̇ዴ።

³⁸ሊ̈ዳ ጋ̈ዝ ቤሲ̇ንዳ̇ ዮ̈ጲ̇ ላፍ ጋልዳ ኡክ ማ̈ቂ̇ኖኮታ̇ቦ ዮ̈ጳ̇ ዎ ኣማ̇ኒዝ ኣሳን ጴ̈ጥሮ̈ሲ ሊ̈ዳ ዎን ሲስካ̇ሪ ናምኢ ኣስ ኢ̈ክ ሚሻሪ “ዋ̈ዴ ኔ ኑ̈ክ ኤሊ̇ ዬይሼ” ጋ̈ር ጌሺዴ።

³⁹ጴ̈ጥሮ̈ሳሬ ዲንዳ̇ሪ ኢንታ̇ባር ዬይዴ። ኢና ዬላ̇ሪ ኣፋ ፎ̈ቂን ጋልዳ ኢያ ኬሲ̇ዴ፤ ኣስኒ ዓይቂ̇ኖ ማጫ̇ን ዎይ ዶርቃ ኢንታ̇ባር ዎዶራ ኢዛ ኦ̈ኖ ቃሚሳንኬ ሜል ኣፊላን ኢያ ቤይሲሙታ̇ ኢ ቡጊዲንባር ኤቂ̇ዴ።

⁴⁰ጴ̈ጥሮ̈ሳሬ ኣሳን ዎይ ዛ̈ና ኬሳ̇ሪ ኢ ኬ̈ ኢና ቡቂንታ̇ር ዎ̈ሲ̇ዴ፤ ኢናፖ̇ ኢዝ ኣሂንኮ ቢሪንታ̇ሪ “ጣ̈ቢታ! ዲንዳ̇ቤ!” ጌይዴ። ኢዛር ፌ ኣፊን ፊርቃ̇ዴ፤ ጴ̈ጥሮ̈ሳ ቤቃ̇ራ ሾክ ጋ̈ር ዶኣዴ።

⁴¹ኢያር ኢዝ ኩሺን ኤ̈̇ር ዲንዴ ኣማ̇ኒኖ ኣሳንኬ ኣስኒ ዓይቂ̇ኖ ማጫ̇ን ጼይጋር ፋ ኣስ ኢንታብ ኢሚ̇ዴ።

⁴²ባዝ ዪና̇ ዮ̈ጳ̇ ጋርታ ዎይ ቤስ̇ ኤሪንቲን ዎይሊን ኣሲ ጎዳ̈ ኣማ̇ኒዴ።

⁴³ጴ̈ጥሮ̈ሳር ሲሞ̈ና ጌይዛ ጋማ̇ ጻ̈ዚዝ ፔቲ̇ ና̈ሳባር ኢና ዮ̈ጳ̇ ዎይሊን ቃ̈ም ዶኢዴ።