Read basketo ሮሜ 1 Bible Online

ሮሜ 1 - basketo bible

ሮሜ 1

¹ሃዋ̈ራ̈ ማ̈ቃ̇ምፔ̈ን ጼይጊንቲ̇ኖ፥ ጾሳ̇ ዎጛላ ታማ̈ርሳምፔ̈ን ማራ̇ጺንቲ̇ኖ ዬሱ̈ስ ክርስቶ̈ሳ ኣይላ ታ ጳውሎ̈ሳ ጋልዳፖ̇ ኪ̈ቲንቲ̇ኖ ኪ̈ታ።

²ዪና̇ ዎጛሊንዳ̇ ጾ̈ሳ̇̈̇ዲ̇ ፌ ናባን ጎይባራ ጌ̈ሻ̇ ማጻ̈ፋ ጋልዳ ቲ̈ኒታ̇ር ታስፋ ኢሚ̇ኖ ዎጛላ።

³ዪና̇ ዎጛሊንዳ̇ ኢ ናኣ̈ዲ ኣስ ማ̈ቂ̇ኖ ጎይባራ ዳ̈ዊታ ዜር ጋልዳፖ̇ ዬሊንቲ̇ኖን ኤሪሳ̈ሬ።

⁴ማ ኢ ጾ̈ሳ̇̇ ናኢ ማ̈ቂ̇ኖን ጴች ዎልቃ̇ባራ ኤሪንቲ̇ኖንዳ ኢ ጌ̈ሻ ኣያ̇ናባራ ዓይቃ ጋርታ̇ፖ̇ ዲንዲኖኮታ̇ቦ።

⁵ዎርዣ ጋርታ̇ፖ ዎይ ኣሲ ዬሱ̈ሳ ኣማ̇ናንፔ̈ንኬ ኢ̈ብ ኪ̈ቲንታ̇ምፔ̈ኒ ዎታንዳቦ ኑ̈ኒ ሃዋ̈ራ ማ̈ቃ̇ምፔ̈ን ኢዲ̇ላ ኑ̈ብ ኢሚንቲ̇ኔ።

⁶ዪንታ̇̇ሬ ዬሱ̈ስ ክርስቶ̈ሳይ ማ̈ቃ̇ምፔ̈ኒ ጾ̈ሲ ጼይጊኖ ኣሳን ጋርታ ፋይዲንቲ̇ኖ ኣሴ።

⁷ጾ̈ሲ ካኖንኬ ኢያይ ማ̈ቃምፔ̈ኒ ኢ ጼይጊኖ ሮ̈ማ ካታማ ጋርታ ዎ ኣሳን! ጾ̈ሳ̇̈ ኑ ባ̈ባፔኬ ኑ ጎዳ ዬሱ̈ስ ክርስቶ̈ሳፖ ኢ ኮሺቲንዲኬ ኢ ሳሪቲን ዪንታ̇̇ብ ማ̈ቆ̇ጋቤ።

⁸ታ̈ኒ ዎይ ባዛፖ ቲ̈ኒታራ፥ ዪንቲ̇ ዬሱ̈ሳ ኣማ̇ኒኖንዳ̇ ሳዝ ኤ̈ሻ ዎይ ጋልዳ ሲስኪ̇ንቲ̇ኖኮታ̇ቦ ዪንቲ̇ ዎይንጊሽ̇̇ ታ̈ኒ ጎዳ ዬሱ̈ስ ክርስቶ̈ስ ሱምባራ ታ ጾ̈ሳ̇ ጋላታ̈ሬ።

⁹ታ̈ኒ ዎ̈ሳ̈ርዶራ ዎይ ጋላስ ዪንታ̇ ቆፓ̇ዚንዶ፥ ታ̈ኒ ፎቲ ቡ̈ዳባር ኢ ናኣ ዎጛሊን ጎይ ታማ̈ርሳሙታ̇ ዬዝ ጾ̈ሳ̇̈̇ዲ ታ̈ቦ ማርካ̇።

¹⁰ዓት ዉርሲን ጋልዳ ጾ̈ሲ ጌዬጌይን ታ ዪንታ̇̇ክ ሉካ̇ንዳቦ ጎይን ታ̈ብ ኮሽካ̇ምፔ̈ን ታ̈ኒ ጾ̈ሳ̇̈̇ ዎ̈ሳ̇̈ሬ።

¹¹ዪንቲ̇ ኣማ̇ናባራ ሚ̈ጛምፔ̈ን ዎቲዝ ኣያ̇ና ጋልዳፖ ኢሚንቲ̇ዝ ኪልሲን ዪንታ̇̇ቦ ፋጋንዳቦ ኮያራ ዪንታ̇ ቤቃ̇ንዳብ ኢኒ̇ታ̈ሬ።

¹²ዪና̇ ታ̈ኒ ጋ̈ዚንዳ ታ̈ኒ ዪንታ̇ ኣማ̇ኒንባራ ዪንታ̇ር ታ ኣማ̇ኒንባራ ዎልዎልኣ ሚ̈ንምፔ̈ኔ።

¹³ቴ ኢሺንታን! ሜላን ኣይሁድ ባዮ̇ ኣሳን ጊዳ̇ ታ̈ኒ ዎይሊን ኣስ ኣማ̇ንኖንዲፌ̈ኒ ዪንታ̇ ጊዳ̇ሬ ዪና̇ ኢዝፌ̈ን ኣማ̇ንንዳብ ኮዪንዶን፤ ዎቲናካሬ ዪኒ̇ቦ ቴ ዪንታ̇ክ ሉካ̇ንዳቦ ዎይሊን ጎይ ቆፒን ዓኖ ዬላ̇ር ታ̈ብ ማ̈ቃካ̇ይ ኣቲ̇ኖን ዪንቲ ኤራምፔ̈ን ቴ ኮያ̈ሬ።

¹⁴ታ̈ኒ ታማ̈ሪኖንባር ማ̈ቂ̇ን ታማ̈ራካዮንቦ፥ ኤራንባር ማ̈ቂ̇ን ኤራ ባዮ ዎርዣንቦ ታብ ኣጫ ዎ።

¹⁵ዪዚ ዪ̈ኮታ̇ቦ ታ̈ኒ ዪንቲ̇ ሮማ ጋዳ̇ ዎንባራሬ ዎጛላ ሳባ̇ካንዳቦ ዎይሊንስ ኢኒ̇ታ̈ሬ።

¹⁶ታ̈ኒ ዎጛላ ቃ̈ላ ሶ̈ላንዳብ ዬ̈ልቃባሴ፤ ኣባ ጌይን ዎጛላ ቃ̈ላ̈ዲ ቲ̈ን ኣይሁዳንቦ ኢናፖ ኣይሁድ ባዮ̇ ኣሳንቦ፥ ኣማ̇ኒዝ ኣሳን ዎይ ፋንዳብ ዳንዳኢዝ ጾ̈ሳ̇̇ ዎልቃ።

¹⁷“ጺላ̇ ኣሲ ሼምፓ ዲጚ̈ዛ̈ዲ ኣማ̇ናባራ” ጌዪ ጻ̈ፊንቲ̇ኖንዲፌ̈ኒ ዎጛላ ጋልዳ ጾ̈ሳ̇̈ዲ ኣስ ዎዛርታር ጺላ ማሂ̈ርኮ ኤሪንቲ̇ኔ፤ ዪ̈ዳሬ ኣሲ ጺሊ̇ዛ̈ዲ ሜላ ባዚ ኢና ጌላካ̇ይዶን ኣማ̇ናባር ሙታ̇።

¹⁸ፌ ኢቲቲንባራ ኪንን ኤሪንታካይፌ̈ኒ ዎቲዝ ኣሳን ጋልዳ ኢንታ ዉጪንኮታ̇ብኬ ኢንታ ኢ̈ቲቲንጊሻ̇ቦ ጾሳ ጎይላ̈ዲ ኣፋፖ ኢንታ ጋልዳ ዬይሬ።

¹⁹ጾ̈ሲ ኢንታ̇ ጎይላዚንዳ፥ ኢንቲ̇ ጾ̈ሳ̇̇ ባዝ ኤራንዳብ ኮሺ̇ዝ ባዛን ኢ ኢንታ̇ ቤይሲን ኢንቲ̇ ኤራዚንኮታ̇ቦ።

²⁰ሳ̈ዚን ኮቺንቲ̇ኖምፖ ኤ̈̇ሪ ጾ̈ሳ̇̇̈ኮ ኣሳብ ቤንቲ̇ባ̈ሶ ሜናብ ዶኢዝ ዎልቃ̈ዲኬ ኢ ጾ̈ሲቲ̈ዲ ኢ ኮቺ̇ኖ ኮቺንታን ጎይባራ ፋላ̇ ጋልዳ ቤንቲ̇ኖኮታ̇ቦ ኣሳን ፌ ኢ̈ሲዝ ባዛንቦ “ታ ዓና̇ ኤራካ̇ይዶር ኦኔ” ጋ̈ንዳብ ዳንዳኢባ̈ሴ።

²¹ኢንቲ̇ ኢ ጾ̈ስ ማ̈ቂ̇ኖን ኤሪሙታዶ̈ሪ ኢ ጾ̈ሲቲንዲፌ̈ኒ ኢ̈ቦ ቦንችኬ ጋላታኬ ኢማካ̇ዬ፤ ኢንታ ቆፋዲ ሜላ̇ ማ̈ዲባ̈ሶ ቆፊ ማ̈ቂ̇ዴ፥ ቆፒባ̈ሶ ኢንታ ቡ̈ዳ̈ዳሬ ዉርሲ ሚ̇ኔ።

²²ኢንቲ̇ ፌ̈ና “ኑ̈ኒ ኤራ” ጋ̈ዚምባራ ዳሻ ማ̈ቃ̇ር ቤንቲ̇ዴ።

²³ሜናብ ዶኢዝ ጾ̈ሳ̇̇ ቦንቻ̇ዚን ኣሻ̇ሪ ዓይቃ̇ር ዪዝ ኣሳቦ፣ ካፊቦ፣ ሜሃቦ፣ ሳ̈ዝ ጋልዳ ፌ ሚልባር ዬዝ ማታባዛን ማይጺሳር ኮቺንቲኖ ዪን ሚሲላንቦ ቦንች ኢሚ̇ዴ።

²⁴ዪ̈ኮታ̇ቦ ኢንቲ̇ ዎልዎልኣ ፌ ጋል ጌ̈ቲን ጋልዳ ዬልቂዝ ኦ̈ሳ ኦ̈ምፔ̈ኒ ጾ̈ሲ̇ ኢ̈ታ ኢና̇ቦ ኢንታ̇ ኣ̈ ኢሚ̇ዴ።

²⁵ዪ̈ ማ̈ቂ̇ኖ̈ዲ ጾ̈ሳ̇̇ ኪንቲን ኣሻ̇ሪ ማቃ ማ̈ቂ̇ኖ ባዝ ኣማ̇ኒኖኮታ̇ቦ፤ ኮቺኖ ጾ̈ሳ̇̇ ኣሻ̇ሪ ኮቺንቲ̇̇ኖ ባዛንቦ ጎሽቲ ኢንታ̇ብ ዎ̈ሲንቲ̇ኖኮታ̇ቦ፤ ዎቲናካሬ ጾ̈ሳ̇̇̈ዲ ሜናብ ጋላቲንቲ̇ኖ̈ዳ፤ ኣሚንኤ!

²⁶ዪኒ̇ጊሻቦ ጾ̈ሲ̇ ኢንታ̇ ማ̈ዲባ̈ሶ ዬልቂዝ ኢና̇ቦ ኣ̈ ኢሚ̇ዴ፤ ኢንታ ማጫ̇ን ጾሲ̇ ኢንታ̇ብ ኢሚ̇ኖ ዎጊን፥ ማጮ ኣቲናባር ሱርቃ̇ዚን ኣሻ̇ሪ ማጮ̇ ማጫ̇ባር ሱርቂ̇ዴ።

²⁷ዪና̇ ኢዝፌ̈ኒ ኣቲናንሬ ማጫ̇ባር ሱርቃዚን ኣሻሪ ኣቲናባራ ሱርቃ̇ንዳብ ኢኒ̇ቲ̈ዴ። ኣቲኖ ኣቲናባራ ሱርቂ̇ዴ፤ ኢንቲ̇ ዪኖ̇ ኦኖ ኢ̈ታ ኦሲምቦ̇ ፌ̈ብ ኮሻ̇ዝ ጎይሊን ፌ̈ብ ኤኪ̇̈ኔ።

²⁸ኣሳን ጾ̈ሳ̇̇ ኤራንዳ̇ቦ ኮያካ̇ዮኮታ̇ቦ ኢንቲ̇ ፋባ̈ሶ ላ̈ፋ ባዝ ኦ̈ሳምፔ̈ኒ ላ̈ፋ ቆፋቦ ኢንታ̇ ኣ̈ ኢሚ̇ዴ።

²⁹ኢንቲ̇ ኢ̈ታ ኦ̈ሳ ጌይዛ ዎይባራ፣ ዎይ ባዝ ታ̈ብ ማ̈ቆ̇ ጌንቲ̇፣ ዉጫባራ፣ ቂና̈ታባራ፣ ኣስ ዎባራ፣ ጎይልባራ፣ ኣስ ዳሺቺባራ ኩሚኖን። ማ ኣስ ጌስቲ̇ዛን፣

³⁰ኣሳ ሱም ይሲ̇ዛን፣ ጾ̈ሳ̇̇ ኢጺ̇ዛን፣ ኣስ ቆ̈ዛን፣ ኦቲርቂ̇ዛን፣ ኢ̈ታ ባዝ ኦ̈ንዳቦ ጎይ ኮዪዛን፣ ባ̈ባብኬ ኢንዲ̇ብኬ ኪ̈ቲንቲ̇ባ̈ሶን፣

³¹ማሂ ቆፒባ̈ሶን፣ ጌሊኖ ጫ̈ቂን ና̈ጊባ̈ሶን፣ ካን ባዮ̇ን፣ ኣሳብ ሚጪንቲባ̈ሶን።

³²“ዪንፌ̈ኖ ባዛን ኦ̈ዛን ዎይንቦ ዓይቃ ኮሺ̈ሬ” ጋ̈ዝ ጾ̈ሳ̇̇̈ኮን ኪን ሂጊ̇ን ኤሪሙታ̇ዶ̈ሪ ዪና̇ ዎይ ዎቲ̈ሬ፤ ዪና̇ ዎታዚን ሙታ̇ ጊዳካ̇ይዶን ዪኖ ዎቲዝ ኣሳንር ሚ̈ንሲ̈ሬ።