Read basketo ሮሜ 10 Bible Online

ሮሜ 10 - basketo bible

ሮሜ 10

¹ቴ ኢሺንታ̈ን! ቴ ቡ̈ዲን ጋርታ̇ ታ̈ብ ዎ ጴች̇ ኢኒ̇ንዲኬ ቴ ጾ̈ሳ̇ ዎ̈ሳ̈ዚንዳ ኢስሬ̈ላን ፋጻምፔ̈ኒዬ።

²ጾ̈ሳ̇̇̈ቦ ኦ̈ንዳቦ ጴች ኢና̇ ኢንታ̇ብ ዎን ቴ ቴ ቆሚ̇ን ኢንታ̇ብ ማርኪ̇ታ̈ሬ ዎቲናካሬ ኢንታ̇ ኢኒ̇ንዳ ኪንን ኤራሪ ጊዳካ̇ዬ።

³ጾ̈ሲ ኣስ ጺላ̇ ማሃዝ ጎይን ኢንቲ̇ ኤራካ̇ዮኮታ̈ቦ ፌ ኦ̈ሳባራ ጺላ̇ ማ̈ቂ̇̈ሬ ጌይዶ̇ኬ ጾ̈ሳ̇ ኣስ ጺላ̇ ማሃዝ ጎይን ኮያካ̇ዬ።

⁴ኣሲ ዎይ ኣማ̇ናባር ጺላ̇̇ምፔ̈ኒ ሂጋ̇ ኦ̈ሲንዳ ክርስቶ̈ሳባር ዉሪኔ።

⁵ሂጋ̇ ና̈ጋር ዲጛዝ ጺሊቲን ጎይ ሙ̈ሶ ጻ̈ፊርዶሪ “ሂጊ̈ን ና̈ጊዝ ኣሲ ሼምፓባር ዶኢ̈ሬ” ጌይሬ።

⁶ኣማ̇ናባር ጺ̈ላ̇ ማ̈ቃ̇ዝ ጎይንኮን ጌ̈ሻ ማጻ̈ፋ ሶ̈ሊ̈ርዶሪ “ኔ ቡ̈ዳ ጋርታ ‘ፉዳ ኣፋ ኦ ኬስኪ̇̈ራ?’ ጋ̈ፔ፤ ዪ̈ዲ ክርስቶ̈ሲ ቢርት ኑ̈ብ ቶ̈ራ ሶ̈ቦ ጌንቴ̇።

⁷ዎይ “ኔ ቡ̈ዳባራ ‘ቶ̈ራ ዱ̈ፊ ጋርታ̇ ኦ ሶቢ̈ራ?’ ” ጋ̈ፔ። ዪዳ̇ሬ ክርስቶ̈ሳ ቢርት ዓይቃ ጋርታ̇ፖ ዲንዶ ጌንቴ̇።

⁸ዎቲናካሬ “ጾ̈ሳ̇ ቃ̈ላ ኔ ላ̈ፍ ዎ፤ ዪኒፓሬ ኣ̈ሪ ኔ ኖ̈ኒን ጋርታ̇ኬ ኔ ቡ̈ዲን ጋርታ̇ ዎ” ጋ̈ሪ ጻ̈ፊንቲ̇ኔ። ዪና̇ ቃ̈ሊንዳ ኑ ሳባ̇ካዝ ኣማ̇ና ቃ̈ሊንዶ።

⁹ዬሱ̈ሲ ጎድ ማ̈ቂ̇ኖን ኔ ኖ̈ኒንባር ማርኪቴጌዪንኬ ጾ̈ሲ̇ ኢያ ዓይቃ ጋርታ̇ፖ ዲንኖን ኔ ቡ̈ዲምባር ኣማ̇ኔጌዪን ፋጻ̈ሬ።

¹⁰ኣሲ ፌ ቡ̈ዳባር ኣማ̇ኔጌይን ጺሊ̇̈ሬ፤ ፌ ኖ̈ኒምባር ማርኪ̇ቴጌይን ፋጺ̈ሬ፤

¹¹ጌ̈ሻ̇ ማጻ̈ፋ ጋልዳ “ኢያ ኣማ̇ኒዝ ኣሲ ዎይ ዬልቂ̇ባ̈ሴ” ጋ̈ር ጻ̈ፊንቲ̇ኔ።

¹²ዪዚ ፔቲ̈ ጎዳ̈ዲ ዎይቦ ጎድ ማ̈ቂ̇ኖኮታ̇ቦ ኣይሁዳንብኬ ኣይሁድ ባዮ̇ ኣሳን ጊዳ̇ ኣባካር ፋጊቲ ባዬ̇፤ ኢያ ጼይጊዝ ኣሳንቦ ዎይ ኣንጃ ዎይሊሳር ኢሚ̇̈ሬ፤

¹³“ጎዳ ሱምን ጼይጊዛ ዎይ ፋጺ̈ሬ” ጌይንቲ̇ኔ።

¹⁴ዎቲናካሬ ኢያ ኣማ̇ናካይዶ̈ሪ ዎዛ̈ርታ̇ር ኢያ ጼይጋንዳብ ዳንዳኢ̈ራ? ኢ ባዝ ሲስካካ̇ይዶሪ ዎዛርታ̇ር ኢያ ኣማ̇ኒ̈̇ራ? ታማ̈ሪሲዝ ኣሲ ባዪዶ̈ን ዎዛርታ̇ር ሲስካ̇ንዳብ ዳንዳ̇ኢራ?

¹⁵ታማ̈ርሲዝ ኣስ ኪታ̈ር ሚ̈ሻካይ ኣቴጌይን ዎዛርታ̈ር ኢንቲ̇ ቃ̈ሊን ታማ̈ርሳንዳብ ዳንዳኢራ? ዪና̇ሬ ጌ̈ሻ̇ ማ̈ጻ̈ፋ ጋልዳ “ኡፋይሳ̇ዝ ጾ̈ሳ̇ ቃ̈ሊ̈ን ኤሄይዝ ኣሳን ዬንቲ̇ንዳ ዎዛርፌ̈ን ኡፋይሳ̈ራ!” ጋ̈ሪ ጻ̈ፊንቲኖንዲፌ̈ኔ።

¹⁶ዎቲናካሬ ናባ̈ ኢሳ̈ሲ ጌይርዶሪ “ጎዳ̈ዶ! ኑ ሶ̈ሊኖ ቃ̈ሊን ኦ ኣማ̇ኔ?” ጋ̈ሪ ጻ̈ፊኖንዲፌ̈ኒ ዎይን ኡፋይሳ̇ዝ ጾ̈ሳ̇̈ ቃ̈ሊ̈ን ኣማ̇ናካ̇ይ ኣቲ̇ዴ።

¹⁷ዪ̈ኮታ̇ቦ ኣማ̇ኖ ቃ̈ሊን ሲስካ̇ዚን ጋርታ̇ፖ ቤንታ̇̈ሬ፤ ቃ̈ሊንዳ ክርስቶ̈ሳ ባዝ ሶ̈ላዚን ጋርታ̇ፖ ቤንታ̈̇ሬ።

¹⁸ቴ ዪንታ̇ ኦይጫ̇ስቶ፤ ዪዚ ኢንቲ̇ ቃ̈ሊን ሲስካ̇ካ̇ዬ ጋ̈ንዳብ ዳንዳኢ̈ራ? ጌ̈ሻ̇ ማጻ̈ፋ ጋልዳ፥ “ኢንታ ቆ̈̈ዲ ሳ̈ዝ ኤ̈ሻ̇ ዎይ ቤስ̇ ሲስኪንቲ̇ዴ፥ ኢንታ̈ ቃ̈ላ̈ዲ ሳ̈ዝ ቡጊዳፖ ቡጊድ ዬሊ̈ዴ” ጋ̈ሪ ጻፊንቲኖንዲፌ̈ኒ ኢንቲ̇ ሲስኪ̇ኔ።

¹⁹ማ̈ ኢስሬ̈ላን ቃ̈ሊን ኤራካ̇ዬ ጋ̈ንዳ̇ብ ዳንዳኢ̈ራ? ዪ̈ፌን ጌይንታ̇ካፌ̈ን ሙ̈ሶ ቲ̈ኒታር ጌይርዶሪ፥ “ታ̈ኒ ሌቂንቲ̇ኖ ዎርዣባራ ቴ ዪንታ̇̈ ቃና̇ኢሳንዳ̇፤ ቆፊ̈ ባዮ ዎርዣ ማራ̇ጻራ ዪንታ̇ ዛልቂ̇ሳንዳ” ጌይኔ።

²⁰ኢሳ̈ሳሬ፥ “ታ̈ና ኮያካ̇ዮ ኣሳንባር ቴ ቤንታ̇ዴ፤ ‘ጾ̈ሲ ዎይዲ ዎ?’ ጋ̈ሪ ታ̈ና ኦይጫካ̇ዮ ኣሳንቦ ቴ ታ̈ና ቤይሳዴ” ጋ̈ሪ ኢ̈ጫካ̇ይ ሶ̈ሊኔ።

²¹ዎቲናካር ኢስሬ̈ላን ባዝ ኢ ሶ̈ሊ̈ርዶሪ፥ “ኪ̈ቲንቲ̇ባ̈ሶዳኬ ዉጪቲ̈ዝ ዎርዣን ታ̈ክ ዬምፔ̈ን ጋላሲ̇ን ዎይ ኢንታ ና̈ጋዴ” ጌይሬ።