Read basketo ሮሜ 11 Bible Online

ሮሜ 11 - basketo bible

ሮሜ 11

¹ቴ ዪንታ̇ ኦይጫ̇ስቶ፦ ጾ̈ሳ̇̇̈ዲ ፌ ዎርዣ ቶጚ ኣሺ̇ና? ዉርሲ ቶ̈ጛካዬ! ቴ ቴ ቆሚ̇ንዳሬ ኢስሬ̈ላ ዜር፤ ኣብራሃ̈ማ ዜር ጋርታፖ ቢ̈ናማ ኮቼ̇።

²ጾ̈ሳ̇̈ ቲ̈ኒታሪ ፌ̈ቦ ጌዪ ቆሪኖ ዎርዣ ቶ̈ጛካዬ፤ ጌ̈ሻ̇ ማጻ̈ፎ ናባ ኤ̈ላ̈ሳ ባዝ ዎዛር ጌይኖኮ ማ ኤ̈ላ̈ሳሬ ኢስሬ̈ላ ዎርዣ̈ዳ ዎዛር ጋ̈ሪ ጾ̈ሳ̇̇̈ ቲ̈ን ሞ̈ቲኖኮ ዪንቲ̇ ኤሪባ̈ሳ?

³ዪና̇ ኢዝባራ ኤ̈ላሲ “ጎዳ̈ዶ! ኢንቲ̇ ኔ ናባን ዎዴ፤ ኔ ካሻ̇ ቤሳ̇ንር ላ̈ሊ̇ኔ፤ ቴ ሙታ ኣቲ̇ኔ፥ ታ̈ናር ዎንዳ̇ብ ኮዪ̈ሬ” ጌይኔ።

⁴ጾ̈ሲ̈ ዎዛር ጋ̈ር ማሄ? “ማቃ ጾ̈ሳ̇̇ ባኣ̈ላቦ ጎሽታ̇ካዮን ታ̈ብዛ ሙኩላ ኣሳን ቴ ታ̈ብ ኣሺ̇ኔ” ጌይኔ።

⁵ዓቶ̇ ኬል̇ባራር ማ̈ቂን ጾ̈ሳ̇̈ ካንባራ ማራ̇ጺንታ̇ሪ ዎ ኢስሬ̈ላ ኣሳን ሙቃ̇ ዎ።

⁶ጾ̈ሳ̇̈ ኣስ ማራ̇ጺዛ̈ዲ ፌ ካንባርዶኬ ኣሳ ኦ̈ሳኮታ̇ብ ጊዳካ̇ዬ፤ ኣሳ ኦ̈ሳባርኮ ዎኒ ጾ̈ሳ̇̇ ካንዲ ኪን ካን ማ̈ቂ̇ባ̈ስዶ̈ን።

⁷ዓት ዪ̈ዲኮ ኣባ? ኢስሬ̈ላን ፌ ኮዪኖ ባዚን ዲጛካ̇ዬ፤ ዎቲናካሬ ማራ̇ጺንቲኖን ፌ ኮዪኖን ዲጚዴ፤ ኣቲ̇ኖን ፌ ቡ̈ዳ ዛቢሲዴ።

⁸ዪዚ ዪ̈ዲ̈ ጾ̈ሳ̇̈ ቃ̈ላ ጋልዳ፥ “ጾ̈ሲ ኢንቲ ፌ ኣ̈ፊንባር ቤቃካ̇ይፌ̈ን፤ ፌ ዋ̈ይምባር ሲስካ̇ካ̇ይፌ̈ን፥ ዓኖ ዬላ̇ር ኢንታ̇ ቡ̈ዳ ቆፒ ቢሪንካይፌ̈ኒ ዎቲዴ” ጌዪ ጻ̈ፊንቲ̇ኔ።

⁹ዳ̈ዊታሬ ጌይርዶሪ፤ “ኢንቲ̇ ሞ̈ዝ ፊ̈ሺን ኢንታ̇ ኤ̈ዝ ጺሂፌ̈ን ኢንታ̇ብ ማ̈ቃ̇ጋ̈ቤ፤ ኢንታ ቶ̈ጚዝ ዶ̈ች ማ̈ቃ̈ር ዋ̈ይጋ̈ቤ፥ ኢንቲ̈ ኦ̈ኖ ኢ̈ቲ̈ቲንዳ ማ̈ቃ̇ር ኢንታ ዬላ̇ጋ̈ቤ፤

¹⁰ኢንቲ̇ ቤቃካ̇ይፌ̈ን ኢንታ ኣ̈ፊን ማ̇ጋ̈ቤ፤ ኢንታ ባንታ̇ ሜናብ ዎባ̇ጋ̈ቤ” ጌይኔ።

¹¹ዪዚ ቴ ዪንታ̇ ማ̈ቃ̇ር ኦይጫ̇ስቶ፤ ኣይሁዳን ማ̈ቂ̇ ዲንዳምፔ̈ን ባዮ̇ ኬዲ ኬዲ̇ና? ጊዳካ̇ዬ! ኣይሁዳን ኢ̈ሲ̇ኖ ጎይባራ ኣይሁድ ባዮ̇ ኣሳን ፋቲ ዲጚዴ፤ ዪና̇ ማ̈ቂ̇ኖንዳ ኣይሁዳን ኣይሁድ ባዮን ጋልዳ ቃና̇ኦ ጋ̈ር ዎቲኔ።

¹²ኣይሁዳን ኢሲ̇ኖንዳ ኣላሚን ጋልዳ ዎይሊን ኣንጃ̇ ቤይሲኔ፤ ኢንታ ኬዲንዳ ኣይሁድ ባዮ̇ ኣሳንቦ ኣንጃ̇ ማ̈ቂ̇ኔ፤ ዪዶኮ ፋጻንዳብ ዎን ዎይ ፋጼጌይን ዎዛርፌ̈ን ዎይሊን ኣንጃ̇ ማ̈ቂ̇̈ርዶ̈ኔ!

¹³ዪዚ ዓት̇ ታ̈ኒ ኣይሁድ ባዮ̇ ኣሳን ዪንታ̇̇ብ ሶ̈ላሬ፤ ታ̈ኒ ኣይሁድ ባዮ̇ ኣሳንቦ ሃዋ̈ራ ማ̈ቂ̇ኖንኮታ̇ቦ ታ̈ኒ ጾ̈ሳ̇̇̈ብ ኦ̈ዝ ኦ̈ሲን ታ̈ና ኦቲርሳ̈ሬ፤

¹⁴ዪና̇ ቴ ዎቲንዳ ቴ ዜርን ኣይሁዳን ቃና̇ኢሳንዳቦ። ዪዚ ዪኒ̇ባራ ኢንታ̇ ጋርታ̇ፖ ፔታ̇ን ፔታ̇ናን ፋንዳብ ዳንዳኣስታ ጋ̈ራ ዎቲኔ።

¹⁵ጾ̈ሲ̇ ኢንታ ኣሺ̇ኖ ኬል̇ባራ ሜላ ኣላማ ጋ̈ልዶ ዎርዣ̈ዲ ጾ̈ሳ̇̇̈ባር ኢጊንቴጌይን ኢንታ ፌ̈ክ ሺ̈ሺ̇ኖ ኬል̇ባራ ኣብዝ ማ̈ቂዛ ዪንታ̇ክ ማይጺ̈ራ? ዪ̈ዲ ዓይቃ ጋርታ̇ፖ ዲንዲዛ̈ዲፌ̈ኔ።

¹⁶ፔቲ̇ ኦት ጋርታ̇ ሙኑቂ̇ኖ ሙኒቂን ጋርታ̇ፖ ኡ̈ካ̇ሪ ጾ̈ሳ̇̈̇ቦ ዣርሻ ሺ̈ሼጌይን ኣቲ̇ኖ ሙኒቂን ዎይ ጾ̈ሳ̇̇̈ባዝ ማ̈ቃ̇̈ሬ። ፔቲ̇ ሚንዳ ኢዝ ጻጲን ጌ̈ሽ ማ̈ቄጌይን ኢዝ ሻቃንር ጌ̈ሼ̇።

¹⁷ኣሲ ጋርሲን ጎሽኪ̇ን ዲጪ̇ኖ ዎይራ ሚ̈ን ሻቃ ማ̈ቂኖ ኣይሁዳን ቃጺ̈ንታ̇ር ኬዴ̇ጌይን ዪንቲ̈ ባራሃ ጋርታ̇ ዲጪ̇ኖ ዎይራ ሚ̈ን ሻቃፌ̈ኖን ዪንቲ̇ ኣይሁድ ዜር ባዮ̇ን ኢንታ̇ ቤሲ̇ን ጌላሪ ኢንታ̈ኮ ኣንጃ̈ ኤኪ̇ዝ ኣስ ማ̈ቄ̇ጌይን፤

¹⁸ሻቃ̈ፌን ቃጺንታ̇ር ኬዲ̇ኖን ጋልዳ ኦቲርቃፒ̇ቴ፤ ዪንቲ ሻቃ ማ̈ቂ̇ኖኮታ̈ቦ ሚ ጻጳ ዪንታ̇ ቶ̈ኪ̇ንዶኬ ዪንቲ ሚ ጻጳ ቶ̈ካካ̇ዬ፤ ዪንቲ̇ ኦቲርቂ̇ዝ ባዝ ማ̈ቄ̇ጌይን ዪኖ̇ ቆፒ̇ብቴ።

¹⁹ዪዚ ዪንቲ “ሻቃን ቃጺንታ̇ር ኬዲኖ̈ዲ ቴ ኢንታ̇ ቤሲ̇ን ጌላምፔ̈ኔ” ጋ̈ሪ ቆፓ̇ንዳብ ዳንዳኢ̈ሬ።

²⁰ዪንቲ̇ ጋ̈ዚንዳ ኪን፤ ዎቲናካሬ ኢንቲ̇ ኣማ̇ናካዮንኮታ̇ቦ ቃ̈ጺንታ̇ር ኬዲ̇ኔ፤ ማ ዪንቲ̇ ኣማ̇ኒኖንኮታ̇ቦ ሚ̈ጛር ኤቂ̇ኔ፤ ዪዚ ዪንቲ̇ ኢ̈ጫ̇ንዳ̇ብ ኮሺ̇̈ርዶኬ ኦቲርቃ̇ንዳብ ኮሺ̇̈ባ̈ሴ።

²¹ጾ̈ሲ̈ ቲ̈ናፖ̇ ሚን ጋልዳ ዎ ሻቃን ኣይሁዳንቦ ሚጪንታካ̇ይ ኣቴ̇ጌይን ዪንታ̇ባር ሚጪንቲ̇ባ̈ሴ።

²²ዪዚ ዪንቲ̇ ጾ̈ሳ̇̇ ኣሽኪቲንዲኬ ኢ ኢ̈ቺዛ ማ̈ቂ̇ኖን ቤቂ̇ብቴ፤ ኢ ኢ̈ቺዝ ጾ̈ስ ማ̈ቂ̇ኖን ቤይሳዚንዳ ኬዲ̇ኖን ጋልዳ፤ ፌ ኣሽኪቲን ቤይሳዚንዳ ዪንታ̇̇ቦ፤ ዪኖ̇ ኢ ዎታ̈ዚንዳ ኢያ ኣማ̇ናሪ ሚ̈ጛር ዶኤጌይንዶ፤ ዪንቲ̈ ኢ ኣሽኪቲን ጊዳ̇ ሚጛር ዶኣካ̈ይ ኣቴ̇ጌይን ዪንታ̇ር ቃጺንታ̇ር ኬዲ̇̈ሬ።

²³ጾ̈ሲ̇ ኢንታ ቤሲ̇ን ሚኖን ጋልዳ ኢንታ̇ ማሃንዳብ ዳንዳኢዛኮታ̇ቦ ኣይሁዳን ኣማ̇ኒባ̈ዳ ጋ̈ዚን ኣሺኖኮ ፌ ቤሲ̇ን ሚኖን ጋልዳ ማ̈ቂ̈̇ሬ።

²⁴ዪንቲ ሚን ኮቺንቲ̈ርዶ̈ሪ ባራሃ ጋርቶ ዎይራ ሚ ሻቃ̈ፌኖንዶሪ ኣሲ ጎሽኪ̇ን ዲጪ̇ኖ ዎይራ ሚን ጋልዳ ፉርታ̇ንዳብ ዳንዳኤጌይን ዓን ዎዳ ኢና ጎሽኪንቲ̇ ዎ ዎይራ ሻቃ̈ፌኖን ዎዶ̈ ፌ ቤሲ̇ን ጋልዳ ማ̈ቃ̇ር ፉርታ̇ንዳብ ዎዛርታር ዳንዳኢባ̈ሳ?

²⁵ቴ ኢሺንታ̇ን! “ኑ ኤራን” ጋ̈ሪ ኦቲርቃ̇ካ̇ይፌ̈ኒ ፔቲ̇ ባዝ ቴ ዪንታ̇ብ ሶ̈ላንዳብ ኮያ̈ሬ፤ ኢስሬ̈ላን ቡ̈ዳ ዛቢስ ማ̈ቂ̇ኖንዳ ኣይሁድ ባዮ̇ን ዎይ ኣታካይዶር ጾ̈ሳ̇̇̈ኮ ዬይዝ ዲራስዶኬ ሜናብ ጊዳካ̇ዮንዶ ዪኖ̇ ኤሪብቴ።

²⁶ዪዚ ዪኒ̇ፌ̈ኒ ኢስሬ̈ላን ዎይ ፋጺሬ። ዪ̈ዳሬ፦ “ፋዛዲ ጺዮ̈ናፖ ዬይሬ፤ ዓይቆ̈ባ ዜርን ፌ ኢ̈ታ ኦ̈ሲን ኣሻ̇ሪ ኢ̈ክ ማ̈ቃምፔ̈ን ዎቲ̈ሬ፤

²⁷ቴ ኢንታ ናጋሪን ቁቻ̈ ይሲዝ ኬል̇ባራ፤ ቴ ኢንታባር ጌላዝ ጫ̈ቃ ቃ̈ሊን ዓኖ̇” ጋ̈ሪ ጻ̈ፊንቲ̇ኔ።

²⁸ኢስሬ̈ላን ዎጛላ ቃ̈ሊን ኣማ̇ና̇ካዮን ጎይባራ ዪንቲ̇ ኣይሁድ ባዮ̇ ኣሳን ጊሽ̇ ኢንቲ̇ ጾ̈ሳ̇̈̇ቦ ጻላ̈ታ ማ̈ቂ̇ኔ፤ ዎቲናካሬ ጾ̈ሳ̇̇ ኣስ ማ̈ራጺዛ ጎይባራ ማ̈ቄጌይንዶ ሚ̈ኖ ባ̈ቢንታ ጊሻ̈ቦ ጾ̈ሲ̇ ኢንታ̇ ዶሲኖ ኣሴ።

²⁹ጾ̈ሲ̈ ፌ ካንን ኢሚ̇ኖፖ̇ ዓኒኬ ዶሳር ማ̈ራጺ̈ኖፖ ዓኒ “ቴ ዓኖ̇ ኣባቦ ዎቴ” ጌዪባ̈ሴ።

³⁰ዪንቲ̇ ዓኒ̇ፖ ቲ̈ን ጾ̈ሳ̇̈ቦ ኪ̈ቲንቲ̇ባ̈ሶንዶሪ ዓት ዎቲናካሬ ኣይሁዳን ኪ̈ቲንታ̇ካዮኮታ̈ቦ ጾ̈ሳ̇̈ ማ̈ሪቲ̇ ዪንቲ̇ ዲጚዴ።

³¹ዪንቲ ማ̈ሪቲ ዲጚኖንዲፌ̈ኒ ኢንታ̇ሬ ማ̈ሪቲ ዲጛምፔ̈ኒ ኢንቲ ዓት ጾ̈ሳ̇̈̇ቦ ኪ̈ቲንቲባሶ ኣስ ማ̈ቂ̇ኔ።

³²ጾ̈ሳ̇̈̇ ፌ ማ̈ሪቲ ኣስ ዎይ̈ቦ ቤይሳንዳ̇ቦ ጋ̈ሪ ኣሲ ዎይ ፌ ዉጫባር ቃ̈ቺንቲ̇ኖ ማ̈ቃ̇ምፔ̈ን ዎቲዴ።

³³ጾ̈ሳ̇̈̇ ዱሪቲንዳ፣ ኢ ኤጪቲንዲኬ ኢ ኤሪቲንዳ ዎዛርፌ̈ን ጴቻ̇! ኢ ፊርዳ̈ዲ ኣሳ ኤራፖ ሺ፤ ኢ ኦ̈ዚንዶ ኣባቦ ኦ̈ርኮ ኦ̈ናካር ኤሪዝ ኣሲ ባዬ̇።

³⁴“ጎዳ̈ ቆፊን ኤሪዛ ኦ̈ኖ? ኢያ ዞራንዳ ዳንዳኢዛ ኦ̈ኖ?

³⁵ጾ̈ሳ̇̈ቦ ታ̈ልቂዛ፤ ማ ፌ ታልቂ̇ኖን ማሂ ኤኪ̇ዛ ኦ̈ኖ?”

³⁶ዎይ ባዝ ኮቺ̇ኖ̈ዲ ኢያ፤ ማ ዎይ ባዚ ዶኢዛ̈ዲ ኢባርኬ ኢ̈ ቦንቻ̇ብኬ ዶኢ̈ሬ። ሜናብ ቦንቺ̇ ኢ̈ብ ማ̈ቆ̇! ኣሚንኤ!